YouVersion Logo
Search Icon

Saan 2

2
'Blɩ a pʋpa a lɛ'mimle nɩ 'lɩ Kanadɩɔ 'kwli
1‑Nyrɔwɩ nɩ 'hʋɛn bʋ ‑hi, ‑ɛ ‑bɩ 'blɩ a pʋpa a lɛ'mimle, nɔ‑ mii 'lu ‑mɔ, 'kɩ 'lɩ Galileblʋgba 'kwli. 'Kɩ ʋ daa 'lɩ ‑Yusu a 'dii, 2'ʋ da ‑Yusu ‑wɛ, 'kɩ 'lɩ 'blɩpaalɛ a 'mʋ kɩ. 3Ti nɩ ‑do a ti 'yri, nɔ, ʋ 'nɛ wɛn, ɛ ‑wɛ nɩ. ‑Ɛ ‑bɩ kɛ‑ ‑Yusu a 'dii pɩ꞊ɩ yɩ: «Nɔ a pɛpɛ ‑wɛ nɩ.» 4Ɛ nɔ‑ mɔ ‑Yusu bʋ ‑hɩhɩa꞊a klɛ, ‑ɛ mɔ: «'Na 'dii o, ‑ha 'mʋ mɛ lɛ, ɛ 'yɩ ‑mɔ 'pa‑, ꞊nɩ ‑lee꞊e 'mʋ nɩ, ‑kʋan 'n kɔ ꞊bʋ nu. Ti ‑mʋ' ‑kɔ 'yri 'n di 'ʋ ꞊wlɩlɛkɛɛdɛ ‑nuu ‑nɩ, ti a 'mʋ, ɛ 'yɛɛ 'ʋ 'ʋ nɩ nyre.» 5Bʋ pʋ 'kɩ lɛ, ‑ɛ ‑bɩ kɛ‑ 'a 'dii pɩ nyibli ‑mʋ', ‑ʋ ꞊glɛ ‑tɛblɩ yɩ, ɛ wɛn: «‑Tɩ a pɛpɛ ‑bʋ, ɛ di 'a mʋ ‑lee ‑nɩ, nɔ‑ ba nu.»
6Kɛɛ, 'kɩ yɩ gbagbɩ nɩ ꞊hlon‑do, ʋ nu 'hɩ, ʋ ‑nu, ‑ɛ kɔ 'kwli ʋ pɩ 'lɩ 'nie lɛ nɩ 'ʋ, 'kɩ 'ʋ bʋɩ a lɛyɩyra a ‑ta', ꞊wɩ yɩ, ‑tɛ ‑Juukʋɛ* a tete ni 'a ‑hʋhʋa. Yɩ a 'mʋ, 'a 'yɛ nɩ ‑do gbɛ 'litayrɩɩ a ꞊wlɩ nɩ ꞊hun. 7Kɛ‑ ‑Yusu pɩ ‑tɛblɩ꞊glanyʋ a 'mʋ yɩ, ɛ wɛn: «Ba nu 'nie, ba 'yii 'lɩ ꞊nʋ lɛ,» 'ʋ 'yii 'lɩ꞊ɩ lɛ ‑tɛɛ. 8‑Ɛ ‑bɩ ɛ wɛn: «Ba 'pi 'kɩ 'a dɛ gbe, ba gba꞊a ‑tɛblɩ꞊glanyʋ a nyiblo gbagbʋ yɩ,» 'ʋ gba 'lɩ꞊ɩ, 'ɛ ꞊tɛ꞊ɛ wlɔn. 9Bʋ ꞊tɛ 'kɩ꞊ɩ wlɔn, ‑ɛ ‑bɩ ɛ ‑hɛ nɔ. ‑Bɩ' nɔ a 'mʋ, bʋ di yɩ ‑hɔɔn ‑nɩ, ɛ 'yɩ 'ʋ ‑yi. Kɛɛ, ‑tɛblɩ꞊glanyʋ a 'mʋ, ʋ nʋ‑ yi꞊e. Ɛ nɔ‑ mɔ nyiblo gbagbʋ a 'mʋ, bʋ da 'blɩpanyɔ, 10ɛ wɛn: «'A ‑nɛ nyiblo 'bʋ da lɛ'mimle, ꞊haannɔ, ɛ nɔ‑ ʋ yɩ 'hru 'nyɛɛ ‑nɩ, ʋ pɩ. Nyibli 'bʋ 'na 'kɩ꞊ɩ ‑tɛɛ, 'tɩ‑ nɔ ‑mʋ', ‑ɛ 'yɩ ꞊haannɔ 'pa‑, 'ʋ pɩ꞊ɩ ‑wɛ. Kɛɛ, ‑mɔ ‑bɩ, kʋɛ wɛn 'lɩ bʋ, ꞊haannɔ, nɔ‑ ꞊tu bʋ.»
11Kɛ‑ ‑Yusu nu 'a yɩ‑hɛ꞊wlɩlɛkɛɛdɛ a nunuo, 'kɩ 'lɩ Galileblʋgba a 'dɩɔ ‑mʋ', ‑ɛ mɔ Kana 'kwli. Kɛ‑ ɛ ‑nu, 'ɛ tɔɔ nɛ 'a ‑nagbopʋ* 'klɩ ‑mʋ', Nyɩsʋa ‑nyi꞊e. Dɛ a 'mʋ, ɛ nɔ‑ nu꞊o, 'ʋ kuo ꞊nɛ ꞊wlʋ yɩ. 12‑Tɛ dɛ a 'mʋ, ɛ ‑hi, ‑ɛ ‑bɩ 'kɩ ɛ mu 'lɩ Kapɛnaɔdɩɔ 'kwli, ɛ kɔ 'a 'dii, kɔ 'a 'dɩayɩnʋ, kɔ 'a ‑nagbopʋ 'hʋɛn‑, ‑ɛ di꞊e nu, ʋ 'mʋ 'lɩ ‑nyrɔwɩ gbi 'lɩ ‑hi.
‑Tɛ ‑Yusu bla la ‑tɛblɩplonyibli lɛ, 'kɩ 'lɩ Nyɩsʋa a 'kagbaʋ a ‑yaa 'kwli
(Matie 21.12-13; Makɩ 11.15-17; Luku 19.45-46)
13‑Tɛ dɛ a 'mʋ, ɛ ‑hi, ‑ɛ ‑bɩ ‑Juukʋɛ* a lɛ'mimle gbagbʋ ‑mʋ', ʋ dɛɛ Pakɩ, ɛ 'mʋɛ yrɛ. Ɛ nɔ‑ nu꞊o, ‑Yusu kɔ 'a ‑nagbopʋ* 'hʋɛn‑, 'ʋ mu 'lɩ Jrusrɛdɩɔ 'kwli. 14‑Tɛ ʋ nyre 'lɩ Nyɩsʋa a 'kagbaʋ a ‑yaa 'kwli, 'kɩ ʋ yɛɛ 'lɩ puplonyibli bʋ, ‑ʋ ple blo, kɔ blablɩ, kɔ ‑hungbo 'hʋɛn‑, ‑ɛ di꞊e nu, ‑tonyibli 'mʋ꞊ʋ ‑tɔ, ʋ 'mʋ꞊ʋ nu, ʋ 'mʋ ‑cɔhlʋn* pi. 'Kɩ 'ʋ ‑tɩtɛ nɩ ‑do a 'mʋ, 'kɩ ʋ yɛɛ 'ʋ 'wli'cɩcɩnyibli bʋ ‑wɛ, 'ʋ nɩ 'lɩ 'waa 'teble ye' blɛ, 'ʋ yɩ hɩapʋwli 'cɩcɩ ‑nɩ. 15‑Tɛ ‑Yusu 'ye ꞊nʋ, ɛ nɔ‑ mɔ, bʋ nu lɔkɔ, bʋ bla ꞊nʋ lɛ pɛpɛ, 'ʋ ‑hɔn 'lɩ Nyɩsʋa a 'kagbaʋ a ‑yaa a 'mʋ 'kwli, ʋ kɔ 'waa 'wlugba‑tɛblɩ a 'mʋ 'hʋɛn‑, 'tɩ‑ 'ɛ 'wla 'wli'cɩcɩnyʋ a 'wli bʋ, 'kɩ 'ʋ ‑tʋtʋ kɩ, 'ɛ ꞊jri 'waa 'teble yɩ blɛ. 16‑Ɛ ‑bɩ kɛ‑ ɛ pɩ, 'ɛ yɩ ‑hungboplonyʋ ‑mʋ' ‑lee ‑nɩ, ɛ wɛn: «Ba ‑ha 'nɛ‑ ‑tɛblɩ ‑bʋ! A 'nɩ 'nuo 'lɩ 'na 'Baɩ Nyɩsʋa a 'kayu puplokayu ‑mɔ!» 17‑Yusu a ‑nagbopʋ ‑mʋ', ‑ʋ nɩ 'ʋ, ‑tɩ ‑mʋ', ʋ 'crɩɩ la 'lɩ Nyɩsʋacrɩɛn 'kwli, ɛ bi 'lɩ ꞊nʋ 'kwli. ‑Tɩ a 'mʋ, ɛ nɔ‑ ‑bʋ: «Nyɩsʋa o, 'n nʋɛ ‑na 'kayu nɩ dɩakɩ. ‑Tɛ 'n nu 'a nʋɛlɛ, ɛ 'wɩ‑ na yɩ, ‑ɛ yɩ wlɩn, 'kɩ 'lɩ 'na 'hʋɩ 'kwli, ‑ɛ yɩ 'mʋ lɛ hien.»
18Ɛ nɔ‑ mɔ, ‑Juukʋɛ a nyibli gbagbɩ ‑mʋ', ‑ʋ nɩ ‑tuo kɩ, bʋ 'bɛti꞊e, ʋ wɛn: «Nyiblo a 'dɩ ‑bɩ ‑mɔ, ꞊nɩ blɛ ꞊nʋ lɛ 'lɩ? Nu ꞊wlɩlɛkɛɛdɛ, ‑ɛ di ‑a mɔ꞊ɔ ‑tɔɔ ‑nɩ, ‑ɛ mɔ, 'klɩ ‑mʋ', ‑ɛ kɔ 'kwli ‑blɛɛ 'lɩ ꞊nʋ lɛ, 'kɩ ɛ kʋɛ 'lɩ Nyɩsʋa ‑mɔ bʋ.» 19‑Ɛ ‑bɩ ‑Yusu ꞊tu ꞊nʋ ꞊wɔn, ɛ wɛn: «Dɛ 'n di nu, ɛ nɔ‑ ‑bʋ: Ba 'wla Nyɩsʋa a 'kagbaʋ ‑bʋ, 'n di 'du꞊o ye' de, 'kɩ 'lɩ ‑nyrɔwɩ nɩ ta 'kwli.» 20‑Ɛ ‑bɩ ʋ wɛn: «꞊Bɩ 'kayu ‑bʋ, ʋ ‑pʋ, 'kɩ 'lɩ 'yrɩ a (46) ‑wlɩ nɩ 'hʋɛn ꞊tu 'ʋ ꞊hlon‑do 'kwli, ɛ nɔ‑ ‑pɩ lɛ, ‑di ye' 'du, 'kɩ 'lɩ ‑nyrɔwɩ nɩ ta 'kwli?»
21Kɛɛ, Nyɩsʋa a 'kagbaʋ ‑mʋ', ‑Yusu ꞊hɛn 'nyrɛ, ɛ nɔ‑ mɔ 'a dɩɔnʋ a ‑plahʋɩ. 22‑Tɛ ɛ ‑hie ti ‑hʋɔhʋɩ, ti ‑mʋ' ‑kɔ 'yri ɛ 'kʋ, 'tɩ‑ ɛ 'hrɩ 'klɔ, 'kɩ ɛ bi 'lɩ 'a ‑nagbopʋ 'kwli, ‑ɛ mɔ, 'a ‑plahʋɩ a ‑tɩ ɛ hlɛ la, ɛ 'yɩ la Nyɩsʋa a 'kagbaʋ 'pa‑, ɛ 'yɩ la꞊a 'nyrɛ ꞊hɛn. ‑Tɩ a 'mʋ, ʋ 'crɩɩ la 'lɩ Nyɩsʋacrɩɛn 'kwli, yɩ‑hɛ‑nyrɛ a ti 'yri, ɛ kɔ ‑tɩ a pɛpɛ ‑mʋ', ‑Yusu lee la ꞊nʋ, ʋ kuo ꞊nɛ ꞊wlʋ yɩ.
‑Tɛblɩ a pɛpɛ ‑mʋ', ‑ɛ nɩ 'lɩ ‑tonyiblo a ꞊wlʋ kɩ, ‑Yusu yi꞊e nɩ
23Ti ‑mʋ', ‑ɛ kɔ 'yri ‑Yusu 'tɩɛ nɩ la 'lɩ lɛ'mimle ‑mʋ', ‑ɛ mɔ Pakɩ kɩ, 'kɩ 'lɩ Jrusrɛdɩɔ 'kwli, ɛ ni la ꞊wlɩlɛkɛɛ‑tɛblɩ ‑hʋɔhʋɩ. Nyibli ‑hʋɔhʋɩ bʋ yɩ ꞊wlɩlɛkɛɛ‑tɛblɩ a 'mʋ nɩ 'ye, ɛ nɔ‑ nu꞊o, 'ʋ pʋ꞊ʋ ꞊han‑tɩ, ‑ɛ mɔ, ɛ nɔ‑ mɔ Wanyɔ ‑mʋ', Nyɩsʋa pʋ la lɛ, ɛ di la ya. 24Kɛɛ, ‑Yusu 'yɩ ꞊nʋ ꞊wlʋ yɩ ‑kuo ‑nɩ, ‑ɛ nu꞊o, ‑tɛ 'waa ꞊wlɩ nɩ 'mʋ, ɛ yi꞊e nɩ. 25‑Yusu 'nɩ ꞊mʋɔ lɩ꞊ɩ lɛ, 'kɩ nyiblo ꞊dʋ bʋ lee ꞊nɛ, ‑tɛ ‑tonyibli a ꞊wlɩ nɩ 'mʋ, ‑ɛ nu꞊o, 'a ꞊gbɛtʋ, ɛ yi ‑tɛblɩ a pɛpɛ ‑mʋ', ‑ɛ nɩ 'lɩ ‑tonyiblo a ꞊wlʋ kɩ nɩ.

Currently Selected:

Saan 2: ktj

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy