1 Timóteo 2
2
Deusbe hãtxatikiri yusĩnikiaki, na hãtxarã
1Eska dukũkiri hatu yusĩkubaĩwẽ. Yurabu betsa betsapabu Deusũ hau hatu merabewakubainũ Deusbe hãtxakĩ hatu yukashũkĩ betsabukiri hatu ea ashũkĩ hãtxakĩ hatukiri Deus kẽwãkubaĩkãwẽ. 2Deusũ yusĩa pepa txibaĩ unãnuma benimai hiweshũ hawama pepa besti hawa dakeama nũ hiweyukubainũbũ shanẽ ibubu inũ yununikabu haska tibikiri hatu yukashũkubainãkãwẽ, hau Deusũ nukukiri hatu pe xinãmanunã. 3Haska nũ hatukiri xinãkĩ hatu yukashunairã, harã, peki, nukũ mekenika Deusũ haska abumiskenã. 4Hatunã, hakiri hawẽ kakape txanima dasibibũ unãkĩ hau ikũwaĩ mekeshanũbũ Deusũ abuikiki. 5Haskawẽ taea eska Deus hawẽ xinã hayaki. Deusrã, bestitxaiki. Hanua nuku itsa habe hãtxashũmisrã, bestitxairiki, ha Jesus Cristorã, Deus nuku daewashuni hãtxashũmisrã. 6Cristo tsuabũra ikũwaĩbu Deusũ hatũ txakabu buashũshanaiwẽ taea Jesus Cristo hamebi mawakĩ habũ ikũwãshanaibu hatu mekeniki. Haskakẽ na habiatiã Deusũ yununi tsuabura hakiri txanibaũtirubuki.
7Haskawẽ taeshũ Deusũ ea katutã hawẽ kakape yuishunika ea wakĩ Jesus Cristõ kuxipaya ea watã judeubuma anu na yusĩa Jesus Cristokiri txanima ẽ ha ikũwaĩ ẽ txanikauanũ ea yununiki. Na haska mia yuikinã, txani txakakĩ ẽ mia yuiamaki.
Aĩbũ hatũ yura dauwamisbukiri hatu nemanikiaki, na hãtxarã
8Haska inũ, betsarã, hanishũra ikũwaĩbũ Deus kẽwãnũ ika itxa hunibu hau mexãtã Deusbe hãtxakubainũbũwẽ. Haskai Deusbe hãtxai haska bestiama haska Deusũ abuai benimawai besti hiwei hawa tsuki sinatama tsua ha akama hau pe besti meribi hiwekĩ hatu uĩmakubainũbũwẽ. 9Ha inũ, habiaskariai aĩbuaibũ ikũwaĩ mapuarã, hawẽruashũ hunibu kemumama inũ hatũ yuraki batxi hawẽ kemumati hatu xinãmakĩ hau saweyamanũbũwẽ. Bu txũpia inũ mane itxapa inũ batxi karuhaira haska bestiwẽ hau hawẽruayamakubainũbũwẽ. 10Hakia aĩbuaibũ Deus ikũwaĩ benimawakinã, haska abuai nishũ dayashũkĩ hatu merabewakĩ pepa besti aki hawẽ dauwa itsai hau duapakubainũbũwẽ. 11Hanushũ Deusũ hãtxa yuiaibu anu buarã, hau pes bestishũ yusĩaĩbu hau hatu nĩkakubainũbũwẽ. 12-14Ha dukũ damiwakĩ taewakinã, Adão Deusũ damiwaniki. Ha katxu hawẽ aĩ Eva damiwarianiki. Adão Satanásã paranũ, iwanã, yuiama hakia hawẽ aĩ Eva parãkĩ ha dukũ txakabuwamaniki. Haskawẽ taeshũ shanẽ ibukĩ aĩbuaibũ yunutiruma inũ hunibu yusĩtirubuma ẽ hatu nemamiski, hau pesshũ nĩka bestikubainũbunã. 15Hakia aĩbuaibũ Jesus Cristo ikũwaĩ pe hiwei betsabuwẽ nui duanamekĩ haska Deusũ abuai ashuĩ meribikĩ txibãkubainaiburã, tsuãra bake bitã hatuwẽ nuikĩ pe yumewakubaĩmisburã, Deusũ ha aĩbuaibu mekekubaĩshanikiki.
Currently Selected:
1 Timóteo 2: cbsBR
Highlight
Copy
Compare
Share
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.
