Khiav Dim 14
14
Hla Hiavtxwv Liab
1Ces tus TSWV hais rau Mauxes tias, 2“Koj ciali kom cov Yixalayees rovqab mus tsuam chaw so rau ntawm Pes Hahilaus uas nyob hauv ntu nruabnrab ntawm Minkadaus thiab Hiavtxwv Liab, uas nyob ze Npa-as Xefoos. 3Falaus yuav xav tias cov Yixalayees yuav mus-mus los-los tom tiaj suabpuam vim lawv tau kevtws lawm. 4Kuv yuav ua kom Falaus muaj lub siab tawv, thiab nws yuav caum nej qab tuaj; qhov uas Kuv yeej Falaus thiab nws tej tubrog, yuav ua rau Kuv tau koobmeej. Thaum ntawd cov neeg Iziv yuav paub tias kuv yog tus TSWV.” Cov Yixalayees ua rawsli tus TSWV tej lus uas hais rau lawv lawm.
5Thaum muaj neeg mus qhia rau Falaus hais tias cov Yixalayees khiav tag lawm, nws thiab nws cov nomtswv hloov dua siab thiab hais tias, “Peb ua dabtsi li ntawd? Peb tso cov Yixalayees khiav mus tag lawm, ces peb tsis tau lawv los ua peb qhev li lawm lau!” 6Yogli ntawd, Falaus thiaj txhij tubrog thiab tej tsheb nees caij ntaus rog nrog nws mus caum cov Yixalayees qab.
7Nws kom cov thawj tubrog caij 600 lub tsheb nees ntaus rog uas zoo kawg nkaus, thiab lwmyam tsheb ntaus rog uas cov Iziv muaj, nrog nws mus thiab. 8Tus TSWV ua rau Falaus muaj lub siab tawv, thiab nws txawm mus caum cov Yixalayees uas tabtom taug kev mus nrog txoj kev muajyeej.#14:8: txoj kev muajyeej; lossis tus TSWV txoj kev tivthaiv. 9Tagnrho cov Iziv tej tubrog caij nees thiab tsav tsheb nees tuaj caum cov Yixalayees qab. Lawv tuaj caum cuag cov Yixalayees ntawm ntug Hiavtxwv Liab, qhov chaw uas lawv tsuam chaw so nyob ze rau ntawm Pes Hahilaus thiab Npa-as Xefoos.
10Thaum cov Yixalayees pom Falaus thiab nws cov tubrog caum tuaj yuav cuag, mas lawv ntshai kawg li; lawv thiaj quaj zomzaws thov tus TSWV pab lawv. 11Lawv yws Mauxes hais tias, “Nyob tom tebchaws Iziv tsis muaj chaw log tuag lawm es koj thiaj coj peb los tuag rau hauv tiaj suabpuam no puas yog? Uacas koj tseem coj peb tawm hauv tebchaws Iziv los ua dabtsi thiab? 12Peb twb hais rau koj thaum tseem nyob tom tebchaws Iziv lawm hais tias, cia peb nyob twjywm, peb yeej zoosiab ua cov Iziv qhev no ne! Peb ua cov Iziv qhev tseem zoo dua peb los tuag rau hauv tiaj suabpuam no.”
13Mauxes teb lawv hais tias, “Tsis txhob ntshai! Yuavtsum sawv khovkho, nej thiaj yuav pom tias hnubno tus TSWV yuav cawm nej licas; nej yuav tsis pom cov neeg Iziv no ib zaug ntxiv li lawm. 14Tus TSWV yuav tawmtsam pub rau nej, yogli ntawd, nej ciali nyob twjywm xwb.”
15Tus TSWV hais rau Mauxes tias, “Vim licas nej ho quaj thov Kuv pab? Hais kom cov neeg Yixalayees ciali txav mus lawm tom hauvntej. 16Muab koj tus pas nrig tsa rau saum nplaimdej hiavtxwv. Dej yuav faib rau ob sab, kom cov Yixalayees thiaj yuav tau taug kev qhuav qhawv hla mus lawm sab tim ub. 17Kuv yuav ua rau cov Iziv muaj lub siab tawv heev, kom lawv caum nej qab. Kuv yuav tau koobmeej los ntawm qhov uas Kuv kovyeej Falaus, kovyeej nws cov tubrog, nws tej tsheb nees, thiab nws cov tubrog tsav tsheb nees. 18Thaum Kuv kovyeej lawv lawm, cov neeg Iziv yuav paub tias Kuv yog tus TSWV.”
19Vajtswv tus timtswv uas mus ua cov tubrog Yixalayees ntej, txawm txav tuaj tomqab lawm. Tus ncej huab txawm txav pem hauvntej los nres rau tom lawv qab, 20uas yog nyob nruabnrab ntawm cov tubrog Iziv thiab cov tubrog Yixalayees. Tus ncej huab ntawd ua rau cov neeg Iziv sab tsausntuj nti, tiamsis ua rau cov Yixalayees sab pomkev kajnrig;#14:20: Nqe no sau hais tias Tus ncej huab … kajnrig; paub tsis meej tias lolus Henplais yog txhais licas tiag txog qhov no. yogli ntawd, thiaj ua rau ob tog txav tsis tau los sibze ib hmos nkaus.
21Mauxes tsa tes rau saum tus dej hiavtxwv, ces tus TSWV txawm tso cua tuaj sab hnubtuaj tuaj ntsawj hiavtxwv ib hmos kajntug ua rau dej hiavtxwv faib hlo rau ob sab ua kev qhuav qhawv; 22cov Yixalayees thiaj tau taug kev qhuav qhawv hauv hiavtxwv mus rau sab tim ub, ntawm ob sab phabntsa ces yog dej xwb. #1Klt 10:2; Henpl 11:29
23Cov Iziv, uas yog tagnrho Falaus tej nees, tej tsheb nees, thiab cov neeg tsav tsheb nees, txawm caum cov Yixalayees qab tuaj rau hauv hiavtxwv. 24Thaum kajntug txoog tus TSWV nyob hauv tus ncej hluavtaws thiab hauv tus ncej huab ntsia tuaj rau cov tubrog Iziv ua rau lawv ceeb thiab ntshai kawg nkaus. 25Nws ua rau lawv tej log tsheb nees ciali ntais thiab ntog tsis taus li lawm. Lawv sibtham zomzaws hais tias, “Peb ciali khiav rovqab tsis txhob caum cov Yixalayees lawm! Rauqhov tus TSWV tuaj lawv tog tawmtsam peb lawm.”
26Ces tus TSWV hais rau Mauxes tias, “Ciali tsa koj txhais tes rau saum dej hiavtxwv, kom dej nphau los npog cov Iziv, npog lawv tej tsheb thiab cov neeg tsav tsheb huv tibsi.” 27Mauxes txawm tsa tes rau saum dej hiavtxwv, ces thaum kajntug uaciav dej rov ntom nkaus li qub. Cov Iziv khiav tas zog kom dim, tiamsis tus TSWV muab lawv pov rau hauv hiavtxwv. 28Dej nphau los npog tej tsheb nees, cov neeg tsav tsheb nees, thiab cov tubrog Iziv uas tabtom tuaj caum cov Yixalayees txog hauv plawv hiavtxwv tuag tag tsis seem ib tug li. 29Tiamsis cov Yixalayees taug kev qhuav qhawv hauv hiavtxwv mus rau sab tim ub, ntawm ob sab ntsa ces yog dej xwb.
30Hnub ntawd tus TSWV tau cawm cov Yixalayees dim ntawm cov Iziv txhais tes; cov Yixalayees pom cov Iziv tuag pawglug raws ntug hiavtxwv. 31Thaum cov Yixalayees pom tus TSWV lub hwjchim loj uas Nws kovyeej cov Iziv, lawv thiaj ntshai thiab hwm tus TSWV, lawv ntseeg tus TSWV thiab Mauxes tus uas yog tus TSWV tus tubtxib.
Currently Selected:
Khiav Dim 14: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
