زَبور 36
36
هُدائے مِهر چنکدر پُراَرزش اِنت
په سازگر و وشآوازانی سالارا. هُداوندئے هزمتکار داوودئے زَبور.
1گناه، بدکارا مان آییئے دلئے جُهلانکیا گوانکَ جنت،
آییئے چمّان هُداتُرسی نێست.
2چیا که آ وتی جندئے دلا همینچک وتی تئوسیپا کنت،
که وتی گناها نزانت و چه آییا نپرت کرتَ نکنت.
3دپئے هبری بدی و پرێب اِنت،
چه اگلمندی و نێککاریا دستی شُشتگ.
4تنتنا وتی گندل و بسترا پندلَ سازیت،
گُنهکاریئے راهی گپتگ و
بدیا یلهَ نکنت.
5او هُداوند! تئیی مِهر اَرشا رسیت و
وپاداری تان جمبران.
6تئیی اَدل و راستی بُرزترێن کۆهانی ڈئولا اِنت و
اِنساپ، مزنێن جُهلانکیانی.
او هُداوند! تئو ائے که انسان و هئیوانئے رَکّێنۆک ائے.
7او هُدا! تئیی مِهر چنکدر پُراَرزش اِنت،
بنی آدم تئیی بانزُلانی ساهگا پناهَ گیپت.
8آ چه تئیی بارگاهئے سررێچێن نیامتان سێرَ بنت و
چه وتی لزّتانی کئورا آیان سێراپَ کنئے.
9چیا که زِندمانئے سرچمّگ تئو ائے و
چه تئیی نورا اِنت که نورَ گِندێن.
10په وتی دۆستداران وتی مِهرا مُدام برجاه دار و
اَدل و راستیا په نێکدلان.
11پُرکِبرانی پاد منی سرا اێر مبات،
بدکارانی دست منا سرگردان مکنات.
12بچار بدکار چِه پئیما کپتگاَنت،
هاکا سرشکون و پاد آتکَ نکننت.
Currently Selected:
زَبور 36: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2016-22 Wycliffe Bible Translators, Inc.
