Efɛzɛ̀n anmàn-bɔ̀ 6

Ɛẅì hɔ̀n mán y'ɛmɛn-bɔ̀

1Ɛẅì hɔ̀n, Ɛẅɛnwrɔn zìwú lɔ, ny'eci-hán dú hɩ le, ke ji le nyɛ́n wá ny'ɛmɛ̀n mɛ̀n bɔ̀, ɔmuhi ndɔ lɔ dú ɛnyrɔnnan-ci-hán nɔn. 2“Ɛ̀ wá e zi mán ɔmuan” dú ɛnvrakpà nyànmàn léyi ɔmùan-wá dú ɛmɛ̀n nɔn: 3“Ô è dú ɛnbɔrɛ-bruemɛ̀n, ô ɛwúvà kɛ̀ gbɔ́ mɛ́n ɛnhibù wú.”

4Nyɛ́n ɛẅì-nɛ́n-zi hɔ̀n, nyɛ́n bɩ́ hán ny'ɛẅì hɔ̀n ke sɩ́ y'edòmɛ̀n ɛwú ny'eci-hán mɛ̀n. Tɛ́n nyɛ́n ẅɛn yɔ anvrɛnvrɛn, nyɛ́n yé yɔ ankà léyi Ɛẅɛnwrɔn kɔrɛ̀-wá kɛ tán nɔn.

Anwɔ̀n-bɔ̀ mán y'ɛẅɛn-bɔ̀

5Anwɔ̀n-bɔ̀, nyɛ́n wá ny'ɛẅɛn-bɔ̀ léyi dú ɛnu ɛnhi nɔn, edomɛ̀n ɛnhisɩemɛ̀n, ɛwá mɛ̀n, ɛnbɔrɛ zri anvrɛnvrɛn mɛ̀n, kè dù kɛ̀ hán ɔmu le nyɛ́n dú Krisì ci-bɩ̀tan-bɔ̀ nɔn. 6Nyɛ́n bɩ́ hán nɛ̀n tɛ̀kɩ ɔmuhi yɔ nán nyɛ̀n, ô nyɛ́n cüɛn yɔ ɛvɛ̀ kɩ, tɛ́n nyɛ́n hán Ɔwɔ kɔrɛ̀-zì-ci ny'ɛnbɔrɛ lɔ fɛn mɛ̀n kɛ̀ hán Krisì ci-bɩtan-bɔ̀ hɔ́. 7Nyɛ́n dú y'eci-bɩ̀tan-bɔ̀ ɛnbɔrɛ anvrɛnvrɛn mɛ̀n, kɛ̀ hán le Ɛẅɛnwrɔn dùku de nye bɩ́ eci tán nɔn, kɩ kè sɩ̀ dù anwrɔnẅì. 8Kè bru nyɛ̀n le, ɔwrɔnwrɔn, ɔwɔ̀n-wrɔn dú mɛ́n hô, ɔwrɔn kora dú mɛ́n hô, ɛ lɛ cɔ́ anjakpà Ɛẅɛnwrɔn yri, eci léyi ɛ lɛ hán nɔn hɩ wú.

9Nyɛ́n, anwrɔn-ẅɛn-bɔ̀, nyɛ́n hán eci kɛ̀ cá ny'anwɔ̀n-bɔ̀ hɔ́; nyɛ́n bɩ́ wɔnwran yɔ. Kè bru nyɛ̀n le, nyɛ́n mán ny'anwɔ̀n-bɔ̀ mɛhi nyɛ́n ẅɛn Ɛẅɛnwrɔn zri anhobɩ́ anmàn, kɩ nɛ́n sɩ́ hán eci kɛ vɛ́n ɔwrɔnwrɔn tɛ̀sɛ̀n.

Anhà-kɔ́n-ci hɔ̀n léyi Ɔwɔ kɛ tán nɔn

10Ɔtrɔmɛ̀n lɔ, nyɛ́n bɩ́ ecüì nyɛ́n mán Ɛẅɛnwrɔn mɛhi ny'ɔbɔ̀sɔ̀ lɔ mɛ̀n, n'ɛkɔrɛ̀srɔn vri lɔ mɛ̀n. 11Nyɛ́n bɩ kè dú ny'edomɛ̀n anhà-kɔ́n-ci hɔ̀n lɔ fɛn léyi Ɔwɔ kɛ tán nɔn, ô nyɛ́n nyɔn ɛshishiemɛ̀n anwa-wrɔn frɛ́n hɔ̀n lɔ fɛn zìwú. 12Ɔmuhi bɔ́ mán anwrɔnẅì mɛhi bɔ̀ sɩ̀ ẅɛ̀n anhà-kɔ̀n, tɛ́n bɔ́ mán ɛkɔrɛ̀-srɔn hɛ́n gbàngbàn hɔ̀n léyi dú anhobɩ́ anmàn nɔn, ɛkɔrɛ̀levri-bɔ̀ mán anwrɔn-ẅɛn-bɔ̀ léyi dú ɛnhibù yɔwɔ ndɔ lɔ wú nɔn de yɔ mɛhi bɔ̀ ẅɛn anhàkɔ̀n nɔn. 13Hɩ le kruhú de zɛtɛ lɔ, ke ji le nyɛ́n bɩ́ Ɔwɔ anhà-kɔ́n-ci hɔ̀n lɔ fɛn! Ɔmu lɔ de, ɛnvra léyi ɛnbì gbàngbàn lɔ kɛ lɛ và nɔn, nyɛ lɛ kɛ́n egbri-wrɔn lɔ ezì, kɩ anhà-kɔ̀n trɔ mɛ̀n lɔ, nye le vru nyɛ́n nyɔn ɛshishiemɛ̀n.

14Nyɛ́n krɔn kpehɛ́n nyɛ́n nyɔn: annanwɔrɛ kè dú nyɛ́n pɛtɛ̀n nyɛ́n nyɔn ɛwùe; ɛnnyrɔnnan kè dú nyɛ́n anhà-kɔ́n ceci; 15ny'edùyì, Ɛmɛẅi ankà Ankrànkràn dɔ̀, kè dú ny'annanwrú. 16Ɛnvra lɔ fɛn, nyɛ́n bɩ́ ankaẅì-bùtan kè dú nyɛ́n *anhà-kɔ́n-lɛ̀biɛ: nɛ lɛ hán nyɛ̀n nyɛ́n zɛ́n Anwa-wrɔn lɛbɛ́n-hyà lɔ. 17Nyɛ́n bɩ́ ɛnkrukɔrɛ̀ kè dú ny'ɛnkplo, ô Ɔwɔ mùan-ankà kè dú ny'anhà-kɔ́n-nyan she léyi Ɛnhɛ́n Prɔnprɔn tán nɔn. 18Ndɔ lɔ fɛn, nyɛ́n sán nɛ̀n Ɔwɔ-sɛ́n mɛ̀n. Hɛ̀ɛ̀, nyɛ́n sɛ́n ɛnvra lɔ fɛn, Ɛnhɛ́n Prɔnprɔn kɔrɛ̀-wá mɛ̀n. Hɩ mɛ̀n lɔ, anvɛmɛ̀n ke cüe nyɛ̀n, ô nyɛ́n dú ɛnvra lɔ fɛn ɔmùan-zri-diemɛ̀n. Nyɛ́n sɛ̀n nyɛ́n tán Ɔwɔ-fɛcüè lɔ fɛn; 19nyɛ́n sɛ̀n nyɛ́n tán mɛ̀n mán, ô Ɔwɔ kɛ̀ tán mɛ̀n ɛnnyrɔnnan ankà-dɔ̀, ô mɛ̀n cɔ́ ɛkɔrɛ̀-levri mɛ̀n dɔ́ annanwɔrɛ mɛ̀n Ɛmɛẅi ankà Ankrankran lɔ, n'ankà-bán-ankà. 20Zɛtɛ̀ léyi mɛ̀n dú anwɔn-mɛ̀n-wá-wɔn mɛ̀n nɔn, mɛ̀n dú Ɛmɛẅi ankà Ankrankran ndɔ lɔ, n'ankà-nyrì-dɔ́-wrɔn. Zɛtɛn, nyɛ́n sɛ̀n, ô mɛ̀n dɔ́ n'ankà annanwɔrɛ mɛ̀n hán ɔmu le ke ji le mɛ̀n dɔ̀ nɔn hɔ́.

Ɛmɛẅi-trɔ binyan

21Tishikɛ̀n léyi dú bɔ́ muan-ẅì ankrankran mán ɔmùan-zri-di-wrɔn kɔrɛ̀-wá-wrɔn, Ɛẅɛnwrɔn ci-bɩtan kɔ̀hɔ́n lɔ mɛ̀n nɔn, kɛ lɛ tán nyɛ̀n m'ɛmɛẅi ankà lɔ fɛn, ô nyɛ́n nyri eci léyi mɛ̀n srɔ nɔn. 22Me yüre nyɛ̀n nɛ́n, ô nɛ̀n dɔ́ nyɛ̀n ɔmu le bɔ̀ hán bɔ́ dù, ô nɛ̀n bi ɛnbɔrɛ nɛ̀n wá nyɛ̀n.

23Ɔwɔ Zi mán Ɛẅɛnwrɔn Zhezü Krisì kɛ̀ tán anwrɔn-nɛ́n-muan-ẅì hɔ̀n lɔ fɛn anwɔwɔ mán ɛcüɛ̀n, mán ankaẅì-bùtan mɛhi. 24Ɔwɔ boafɔn kè dú anwrɔn lɔ fɛn léyi kɛ cüɛn annanwɔrɛ mɛ̀n bɔ́ Ɛẅɛnwrɔn Zhezü Krisì nɔn mɛ̀n.

Currently Selected:

Efɛzɛ̀n anmàn-bɔ̀ 6: ƐAA03

Highlight

Copy