I Timoteo 6
6
Bakota nu Bakambi Babo.
1Bakobe bansania banze bakota babo nunse, buno izina lia Kalaga nu meigisia meitu tamelilikue. 2Nu babo beli na bakota babo bakatizia, tabababenge, kubuno beli mibuto zabo; tondo babakitile busoga, kubuno babano beli na mutali wa mulimo wabo beli bakatizia nu batundua, Igisia bitondo bibino nu anabio.
Nsake nu Kuelama Bikulo.
3Ndi muntu igisia mango meigisia, nu ntakuitabizia malagi masoga ma Mukota weitu Yesu Klisto, nu ta meigisia ma kuanza Kalaga; 4akuikotia, tondo nti ntezi kena, tondo ekutunda kubuzia mbuzio za miango, ku bitondo bibino ukukutuka lugi, nu nsake, nu bilingano, nu kukengela bubi, 5nu miango za bukongolo nu bateizi bulili, bekukengela buno kuanza Kalaga kuli mutali. 6Tondo kuanza Kalaga na mbogimbogi guli mutali munene: 7kubuno tatuavule na kena mu kisi, nu tatunavuama kutuka na kena; 8tondo ndi tuli neidia nu nsulu nti tuaba na mbogimbogi ku bibino. 9Tondo babo bekutunda kuguma bekuaga mu malindiko nu mu matega nu mu ntundo za bukongolo zikuita, nu zikuenzia bantu mu buzimizi nu lukuo. 10Kubuno kulinga kua bubi bunsania kuli kuelama bikulo: nu bamozi ku kubielama, basigile bukatizio, nu babede na tubebe tuingi.
Timoteo Idange Busoga ku Bitondo Bibino.
11Tondo uwe, muntu wa Kalaga, tina bitondo bibino; uyange kuisanana, kuanza Kalaga, bukatizio, lutundo, nkiki, nu kola. 12Luana bita bibio bisoga bia bukatizio, kokomezia kalamo katanakuzinda, kawamaninue muko, nu buwalongekile bulongeki busoga ku balongeki beingi. 13Nkukukakizia ku Kalaga, ukulamagia binsania, nu ku Klisto Yesu, walongekile bulongeki buage busoga ku Pontio Pilato; 14buno ulange kukakizia kukuno, geteli itondoki, nu geteli kabalibango, aba nu kumoneka kua Mukota weitu Yesu Klisto: 15uko kukalolesibua mu nkungu zage, we wenyene uli na lutanuno nu buangato bunsania ewenyene tugu, Muangati wa bangati, Mukota wa bakota; 16we wenyene uli na kalamo katanakuzinda, ukuikalaga mu kiengi kitanakunda muntu; takuli muntu wamumonineko, aba ukumumonako, luanzo nu magala meli namo tamanakuzinda. Amena.
Paolo Ekukengelezia Bagumi.
17Kakizia babo beli bagumi mu nkiko zezo, tabekotie, aba tabalemanine bugumi butakuizizia, tondo balemanine Kalaga ukutukasaga binsania buno tukite nabio na mbogimbogi; 18bakite busoga, babe bagumi ku makitilo masoga, babe kayikayika kukasana bikulo biabo, bagomanie na bango; 19kuibikila kikagi kia kalingilo kasoga ku nkungu zikavua, buno bakokomezie kalamo katanakuzinda.
20Timoteo, langa bitondo bibio biwigisizibue, ibembukie na meigisia matasuaga, nu miango za bumenyinino butasuaga; 21bamozi, ku kutenda beli namo, bekuida bukatizio. Mponga zibe kuguli.
Currently Selected:
I Timoteo 6: NTKI57
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
