ƐFƐSƆITIƐ 5

1Tei tɔwɔ wo ga Gala wõila lea, a ɣɛ ga Gala po‐kɔ̃ɔ bea. 2A wiɛ ziɛ ga wõila mavele è ɣɛ velei Kolai wõini la ga diɛ é ɣi kulo ƃɔɔ zu de ʋaa ma é ƃɔɔ wulo ga zalaɣa wũ‐nɛɛ‐nɛɛ é ƃɔɔ ʋe Gala bɛ. 3Kɛ̀ wɛ̃ɛ‐ziɛ‐boga vɛɛ maa‐yɛ̃ɛlɛ tuo ɣaazɔ va ɔɔ kuu‐zu‐yii‐wuloa, maa lɛ nɛɛni fai niitiɛ tɔ ʋɔlɔ ƃalaa ɣɛ ga wo yɛpɛ woo. Tɛ lɛ zolowoni nui niitiɛ zaama te ga Gala na dɔ numaa. 4A mɛ lɛ ƃɔɔ wɔtɔ ɔ́ nɔ ɣɛ ga wo titi zɛpɛ wu ɔɔ wo numaa wãla‐ma ʋaa ɣɛ ga soloya‐wulo yɛpɛ. Natiɛ tɛ lɛ zolo‐woni. Kɛ̀ nii mugi wa kɛ tɔ ga wiɛ mama fe Gala bɛ. 5A la ga nii. Nui nɛpɛ é ga wɛ̃ɛ‐ziɛ‐bo nu ɔɔ maa‐yɛ̃ɛlɛ tuo‐wo nu pɔɔ laa lɛ ɣɛɛ Kolai ƃɔga Gala ta masadai va. Nui wɔnɔ é ga kuu‐zu‐yii nu pɔɔ laa lɛ ba, ƃɔvɛlaale kuu‐zu‐yii nu ɣa ga maa‐niini gala‐feli nu.

A ziɛ è ɣɛ ŋada wodoai zu vea

6Tuoi niitiɛ mazaƃu ɣa Gala na zii‐ɣaa‐wãlai ɣa ziiti la goo‐mɛni tala veaitiɛ ma. Na ma a mɛ lɛ laa zei wo ɣaa‐wɔlɔ goo wu nu ta nɛpɛ zeea. 7A mɛ lɛ vile wulu wa tiɛni. 8Ƃɔvɛlaale wo ɣɛni wɔlɔ ga ŋada ƃidia, kɛ̀ wa sa ga ŋada wodoa de maliɣii zaala zu. A ziɛ è ɣɛ ŋada wodoai zu vea. 9Toku seivɛ ga ŋada wodoai malɔnɔi ɣa vɛtɛ fai ɣaazɔ zu pagɛi é pele ma é ga gaama. 10A ɣaa ƃaa wiɛ fai nii ɣɛ yá ɣɛ ga de mailiɣii nɛɛ‐bɛ ʋaa. 11A mɛ lɛ wɔɔ laa nɛpɛ too kpidi liitiɛ va. Te zu‐lɔnɔ lɛ ba. Kɛ̀ to mu a wiɛ te maʋaa wulo podo ɣala‐kala ga. 12Ƃɔvɛlaale tɔ ʋɔlɔ ƃalaa ga wũfe faa ga nu yɛpɛ é vile fai nii va ta kɛ doowu zu. 13Kɛ̀ ŋada wodoai ɣa ŋɛni ta nɛpɛ kulo na kala‐kala ga, maŋɛnii ɣa ɣɛ sa ga ŋɛnii nii nu ɣa ɣaazu la ma, ƃɔvɛ‐laale ŋɛni nɛpɛ nu ɣa ɣaazu la ma gaa ɣa wodo è ɣɛ ŋada wodoa. 14Na ma bogɛ mawoi ga

“Yai è ŋiizu, ɣaazu lao è wu ziɣi saa ya, Kolai ɣa ʋolo è ma.”

15A wɛlɛ na va ga pagɔ ga velei wa ziɛ la, wo mɛ lɛ kɛ ga velei titi beaitiɛ ta kɛɛ la, kɛ̀ wo kɛ ga kele‐ɣele beaitiɛ ta dɛi ɣavele. 16A ɣaa ƃaa ga pelei ɣaazɔ zɔi wa zoo da wo kɛ siɛgi nii ʋaa ma, ƃɔvɛlaale siɛgi nii zu yowũvɛ. 17Na ma a mɛ lɛ titi kulo. Kɛ̀ nii é ga de maliɣii yii‐mai a gaa ɣa. 18A mɛ lɛ ƃe ba dɔɔ ɔ́ wo zo, ƃɔvɛlaale na ɣa ga bɛlɛ lala luo‐woga. Kɛ̀ a ƃe ba Gala baa ŋinɛgi é wo yii laa ʋe. 19A wiɛ ƃɔɛ ɣiini pɔ ga Gala daa‐maa‐lɛɛ wui‐loa wiɛ gui nɛɛ‐nɛɛ too de maliɣii ma ga yii ɣaazɔ. 20A wiɛ mama fe de ɣeea Gala bɛ ga ɣee nɛpɛ ŋɛnii ɣaazɔ ʋaa ma de maliɣii Ziizɛ Kolai na daa‐zeigi zu. 21A wolo ɣiini bɛ wiɛ kɛ Kolai na wũfe‐mai zu.

Ŋaza kɛɛ ʋeaitiɛ ƃɔga te ŋazaitiɛ

22Zini‐bɛ veaitiɛ, a wolo wo wɔɔ veaitiɛ vɛ è ɣɛ wa ɣɛ kɛɛzu de maliɣii vɛ. 23Ƃɔvɛlaale nui é ga zunui tɔ ɣa é ga ŋázai mawũgi è ɣɛ velei Kolai la ga Gala pɛlɛi mawũgi. Gala pɛlɛi ɣa ga malɔtɔi. Tɔ ɣagi ɣa é ga Gala pɛlɛi valo nui. 24Velei nɔ Gala pɛlɛi woloai la Kolai vɛ, vele nɔ na pagɛi zini‐bɛ vea te wolo la te wɔɔ veaitiɛ vɛ faa ɣaazɔ zu. 25Wai wo ga ŋaza kɛɛ vea, a wõi ga wo ŋazaitiɛ è ɣɛ velei Kolai wõiya la ga Gala pɛlɛi é ɣi kulo ƃɔɔ zu maʋaa ma, 26kɛɛ ʋaa ma é kulo su ga tee Gala faa ma. É Gala pɛlɛi maa ziɣia guo vele ma bɛ́ ga ziɛ ta Gala goi, 27kɛɛ ʋaa ma é kɛ saala la Gala pɛlɛi ma gaazu, ŋada wo kolo ƃalaa mɛ lɛ ɣɛ ba ɔ́ nɔ ɣɛ ga su‐zei‐zu ɔɔ na mazii ɣavele ta nɛpɛ. Na ɣa ɣɛɛ na é ɣɛ ga ŋɛnii maa ɣa wuo kawɔ‐zu lɛ ɣɛɛ ba. 28Vele nɔ na ƃalaa é la ga ŋaza kɛɛ veaitiɛ. Pagɛ te wõi ga te ŋazaitiɛ è ɣɛ velei te ƃɔɔ lɔtɔi wõini la. Nui é wõini ga ŋázai, manui ƃɔɔ ɣagi wõini. 29Ƃɔvɛlaale nu ta lɛ wɔlɔ‐wɔlɔ zilia ga ƃɔɔ lɔtɔi. Kɛ̀ to mu towaa ɣɛ gaa wɔsu yíɛ sɛ‐sɛ bo è ɣɛ velei Kolai kɛɛzu la ga Gala pɛlɛi, 30ƃɔvɛlaale dai de ga Gala pɛlɛ wu veaitiɛ da ga dɔtɔi ta. 31Ponɛvɛ Gala kɔlɔi zu mawoi ga “Nii mazaƃui ma zunu ɣa ƃe keea va ta dee é ɣata ŋazai va. Na ɣa ɣɛɛ na te felegɔ te ɣɛ ga ŋɛni ɣila.” 32Nii ɣa ga faa ƃakpai doowugɛi yɛga. Nài gè ga Pɔɔ fai nii zu‐wulo‐zuvɛ ɣa gàazu ga Kolai ƃɔga Gala pɛlɛi. 33Nii pɛ ge ɣɛɛvɛ, wo ɣile‐giledai a wõi ga wo ŋazaitiɛ è ɣɛ velei wo ƃɔɔ wõini la. Wai wɔnɔ wo ga ŋazaitiɛ, a wɛlɛ na va ga wa wũfesu wo wɔɔ veaitiɛ ma.

Currently Selected:

ƐFƐSƆITIƐ 5: DN1971

Highlight

Copy

Compare