Matiye 3
3
Zhaŋe Batiste kazlape ghena ta Shala
(MRK 1.1-8; LWK 3.1-18; ZHŊ 1.19-28)
1Ma vəa ŋkwa shɛ ne, pa Zhaŋe Batiste nca kwamte te ɓerama ta ka Zhəwdɛ, ntake ŋkɛ kazlape ghena. 2Ma ke: «Zhɛre mə nza ta ŋayɛ, takwa takwa Meghe nya pelɛ ghweme yitea gheyɛ.»
3Zhaŋe ya kawəndə nya gezete ghena ta ŋkɛ Ɛzayi nde mɛ ŋkwa ta Shala nya kegezete:
Ma ke kwete wəndə zlapete kwamte te ɓerama:
Hele nda mə hweŋkwa ke Mahwətə,
hi nda mə yɛ hweŋkwa tiɗiɗia tiɗiɗia.
4Le shintia zlegwemə tsate lekwesa ta Zhaŋe mbeli, hətə ya hwa hwə ve, hegi ba'a mze nyi hwa gamba yazeme ŋkɛ. 5Kase ka Zhɛrəzalɛm, ka Zhəwdɛ ba'a mbeli nyi mɛa hələa Zhəwrdɛŋe shɛ. 6Kampi dzeve hɛ va jaɗafa ta nci kwa ntsə ta mbeli pɛtɛ, kamene nda batɛme Zhaŋe ke hɛ kwa hələa Zhəwrdɛŋe.
7Ma kwa nakɛ ka Fariziyɛn Zhaŋe le ka Sadəsɛyɛn kase shɛ kwele kwele kezha mene batɛme ne, ma ke sha hɛ: «Ŋwalea mentsape, wa nde tekete ŋayɛ wərə yɛ kambele va hwepe wənə ta Shala wa? 8Mene mə wəshi nyi kenza ncɛte nahe yɛ kezhɛrete nza ta ŋayɛ kaganda. 9Dambeghəma ŋayɛ yɛ kageze: Nahe Abraham kenza kashia n'yɛ, pe yɛ ma. Kaganda ne, ma 'ya sha gheyɛ: Wərə Shala kazhɛrete pelɛ nyi kaka shihɛnyɛa Abraham. 10Wa nya tseyɛ nya te slərəa wəfe kezha tsasle, yayata wəfe nya keɗema kaya ndeɗekə ne, katetsasle ŋkɛ mbeli kadzemɛa ghwə. 11Le yɛmə mene ŋayɛ batɛme 'ya yitea zhɛre nza ta ŋayɛ yɛ. Ama katese kwete wəndə kwetere wəmbəa ɗa, le Sefəa Shala ba'a ghwə temene ŋayɛ batɛme ŋkɛ. Berete ma ŋkɛ ke 'ya, kehi 'ya kenza kawəndə nya keseɗe tsahwa shave mbe seɗa ta ŋkɛ we. 12Yitea dzeve 'yɛmbe ve kezha mehe ha, katetsene ha ŋkɛ kwa tame ta ŋkɛ, katendə cɛkəvə ŋkɛ le ghwə nya keɗema kamte kaghala ghala.»
Batɛmea Yɛsə
(MRK 1.9-11; LWK 3.21-22)
13Pɛkwe Yɛsə sawa pelɛ Galilɛ kadzawa Zhəwrdɛŋe, hwa'a ŋkɛ sha Zhaŋe kezha mene batɛme. 14Ama pa Zhaŋe ɗema, ma ke shɛ: 'Ya nde hi kamene ɗa batɛme na, ama gha nde se sha 'ya. 15Ma ke Yɛsə zhɛnete nda: «Yɛte, shɛ na menete ɗa tsagha, va nya nza ŋkɛ tsetse mene mə nda nza mə yipəte wəsə nya ɗe Shala tiɗiɗi.» Pa Zhaŋe yɛte. 16Ma kwa nahemte mene nda batɛme mbeli ne, pa Yɛsə same hwa yɛmə. Taghanyɛ ne, pa ŋkwa nya pelɛ ghweme ghwenemte geva. Pa ŋkɛ nakɛ Sefəa Shala sawa pelɛ ghweme kala gheɗepe kadzeghə. 17Ma ke ghena gezeke geva sawa pelɛ ghweme: «Nya ya kaWəzege ta ɗa nya ɗe 'ya, nya zlama 'ya te kwele kwele.»
Currently Selected:
Matiye 3: BEK12
Highlight
Share
Copy
Want to have your highlights saved across all your devices? Sign up or sign in
La Bible en langue Kapsiki avec les livres deutérocanoniques © Alliance Biblique du Cameroun 2012.