1 Timoteo 1
1
So Pablo ÿamaxa aso lede so Timoteo
1Aÿim Pablo, aÿim lamaxashic so Jesucristo. Qaq de'eda ñamaxasaguec chigoqtot ñi Dios mayi qadca'alaxaqui, nataq'en so qadataxala' Jesucristo mayi ÿataqta qadpe'et. 2'Am Timoteo, 'en'am da 'am ÿalec, cha'ayi aÿim 'auachigoxottot da 'adpi'iÿaxac. 'Am samaxa ana ÿide, cha'ayi ñishitaique da 'auaconguet da nqouagaxanaqtaic nataq'en da nchoxonnataxanaxac, qataq da nlagaxayic mayi chigoqo'ot ñi qadta'a Dios nataq'en so qadataxala' Cristo Jesús.
Nqataxac da qantela'aguet ca napaxaguenataxanaxac mayi sa lataxac
3Ñishitaique da 'am ñaq qonetaña yi la ciudad Éfeso, 'eeta'am so lÿa na'a'q co'ollaq aÿim sata'ague da 'alhua Macedonia, cha'ayi huo'o na dapaxaguenataxaatapeguec na sa lataxac. Ÿoqo'oyi ñishitaique da qonapega namayipi da sa ishit da quetalec da dapaxaguenataxaatapeguec de'eda, 4qataq nal'en sa ishit da ÿoqocha'a na chochi n'aqtaxanaxac n'ajnaxaic, nataq'en da n'aqtaguec da lliquiaxac so hua'au lta'alpi. Cha'ayi damayi ndota't da cotaxac mayi qaica ca naigui, qataq sa ishit da itauan ca shiÿaxaua da huapegue' da n'onataxanaxac mayi Dios qomi' ÿanema, souaxat da huo'o da qadpi'iÿaxac.
5Qaq damayi qaÿamaxasoxoolec da qoÿaxaañi, cha'ayi ñi Dios nshitaique da nchoxonna't na shiÿaxauapi. Ca shiÿaxaua huo'o da lsoxoyic, cha'ayi ÿataqta qui'itta añi lquiyaqte, qataq da lavilÿaxac ÿaÿamaqchiguiñi, qataq huosota da lpi'iÿaxac. 6Cha'ayi mashi huo'o na ilamaqhuec, ca'ai da ÿaÿamaqchiguiñi, isomaxanaqchit na ntaxaÿaxacpi mayi saqca ca naigui. 7Namayipi nshitaique da apaxaguenaxala' da dapaxaguenataxanec na lqataxacpi ñi Dios. Qalaxayi ÿataqta sa ÿaÿaten dam i'axattac, nataq'en dam dapaxaguenataxaatapeguec mayi 'eetega ÿataqta 'eesa lataxac.
8Saÿajnaq na lqataxacpi ñi Dios da ÿataqta ÿaÿamaqchiguiñi da qaipagaqchiichigui da ÿataqta l'onataxanaxac. 9Cha'ayi mashi qaÿaÿateeta da sa ishit da qai'ot na nqataxacpi da nmit ca shiÿaxaua da ÿataqta no'on. Chaqcata ca shiÿaxaua da sa i'ot na nqataxacpi, qataq sa ÿalaq, qataq qauemaic, 'itaxaloxoic, sa iyacnapec ñi Dios nataq'en da n'amqajnataxanaxac, qataq ca ÿalauat ca lta'a, huo'otaq aca late'e, huo'otaq camachicague't shiÿaxaua. 10Na nqataxacpi nmit ca shiÿaxaua da ncachitapegue' ana 'alo, huo'otaq ca maichi lÿa 'eeta'am shiÿaxaua, nataq'en da decachiÿa ca lÿa, nataq'en da tenataxanaxaic, huo'otaq da i'axat ca 'eetega lataxac, qalaxayi chochi shipegaxanaxac. Na nqataxacpi nataq'en ividauga da nmit 'enauac na sa ÿalaxaguet da napaxaguenataxanaxac mayi no'oita. 11Qaq de'eda napaxaguenataxanaxac mayi no'oita ÿataqta nateeteguet da n'aqtac mayi chigaqaigui da nca'alaxa mayi ÿapac da lyaquiaxac. Damayi chigoqtot ñi Dios mayi hueto'ot da namaxayic. Qaq damayi aÿim qaipataxalec da sa'axateec.
So Pablo ÿanot da n'achic ñi Dios souaxat da lchoxonnataxanaxa
12Sanot da ñi'achiquiaxac ñi qadataxala' Jesucristo mayi aÿim ÿanem co'olloxochiyi da i'añaxac da souapegue' de'eda, cha'ayi ñimayi saq llalcolec da lpe'e naq'en aÿim, qataq aÿim ipataxalec da l'onataxanaxac. 13Qaq ñimayi aÿim i'otec de'eda, nai'ctaxa da so lÿa na'a'q ÿataqta sasaxalguete na itaxaÿaxaco qauema da sa seyacnapec, qataq secaatac, qataq seshiueetac. Qalaxayi ñi Dios ÿataqta aÿim ichoxoden, cha'ayi saxanaxa da sa'amaqten so Jesús, qataq ÿataqta sa saÿaten da so'ottac. 14Ÿoqo'oyi aÿim ÿanem da lqouagaxanaqtaic ÿataqta saq llalcolec, nataq'en da npi'iÿaxac, nataq'en da nsoxoyic mayi 'enauac qomi' qoÿanema souaxat da ñi'adaqtau'a so Cristo Jesús.
15Qaq de'eda ÿataqta 'eesa, sa ishit da qaÿoqolguet, cha'ayi so Cristo Jesús naÿa ana 'alhua da nca'alaxateec na shiÿaxauapi 'itaxaloxoicpi. Qaq aÿim, mayi aÿim ÿacteec da aÿim 'itaxaloxoic. 16Qalaxayi ñaqaiyita ñi Dios aÿim ichoxoden, cha'ayi ñimayi nshitaique da aÿim l'auaxanec da do'onataxana naq'en so Jesucristo da ÿachaxana na shiÿaxauapi da lhualaxavic lta'adaic. Cha'ayi ÿauotaique da aÿim naloqnaxanaxat, yaqto' ca shiÿaxaua ishit da i'amaqten so Jesús, qaq ÿaconguet da nca'alaxa mayi chochi tateec. 17Ÿoqo'oyi nagui sanaxam ñi qadta'a Dios da qayi'oxonnataxanaxa qataq da qadyacnataxanaxac mayi chochi tateec. Ñimayi qaica ca loga't, qataq sa ishit da qaila'a. Ñim Dios mayi qaica ca lÿa 'en'am, qataq ÿajnaxanaxaic. Aja', nachi 'eetec de'eda.
18'Am ÿalec Timoteo, 'am sami' da ÿaqataxac, cha'ayi ñishitaique da qoquetalec da 'auloctapeguelec da 'ad'onataxanaxac, qalaxayi nachida da 'adpi'iÿaxac, qataq da ÿaÿamaqchiguiñi 'advilÿaxac. 'Aupactelco' qome da 'an'aqtaguec mayi chigaqaigui na Dios l'aqtaxanaxanecpi. 19Cha'ayi mashi huo'o na ilamaqhuec, ca'ai da lpi'iÿaxac, souaxat da sa ÿalaxalec da lavilÿaxac ÿaÿamaqchiguiñi. 20Qanachi 'eetec da huaiguilo soua Himeneo nataq'en so Alejandro. Ÿoqo'oyi soomayi sangueta so Satanás, yaqto' sa ishit da nachi 'eetra'ac da quetralec da sa iyacna'pe ñi Dios.
Currently Selected:
1 Timoteo 1: TBSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
