Bisalu Ya Bantumwa 18
18
Paulu kwendaka ku Kolinto
1Nanima na mambu yai Paulu katuka na Atene ye kwizaka ku Kolinto.
2Yandi monaka muYuda, nkumbu ya yandi Akila, muntu ya Ponto, ntama ve yandi katukaka na Italia sikamosi na nkento ya yandi, Pliskila, sambu na Klaudio sikidikisaka na baYuda yonso takatuka na Loma. Buna Paulu kwendaka kwa bau.
3Sambu na yandi vandaka na kisalu mosi na bau, yandi vandaka na bau ye salaka na bau, sambu na kisalu ya bau ikele kusala nzo ya tente. Bis. 20:34; 1 Kol. 4:12; 1 Tes. 2:9; 2 Tes. 3:8
4Yandi tubanaka na bantu mu nzo ya sambilu kilumbu ya luvundu na kilumbu ya luvundu, yandi sosaka kukwidisa baYuda ye baElene. Bis. 17:17
BaYuda buya nsamu mbote
5Bu Sila ye Timoteo katukaka na Makedonia, mambu ya Nzambi kwikidisaka Paulu, ye yandi songaka kitemo kwa baYuda na Yesu ikele Klisto. Bis. 17:14; 18:28
6Bu bau buyaka ye tubaka mbi, yandi bulaka mvwatu ya yandi, ye tubaka kwa bau: Menga ya beno ikele va ntu ya beno mosi, mono ikele na mambu ve, tuka ntangu yai, mono takwenda kwa bapaien. Bis. 20:26
7Yandi katukaka kuna ye kotaka mu nzo ya muntu, nkumbu ya yandi Tito Yustu ya vumina Nzambi, nzo ya yandi vandaka mfinama ku nzo ya sambilu. Kolo. 4:11
8Kansi Klispo nkuluntu ya nzo ya sambilu kwikilaka Mfumu ye nzo ya yandi yamvimba. Bantu mingi ya Kolinto kuwaka ye kwikilaka ye botikwaka. 1 Kol. 1:14
9Mfumu tubaka kwa Paulu mu mpimpa mu mona-meso: Vanda na boma ve, kansi tuba, vanda napi ve. Bis. 16:9; 23:11
10Sambu na mono ikele sikamosi na nge, ye muntu tabwila nge ve, kumonisa nge mpasi, kadi mono ikele na bantu mingi mu mbanza yai. Yes. 41:10; Yoa. 10:16
11Yandi vandaka kuna mvu mosi ye ngonda sambanu, ye longaka mambu ya Nzambi nakati na bau.
Bau zola kufundisa Paulu
12Bu Ngalio vandaka nyadi mu Akaya, baYuda teleminaka Paulu ye twalaka yandi ku kiti ya mfundisi.
13Bau tubaka: Muntu yai ikele kukwikidisa bantu kusambila Nzambi mpilamosi nsiku ikele kubuya.
14Kansi bu Paulu zolaka kukangula munoko ya yandi, Ngalio tubaka kwa baYuda: Beno baYuda, kana yo ikele mambu ya mbi keti mambu ya masumu, mono fwiti kuwa beno. Bis. 25:11
15Kansi kana yo ikele biuvu sambu na mambu ye bankumbu ye nsiku ya beno, beno kibeni tala yau, mono zola ve kuvanda mfundisi ya mambu yai. Mat. 27:24; Yoa. 18:31
16Yandi kulaka bau tuka kiti ya mfundisi.
17Bau yonso bwilaka Sostene nkuluntu ya nzo ya sambilu, ye bulaka yandi nantwala na kiti ya mfundisi, kansi Ngalio banzaka sambu na mambu yai ve.
Paulu vutuka ku Yelusalemi ye Antiokia
18Bu Paulu imene kuvanda kuna bilumbu mingi diaka, yandi pesaka bampangi mbote, ye sabukaka ku Silia sikamosi na Pliskila ye Akila. Paulu imene kuzenga nsuki ya ntu ya yandi mu Kenkelea, sambu na nsilulu vandaka na yandi. Bis. 21:23
19Bau kwizaka ku Efeso, ye yandi bikaka bau kuna. Yandi kibeni kotaka mu nzo ya sambilu ye tubanaka na baYuda.
20Bu bau lombaka yandi kuvanda bilumbu mingi, yandi ndimaka ve.
21Kansi bu yandi imene kupesa bau mbote, yandi tubaka: Mono tavutuka kwa beno kana Nzambi zola, buna yandi kwendaka ye sabukaka tuka Efeso.
22Bu yandi kumaka ku Kaisalia, yandi tombokaka ku Yelusalemi ye pesaka mbote kwa dibundu, buna yandikulumukaka ku Antiokia.
Bau kwenda mu nzila ya tatu
23Bu yandi imene kuvanda kuna ntangu ndambu, yandi katukaka ye lutaka mu ntoto ya Ngalatia ye Filingia, bonso yo landana, yandi siamisaka banlonguki yonso.
Apolo kwiza ku Efeso
24Mu Efeso muYuda mosi kwizaka, nkumbu ya yandi Apolo, mwisi Alesandia, yandi ikele muntu ya ngangu, ye longaka masonukwa ngolo.
25Muntu yai longwaka mu nzila ya Mfumu, yandi vandaka ngolo mu mpeve, ye yandi tubaka ye longaka kieleka mambu yonso sambu na Yesu, kansi yandi zabaka mbotika ya Yoane kaka. Bis. 19:3
26Yandi yantikaka kulonga na kikesa mu nzo ya sambilu. Kansi bu Pliskila ye Akila kuwaka yandi, bau bakaka yandi, ye tendudilaka yandi nzila ya Nzambi kieleka.
27Bu yandi zolaka kuluta ku Akaya, bampangi pesaka kikesa ye sonikaka kwa banlonguki kubaka yandi. Bu yandi kumaka kuna, mu nlemvo yandi sadisaka mingi bau ya kwikilaka;
28mu ngolo yonso yandi tulaka ntembe na baYuda nantwala na bantu, yandi songaka mu masonukwa na Yesu ikele Klisto.
Currently Selected:
Bisalu Ya Bantumwa 18: NTK50
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Kikwango © BAliiance Biblique de la RD Congo, 1950.
