Hanpakus 1
1
1Nov yog tus TSWV tej lus uas tau muab hais qhia rau Hanpakus uas yog tus xibhwb cev Vajtswv lus.
Hanpakus Yws Txog Kev Tsis Ncajncees
2Au tus TSWV, kuv yuav thov Koj ntev npaum licas es Koj mam mloog thiab cawm kom peb dim ntawm txoj kev raug luag ua limhiam? 3Vim licas Koj cia kuv pom tej kev phem no? Uacas Koj tseem ntsia taus tej kev txhaum ntawd thiab? Muaj kev puastsuaj thiab kev uanruj uatsiv nyob puagncig kuv, thiab muaj kev sibcav sibceg nyob txhua qhov. 4Txoj kevcai taug heev thiab siv tsis tau lawm, ua rau thiaj tsis muaj kev ncajncees. Cov neeg siabphem tsuas kovyeej cov neeg ncajncees tas mus li xwb, vimli ntawd txoj kev ncajncees thiaj raug muab ntswj ntxeev tas mus li.
Tus TSWV Tej Lus Teb
5Tus TSWV hais rau Nws haivneeg tias, “Nej ciali tsa qhovmuag ntsia txhua haivneeg uas nyob ibncig nej, tej uas nej pom yuav ua rau nej xav tsis thoob. Kuv yuav ua tej yam tshwm rau nej, lub sijhawm thaum nej hnov tej ntawd nej yuav tsis ntseeg. #Teshl 13:41 6Kuv yuav tsa cov neeg Npanpiloos, uas siab ceev thiab siab nrujtsiv, kom lawv muaj hwjchim. Lawv tabtom tawm tuaj mus kom thoob lub ntiajteb thiab yuav txeeb luag lwm lub tebchaws. #2Vaj 24:2 7Lawv tso hemthawj kom sawvdaws txhawj thiab ntshai, lawv khavtheeb, thiab lawv tsuas yuav lawv txojcai nkaus xwb.
8“Lawv tej nees khiav ceev tshaj tsov pomtxwv, thiab nyaum tshaj tej hma uas tshaib plab. Lawv cov tubrog caij nees khiav rag ntws tuaj kev deb tuaj. Lawv khiav taw hau ntsoov thiab ceevnrooj tuaj yam nkaus li tus dav ya rwg ntxiaj los muab qaib.
9“Lawv cov tubrog tuaj txeeb tebchaws kav ua limhiam ntsuav, thiab thaum lawv tuaj yuav txog, lawv ua rau txhua tus ntshai tsheehnyo.#1:9: Nqe no sau hais tias thiab thaum lawv … tsheehnyo; paub tsis meej tias lus Henplais yog txhais licas tiag txog qhov no. cov neeg uas lawv ntes tau mas coob npaum li tej xuabzeb suav tsis txheeb. 10Lawv saib tsis taus cov vajntxwv, thiab luag hnyos tej nomtswv loj plig uatsoj uatsaug. Tsis muaj ib lub yeej ruaj-khov twg uas yuav tivthaiv tau lawv; lawv khawb av los meem kom siab thiab txeeb kom tau tej nroog ntawd. 11Lawv txeeb tau lub nroog twg, ces lawv mus ceevnrooj dhau plaws yam nkaus li nthwv cua ntsawj ibvuag xwb. Cov neeg no lub zog ces yog lawv tus nyuag vajtswv ntag.”
Hanpakus Rov Yws Rau Tus TSWV Mloog
12Tus TSWV, Koj yeej yog Vajtswv puag thaum chivkeeb los lawm. Koj yog kuv tus Vajtswv, tus dawbhuv thiab nyob mus ibtxhis. Tus TSWV yog kuv tus Vajtswv thiab yog tus tsomkwm kuv, Koj tau xaiv cov neeg Npanpiloos thiab pub lawv muaj hwjchim loj, kom lawv thiaj rautxim tau rau peb. 13Tiamsis uacas Koj tseem tiv taus cov neeg phem no thiab? Koj ob lub qhovmuag dawbhuv heev, yeej tiv tsis taus tej kev phem kev qias uas tibneeg ua ntawd li. Tiamsis yog vim licas thaum cov neeg phem tuaj muab cov neeg ncajncees tua povtseg tag lawm, Koj ho nyob ntsiagto tsis quavntsej li?
14Yog licas Koj saib neeg zoo li tej ntses hauv hiavtxwv lossis tej kab tej ntsaum uas tsis muaj tus coj lawv kev li? 15Cov Npanpiloos tuaj ntes neeg thiab muab nqelauj chob lawv yam li lawv yog ntses. Lawv xuas vas khwb cov neeg ntawd txhom cab thiab luag qw uatsoj uatsaug zoosiab rau cov neeg uas lawv ntes tau ntawd. 16Lawv tseem pe lawv tej vas thiab tua tsiaj fij rau tej vas ntawd, rauqhov lawv tej vas ntawd ua rau lawv npluanuj heev!
17Puas yog lawv yuav siv lawv tej ntaj ntawd tag mus li thiab ua kom ntau lub tebchaws raug puastsuaj mus, yeej tsis tabncuab leejtwg li?
Currently Selected:
Hanpakus 1: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
