Khiav Dim 24

Lub Homthawj Nias Rau Vajtswv Cov Lus Cogtseg

1Tus TSWV hais rau Mauxes tias, “Koj ciali tuaj cuag Kuv saum roob no, coj Aloos, Nadas, Anpihus thiab cov Yixalayees cov thawjcoj xyacaum leej nrog koj tuaj; thaum nej tseem nyob deb tsawv, nej ciali pehawm Kuv. 2Tsis pub lwmtus li, tsuas pub koj tibleeg txav tuaj ze Kuv xwb. Txwv tsis txhob pub cov pejxeem nce tuaj rau saum roob no hlo li.”

3Mauxes thiaj coj tus TSWV tej lus thiab tej kevcai los piav qhia rau cov pejxeem, ces tagnrho cov pejxeem ua ibtsaug teb tias, “Peb yuav ua txhua yam rawsli tus TSWV hais.” 4Mauxes sau tus TSWV tej lus xaaj huv tibsi cia. Hnub tomqab thaum sawvntxov, nws mus teeb ib lub thaj rau tim taw roob, thiab muab kaum-ob lub pobzeb los teeb, rawsli cov Yixalayees kaum-ob xeem. 5Ces nws txib cov tub hluas Yixalayees kom mus hlawv tej khoom fij thiab tua nyuj hlawv fij ua kev sib raugzoo rau tus TSWV. 6Mauxes muab cov ntshav nyuj ibnrab tso rau hauv cov phiab thiab muab ibnrab nchos rau saum lub thaj. 7Ces nws muab Phau Ntawv teev lus Cogtseg, uas sau txog tus TSWV tej lus xaaj, los nyeem rau cov pejxeem mloog. Cov pejxeem teb tias, “Peb yuav mloog thiab ua txhua yam rawsli tus TSWV tau xaaj tseg rau peb lawm.”

8Ces Mauxes muab cov ntshav uas nyob hauv cov phiab nchos rau cov pejxeem thiab hais tias, “Nov yog cov ntshav coglus uas tus TSWV muab ua lub cim rau nej rawsli cov lus xaaj no.” #Math 26:28; Malak 14:24; Lukas 22:20; 1Klt 11:25; Henpl 10:29; Henpl 9:19-20

9Mauxes, Aloos, Nadas, Anpihus, thiab cov Yixalayees xyacaum leej thawjcoj thiaj nce mus saum roob 10thiab lawv pom cov Yixalayees tus Vajtswv. Qhov chaw uas Nws tsuj ntawd zooli pua cov hlaws xafais, uas xiav zooli lub ntuj. 11Vajtswv kuj tsis ua licas rau cov Yixalayees cov thawjcoj; lawv pom Vajtswv, thiab lawv txawm nojhaus uake.

Mauxes Nce Mus Saum Roob Xinais

12Tus TSWV hais rau Mauxes tias, “Koj ciali nce tuaj cuag Kuv saum roob thiab nyob ntawd tos, Kuv yuav muab ob daim txiag zeb uas muaj tagnrho Kuv tej kevcai thiab tej lus xaaj uas Kuv tau sau los qhia lawv rau koj.” 13Mauxes thiab Yausuas, uas yog tus pab Mauxes, nkawd txawm sawvkev mus; Mauxes txawm pib nce mus#24:13: Mauxes txawm pib nce mus; Ib phau ntawv qub-qub thaum ub saum hais tias nkawd txawm pib nce mus. rau saum Vajtswv lub roob. 14Mauxes hais rau cov thawjcoj tias, “Nej nyob ntawm lub yeej no tos txog thaum wb rovqab los. Aloos thiab Hawj nkawd nrog nej nyob ntawm no; yog nej leejtwg muaj plaubntug dabtsi los kom mus cuag nkawd.”

15Thaum Mauxes nce mus saum Roob Xinais, txawm muaj huab tsaus nti pos lub roob cia. 16Tus TSWV tus tshwjchim nyob saum lub roob ntawd, thiab pos huab tsaus nti tau rau hnub. Hnub thib xya tus TSWV thiaj hu hauv tauv huab tuaj rau Mauxes. 17Tus TSWV tus tshwjchim ci ntsa-iab zoo ib yam li nplaimtaws cig lamlug saum roob los rau cov Yixalayees pom. 18Mauxes txawm nkag mus rau hauv tauv huab thiab nce mus rau saum roob lawm. Nws mus nyob saum roob tau plaubcaug hnub plaubcaug hmo. #2Kev 9:9

Currently Selected:

Khiav Dim 24: MWW2022

Highlight

Copy