Hanpakus 3
3
Hanpakus Tej Lus Thov Vajtswv
1Nov yog tus xibhwb cevlus Hanpakus tej lus thov Vajtswv.#3:1: Phau lus Henplais ntxiv tau ib kab rau, tiamsis paub tsis meej tias lub ntsiablus yog txhais licas tiag.
2Tus TSWV, kuv tau hnov txog tej uas Koj tau ua tag los,
mas ua rau kuv xav tsis thoob li.
Nimno thov Koj rovqab ua
tej haujlwm tseemceeb uas thaum ub Koj twb ua lawm rau peb tiam no pom dua!
Txawm yog thaum Koj npautaws
los thov Koj tabncuab peb thiab.
3Vajtswv yuav tuaj hauv lub tebchaws Edoos tuaj dua;
Vajtswv tus uas dawbhuv tabtom nqis saum tej hauv roob Palas los.
Nws tus tshwjchim ci ntsa-iab plooj nkaus saum nruabntug
ua rau neeg qhuas Nws thoobplaws lub ntiajteb.
4Thaum Nws los, Nws tus tshwjchim ci ntsa-iab cuag nplaimxob;
muaj nplaimxob ci laim lias ntawm Nws txhais tes,
ntawd yog qhov chaw uas Nws zais Nws lub hwjchim.
5Nws tso tej kab mob mus ua Nws ntej
thiab xaaj kom kev tuag lawv Nws qab.
6Thaum Nws nres, lub ntiajteb co uazog koog;
thaum Nws tsa muag saib, txhua haivneeg ntshai tsheehnyo.
Tej roob uas ibtxwm nyob thaum ub los, tawg ntsoog ntxaws;
tej ncov roob uas ibtxwm muaj nyob, ciali saus pes zog mus lawm;
tej ncov roob ntawd yog tej uas thaum ub Nws tau taug los mus.
7Kuv pom cov neeg Kusas ntshai kawg li
thiab cov neeg Midias mas ntshai ua ibce tsheehnyo.
8Tus TSWV, puas yog tej dej ua rau Koj chim?
Puas yog hiavtxwv ua rau Koj npautaws?
Koj caij rawv tej huab;
tauv huab dub yog Koj lub tsheb,
Koj tuaj pab Koj haivneeg kom muajyeej.
9Koj npaj rawv yuav siv Koj rab hneevnti,
npaj rawv yuav tua Koj cov xibxub.#3:9: Nqe no sau hais tias npaj rawv yuav tua Koj cov xibxub; paub tsis meej tias lolus Henplais yog txhais licas tiag.
Koj ua nplaimxob tua lub ntiajteb tawg rhe ua rau dej tawm tuaj.
10Thaum tej roob pom Koj, lawv tshee uazog koog;
dej nchuav laublug saum nruabntug los.
Tej dej uas nyob hauvqab tivtxwv tau tshoom plaws tuaj,
ua rau nphau tej niag nthwv siab kawg li.
11Thaum Koj tej xubvos ya ua duab ci nplas ceev heev tuaj
thiab Koj tej hmuv ya ua duab ci hob tuaj lawm,
ces lub hnub thiab lub hli txawm ciali nres.
12Koj rhais ruam hla lub ntiajteb yam siab tsiv tsawv;
thiab Koj tsuj ntiag txhua haivneeg ua npautaws vog.
13Koj tuaj cawm Koj haivneeg
thiab cawm tus vajntxwv uas Koj tau xaiv tseg lawm.
Koj muab cov neeg phem tus thawj tua povtseg,
thiab muab cov neeg uas tuaj nws tog tua tu noob nrho.#3:13: Nqe no sau hais tias muab cov neeg… tu noob nrho; paub tsis meej tias lolus Henplais yog txhais licas tiag txog qhov no.
14Koj tua tej xubvos tuaj ntsia nkaus nws tus thawj tubrog;
thaum nws pab tubrog tuaj yam nkaus li nthwv cuadaj cuadub ntsawj peb tawg uasab uasua,
ib yam li cov neeg uas soj rawv yuav caijtsuj tej neeg pluag.#3:14: Nqe 14 no paub tsis meej tias lolus Henplais yog txhais licas tiag.
15Koj cov nees txauj dej hiavtxwv,
ces hiavtxwv txawm ntas nphau pes nphwv tuaj.
16Thaum kuv hnov tej xwm no, ua rau kuv tsheehnyo;
kuv daim dincauj tshee mosnyoos vim kuv ntshai heev.
Kuv ibce tuag tag
ua rau kuv ob txhais ceg sibdawm.#3:16: Nqe no sau hais tias kuv ob txhais ceg sibdawm; phau lus Henplais hais tias Kuv zoosiab heev, rauqhov.
Kuv yuav nyob twjywm tos txog thaum lub sijhawm
uas Vajtswv los rautxim rau cov neeg uas tawmtsam peb.
17Txawm yog tej ntoo txiv ncuavpias tsis tawgpaj,
thiab tej txivhmab tsis txitxiv,
txawm yog tej ntoo-roj txiv zeeg tag,
thiab tej liaj-teb qoobloo tsis tuaj;
txawm yog tej yaj tuag tas
thiab tej nkuaj nyug khoob ntshuv cia xwb los,
18kuv tseem muaj kev zoosiab nyob rau hauv tus TSWV,
rauqhov tus TSWV uas yog Vajtswv yog kuv tus Cawmseej.
19Tus TSWV uas kav ibpuas tsavyam pub rau kuv muajzog.
Nws ua rau kuv ob txhais kotaw mus kev nplaum ib yam li kotaw muaslwj,
Nws tso kuv nyob kajsiab lug saum tej roob. #2Xamu 22:34; Nnkauj 18:33
Currently Selected:
Hanpakus 3: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
