SAN MATEO 5
ENHL
5
Apquillhicmoscama Jesús netin inquilhe acvinatem
1Lhama alhta apvita Jesús aplhamoclhojo enlhit. Apquinatvoclhec alhta netin inquilhe acvinatem. Apnaclhec alhta maa. Yejemoc alhta apquilyoclho apquiltamsoycaoc apnaclha. 2Yejemoc alhta aptomja apquillhicmosa:
Enlhit apquilinyejemo
(Lc 6.20-23)
3—Apquilinyejemoc anco enlhit apquilyicpilcangviyam actemaclha ayaymomalhca apquilvalhoc Espíritu. Apancaoc actomja Visqui netin apquilnancascama.
4‘Apquilinyejemoc anco enlhit apquilmapyovsica.#Is 61.2. Dios Ingyapam sat eltamilquiscomoc apquilvalhoc.
5‘Apquilinyejemoc anco enlhit apquiltamilcasomacpo apanco.#Sal 37.11. Ellhovac sat asoc, Dios Ingyapam yoyam elmesic.
6‘Apquilinyejemoc anco enlhit apquilmayjayo actemaclha acpeyvomo, malha mayc alnapma najan acnim alnapma.#Is 55.1-2. Dios Ingyapam sat epasmoc yoyam ellhovangvomoc.
7‘Apquilinyejemoc anco enlhit apquilimlaycmo. Dios Ingyapam sat ingyimlimojo.
8‘Apquilinyejemoc anco enlhit ayalhnayo apquilvalhoc.#Sal 24.3-4. Elvitangvomoc sat Dios Ingyapam.
9‘Apquilinyejemoc anco enlhit apcasicjascaseyquiclho poc.#Pr 12.20. Eltamjacpoc sat apquilvisay Dios apquitquic.
10‘Apquilinyejemoc anco enlhit macminlhinaycam ayinyema actemaclha acpeyvomo.#1 P 3.14. Apancaoc actomja Visqui netin apquilnancascama.
11‘Apquilinyejemoc anco enlhit malyamneycam najan mayasquiscama apyimpeoc najan ayajemo malantipquiscama apquilvisay quellhip, coo selyiploycam eyca ayinyemaclha.#1 P 4.14. 12Elitsovacsojo quellhip, colpayjiclha sat apquilvalhoc. Coyangvomoc sat quellhip acyanmongam netin. Innoc actema ilhnic nat malminlhinaycam profetas Dios apquillingascama apquilictingam apmamyi —alhta aptomjac Jesús.#2 Cr 36.16; Hch 7.52.
Yasic najan ayitsayolhma as nalhpop
(Mr 9.50; Lc 14.34-35)
13Aptomjac alhta mocjam Jesús:
‘Quellhip apquiltomja malha yasic nipyesicsa enlhitaoc as nalhpop. Am sat ancoc copanacmoc yasic, mongvanquejec yoyam copanmojo mocjam. Comalhquejec sat copanaycmo yasic. Cotlhalhcac sat amay. Colhic sat altacmo.#Mr 9.50; Lc 14.34-35.
14‘Quellhip apquiltomja malha ayitsayolhma nipyesicsa enlhitaoc as nalhpop.#Jn 8.12; 9.5. Mongvanquejec ongajapsic tingma apyitna netin inquilhe acvinatem. 15Ningalevasquic sat ancoc calevascama, mongajapsic sat coning yingmin alhancoc. Onquilhnic sat netin,#Mr 4.21; Lc 8.16; 11.33. yoyam cotsacsic sat olhma enlhit apnaycam congne tingma. 16Ellhojo sat quellhip lha. Elapongmit sat nipyesicsa enlhitaoc. Colvitalhcac sat quellhip apquiltamjaycam altamila. Colhic sat ayaco Ingyapam netin —alhta aptomjac.#1 P 2.12.
Apquillhicmoscama Jesús singanamaclha Dios
17Aptomjac alhta mocjam Jesús:
‘Nocollhen nasa apquilvalhoc sicvoy coo, yoyam olvatesquisamcoc singanamaclha Moisés najan profetas apnatalhescama. Acvaac coo, yoyam osavojo sicyiplovquiscama actemaclha singanamaclha. Motvacsejec sat coo. 18Actomjac coo silanya quellhip: Naso, am sat ancoc comascac netin najan nalhpop, comasquejec sat najan lhama actalhamavo actalhesomalhca singanamaclha. Cotnejic sat aclhamoclhojo asoc acvocmo acsovjomalhca.#Lc 16.17. 19Am sat ancoc eyiplovcasac enlhit lhama singanamaclha ayitcoc. Apquillhicmosquic sat ancoc enlhit apnaymacoc actemaclha meyiplovquiscama moclhama singanamaclha ayitcoc, colhic sat acvino as enlhit Visqui netin apquilnancascama. Apyiplovcasquic sat ancoc enlhit aclhamoclhojo singanamaclha, coyiplovjoc sat apquillhicmoscama apnaymacoc, colhic sat actimesa apyimtalhnamo Visqui netin apquilnancascama. 20Apquililtamjoc sat ancoc elvitangvomoc quellhip Visqui netin apquilnancascama. Incaymalhquic yoyam elyiplovcasojo quellhip actemaclha acpeyvomo, am colhno apquiltemaclha apquilyiplovquiscama fariseos najan apquilyascamco apquiltemaclha —alhta aptomjac.
Aplhanma Jesús actemaclha ninlom (nintanoncama)
(Lc 12.57-59)
21Aptomjac alhta mocjam Jesús:
‘Apquillinga inyicje quellhip amyaa nano: “Nongyaa nasa poc.#Ex 20.13; Dt 5.17. Apcajac sat ancoc poc, esilhnanacpoc sat as enlhit” —nic nat intomjac amyaa. 22Coo eyca actomjac silanya quellhip: Aptanovquic sat ancoc poc, ingyavojo esilhnanacpoc. Aptomjac sat ancoc enlhit apcanya poc: “Mongmo apanco lhip” (paj apanco lhip), ingyavojo sat esilhnanacpoc napatavo apquilviscaa apquilpamejitsomap. Aptomjac sat ancoc enlhit apcanya poc: “Apjapac nac lhip,” ingyavojo esilhnanacpoc cosponeyaclha talha —alhta aptomjac.
23‘Apsaclhec sat ancoc lhip apcaycaoc actemaclha ningmescama Dios Ingyapam, iyasingvoclhojo lhip actemaclha aptanovmap. 24Cotnejic ac siclhoc maa apcaycaoc nicja ningmescamaclha ningaycaoc. Iyoclhojo sat siclho aptomja aptanoncama. Ingyane sat ingyasicjiclhojoc mocjam lhip. Ivota sat mocjam. Ilmes sat apcaycaoc actemaclha ningmescama Dios Ingyapam —alhta aptomjac.
25‘Apyantimquic sat ancoc lhip aptomja apquinmelhaycam elyacsic singyicpilquemo tingma pac. Naysicsa apquillhingam ilinlhanmojo etamilcasiclha apvalhoc. Yoyam meyantamoc lhip apnaclha singyicpilquemo. Ingyanic sat singyicpilquemo apquilancam emoc lhip. Elhnescomoc sat lhip singilpilhtetomaclha. 26Actomjac coo siyanya lhip: Naso, metyepejec sat mataa lhip singilpilhtetomaclha mesovjomo apquilhayclha solyayem (apmaycaoc nasa) —alhta aptomjac.
Aplhanma Jesús actemaclha nintovascama singilyimjapma
27‘Aptomjac alhta mocjam Jesús: Apquillinga inyicje quellhip amyaa nano: “Notvas nasa actemaclha singilyimjapma” —ilhnic nat intomjac amyaa.#Ex 20.14; Dt 5.18. 28Coo eyca actomjac silanya quellhip: Inquitsepquic sat ancoc apnenyic enlhit naysicsa apquilaneyo moc quilvana, eyca as aptomja aptovascama actemaclha singilyimjapma ayinyema apvalhoc apanco.
29‘Insilhnanaquic sat ancoc lhip apatic, ilic, iyinyov. Intasi inyicje lhip etnejic apyavec, am colhno eyinyovacpoc lhip apyovoclhojo acyitnaclha cosponeyaclha talha.#Mt 18.9; Mr 9.47. 30Insilhnanaquic sat ancoc lhip apmic (actamilaclha), ilic, iyinyov. Intasi inyicje lhip etnejic appinsem, am colhno eyinyovacpoc apyovoclhojo acyitnaclha cosponeyaclha talha —alhta aptomjac.#Mt 18.8; Mr 9.43.
Aplhanma Jesús actemaclha ningyamasma intava
(Mt 19.9; Mr 10.11-12; Lc 16.18)
31Aptomjac alhta mocjam Jesús:
‘Apquillinga inyicje quellhip amyaa nano: “Apyinyovquic sat ancoc lhip aptava, imques sat quilvana vaycajac actemaclha ningyamasma intava” —ilhnic nat intomjac amyaa.#Dt 24.1-4; Mt 19.7; Mr 10.4. 32Coo eyca actomjac silanya quellhip: Am sat ancoc copatjetamcoc poc lhip aptava, noyinyov nasa aptava. Apyinyovquic sat ancoc lhip aptava, cotvacsic sat actemaclha singilyimjapma aptava. Inquilyimjapeclhec sat ancoc enlhit quilvana actamopeycaoc, eyca as aptomja aptovascama singilyimjapma —alhta aptomjac.#Mt 19.9; Mr 10.11-12; Lc 16.18; 1 Co 7.10-11.
Aplhanma Jesús nintimesquiscama nasoc anco ninlhanma
33Aptomjac alhta mocjam Jesús:
‘Apquillinga inyicje quellhip amyaa nano: “Noyinimquis nasa aplhanma, yoyam colhejec acyascacmo. Itnesquis sat nasoc anco aplhanma napato Visqui ingac” —nic nat intomjac amyaa.#Lv 19.12; Nm 30.2; Dt 23.21. 34Coo eyca actomjac silanya quellhip: Noellhamasap nasa, yoyam colhejec acyascacmo. Noellhen nasa acvisay netin, yoyam colhejec acyascacmo. Equimá Dios Ingyapam aptajanem apanco. 35Noellhen nasa acvisay nalhpop, yoyam colhejec acyascacmo. Equimá actomja apquiltoyam Dios Ingyapam.#Is 66.1; Mt 23.22; Stg 5.12. Noellhen nasa apvisay tingma Jerusalén, yoyam colhejec acyascacmo. Equimá tingma pac Apvisqui apyimtalhnamo.#Sal 48.2. 36Nolhamasap nasa elhenic lhip apcatic, yoyam colhejec acyascacmo. Copvanquejec lhip ingyanic comopiclha apva najan copaysimiclha apva. 37Eltime sat mataa acvamlha: “jey” (eje), najan moc: “paj”. Eyca ninlhamasomalhca ayinyema somquic quilyicjamo —alhta aptomjac.
Aplhanma Jesús actemaclha ningyanmoncasquiclha
(Lc 6.29-30)
Aptomjac alhta mocjam Jesús:
38‘Apquillinga inyicje quellhip amyaa nano: “Inpatic acyanmongayclha inpatic. Ingmaoc acyanmongayclha ingmaoc.” Ningiltimem nincoo: “Inticpongalhquic sat ancoc lhip apvajic, iyanmongsiclha. Iticpong sat lhip lha apvajic” —nic nat intomjac amyaa.#Ex 21.24; Lv 24.20; Dt 19.21. 39Coo eyca actomjac silanya quellhip: Noelyanmoncasiclha nasa enlhit aptomja apmapsom. Inticpongalhquic sat ancoc lhip apmalhimpenic, ingyane sat coticpongalhca moc nicja apmalhimpenic.#Lm 3.30. 40Apquiltamjoc sat ancoc enlhit elnatamoc lhip aptalhnama, nomyov nasa. Imques sat najan apcalomap. 41Apcanayquic sat ancoc enlhit, yoyam esovsic lhip apquilnatam acyavataclhojo, iyiplaclhojo sat lhip. 42Apquilmalhnacpec sat ancoc lhip, imques asoc. Apquiltamjoc sat ancoc enlhit emam siclho asoc, nomyov nasa lhip —alhta aptomjac.
Actemaclha ningasicjayo cotnaja ingmoc
(Lc 6.27-28,32-36)
Aptomjac alhta mocjam Jesús:
43‘Apquillinga inyicje quellhip amyaa nano: “Ingyasicjojo sat lhip ingmoc.#Lv 19.18. Itanova sat lhip cotnaja ingmoc” —nic nat intomjac amyaa. 44Coo eyca actomjac silanya quellhip: Elasicjojo cotnaja ingmoc. Elmalhnesquis asoc altamila enlhit apquiltomja apquilminlhinaycam. (Eltamilsojo sat enlhit apquiltomja apquiltanoncama. Elmalhnesquis sat enlhit apquiltomja apquilyamneycam quellhip najan apquilminlhinaycam). 45Eltimjic sat quellhip apquitquic Ingyapam apna netin. Aptipcasquic mataa acnim Dios Ingyapam, yoyam colsavojo olhma apnamcaclha enlhit apquiltamila najan enlhit apquilmapsomcaa. Apcapajasquic mataa acmamay apnamcaclha enlhit apquilpeyvomo najan enlhit melpeyvomo. 46Apquilasicjacpec quellhip nipyesicsa apnaymacoc. Apquilasicjavoc sat ancoc quellhip apquilvamlha apnaymacoc apanco, ¿soc asoc actamila yi? Acno najan lha apquiltemaclha enlhit apquilvinamap apquilmam tacja solyayem, apquilasicjavoc mataa apnaymacoc. 47Apquilpayvasquic sat ancoc quellhip apquilvamlha apquilmolhama, ¿soc asoc actamila yi? Acno najan lha apquiltemaclha enlhit lhalhma anco. 48Appeyvomo apanco Ingyapam netin. Ellhojo sat quellhip lha, eltime sat apquilpeyvomo —alhta aptomjac.#Lv 11.44-45; 19.2; Dt 18.13.