FELEPAITIƐ 1

Daali‐mai

1Nài gè ga Pɔɔ gá Temete gá ga Ziizɛ Kolai na tii‐ɣɛɛ vea. Taitiɛ ɣaazɔ te Felepai lai zu ga Gala na dɔ numaa te ɣɛɛ vele ma su ɣilekpu ta Ziizɛ Kolaini, gá kɔlɔi nii levesu te wɔ vɛ te vɛɛ Gala pɛlɛ maazu veaitiɛ va ta Gala pɛlɛ vaa yeke‐kɛɛ veaitiɛ. 2Gaazu‐maa‐wõi‐ɣaa ƃɔ‐bai ƃɔga zii‐lai kuloai de ɣeea Gala zeea ta de maliɣii Ziizɛ Kolai ta ɣɛ wo ʋaa ma fãa.

Pɔɔ na Gala‐feliai Kolai maa veaitiɛ ʋaa ma te Felepai

3Siɛ nɛpɛ gà ɣi gaa ziɛ na é vile wo va, gà nà Galagi mama. 4Gà ɣɛ na Gala felizu wo pɛ wo ʋaa ma ga ɣee nɛpɛ, gà kɛ ga kuu‐zu‐nɛɛ. 5Wo ɣɛɛ‐zuvɛ wo ná ɣɛɛzu woo niinɛ vagɔi ʋaa va é ziɣi ƃɔɔ folo maa wũgi ma é loo zai ŋɛ ni ma, gà mamama feezu Gala bɛ. 6Dàavɛ la ga nui nii é tii vagɔ maʋaa lɔɔ zeiya wo yii zu towaa daa wulo ga Ziizɛ Kolai vaa ʋoloi. 7Tɔ pele ma ga gè ɣi gaa ziɛ ŋɛ na é vile wo ɣaazɔ va, ƃɔvɛlaale wo maʋai ɣa laani zìi ma, toku ge zei ga wo pɛ wo vɛɛvɛ bà a de wɔɔ laa ɣɛ Gala na maa‐wõi‐ɣaa ƃɔ‐bai va. Gè ɣɛ̀ɛvɛ kpidi vɛlɛ wu wo vɛɛvɛ bà. Gè ɣɛ wɔnɔ goo‐zu‐wulo bosu gìɛ dɛ ga woo niinɛ vagɔi maʋai ɣa ga gaama, wa ɣɛ nɔ bà. 8Tɔwɔ velei gè wo maa‐wõi‐wõi kulozu la wo ɣaazɔ ga Ziizɛ Kolai na wõila luoi Gala ka ga mazeele. 9Nà Gala‐feli woi ɣa ga wa wõila zu yíɛ wɔɔlɔ ma nɔ kelẽi ga kele‐ɣele é vɛɛ faa‐ɣaa‐ɣaa ʋaa mazii ɣaazɔ va, 10kɛɛ ʋaa ma nii pagɛi faa ta lɛ ba wo yee zei maʋai wu. Na ɣa ɣɛɛ na wo maa wuo wo ɣɛ ga nui faa lɛ ɣɛɛ ba Kolai na kui ma, 11wo yii laa ʋegɛi ga tele‐bo tuoi zu‐lɔnɔi yá va wo wɔ Ziizɛ Kolai zaala zu, kɛɛ ʋaa ma wiɛ Gala bɔɔlɔ wiɛ daa maa lɛ.

Kolai ɣa é ga zɛʋui Pɔɔ ɣaazu

12Nà numaa, gè wõini wo kwɛ̃ɛ ga fai é ɣɛɛ gàazu é kɛɛ woo niinɛ vagɔi maʋaa li ga zee luo vele. 13Nii mavele ma, kwɛ̃ɛgɛ sa gɔmɛti nu walai maa zɔdasiitiɛ ɣaazɔ vɛ é vɛɛ nui matai ɣaazɔ va ga pilisinelai gè su gà su Kolai ʋaa ma. 14Na ɣa ɣɛɛ na nà pilisinelai mazaƃu ma zii‐lɔɔ viligɛ de vaitiɛ bɔɔlɔ zu yii zu te ɣɛɛ vele ma su ɣilekpu ta de maliɣiini. Te wala ɣɛɛvɛ sa ga duo lala vea tiɛ Gala daa woi wo duo ʋaa nɛpɛ gɛ lɛ ba.

15Ƃɔɔƃɔɔ su nui taniga ta Kolai mawoi wosu ga kuu‐zu‐yii, taniga tiɛ bo ga kala faa, zɔitiɛ wɔ tiɛ bo tuo vele vagɔ zu. 16Gaa‐ƃelagi niitiɛ ta kɛɛzu wõilai zu é te ya fàa ma, kwɛ̃ɛgɛi tiɛ ga togi nii gè su gà su ga gè woo niinɛ vagɔi mawoo‐zu‐wulo bo. 17Nu maa wũgitiɛ gè ʋaa te ma ta Kolai maʋai wosu ga woo maa zeezea teve‐pulu ɣi‐gaa‐ziɛi zu. Tɛ lɛ kɛɛzu ga ƃɔɔƃɔɔ su vele. Kɛ̀ ta ɣi gaa ziɛzu ga te faa ƃoei zei mà nà pilisinelai zu. 18Zɛƃɛ mu be? Tɔ nɔ ga te ɣɛɛvɛ ƃalaa kɛɛzu pele mazii ta nɛpɛ su vele, tiɛ ƃɔɔ wulo ga ta kɛɛzu ƃaa te ɣɛni kɛɛzu ga ƃɔɔƃɔɔ su, Kolai mawoi nɔ na a wo ga seeze. Tɔwɔ na ɣa gà kuu‐zu‐nɛɛ wulo su. Ooi, gà kuu‐zu‐nɛɛ wulo. 19Ƃɔvɛlaale gè kwɛ̃ni ga wa Ɣala‐feliai zaala zu é vɛɛ Ziizɛ Kolai vaa ŋinɛgi na kpɔ‐bai va, fai nii ɣa va wotesu ga nà kulo‐faa‐zu ʋaa. 20Maʋai wɔɔlɔvɛ gàazu gìɛ ná maa kpowũ kìgi bá ga wũfe gɛ lɛ viliga mà. Kɛ̀ zìi laa ʋegɛ ga zii‐lɔɔ zai ŋɛ ni è ɣɛ velei nɔ é la ga ɣee nɛpɛ ga gà ƃaa la Kolai ma nà kagi, gè kɛɛvɛ ƃalaa ʋulu‐ʋulu gá ƃaa gè kɛ saa maazu. 21Su‐wulo‐zu ɣa ga nii. Nà dɔ ɣigi zu nu yɛʋu ɣa yɛ na zéea, Kolai ve. Nu ɣa zaa na wɔnɔ, nàa ga kulo‐nu‐ma ʋaa. 22Ani zɛ̀ʋui ɣa ɣɛ na zèea nu ƃuse ŋeteai zu, su‐wulo‐zu ɣa ga tɔnɔ‐ba lii fàa ma. Na ƃalaa ɣɛɛvɛ gɛ̀ lɛ kwɛ̃ni ga nii gà siɣi ga yii‐mai. 23Kàtagɛ ná ɣɔɔzu ƃɔɔ kpe. Vɛ ná wõi wala mà tɔ ga gè ziɣi ŋetea gè ɣɛ Kolai va, ƃɔvɛlaale nà ɣa pagɛi fai pɛ ba. 24Tɔwɔ zɛ̀ʋui‐yɛ fai wɔnɔ zèea nu ƃuse ŋeteai zu, tɔ ga fai gwala vagɛi ga é ɣɛ wo ʋaa ma. 25Dàa vele ma ga fai nii, gà yɛ na gè ɣili ƃɔga va wo pɛ wo va wo maʋaa lii ʋaa ma ga ná yee luo vele ta wo wuu‐zu‐nɛɛ ʋai zee‐la‐mai zu, 26kɛɛ ʋaa ma zaƃu wɔɔlɔ ba wo ya sàala zu ga wo wɔɔlɔ ƃɔɔ ɣaazu wo ɣɛɛ vele ma su ɣilekpu wa Ziizɛ Kolaini. Toku ge zei pàa ʋai va wo wɔ kɔnɔ.

27Nii nɔ wa kɛ tɔ ga wo ƃe ba wo luo velei ɣɛ ga fai solowogɛi Kolai mawoo niinɛ vagɔi ma, kɛɛ ʋaa ma gè vaani gè wɛlɛ wo va ƃaa gè ƃe ɣɛɛzu wo woba, gè wo maazu woo mɛni ga wa loni kpãa wo ɣigi ɣile, wa ɣi‐gaa‐ziɛi ɣile, wo ɣeeɣi da wiɛ ɣaa ƃaa woo niinɛ vagɔi ʋaa ma wo siɣia ga gaama. 28Wo mɛ lɛ luo ŋɛni ta nɛpɛ ba niitiɛ ya te logɛi wo la. Nii ɣa ga seele ɣaa wodoa te zu‐ŋala‐ŋala faa ma é ga seele wo valo ʋaa ma. Tɔwɔ balolai na wulovɛ Gala zeea. 29Gala faavɛ bu wo ya Kolai zaƃu zu ga wo mɛ lɛ nɔ maʋaa ziɣi ga gaama ɔ́ wɛ̃ɛ minɛ, kɛ̀ wo laa nɔwɔ wo ƃalaa pɛ mázaƃu ma, 30kɛɛ ʋaa ma wo vɛɛ ŋapii nii va wo wɛlɛɛ bà wɔlɔ gá wiɛ mɛni ga gà dɛ gá.

Currently Selected:

FELEPAITIƐ 1: DN1971

Highlight

Copy

Compare