Maqthaiq 2
AEUNT
2
Neenoeq neekha aol nail tsaol-aq juq lal-a nail ganl
1Heeqphaq Heiqlol uvthaiq nail yanq bhai, Yuldav milkhaoq Bhaiqlaiqhaiq meenq bhai Yeiqsul doevq lee-a nail ngaol. Aq-u phao, neenoeq neekha aol nail tsaol-aq juq nlma dov khoeq phao nee mail, Yeiqlulsaqlaiq meenq bha lal kev-a nail ngaol. 2Aqyu juq ge nail: “Doevq lee-a nail Yuldav nail tsaol-aq nail heeqphaq al gaq khaq bha jaol nail-aiq. Nlma dov khoeq phao aivq nail aqgil dov lal nail bhai nvjuq ya moel khi, aivq bhai uqhuq thaoq lal-a nail ngaol” dai, ge bhiq-a nail ngaol.
3Heeqphaq Heiqlol ganl al ganl ya gaiq-u phao, aivq khi mail Yeiqlulsaqlaiq meenq bha jaol nail tsaol-aq juq iqsanl mail, suqsaq nail lavqkhoel neema maq sal-ai bhiq ail. 4Heiqlol neq, Yuldav nail tsaol-aq juq nail Philma khi mail aoldaoq kovqdaoq cavq nail cov nail tsaol-aq iqsanl mail khul jil khi, “Khali khaq bhai doevq lee nail dai, gevq-ai thaq nail-aiq” dai, aqyu juq bhai naldaiq bhiq-a nail ngaol. 5Aqyu juq ge nail: “Yuldav milkhaoq Bhaiqlaiqhaiq meenq bhai doevq lee nail ngaol. Khul khi mail dai ngal-aq neq, Miqyail nail haqbhoil gedan nail teevq gaq-i mail gevq-ai thaq nail, niailhai jiav nail ngaol.
6‘Yuldav milkhaoq
bhai jiav nail
Bhaiqlaiqhaiq meenq-ol.
Yuldav milkhaoq khe
heeqphaq juq uvthaiq nail
meenq lavqkhoel bhai
naol neq, yu nee maqtsil
theq nail meenq
maq ngel-ail.
Khul khi mail dai
ngal-aq neq,
ngaq nail jeq-e jaq-a
pevq nail Ilsaqleiqlal nail
jeq-e jaq-a bhai,
hevqdaiq bhiq nail
Heeqphaq neq,
naoq nail lavqkhoel bhai
dov lal nail ngaol’ dai,
gevq-ai thaq nail ngaol.”
7Aq-u phao, Heiqlol neenoeq neekha aol nail tsaol-aq al juq bhai aqtsi tsu dai khul khi, aqgil al heeq dov lal-a nail yanq bhai naldaiq duq-a nail ngaol. 8A bhai nee ngal-aq, Heiqlol aqyu juq bhai, “Nuljuq yaq al gaq bhai laijai khi halpov ail yaoq. Halpov moel gaq haq neq, ngal iqsanl ail khi aivq bhai uqhuq ya thaoq dai, ngaq bhai ge gaiq lal yaoq” dai, ge bhiq khi, Bhaiqlaiqhaiq meenq bhai bhi ail-a nail ngaol.
9Heiqlol aqyu juq bhai alhai ge bhiq gaq-u phao, aqyu juq sivtavq phao gaoq ail-a nail ngaol. Nlma dov khoeq phao nee aqyu juq-i mail ya moel-a nail aqgil al heeq, aqyu juq nail sivtavq phao ail thailthaiq khi, doevq lee-a nail yaqyov al gaq jaol nail ilkhaol kovtavq bhai teevq daol naq lai-a nail ngaol. 10Aqyu juq aqgil al heeq bhai ya moel-u phao, lavqkhiq tsail deedee lal bhiq-a nail ngaol. 11Aqyu juq ilkhaol lavqkhoel bhai aol lai-u phao, yaqyov khi mail aivq nail aqma Maqlil bhai ya moel khi, peevqceevq kovdoiq doiq nail lavqkhoel nee gaolbeiv khi uqhuq thaoq-a nail ngaol. A bhai nee ngal-aq, aqyu juq-i mail oil lavq-a nail aqphoiq kav nail kovpavq juq thunq nee bheq dov khi, yaqyov bhai danq bhiq-a nail ngaol. Aqyu juq-i mail oil lavq-a nail kovpavq juq neq, heel, laolbhaqoq dai khul nail huqbhiq nil nail aqthail khi mail mullaq dai khul nail huqbhiq nil nail aqtseel, niil juq ngaol. 12A bhai nee ngal-aq, “Heeqphaq Heiqlol jaol nail phao thaq kovq ail” dai, nvmav mav nail lavqkhoel nee Miqyail aqyu juq bhai ge bhiq-a nail ngaol. Alheel ngel-i mail, aqyu juq gailkhaol yaoq khaol yaoq nee aqyu juq nail milkhaoq bhai kovq ail-a nail ngaol.
Iljiltuv milkhaoq bhai tsaol-aivq-a nail ganl
13Neenoeq neekha aol nail juq kovq ail jel gaq-u phao, Yaolsai nvmav mav nail lavqkhoel, Heeqphaq Miqyail nail nqtavq gaqkhoel teevq gaq bhai ya moel-a nail ngaol. Aivq Yaolsai bhai ge bhiq-a nail: “Thul yaoq. Aqyu nvq mayaq hevq khi Iljiltuv milkhaoq bhai tsaol-aivq yaoq. Ngal naoq bhai maq ge tsaoq lee-u kev dai, a bhai jaol yaoq. Khul khi mail dai ngal-aq neq, Heiqlol yaqyov thoil gaq bhai heivq nail dai khi, halpov nail ngaol” dai, ge bhiq-a nail ngaol. 14Aq-u phao Yaolsai thul khi, hul-iq tsilma aqyu nvq mayaq hevq khi, Iljiltuv milkhaoq bhai tsaol-aivq-a nail ngaol. 15Heiqlol sil-u kev dai, aqyu phaqyaq a bhai jaol-a nail ngaol. Ganl al neq, Miqyail aivq nail haqbhoil gedan nail teevq gaq bhai juq khi niailhai ge-ai thaq nail ngaol:
“ ‘Iljiltuv milkhaoq nee
dov lal yaoq’ dai,
ngaq nail Yaqyov bhai
ngal khul naol” dai,
aivq-i mail ge-ai thaq nail daoq al daoq bhee lal dai, pevq lal-a nail ngaol.
Yaqnoil noil yaq juq bhai heivq-a nail ganl
16Neenoeq neekha aol nail tsaol-aq juq aivq bhai goiqbhaoq bhaoq khi kovq ail jel thaq nail niil dai, heeq nia-u phao, Heiqlol neema phail deedee lal bhiq-a nail ngaol. Aq-u phao, aivq-i mail neenoeq neekha aol nail juq bhai naldaiq duq-ai thaq nail yanq bhai saol-nvq daiq khi, Bhaiqlaiqhaiq meenq khi mail al nail aqjail bhai khal jaol nail, nvq kovq nee mail pul-nvq khe yaqyov juq iqsanl mail heivq ail yaoq dai, daoq bivq-a nail ngaol. 17Alhai nl-a nail lavqkhoel nee Miqyail nail haqbhoil gedan nail Yeiqlaqmil-i mail gevq-ai thaq nail daoq al daoq aq-u n-gaol bhee lal-a nail ngaol:
18Aivq ge nail:
“Laqmal dai khul nail
jaol duq bhai
nioilkhaoq khaoq nail
aqthel khi mail
noeq dee noeq deel
khi nioil nail aqthel
ya gaiq nail ngaol.
Aivq nail yaq juq
bhaqda nee,
Laqkheiqlal
nioil nail ngaol.
Aivq nail yaq
maq jaol-aoq nail
ngel-i mail,
yu aivq bhai neema
maq bhi sal lal nia-ail” dai,
gevq-ai thaq nail ngaol.
Iljiltuv milkhaoq nee mail dov lal-a nail ganl
19Heeqphaq Heiqlol sil jel-u phao, Yaolsai Iljiltuv milkhaoq bhai nvmav mav nail lavqkhoel, Heeqphaq Miqyail nail nqtavq gaqkhoel teevq gaq bhai ya moel-a nail ngaol. 20Nqtavq gaqkhoel al gaq Yaolsai bhai ge bhiq-a nail: “Thul yaoq. Aqyu nvq mayaq hevq khi, Ilsaqleiqlal milkhaoq bhai kovq lai yaoq. Khul khi mail dai ngal-aq neq, yaqyov thoil gaq bhai heivq nail dai khi, halpov nail juq sil-aoq nail” dai, ge bhiq-a nail ngaol.
21Aq-u phao, Yaolsai thul khi, aqyu nvq mayaq hevq khi, Ilsaqleiqlal milkhaoq bhai kovq lai-a nail ngaol. 22-23Thailhai ngaol-aoq, Heiqlol nail jiqdan aivq nail yaqyov Aqgeiqlal gaq Yuldav milkhaoq nail heeqphaq jiovq-nq thaq nail ganl, Yaolsai ya gaiq-u phao, aivq a bhai maq kovq lai tseq-ail. Aq-u phao, nvmav mav nail lavqkhoel nee, Miqyail nail nqtavq gaqkhoel aivq bhai teevq pov gaoq ge bhiq lee khi, Gaqliqlail milkhaoq bhai jiav nail Naqsaqlail meenq bhai jaol ail-a nail ngaol. Alheel ngel-i mail, Khali bhai Naqsaqlail meenq yaq dai khul nail ngaol dai, Miqyail nail haqbhoil gedan nail juq-i mail ge-ai thaq nail daoq al daoq bhee lal-a nail ngaol.

© Wycliffe Bible Translators, Inc. All rights reserved. 

Print publication: The Bible Society of Myanmar

Learn More About Jalliq aqsivq Gaolkheel daoq