Levis Kevcai 23
23
Ua Kevcai Rawsli Caijnyoog
1Tus TSWV hais rau Mauxes 2kom qhia rau cov Yixalayees paub txog tej kevcai ntawm rooj noj rooj haus uas tus TSWV teem tseg, thaum lawv muaj kev sibtxoos uake pehawm Vajtswv. 3“Nej muaj rau hnub los ua nej tej haujlwm, tiamsis ncontsoov tias hnub thib xya, uas yog hnub Xanpataus, yog hnub so. Hnub ntawd nej tsis txhob ua ib yam haujlwm dabtsi li, tiamsis nej yuavtsum tuaj sibsau pehawm Vajtswv. Txawm nej yuav nyob qhovtwg los xij, hnub Xanpataus yog tus TSWV hnub. #Khiav 20:8-10; 23:12; 31:15; 34:21; 35:2; 2Kev 5:12-14 4Nov yog tej rooj noj rooj haus dawbhuv uas tus TSWV teem tseg.”
Kevcai Hla Dhau Thiab Noj Ncuav Tsis Xyaw Keeb
(Teev Npe 28:16-25)
5“Kevcai Hla Dhau, uas yog ua los qhuas tus TSWV, yog pib rau lub ib hlis ntuj, hnub kaum-plaub, thaum lub hnub tabtom yuav poobqho. #Khiav 12:1-13; 2Kev 16:1-2 6Hnub thib kaum-tsib yog hnub uas pib ua Kevcai noj Ncuav Tsis Xyaw Keeb; xya hnub ntawd, nej yuavtsum tsis txhob noj tej ncuav uas xyaw keeb hlo li. 7Thawj-thawj hnub ntawd nej yuavtsum tuaj sibsau pehawm Vajtswv thiab tsis txhob ua ib yam haujlwm uas nej niajhnub ua hlo li. 8Coj nej tej khoom noj mus hlawv fij rau tus TSWV kom txwm xya hnub ntawd. Hnub thib xya nej yuavtsum rov tuaj sibsau pehawm Vajtswv thiab tsis txhob ua ib yam haujlwm uas nej niajhnub ua hlo li.” #Khiav 12:14-20; 23:15; 24:18; Khiav 16:3-8
9-10Tus TSWV hais rau Mauxes kom hais rau cov Yixalayees tias, “Thaum nej mus rau hauv lub tebchaws uas Kuv yuav muab rau nej nyob, thiab thaum nej sau tau nej tej qoobloo, nej ciali coj thawj tes nplej mus rau tus povthawj hlob. 11Nws yuav muab tes nplej ntawd yom fij rau tus TSWV, kom tus TSWV thiajli txaussiab txais yuav los ntawm nej. Hnub tomqab uas dhau hnub Xanpataus lawm, tus povthawj hlob mamli coj mus fij rau tus TSWV. 12Hnub uas nej fij nej tej qoobloo, nej yuavtsum coj ib tug thav yaj hnubnyoog ib xyoos uas tsis muaj ib qho phem li mus tua hlawv fij rau tus TSWV thiab. 13Nej yuavtsum muab 2 kilus hmoov nplej zuaj xyaw roj txivntoo coj mus hlawv fij. Tej pa khoom noj uas muab fij ntawd yuav tswqab ntxiag ua rau tus TSWV txaussiab heev. Nej yuavtsum muab ib lamhwj cawv txivhmab uas yog 1 liv coj mus fij thiab. 14Nej tsis txhob rawm noj tej qoobloo tshiab uas nej muab tau los, tsis hais noj nyoos, muab kib noj, lossis muab cub ua ncuav noj mus txog hnub uas nej coj thawj tes nplej mus fij rau Vajtswv tso. Nej cajces yuavtsum coj rawsli txoj kevcai no ib tiam rau ib tiam mus li.”
Ua Kevcai Sau Qoobloo
(Teev Npe 28:26-31)
15“Ciali suav kom txwm nkaus xya lub limtiam, pib hnub tomqab hnub Xanpataus uas nej coj nej thawj tes nplej tuaj fij rau tus TSWV. #Khiav 23:16; 34:22; 2Kev 16:9-12 16Hnub thib tsibcaug, uas yog hnub tomqab lub Xanpataus thib xya, nej yuavtsum coj nej tej qoob tshiab tuaj fij rau tus TSWV. 17Ib yig twg yuavtsum nqa ob lub ncuav mus yom fij rau tus TSWV. Ib lub ncuav twg yuavtsum yog muab 2 kilus hmoov nplej zuaj cub xyaw keeb thiab coj mus fij rau tus TSWV thaum nej pib sau thawj phaum qoob. 18Cov pejxeem sawvdaws yuavtsum coj xya tus thav yaj uas hnubnyoog ib xyoos, ib tug txiv nyuj, thiab ob tug laug tshis, uas tsis muaj ib qho phem li mus fij nrog cov ncuav ntawd. Lawv yuavtsum muab cov tsiaj ntawd hlawv fij rau tus TSWV, nrog cov ncuav thiab cov cawv txivhmab uake. Tej pa khoom fij ntawd yuav tswqab ntxiag ua rau tus TSWV txaussiab heev. 19Thiab muab ib tug laug tshis coj mus fij daws txim, thiab ob tug thav yaj uas hnubnyoog ib xyoos mus fij ua kev sib raugzoo. 20Tus povthawj hlob yuavtsum muab cov ncuav nrog ob tug thav yaj uas yog muab ua cov povthawj hlob tug coj mus yom fij uake rau tus TSWV. Cov khoom fij no yog ib co uas dawbhuv. 21Hnub ntawd nej tsis txhob mus ua ib yam haujlwm uas nej niajhnub ua li, tiamsis nej yuavtsum tuaj sibsau pehawm Vajtswv. Nej cajces, txawm yuav nyob qhovtwg los xij, yuavtsum coj txoj kevcai no ib tiam rau ib tiam mus li.
22“Thaum nej hlais nej tej nplej hauv nej tej teb, nej tsis txhob hlais cov nplej uas nyob tom ntug teb, thiab tsis txhob rovqab mus xawb tej hnab nplej uas seem; tseg tej ntawd rau cov neeg txomnyem thiab cov neeg txawv tebchaws. Tus TSWV yog nej tus Vajtswv.” #Levi 19:9-10; 2Kev 24:19-22
Ua Kevcai Xyoo Tshiab
(Teev Npe 29:1-6)
23-24“Lub xya hli ntuj hnub xiab ib, nej yuavtsum siv hnub ntawd ua hnub so thiab ciali sibsau tuaj pehawm Vajtswv thaum nej hnov suab rajxyu nrov. 25Coj tej khoom noj tuaj hlawv fij rau tus TSWV thiab tsis txhob mus ua ib yam haujlwm uas nej niajhnub ua li.”
Hnub Ua Kevcai Theej Txhoj
(Teev Npe 29:7-11)
26-27“Lub xya hli ntuj hnub xiab kaum, yog Hnub ua Kevcai Theej Txhoj rau cov pejxeem sawvdaws. Hnub ntawd nej yuavtsum yoo mov thiab tuaj sibsau pehawm Vajtswv thiab coj tej khoom noj tuaj hlawv fij rau tus TSWV. #Levi 16:29-34 28Hnub ntawd nej tsis txhob ua haujlwm, rauqhov hnub ntawd yog Hnub ua Kevcai Theej Txhoj. 29Hnub ntawd yog leejtwg noj ib yam dabtsi, tus ntawd yuav raug muab rho tawm ntawm Vajtswv haivneeg mus. 30Thiab hnub ntawd yog leejtwg tseem ua haujlwm, tus TSWV, yuav muab tus ntawd tua povtseg. 31Txawm yog nej nyob qhovtwg los xij, tagnrho nej cajces yuavtsum coj txoj kevcai no ib tiam rau ib tiam mus li. 32Lub hlis ntawd hnub xiab cuaj, thaum hnub poobqho mus txog hnub xiab kaum, thaum hnub poobqho, nej muab ua hnub so. Hnub ntawd nej tsis txhob noj ib yam dabtsi hlo li.”
Ua Kevcai Nyob Tsev Pheebsuab
(Teev Npe 29:12-40)
33-34“Lub xya hli ntuj hnub kaum-tsib yog hnub ua Kevcai Nyob Tsev Pheebsuab thiab yuav nyob mus kom txwm nkaus xya hnub. #2Kev 16:13-15 35Thawj-thawj hnub ntawd nej yuavtsum tuaj sibsau pehawm Vajtswv thiab tsis txhob ua ib yam haujlwm uas nej niajhnub ua hlo li. 36Nej yuavtsum niajhnub nqa khoom noj tuaj fij rau tus TSWV kom txwm xya hnub ntawd. Hnub thib yim nej yuavtsum rov tuaj sibsau pehawm Vajtswv thiab coj tej khoom noj tuaj hlawv fij rau tus TSWV. Hnub ntawd yog hnub pehawm Vajtswv nkaus xwb, nej tsis txhob ua haujlwm hlo li.
( 37“Tej no yog ua kev tuaj sibsau ua kevcai pehawm qhuas tus TSWV los ntawm kev muab tej khoom noj tuaj fij, hlawv tej khoom fij, fij tej qoobloo, fij tej khoom theej txhoj, thiab fij tej cawv txivhmab, uas yuavtsum tau coj tuaj fij ib hnub dhau ib hnub. 38Tej kevcai no yog ua ntxiv rau cov Hnub Xanpataus. Thiab tej khoom fij no yog ntxiv rau nej tej khoom uas nej ibtxwm coj mus fij, uas yog tej uas nej fij uatsaug rau tej lus cogtseg thiab tej uas nej fij rau tus TSWV ntawm lub siab dawbpaug.)
39“Thaum nej sau nej tej qoobloo tom teb tag lawm, nej yuavtsum ua lub koobtsheej no kom txwm xya hnub, uas yog pib hnub thib kaum-tsib lub xya hli ntuj. Hnub thib ib thiab hnub thib yim yog ob hnub uas nej so. 40Hnub thib ib, nej xaiv nej tej txivntoo uas zoo tshajplaws, nqa tej nplooj toovlaj thiab tej ceg ntoo uas muaj nplooj coj tuaj thiab ciali pib ua kevcai qhuas tus TSWV, uas yog nej tus Vajtswv. 41Txhua lub xyoo thaum lub xya hli ntuj, nej yuavtsum ua lub koobtsheej no rau tus TSWV xya hnub. Nej cajces yuavtsum coj txoj kevcai no ib tiam rau ib tiam mus li. 42Cov Yixalayees txhua tus yuavtsum nyob tsev pheebsuab xya hnub, 43kom nej cajces thiaj yuav paub tias Kuv yog tus uas cia cov Yixalayees nyob hauv tej tsev pheebsuab ntawd thaum Kuv coj lawv tawm hauv tebchaws Iziv los. Kuv yog tus TSWV, uas yog nej tus Vajtswv.”
44Yogli ntawd, Mauxes thiaj muab tej kevcai uas tus TSWV tau teem tseg no qhia rau cov Yixalayees paub.
Currently Selected:
Levis Kevcai 23: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
