ƐFƐSƆITIƐ 4

De ɣɛɛ ʋai su ɣilekpu Gala baa ŋinɛgi vɛ

1Na ma nài gè ga pilisine de maliɣii ʋaa ma, gà bosu wiɛ ga pee vele ga wo tuoi nii wo solowogɛi tiligi ma bogɛi ga wiɛ. 2Wa kɛ ga kolo‐wuloa ta sɛ‐sɛ‐bo tuo‐woga. A kɛ ga zii‐lɔɔ wiɛ yii lɔ ɣiini kɛɛ‐zɔ ga wõilai zu. 3Wo ɣɛi Gala baa ŋinɛgi boga su ɣilekpu a wiɛ ɣaa ƃaa ga wo yee ɣata na va. Wa nii ɣɛ ga zii‐laa luo‐woga ga ɣiini. 4Wa nɔ ga dɔtɔ gila su vea, Gala baa ŋinɛgi wɔ ge nɔ ɣilekpu, è ɣɛ velei nɔ wo liligɛi la ki‐to gilagi nii ma é ga wa liligi zu ŋɛni. 5De maliɣii ɣa ɣilekpu, da yee‐la‐mai ɣile, bataizei nɔ su ɣile. 6Gala ka nɔ ɣile é ga de pɛ de ɣeeai, é ŋɛni pɛ maazu ŋɛni pɛ ge saala zu é ŋada ɣaazɔ. 7Kɛ̀ maa‐wõi‐ɣaa ƃɔ‐bai wogɛ ga de ɣile‐giledai. Kpɔ‐bai wɔ siɣivɛ nɔ faa‐nɛɛ liigoi la Kolai kɛɛ de ɣile‐giledai vɛ. 8Na ma ponɛvɛ Gala kɔlɔi zu mawoi ga

“Tei é lɛɛni ƃɔɔ powũ gee‐zuvɛ, é pele wuloni ga

pilisine lamaa

é faa‐nɛɛ ɣɛ sa nu ƃusei vɛ.”

9Da bo na ga é lɛɛni gee‐zuvɛ, na zu‐wulo‐zu ɣa ga minɛ? Kɛ̀bɛ su‐wulo‐zu nɔ ga é yiini zui wu vele ƃalaa pɛ. 10Nui nii é yiini tɔ nɔ ɣa wɔnɔ é lɛɛni gee wɔlɔgi maazu vele powũ, kɛɛ ʋaa ma maʋai kulo‐ɣɛɛ wo ŋadɛi ɣaazɔ. 11Tɔwɔ Kolai na faa‐nɛitiɛ zu‐wulo‐zu ɣa ga nui taniga te ɣɛ ga keela, taniga te ɣɛ ga daa woo‐wo bea, taniga te ɣɛ ga woo vagɔi‐wo bea, taniga te ɣɛ wɔnɔ ga pasitaa ta kala‐mɔa. 12Niitiɛ ɣɛɛvɛ kɛɛ ʋaa ma taitiɛ te wuloai su ga tee ga Gala na dɔa é te ɣavele ƃɛtɛ tii ʋaa ma ta ɣɛ kɛɛzu bɛ́, dai de ga Kolai lɔtɔi de maʋai lii ʋaa ma ga zee luo vele 13é yɛsu é zolowo su de ya ga a de ɣɛ su ɣilekpu zee‐la‐mai zu a de ɣi daa wodo Gala dui maʋai zu. Na ɣa ɣɛɛ na a de ɣɛ ga numaitiɛ te wɔɔlɔɔ ga daa ʋega ta ŋeteai zu ga te ɣɛ ga Kolai ɣavele. 14De mɛ lɛ wɔlɔ‐wɔlɔ ɣɛ sa ga lopaa ɣavele, kala‐bo fai mazii ɣaazɔ ɔ́ ɣɛ de laa‐zu lamasu nu ƃuse na gbana luoi zaala zu tɔ ɣɛ kɛɛzu ga de ɣaa‐wɔlɔ pele. 15Kɛ̀ to mu a diɛ gaamai wo wõilai zu. Kɛni a da ɣɛ liizu ga yee luo vele pelei ɣaazɔ zu yá de ɣɛ su ɣilekpu a da de mawũgi, na ɣa ga Kolai. 16Tɔ ɣa é maa vea ƃulugi ɣaazɔ vilega kii va ŋada ɣila é te zolowo su. É te ɣɛɛ su ɣilekpu pelei ɣaazɔ zu ga velei é te vile‐pilega la kii la. Tii‐ɣɛɛ vele ma te ɣile‐giledai vɛ ta wɔɔlɔzu wõilai zu te maʋai yìɛ li tuo ma.

Ŋetea niinɛi

17Woi nii ɣa gè wo lɛnɛsu la de maliɣii na daa‐zeigi zu. Na ɣa ga wo mɛ lɛ sa wɔlɔ‐wɔlɔ luo ga zii ƃalaagitiɛ luo vele faa yãka ɣi‐gaa‐ziɛi nii zu é te ma. 18Ta ɣele‐ɣelegi ɣaa ƃidivɛ te ga wɛ̃ɛ Gala tuoi ʋaa ma toku ge zei faa ɣaa‐ɣaa lalai va ta wui‐zu‐ƃɔlɔ fai mavele ma. 19Te ɣɛɛ sa tikili. Na ɣa ɣɛɛ na te ƃɔɔ ɣɛɛ ga ƃaa‐wulo‐ma vea. Maa‐yɛ̃ɛlɛ tuo mazii ɣaazɔ mayii viligɛ te wuu zu. 20Wɛ lɛ na ɣavele luoi vɛtɛni Kolai ya!— 21Kɛ̀bɛ te faa woni wiɛ é vile ba? ?Tei tɔwɔ wo ga maa vea, tɛ lɛ wo ɣala boni ga gaamai nii é ná ŋeteai zu? 22A wo luo vele wɔlɔ‐zaɣagi loo ya. Na ɣa wa ŋetea wɔlɔ‐zaɣagi ʋaa ma. Tɔ ga nu zu‐ƃɔnɔ‐wo faa kuu‐zu‐yii yá nu ɣaa wɔlɔ mavele ma. 23A ɣɛ wɔnɔ ga nu niinɛa ki‐gaa‐ziɛi nii mavele ma é wo ɣigi zu, 24wo tuo niinɛi nii ziɣi kpɛtɛi Gala tuoi ʋaa ma ga é ɣɛ ga tele‐bo tuo ƃɔɔƃɔɔ ta tuoi maa wuai.

25Na ma a zɛɛ ʋaa luoi loo ya. Na ɣa ɣɛɛ na nui ɣaazɔ yìɛ gaama wo bɔɔ nu ma, ƃɔvɛlaale a de vile‐pilegɛ ɣiini ba. 26A zii‐ɣaa‐wãla wo, kɛ̀ a mɛ lɛ faa yowũ ɣɛ. A mɛ lɛ ƃe ba zii‐ɣaa‐wãla ɔ́ yɛ wo wɔlɔ ga ɔ́ yɛ su folo ɣai ɔ́ too. 27A mɛ lɛ pele ta nɛpɛ fe dɛvele ya. 28Nui é ga wũmɔ nu, é mɛ lɛ sa wɔlɔ‐wɔlɔ wũmɔ wo. Kɛ̀ to mu é tii ɣɛ ga yee ga gaama vele, kɛɛ ʋaa ma é zoo é faa‐nɛɛ ɣɛ niitiɛ vɛ te ƃalai. 29A mɛ lɛ ƃe ba faa yowũ ta nɛpɛ gɔ wulo wo la wɔ bo. Kɛ̀ nii yá nu yii la solowogɛi fai nii zu wa ɣɛ ma, a wiɛ na wo nɔ, kɛɛ ʋaa ma é ɣɛ ga kpɔ‐ba numai niitiɛ ʋaa ma ta mɛni. 30Na ɣa ɣɛɛ na a mɛ lɛ Gala baa ŋinɛgi yii zuuli. Towaa Gala ge pɛɛ wo va ga yee‐wo wo wũ‐maa‐wo foloi ʋaa ma. 31Faa‐wãla‐ma ʋaa, zii‐ɣaa‐wãla wala, mawolo, doba‐yãka‐woga é vɛɛ daa‐woo‐yowũ‐woga va, a na ɣaazɔ loo ya é vɛɛ kuu‐zu‐ƃɔlɔ ʋaa ɣaazɔ va. 32A ɣɛ ga tuola‐nɛɛ vea ɣiini faa ma wiɛ ɣiini sɛ‐sɛ bo wiɛ ɣiini su ʋaa yɛ è ɣɛ velei Gala ge wo zu ʋaa yɛni la Kolai zaala zu.

Currently Selected:

ƐFƐSƆITIƐ 4: DN1971

Highlight

Copy

Compare