زَبور 34
34
هُداوندئے نێکیا بچَشێت
داوودئے زَبور. هما وهدا که آییا اَبیمِلِکئے کِرّا وتا گنۆکانی پئیما کرت، چه اۆدا در کنگ بوت و وتی راها شت.
1دایما هُداوندا نازێنان
آییئے ستا و سنا مُدام منی دپا اِنت.
2منی اَرواه هُداوندئے سرا پهرَ کنت،
بێکِبرێن مردم بِشکننت و شادهی بکننت.
3گۆن من هۆریگا هُداوندا مزنی بدئیێت،
بیاێت که هئواریا آییئے ناما نازێنێن.
4هُداوندُن شۆهاز کرت و منا پَسّئوی دات،
چه منی سجّهێن تُرسان منا آزاتی کرت.
5آ که چمِّش گۆن آییا اِنت دْرپشان اَنت،
آیانی دێم هچبر شرمسارَ نبیت.
6اے مِسکینا تئوار پِر جت،
هُداوندا آییئے تئوار اِشکت و
چه سجّهێن سکّیان رَکّێنتی.
7هُداوندئے پرێشتگ هُداتُرسانی چپّ و چاگردا پَلّے بندیت و
آیان نجاتَ دنت.
8بچَشێت و بچارێت که هُداوند نێک اِنت،
بَهتاور هما اِنت که آییئے مئیار و باهۆٹَ بیت.
9او هُداوندئے پَلگارتگێنان! چه هُداوندا بترسێت،
چیا که هُداتُرسان هچ کمّیے نێست.
10ورناێن شێر مهتاج و شدیگَ بنت،
بله هُداوندئے شۆهاز کنۆکان چه نێکیا هچ کمّیے نێست.
11او چُکّان! بیاێت و چه من بِشکنێت،
من شمارا سَبکَ دئیان که هُداوندا چۆن بمَنّێت.
12چه شما کئے په زِندا هُدۆناک اِنت و
وشّێن رۆچانی گِندگئے لۆٹۆک؟
13وتی زبانا چه بدیا دور بدار و
لُنٹان چه درۆگا.
14چه بدیا پِر ترّ و نێکی کن،
سُهل و اێمنیئے شۆهازا ببئے و همِشیئے رندا بکپ.
15هُداوندئے چمّ گۆن پهرێزکاران اِنت و
گۆشی هم په آیانی پریاتان پَچ.
16هُداوندئے دێم بدکارانی هلاپا اِنت،
تان آیانی یاتا چه جهانا ببُرّیت و گُمسار بکنت.
17وهدے پهرێزکار پریاتَ کننت، هُداوندَ اِشکنت و
آیان چه سجّهێن سکّیانَ رَکّێنیت.
18هُداوند گۆن پْرُشتهدِلان نزّیک اِنت و
درُشتهروهانَ رَکّێنیت.
19پهرێزکارا بازێن سکّی و سۆریَ رسیت،
بله هُداوند آییا چه سجّهێن سکّیانَ رَکّێنیت.
20آییئے سجّهێن هڈّان مُهرَ داریت،
چه آیان یکّے هم پرۆشگَ نبیت.
21بدی بدکارا کُشیت و
هما که چه پهریزکارا نپرتَ کنت، مئیاربارَ بیت.
22هُداوند وتی هزمتکارانی زِندا رَکّێنیت،
هرکَس که آییئے باهۆٹَ بیت، مئیاربارَ نبیت.
Currently Selected:
زَبور 34: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2016-22 Wycliffe Bible Translators, Inc.
