Matayo 2
2
Bantu ba Menge Bavule Kulola Yesu.
1Gabutilue Yesu mu Betelehema wa Yudaya mu bindi bia mukota Helode, Bantu ba Menge batukile kuntata kukutukaga kisongo kia busi babasile ku Yelusalema, babuzizie bune, 2Kuni kueli wozo wabutilue Mukota Munene wa Bayuda? kubuno tuamonine ku lukenikeni luage kukubasaga kisongo kia busi, tuavua kumukumbamina. 3Gongule mukota Helode ku kitondo kikino, mutima wage wakutukile, nu za bantu bansania babezaga nage mu Yelusalema. 4Akundamanizie basankoga banene bansania nu basanzi ba bantu, ababuzizie bune, Kuni kukabutilua Klisto? 5Bamubuide bune, Mu Betelehema wa Yudaya: kubuno anga buasanzilue na mulengania bune,
6Uwe Betelehema, mu kisi kia Yuda,
Taguli mukeke munkatini mua bukota bua Yuda:
Kubuno muguli umukabutua Mukota Munene,
Wozo akaba mulangi wa bantu bane ba Isalele. #Mika 5:2.
7Nu mukota Helode amanine Bantu ba Menge ku lumbisombiso, ababuzizie bune, Nkungu nkizi nunse zimuamuene ku lukenikeni? 8Abasingile ku Betelehema, abatendile bune, Endazi mutitibukizie musagu wa muana; nu gamuamumoneko, nti muavua kunsambalila, nunne lingo nti nende kumukumbamina. 9Gabongule kuiyuki lia mukota, bendile; nu lulo lukenikeni, lubamonagakulo kuntata kukubasaga kisongo kia busi luendile luabusio luabo, aba nu galuabasile ga kiziki kiabezaga muana. 10Gabamonine ku lukenikeni, babogilebogile nunse. 11Nu beingide mu numba nu bamonine ku muana nu nina Malia; bakomine mazu gansi, nu bamukumbamine; bakanuine bikagi biabo, bamukasile nkaso, mikotola nu aliga nu bulago. 12Nu gabatondile Kalaga mu ndozi buno, Tamusubie ku Helode, basubizie ku kisi kiabo muengo nzila.
Batinine na Yesu ku Ezipeto.
13Nubo gabendile, mugenzi wa Mukota wabaside Yosefu mu ndozi, wamubuide bune, Yuka nu utole muana nu nina, nu utine ku Ezipeto, nu wikale kuko aba gankakubulilaga: kubuno Helode ekulonda kuita muana. 14Nu ayukile nu atolile muana nu nina mu kindi, nu endile mu Ezipeto; 15nu eikede kuko aba nu gakule Helode: bubo lizindilile liatendagua na Mukota ku mulengania, atendile bune, Namanine muana wane akumuke ku Ezipeto. #Osea 11:1.
Mukota Helode Eitile Bana Buliabulia.
16Gamenyine Helode buno Bantu ba Menge bamunyega nu ongilue nunse, asingile bantu, nu beitile bana bamulume bansania babezaga mu Betelehema, nu mu ndenge insania za muino, ba miaka ibili nu bango beki bana bato, kutukila ku busi buamusambalide Bantu ba Menge. 17Buno lizindilile liatendagua na mulengania Yehemia bune,
18Iyuki liungulue mu Lama, idilo nu kasina kanene,
Lahele akulilila bana bage;
Nuwe ntatundile kubibibua, kubuno bana bage tabeligo. #Yelemia 31:15.
Batukile ku Ezipeto, Bakumukile ku Nazaleta.
19Gakule Helode, mugenzi wa Mukota wabaside Yosefu mu ndozi ku Ezipeto, amutendile bune, 20Yuka nu tola muana nu nina, nu wende ku kisi kia Isalele: kubuno babo batundaga kuita muana bakua. 21Nu ayukile nu atolile muana nu nina, nu babasile mu kisi kia Isalele. 22Tondo gongule buno, Alukelao angata ku Yudaya mu kiziki kia isi Helode, akule boba kuenda kuko; nu gamutondile Kalaga mu ndozi, endile mu ndenge za Galela, 23nu abasile nu eikeide mu muino wamanagua buno Nazaleta; bubo lizindilile liatendagua na balengania bune, Akamanua mu Nazaleta. #Yesaya 11:1.
Currently Selected:
Matayo 2: NTKI57
Highlight
Share
Copy
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.