1 Tesalonicenses 5
5
1Qalaxayi qami' qadqaÿa't sa iuen da sedaxañi ca na'a'q mayi laloxoqui de'eda. 2Cha'ayi qami' mashi qauaÿajñiita que'eca na'a'q mayi lvidaxaqui so qadataxala'. Camayi huetoigui ca na'a'q da sa qaÿauapque, 'eeta'am ca cachaxaic da quetagui yi pe. 3Cha'ayi na shiÿaxauapi, qom 'eetega da 'enauac lactapiguiñi qataq saqca ca da, nachi nvita namayipi ca nhuaxanaguec lta'adaic, chochi nque'elaxatta, 'eeta'am da nqui'ic aca 'alo hualaxai da ivita yi laloqo' da deco'o. Namayipi sa ishit da ÿit da nhuaxanaguec. 4Qalaxayi qami' qadqaÿa't, sa ishit da qoviitaigui ca 'ico' napalaxa, yaqto' que'eca na'a'q, lvidaxaqui so qadataxala', sa ishit da qami' ique'elaxa't, 'eeta'am cam cachaxaic. 5Cha'ayi 'enauac da qoñiita mashi qoviitaigui na na'a'q mayi yi'oqchiguiñi. Qaq qomi' sa ishit da souaqtaigui ca pe mayi napanñi. 6Ÿoqo'oyi sa ishit da 'ico' so'ochaqtañi, se'enaxataqtapeguem na sa da'amqajnataxan. Chaqdato' da ñiloqteec, qataq seloqtegue da qoyiquiaxac. 7Ca shiÿaxaua da do'ochi, ÿataqta do'ochi yi pe. Qataq ca taxaic, ipacchigui da taxaic yi pe. 8Qalaxayi qomi' mayi souaqtaigui na yi'oqchiguiñi na'a'q, ÿataqta seloqtegue da qoyiquiaxac. Sanaxañi da qadpi'iÿaxac qataq da qadsoxoyic, se'enaxataqchigui ca ale da ÿaañi aca ishit da npaxatalec ana ltogue. Qataq sanaxañi da qanaquitaxac da qomi' qanca'alaxatreec, 'eeta'am aca ado'o alaataxaqui mayi ÿaañi ca ale. 9Cha'ayi ñi Dios sa ishit da qomi' lca'agui'shi da ÿauo'o ca qanhuaxanaguec ca pa'ateec na'a'q. Chaqdato' da saconaxaguet da nca'alaxa mayi chigoqo'ot so qadataxala' Jesucristo. 10Somayi qomi' ileualguete, cha'ayi nshitaique da qanachaalataxaua, nai'ctaxa da na ñica'alaqtauec, huo'otaq mashi qadeleu. 11Ÿoqo'oyi qantauñiÿa't, qataq ñi 'oonolec i'añaqchit ca lÿa. Qaq de'eda mashi qau'ochiitac, nachida qoquiitot.
So Pablo huaqattega na lqaÿañicpi
12Qami' qadqaÿa't, qami' ñachoxodenaqtoto da ÿataqta qauloÿiguet na l'onataxanaxanecpi so qadataxala' Jesús nam qami' ilotagueto qataq qami' huaqattegalo. 13Ÿataqta qauauochiic, qataq ÿataqta qauchoxoyiñi, souaxat da l'onataxanaxac. Qoviitaiguio' da qami' lactrapiguiñi, saqca ca da ñi 'oonolec da qoñiita.
14Nataq'en qami' qadqaÿa't, qami' saqataxalo da ÿataqta qoñiÿapega na sa ishit da do'onataxan, qataq qau'añaqchichi na sa da'angui yi lauel, qataq qautauañi na sa da'añi da lpi'iÿaxac, qataq qanhualaxauñi' 'enauac na shiÿaxauapi.
15Ÿataqta qanchilliÿa'a't, saqca ca ishiitena'aguet ca sa ÿaÿamaxañi da i'otec ca lÿa. Chaqdato' da qami' qanpogoxoiñiÿapegue' da qau'ochiic ca ÿaÿamaqchiguiñi ñi 'oonolec da qoñiita qataq 'enauac na laÿipi shiÿaxauapi.
16Qoviitaiguio' da ÿataqta qami' machiyiñi. 17Qoquiitot da qanqouagaxauñiitac. 18Nai'ctaxa da huo'o na qami' huelguete, qalaxayi nachi 'en'am qai'añiitacot da qan'achiquiaxaqui ñi Dios. Cha'ayi nachida da 'eetapeguec ñi Dios da qoñiita, cha'ayi mashi qau'amaqchiñi so Cristo Jesús.
19Sa ishit da qaualamachi da l'onataxanaxac so Espíritu Santo. 20Sa ishit da qau'otañi da l'aqtaxanaxac ca i'aqtaxanaxac ñi Dios. 21Qalaxayi qavi'iguiñi 'enauac, qaq cam ÿaÿamaqchiguiñi, nachica ca qauaÿamaxachi. 22Qadvichiÿa'aguet 'enauac na ÿotta'a't sa ÿaÿamaxañi.
23Qaq ñi Dios mayi qomi' ÿanema da qadlagaxayic, nachiñi ñi qami' iqui'itaxatte' qome, qataq ÿaÿamaxat 'enauac da qad'oquiaxaqui, qataq ñi qoquiÿapegue' qadqui'ii, qataq 'enauac da qadvilÿaxaqui, da ÿataqta saqca ca qadasouaxashichi naq'en, chochi ivitta'a ca lvidaxac so qadataxala' Jesucristo. 24Ñim qami' iÿaxanalo ÿataqta sa ÿatenachit quiaxa da l'aqtac, ipactelec 'enauac de'eda.
Da pa'ateec lquinaxanaxac so Pablo
25Qami' qadqaÿa't, qanqouagaxauñiilguete qomi'.
26'Enauac qome na qadqaÿañicpi da qanquiñi', qalaq qanapigoqoi qataq qanchoxonñi'.
27Cha'ayi aÿim lamaxashic so qadataxala', qaq nagui qami' saqatalo da qautaxaÿaxañi ana ÿide da n'axaÿaxana 'enauac na qadqaÿañicpi.
28Qaq so qadataxala' Jesucristo qami' ÿanema qome ca no'on qoyiquiaxaqui. Aja', nachi 'eetec de'eda.
Currently Selected:
1 Tesalonicenses 5: TBSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
