Emibiri 8

Eriendereribwa ryekanisa

1Na Saula abya akaliga oluholo luwe. Noko kiro ekyo mobatsuka eriendererya inene oko kanisa eYerusalema; nabosi mobapanzikanira omo bihugo byeYudea na Samaria, butsira bakwenda. 2Nabandu bagenge mobata Setefano, mobamurira kutsibu. 3Nikwa Saula mwaherya ekanisa kutsibu mwingira omo buri nyumba, akakura abalume nabakali akahi rabo omo nyumba yomuliki.

Filipo eSamaria

4Neryo abapanzikana mobaya eyi neyi eritula engulu yowene yekinywa ekyo. 5Filipo mwandagalira oko muyi wa Samaria, mwatulirabo engulu ya Kristo. 6Nesyondeko mobowa ebyo Filipo abuga nomutima muguma, omugulu bamowa nerilangira ebiminyikalo akola. 7Kusangwa esyombinga mosyalwa oko bosi ababya bakwiresyo, isikabirikira nomulenge munene: nabangi ababya babasire nebilema mobalamibwa. 8Neryo mohabya obutseme bunene omo muyi oyo.

9Nikwa habya omundu ukahulawa mo Simoni oyo wabya akakola obusaki omo muyi oyo iniakaswekaya ekihanda kya Samaria, iniakayahula mo mundu mukulu. 10Abosi ibaka mowa, abosi abakebake na bakulu bati, Omundu oyu ni maka ayo woMungu awakahulawa mo Manene. 11Nabo bosi moba mowa, kusangwa abya akaswekayabo nobusaki buwe oko biro binene. 12Nikwa omugulu bikiriraya Filipo kwa kakangiriraya engulu yowene busana nobwami bwoMungu nerina ryaYesu Kristo mobabatisibwa abalume na bakali. 13Na Simoni mwikirirya neryo abere abibatisibwa mwakwama eribya haguma na Filipo; nerilangira ebiminyikalo nebitikotiko byakolawa, mwasweka.

14Nikwa omugulu abakwenda ababya eYerusalema bowa ambu abanyaSamaria bamangirira eKinywa kyo Mungu, moba tumayo Petero na Yoane, 15mobandagalirayo mobasaba busana nabo bati bangirire eKirimu Kibuyirire; 16kusangwa isikyekyatogerabo, ibamatabatisibwa buyira omo rina ryo Mukama Yesu. 17Neryo mobahira kubo kwebyala mobangi rira eKirimu Kibuyirire. 18Nikwa Simoni abere alangira kwabahirawa kwebyala byabakwenda bamahabwa eKirimu, mwahereryabo esyofranka, ati, 19Mumbe amaka aya, neryo kwoyo nasyahira kwebyala iniangirira eKirimu Kibuyirire. 20Nikwa Petero mwamubwira, ati, Esyofranka syawe sihere haguma nawe, kusangwa wamaringikania uti wangabana erihitya ryoMungu busana nesyofranka! 21Suwite ekihande kutse igabo omu mwatsi oyu, kusangwa omutima wawe siatunganene embere syoMungu. 22Binduka oko bubi bwawe obu, usabe Mukama uti kyamatokekana, erisonda ryomutima wawe lwa bugirwaryo. 23Kusangwa namalebya uri mo ndulu yerikariha nomo muliki webibi. 24Simoni mwasubirya ati, Munyisabire Mukama, ebyo mwamabuga, sihabye kindu nekiguma kika mbikako.

25Nabo babere babitulago nerikangirirya eKinywa kyo Mukama, mobasuba eYerusalema, bakatula engulu yowene omo hiyi hingi ehyabaSamaria.

Omubiki womwamikali

26Nikwa omulaika woMukama mwabwira Filipo ati, Hangana, ugende oko luhande lwekitambi oko nzira eyikanda galira eGaza erilwa eYerusalema. Eyi ni nzira yembwarara. 27Neryo mwahangana mwayayo; neryo omunyaEtiopia, oyu bunire, omugombe mukulu wa Kandake, omwamikali wEtiopia, oyu kategaya ebindu biwe byosi, abya iniayire eYerusalema erisaba. 28Abere akasubula; inianikere oko gari yiwe, mwabya akasoma ekitabu kyomuminyereri Isaya. 29Ne Kirimu mokyabwira Filipo, kiti, Ugende hakuhi uyitomeke oko gari eyi. 30Na Filipo mwatibita eyari, mowa akasoma ekitabu kyaIsaya omuminyereri, neryo mwamubulya, ati, Ebyo ukasoma wasibyo kwehi? 31Naye mwabuga, Inabitoka nyiti ndetabana oyu kanyisondola mubyo kwehi? Neryo mwamulembalemba ahetuke ikale naye. 32Nikwa omulondo owamasako abya akasoma abya goyu:

Mwaletwa ngembuli bakaleta omwikerero,

Kutse ngekyana kye mbuli kikabya bukutu embere woyu katwa obweya,

Isiarikumbula obuno buwe.

33Omwiyiyira mo muke muke mobamukaga erisingana.

Nindi wasyakania eryolulengo luwe kwehi?

Kusangwa engebe yiwe yamalusibwa muna kihugo.

34Noyu bunire mwabuga na Filipo, ati, Ngakusaba unyibwire omumunyereri akahula ndi kwehi? busana naye iyowene kutse ogundi kwehi? 35Filipo mwakumbula obuno buwe, neritsuka omo masako ayo mwamutulira engulu yowene ya Yesu. 36Neryo babere banemugenda omo nzira mobahika oko magetsi, noyu bunire mwabuga, ati, Lebaya, amagetsi ari hano! Ekyangaleka inindabatisibwa niki kwehi? 37Filipo mwabuga, ati, Wamikirirya nomutima wawe gosi, wangatoka. Naye mwa subirya, ati, Namikirirya ko Yesu Kristo ni Mugala woMungu. 38Neryo mwategeka egari ihangane, mobandagalira ababiri omo magetsi, Filipo noyu bunire, neryo mwamubatisya. 39Babere balwa omo magetsi, eKirimu kioMukama mokyaba kula Filipo; noyo bunire mwataswamulolako kandi, mwagenda monzira yiwe akatsema. 40Nikwa Filipo mwayabanika eAzoto, neritwangana aho mwatula engulu yowene oko miyi yosi erihika eKaisaria.

Currently Selected:

Emibiri 8: NTN62

Highlight

Copy