Matai 2
NTK50

Matai 2

2
Banduenga kwiza kusambila Yesu
1Bu Yesu butukaka mu Betelemi ya Yuda mu bilumbu ya Elode ntinu, tala, banduenga ya este kwizaka ku Yelusalemi, kutuba:
2Ntinu ya baYuda ya butukaka ikele wapi ? Kadi beto monaka mbwetete ya yandi mu este, ye beto kwiza kusambila yandi. 3 Mose 24:17
3Bu ntinu Elode kuwaka yo, yandi zakamaka ye Yelusalemi yonso sikamosi na yandi.
4Yandi kutikisaka bambuta banganga yonso ye bansoniki ya bantu ye yuvulaka bau: Klisto tabutuka wapi ?
5Bau tubaka kwa yandi: Mu Betelemi ya Yuda, kadi mpilayai yo sonamaka mu mbikudi:
6Nge Betelemi, mu nsi ya Yuda, nge ikele fioti ve nakati bamfumu ya Yuda, kadi mu nge tabasika nyadi ya tavanda mvungi ya bantu ya mono Isaeli. Mika 5:2
7Buna Elode bingaka banduenga mu kinsweki, ye yuvulaka bau mbote ntangu nki mbwetete monikaka.
8Yandi fidisaka bau ku Betelemi, ye tubaka: Kwenda kusosa mbote mwana fioti, bu beno imene kumona yandi, twala mono ndinga, ye mono mpe lenda kwiza kusambila yandi.
9Kansi bu bau imene kuwa ntinu, bau kwendaka, tala, mbwetete ya bau monaka mu este kwendaka nantwala na bau, ti yo kwizaka kutelema va zulu ya sika ya mwana fioti vandaka.
10Bu bau monaka mbwetete, bau yangalalaka na kiese ya luta mingi.
11Bau kotaka mu nzo ye monaka mwana fioti ye Malia, ngudi ya yandi; bau fukamaka ye sambilaka yandi ye kangulaka bima ya bau ya ntalu, bau pesaka yandi matabisi, wola ye bima ya mfwitila mwisi ye mile. Nk. 72:10; Yes. 60:6
12Bu Nzambi imene kuluengisa bau mu ndozi kuvutuka kwa Elode ve, bau kwendaka nzila yankaka ku ntoto ya bau.
Yosefi tininaka kuna Ngipiti
13Bu bau imene kwenda, tala, wanjo ya Mfumu monikaka kwa Yosefi mu ndozi, kutuba: Telema, baka mwana fioti ye ngudi ya yandi, ye tinina ku Ngipiti, ye vanda kuna ti mono tuba kwa nge, kadi Elode tasosa mwana fioti kufwa yandi.
14Yandi telemaka ye bakaka mwana ye ngudi ya yandi mu mpimpa, ye kwendaka ku Ngipiti.
15Bau vandaka kuna ti Elode kufwaka, na yo lenda kumaniswa ya Mfumu tubaka mu mbikudi, kutuba: Mono imene kubinga Mwana ya mono tuka, Ngipiti. 2 Mose 4:22; Hos. 11:1
Elode kufwaka bana fioti
16Bu Elode zabaka banduenga sekaka yandi, yandi vandaka na makasi mingi, yandi fidisaka kufwa bana babakala yonso mu Betelemi ye ndambu yonso ya mfinama, bau ya mvu zole ye ya konda yau, bonso vandaka ntangu ya yandi yuvulaka banduenga mbote.
17Buna mambu ya tubwaka mu Yelemia mbikudi maniswaka, yandi tuba:
18Ndinga kuwakana mu Lama. Bau kudila ye kunionga mingi; Lakeli kudila bana ya yandi, yandi zolaka kubombwa ve, kadi bau ikele ve.
Yosefi vutukaka
19Bu Elode imene kufwa, tala, wanjo ya Mfumu monikaka kwa Yosefi mu ndozi mu Ngipiti, kutuba:
20Telema, baka mwana ye ngudi ya yandi, kwenda kukota mu nsi ya Isaeli, kadi bau ya sosaka moyo ya mwana fioti imene kufwa.
21Yandi telemaka ye bakaka mwana ye ngudi ya yandi ye kwizaka mu nsi ya Isaeli.
22Bu yandi kuwaka Alakelao ikele kuyala mu Yuda mu sika ya tata ya yandi Elode, yandi titaka kwenda kuna; bu Nzambi imene kuluengisa yandi mu ndozi, yandi kwendaka mu ndambu ya Ngalili,
23ye kwizaka kuvanda mu bwala ya bingwa Nazaleti, na yo lenda kumaniswa ya tubwaka mu bambikudi: Yandi tabingwa mwisi Nazaleti.

L’Alliance Biblique de la République Démocratique du Congo

Learn More About Le Nouveau Testament en Kikwango 1950