Zhan 1
1
Ankà-dɔ̀-yrikàn mán ɛwúvà-kɔrɛ̀
1Ɛnkrubɔmɛ̀n lɔ, ɛnvra léyi Ɔwɔ hán ɛnhibù nɔn, ankà-dɔ̀ gɔ́ dù; ɔwrɔn léyi dú ankà-dɔ̀ nɔn, nɛ́n mán Ɔwɔ mɛhi yɔ dù, kɩ nɛ̀n dú Ɔwɔ. 2Nɛ́n mán Ɔwɔ mɛhi yɔ dú ɛnkrubɔmɛ̀n. 3N'ɛmɛ̀n de Ɔwɔ hán ɛci lɔ fɛn, kɩ ɛci lɔ fɛn léyi ndù nɔn, ci n'ɛmɛ̀n srɔ. 4N'ɛmɛ̀n de ɛwúvà-kɔrɛ̀ ndù nɔn, kɩ ɛwúvà-kɔrɛ̀ ndɔ lɔ kɛ tán anwrɔnẅì ɛyri-kàn. 5Ɛyri-kàn kɛ gbrɛ́n ɛyri-yɔwɔ mɛ̀n, kɩ ɛyri-yɔwɔ kè sɩ̀ cɔ́ nɛ̀n. 6Ɔwɔ wá ɔwrɔn tɔ̀n ɔkɔhɔ̀n, ye bi nɛ̀n Zhan. 7Nɛ́n và hán dalɛfuɛ-di-wrɔn hɔ́, ô nɛ̀n di ɛyri-kàn dalɛfuɛ. Nɛ́n và, ô yɔ lɔ fɛn yɔ ẅɛn ankaẅì-bùtan ankà léyi nɛ dɔ̀ nɔn yi wú. 8Nɛ́n dùku nɛ̀n sɩ̀ dù ɛyri-kàn, nɛ̀n dú dalɛfuɛ-di-wrɔn léyi kɛ và kɛ dɔ́ ɛyri-kàn ankà nɔn. 9Ankà-dɔ̀ ndɔ lɔ dú annanwɔrɛ yri-kàn zri kpokpo, hɩ kɛ vá ɛnhibù wú ô kɛ̀ tán anwrɔnẅì lɔ fɛn ɛyri-kàn nɔn.
10Ɔwrɔn léyi dú ankà-dɔ̀ nɔn dú ɛnhibù wú. N'ɛmɛ̀n de Ɔwɔ hán ɛnhibù, kɩ zɛtɛn ɛnhibù kè sɩ̀ nyri nɛ̀n. 11Nɛ̀n vá nɛ́n dùku n'anmàn hi wú, tɛ́n nɛ́n muan-ẅì hɔ̀n kè sɩ̀ bɩ́ nɛ̀n. 12Ɔmu tɛ̀kɩ, anwrɔn janbɔ̀ shri bɩ́ nɛ̀n kɩ yɔ bú n'ankà yɔ tán ankaẅì; nɛ̀n tán yɔ ɛkɔrɛ̀-levri yɔ srɔ Ɔwɔ ẅì hɔ̀n. 13Yɔ sɩ̀ srɔ Ɔwɔ ẅì hɔ̀n kɛ̀ hán ɔmu le ye bî ɛnẅì kɛ ẅɛn nɛ́n zi mán nɛ́n muan kɩ ɛnẅì kɛ ẅɛn nɛ́n Zi ke dú ɛnhibù wú; Ɔwɔ de tán yɔ ɛwúvà wrù nɔn.
14Ɔwrɔn léyi dú ankà-dɔ̀ nɔn srɔ ɔwrɔnẅì kɩ vá dú bɔ̀ ɛmɛ̀n, nboafɔ̀n mán annanwɔrɛ yɩ́ nɛ̀n ɛmɛ̀n. Bɔ̀ kán n'eci-zrɔ, eci-zrɔ léyi Ɛnẅì zri kpokpo kɛ cɔ́ nɛ́n zi yri nɔn. 15Zhan dɔ́ n'ankà; nɛ dɔ̀ le: “N'ankà de mɛ́n dɔ̀, ɛnvra léyi mɛ́n dɔ̀ le: ‘Nɛ̀n dú mɛ̀n ɛmɛẅi nɛ và, tɛ́n nɛ̀n sevri nɛ̀n vrán mɛ̀n, ɔmuhi nɛ́n dù, yakɛ mɛ́n và nɔn.’ ” 16Bɔ lɔ fɛn bɔ̀ cɔ́ nɛ́n nboafɔ̀n nɛ̀ncüì-dì lɔ; bɔ̀ vru bɔ̀ cɔ́ nboafɔ̀n mán ɛnshifù bobrebe. 17Ɔwɔ tán bɔ̀ ɛnyanmàn Mohizì tamɛ̀n; tɛ́n nboafɔ̀n mán annanwɔrɛ dú Zhezü yri vá. 18Ɔwrɔnẅì zriɛmɛ́n kɛ vá kán Ɔwɔ mrìmrì. Tɛ́n Ɛnẅì zri kpokpo léyi dú Ɔwɔ, kɩ dú nɛ́n Zi ɛtɛ̀sɛ̀n nɔn, nɛ́n hán ye nyri nɛ́n Zi.
Zhan Batisì mùan ankà-dɔ̀
(Nyɛ́n nyan Matie 3:1-12; Markɛ̀n 1:1-8; mán Lükɛ̀n 3:1-18 wrú lɔ mɛ̀n)
19Nyàn dalɛfuɛ-di-ankà léyi Zhan dɔ́ zhüifɛ̀n-bɔ̀ cüìcüì hɔ̀n léyi dú Zherüzalɛmɛ̀n anmàn, hɩ wá Ɔwɔ-cice-bɔ̀ mán y'ɛtɛsɛ̀n bɔ̀ ɔkɔhɔ̀n kɛ và kè yrɛ nɛ̀n le: “Antɔnwrɔn dú mɛ́n hɛ́n?” 20Nɛ̀n sɩ̀ korɔa y'ankà-yrɛ lɔ, tɛ́n nɛ̀n dɔ́ yɔ anwrɔn lɔ fɛn zìwú kpete mɛ̀n le: “Mɛ̀n sɩ̀ dù Ebɩ̀die-wrɔn.” 21Yɔ yrɛ nɛ̀n le: “Zɛtɛn antɔnwrɔn dú mɛ́n hɛ́n? È dú Eli hɛ̀?” Nɛ̀n mrɛ́n ɔmùan le: “Hɔ̂, mɛ̀n sɩ̀ dù Eli.” “È dú Ɔwɔ-mùanwú-ankà-dɔ́-wrɔn hàn?” Nɛ̀n mrɛ́n yɔ ɔmùan le: “Hɔ̂”. 22Zɛtɛn yɔ dɔ́ nɛ̀n le: “Antɔn cehɛ́n dú mɛ́n hɛ́n? Ke ji le bɔ̀ bɩ́ ɛmɛẅi ankà bɔ̀ hɔ̀n sɩ́ anwrɔn hɔ̀n léyi wá bɔ̀ ɔkɔhɔ̀n nɔn. Ankà tán de ɛ dɔ́ tán v'edomɛ̀n nɛ́n?” 23Zhan mrɛ́n ɔmùan le:
“Mɛ̀n dú ‘ɔwrɔnẅì tɔ̀n sùva léyi ke di nkù ɛnnuẅì nɔn:
Nyɛ́n mrɛ́n Ɛẅɛnwrɔn levri kɛ̀ nyrɔn!’ ”
(Nyàn ankà léyi Ɔwɔ-mùanwú-ankà-dɔ́-wrɔn Ezahi dɔ̀ nɔn.)
24Anwrɔn hɔ̀n léyi yɔ wá ɔkɔhɔ̀n Zhan yri nɔn, Ɔwɔ-nyanmàn-sùva-wá-bɔ̀ dú yɔ ɛmɛ̀n, 25kɩ yɔ yrɛ Zhan le: “Ke dú kɛ è sɩ̀ dù Ebɩ̀die-wrɔn, è sɩ̀ dù Eli, e sɩ̀ dù Ɔwɔ-mùanwú-ankà-dɔ́-wrɔn, cɛci kruhú kɛ ɛ wá anwrɔn ɛnshi ɛnkruɛ?” 26Zhan mrɛ́n yɔ ɔmùan le: “Mɛ tɛ́n, ɛnshi de me bɩ mɛ wá anwrɔn ɛnkru nɔn; tɛ́n ɔwrɔn tɔ̀n dú nyɛ̀n anwanzi kɩ nyɛ́n sɩ̀ nyri nɛ̀n. 27Nɛ̀n dú mɛ̀n ɛmɛẅi nɛ và, tɛ́n mɛ̀n sɩ̀ zeze mɛ̀n zrɔa hɩ m'á sɩ́ m'edomɛ̀n ɛnhi, ô mɛ̀n gbrɔ n'annanwrú hɛ́ lɔ nɔn.” 28Ɛci ndɔ hɔ̀n lɔ fɛn lɔ wɔɛ́n Betani anmàn, Zhurdɛn shi mɛẅi, ɛyri léyi Zhan kɛ wá anwrɔn ɛnshi ɛnkru nɔn.
Zhezü, Ɔwɔ Kɔ̀kɔ̀sɛ̀-ẅì
29Ɛnvra léyi ɛcɛ̀n cüe nɔn, Zhan kán Zhezü, jí nɛ̀n nvà kɩ nɛ dɔ̀ le: “Nyàn Ɔwɔ Kɔ̀kɔ̀sɛ̀-ẅì léyi kɛ gbú ɛnhibù gbàn lɔ sɔhɔ́ nɔn. 30N'ankà de mɛ́n dɔ̀, ɛnvra léyi mɛ́n dɔ̀ le: ‘Ɔwrɔn tɔ̀n dú mɛ̀n ɛmɛẅi kɛ và, tɛ́n nɛ̀n sevri nɛ̀n vrán mɛ̀n, ɔmuhi nɛ́n gɔ́ dù, yakɛ mɛ́n và nɔn.’ 31Mɛ̀n sɩ̀ nyri ɔwrɔn léyi ke le dú nɛ̀n nɔn, tɛ́n mɛ́n và, ô mɛ̀n bɩ́ ɛnshi mɛ̀n wá anwrɔn ɛnkru, ô mɛ̀n hán tán Izraɛlɛ̀n fɛcüè kè nyri nɛ̀n.”
32Zhan vru kɛ dɔ̀ le: “Mɛ̀n kán Ɛnhɛ́n Prɔnprɔn bɩ́ brɛndre dùwru dú anhobɩ́ kakɛ nɛ̀n ɛwúɛ. 33Mɛ vá nyrí ɔwrɔn léyi dú nɛ̀n nɔn, tɛ́n Ɔwɔ léyi wá mɛ̀n ɔkɔhɔ̀n mɛ̀n bɩ́ ɛnshi mɛ̀n wá anwrɔn ɛnkru nɔn, dɔ́ mɛ̀n le: ‘Ɛ le kán Ɛnhɛ́n Prɔnprɔn kɛ lɛ kàkɛ, kɩ kɛ lɛ nyɔn ɔwrɔn tɔ̀n ɛwúɛ; nɛ́n de nɛ lɛ wá ɛnshi ɛnkru Ɛnhɛ́n Prɔnprɔn mɛ̀n nɔn.’ ” 34Zhan kɛ dɔ̀ le: “Mɛ̀n kán eci ndɔ lɔ kɩ zɛtɛn mɛ dɔ́ annanwɔrɛ mɛ̀n le, ɔwrɔn ndɔ lɔ dú Ɔwɔ Ẅì.”
Zhezü kpàkpà sɛnkɛn-bɔ̀
35Ɛnvra léyi ɛcɛ̀n cüe nɔn, Zhan vru vá ɛyri zri léyi nɛ́n mán n'ɛsɛnkɛn-bɔ̀ anhyrɛ̀ mɛhi yɔ dù nɔn. 36Ɛnvra leyi nɛ̀n kán Zhezü ndù ke cì nɔn, nɛ dɔ̀ le: “Nyàn Ɔwɔ Kɔ̀kɔ̀sɛ̀-ẅì!”
37Zhan sɛnkɛn-bɔ̀ anhyrɛ̀ lɔ yá ankà léyi nɛ́n dɔ̀ nɔn kɩ yɔ kɛ́n Zhezü esɛ̀n yɔ hɔ̀n. 38Zhezü crɛ̀ kɩ kán yɔ, nɛ̀n kán ɔmu le yɔ dú nɛ̀n ɛmɛẅi kɩ ne yrɛ yɔ le: “Ɛcitan nye jiɛ̀?” Yɔ dɔ́ nɛ̀n le: “Tɛyri de e dù nɛ́n, ankà-yé-wrɔn?” 39Zhezü mrɛ́n yɔ ɔmùan le: “Nyɛ́n và kɩ nyɛ lɛ kàn.” Yɔ hɔ̀n kɩ yɔ kán ɛyri léyi nɛ́n dù nɔn, kɩ yɔ cɔ́ nɛ̀n mɛhi yɔ yɛ́ ɛnbì mumù lɔ fɛn. Zɛtɛn ɛnvra cɔ́ ɔwɔɛmɛ̀n wacɛ̀n anzɔ̀.
40Anwrɔn anhyrɛ̀ lɔ ɔtɔ̀n léyi yá ankà léyi Zhan dɔ̀ nɔn, hɩ kɛ́n Zhezü ɛsɛ̀n nɔn, dú Andre, Simɔn Piɛrɛ̀n nɛ́n muan-ẅì. 41Andre srɔ́n nɛ́n muan-ẅì Simɔn ɛsù dú ɛnvrapkà wrɔn kɩ nɛ dɔ́ yi le: “Bɔ̀ cɔ́ Ebɩ̀die-wrɔn lɔ.” (N'ɛmɛ̀n kɛ dɔ̀ le “Krisì”.) 42Kɩ Andre bɩ́ Simɔn hɔ́n Zhezü ɛtɛsɛ̀n. Zhezü nyan nɛ̀n kɩ kɛ dɔ̀ le: “È dú Simɔn, Zhan ẅì; Ye le bi mɛ́n zɛtɛn Sefasɛ̀n.” (N'ɛmɛ̀n kɛ dɔ̀ le “Obù”.)
Zhezü kɛ bi Filipɛ̀n mán Natanaɛlɛ̀n
43Ɛcɛ̀n cüe, Zhezü wá kɛ̀ hɔ́n Galile kpɔsɔ wú. Nɛ̀n srɔ́n Filipɛ̀n ɛsù kɩ nɛ dɔ́ yi le: “Kɛ́n mɛ̀n ɛsɛ̀n!” 44(Filipɛ̀n dú Bɛtsahida anmàn wrɔn, ɛyri léyi Andre mán Piɛrɛ̀n sɔ́n ebɩ́ ndù nɔn.) 45Zɛtɛn, Filipɛ̀n mán srɔ́n Natanaɛlɛ̀n ɛsù kɩ kɛ dɔ́ nɛ̀n le: “Bɔ̀ cɔ́ ɔwrɔn léyi Mohizì dɔ́ n'ankà ɛnyanmàn-wrú lɔ mɛ̀n, hɩ Ɔwɔ-mùanwú-ankà-dɔ́-bɔ̀ mán dɔ̀ nɔn. Nɛ́n de nɛ̀n dú Zhezü nɔn, Zhozɛfɛ̀n ẅì, Nazarɛtɛ̀n anmàn wrɔn.” 46Natanaɛlɛ̀n kɛ dɔ́ nɛ̀n le: “Eci ankrankran tán de ke le dú Nazarɛtɛ̀n anmàn kɛ̀ srɔ nɛ́n?” Filipɛ̀n mrɛ́n nɛ̀n ɔmùan le: “Và kɩ ɛ lɛ kàn.”
47Ɛnvra léyi Zhezü kán Natanaɛlɛ̀n kɛ vá nɛ̀n ɛtɛsɛ̀n nɔn, nɛ dɔ̀ le: “Nyàn Izraɛlɛ̀n annanwɔrɛ wrɔn tɔ̀n; ɛyɔ̀n ankà zriɛmɛ́n bàdá nɛ̀n edomɛ̀n.” 48Natanaɛlɛ̀n ke yrɛ nɛ̀n le: “Anwɔntan ɛ̀ hán è nyri mɛ̀n hàn?” Zhezü mrɛ́n ɔmùan le: “Mɛ̀n kán mɛ́n ɛnvra léyi ɛ̀ yɛ́ ɛẅì-shi-tɛ̀ tɔ̀n krugbɛ̀n yakɛ Filipɛ̀n bi mɛ́n.” 49Zɛtɛn Natanaɛlɛ̀n kɛ dɔ́ nɛ̀n le: “Ankà-yé-wrɔn, è dú Ɔwɔ Ẅì, è dú Izraɛlɛ̀n nɛ̀ncüì!” 50Zhezü mrɛ́n nɛ̀n ɔmùan le: “E bútan ankaẅì, ɔmuhi mɛ̀n dɔ́ mɛ́n le, mɛ̀n kán mɛ́n ɛẅì-shi-tɛ̀ tɔ̀n krugbɛ̀n nɛ́n? Ɛ lɛ kán ɛci ɛvrivri hɔ̀n ankrànkràn kɛ lɛ vrán ndɔ léyi ɛ kàn nɔn!” 51Kɩ nɛ̀n vru nɛ dɔ̀ le: “Annànwɔrɛ mɛ̀n mɛ dɔ́ nyɛ̀n le: nyɛ lɛ kán anhobɩ́ kɛ lɛ gbɛ́ ɔmùan kɩ Ɔwɔ-kùyüre-bɔ̀ kɛ lɛ kà, kɛ lɛ hɔ́n ɛwú, kɛ lɛ kàkɛ, kɛ lɛ nyɔn ɔwrɔnẅì Ẅì wúɛ!”
Currently Selected:
Zhan 1: ƐAA03
Highlight
Share
Copy
Want to have your highlights saved across all your devices? Sign up or sign in
Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.