ƐFƐSƆITIƐ 3

Pɔɔ na tii zii ƃalaagitiɛ ʋaa ma

1Nii mazaƃui ma, nai gè ga Pɔɔ gè ga pilisine Ziizɛ Kolai ʋaa ma wo mazaƃu ma, wai wo ga zii ƃalaagitiɛ— 2nà ki‐gaa‐ziɛi ɣa ga wo faa mɛniga é vile Gala na maa‐wõi‐ɣaa ƃɔ‐bai va feeai zèea ga gè daa ziiti wo ma. 3Na ɣa ga fai nii doowugɛi yɛga, velei gè gaa ɣaa la kulo vele ma Gala bɛ kɛnɛ ma gàazu, è ɣɛ velei gè ponɛɛ la kɔlɔi nii zu ga su ƃua. 4Wa nii lodo na, wa wɛlɛ na va ga velei gè fai nii ɣaa ɣaazu la doowugɛi yɛga é vile Kolai va. 5Na ɣa ga fai nii gaa lɛ ŋɛni wodoni ga nu ƃusea wɔlɔ‐wɔlɔi zu, tɔwɔ maʋaa wuloa sa kɛnɛ ma niitiɛ ɣaazu te wuloai su leelaa ga Kolai na keelaa ƃɔga daa woo‐wo bea. 6Fai nii gè ʋaazu ma tɔ ga tei tɔwɔ zii ƃalaagitiɛ te su ɣilekpu ta Ziizɛ Kolaini te vɛɛvɛ sa gé va gé ƃɔ weli ma, te ga nu ƃulugi nii gé su su‐veaitiɛ te ta, te wɔɔ laa wɔnɔ ki‐togi va woo niinɛ vagɔi zaala zu. 7Woo niinɛ vagɔi nii ɣa gè ɣɛɛni ga malii‐ɣɛɛ nu Gala na maa‐wõi‐ɣaa ƃɔ‐bai zu ʋaa‐nɛi mavele ma, na ɣa ga nii feeai zèea ná gaa‐ƃaa lii‐ɣɛi zaala zu. 8Velei ƃalaa tòai la niitiɛ ɣaazɔ wu gá tiɛni gé wuloai su leelaa ga Gala na numaa, maa‐wõi‐ɣaa ƃɔ‐bai nii woni gàazu, kɛɛ ʋaa ma Kolai weli tama‐lamagi nii maʋaa ɣaa ɣaazu ƃai gè maʋaa wo zii ƃalaagitiɛ ma. 9Na ɣa ɣɛɛ na fai nii doowugɛi wɔlɔ ŋɛni‐pɛ‐kpɛtɛ Ɣalagi vɛ ga su woozaa, gè kɛ nu pɛ ge maleʋei wɛ̃ɛ, 10kɛɛ ʋaa ma Gala na kele‐ɣelegi tamai su maʋaa wulo kɛnɛ ma gee‐wɔlɔgi‐zu masaga ɣaazu ta ná ɣaa‐ƃaa vea Gala pɛlɛi zaala zu. 11Nii ɣɛɛni ga wɔlɔ‐wɔlɔ‐kulo‐tɔsɔ leʋei zu ʋaa‐ɣɛɛ nii é kpɛtɛni ga é leve ma de maliɣii Ziizɛ Kolai zaala zu. 12Towa de lai la ga da va Gala pɔ ga duo lala vele sáala zu de laa vele ma la. 13Na ma gà wo lɛnɛsu ga wo ʋii mɛ lɛ ƃɛɛ fai nii zu gè malaa‐nɔwɔ‐wo bosu wo ʋaa ma. Towa é saala laazu wo ma.

Kolai na wõilai wɛ̃ɛ fai

14Nii mazaƃui ɣa gè vɛɛzu la de ɣeea wɔwɔ wu. 15Na ɣa ga de ɣeeai nii zui zu ɣaalai ɣaazɔ ƃɔga gee‐zuvɛ ɣaalai ɣaazɔ ta daa‐zei maa zɔlɔ wo zéea. 16Gà vɛɛzu kɔwɔ wu ga é kɛ baa ŋinɛgi é wo yii lɔ ga gaa‐ƃaa ná bɔɔlɔla walai mavele ma. 17Na ɣa ɣɛɛ na é kɛ wɔnɔ Kolai ɣɛ wo yii zu zee‐la‐ma zaala zu. Gà vɛɛzu kɔwɔ wu ga é kɛ wo mayãta vili wo lo kpãa wõila zu, 18kɛɛ ʋaa ma gaa‐ƃaa ɣɛ wo ya ga niitiɛ ɣaazɔ te ga Gala na dɔ numaa wo vɛɛ te va wa tiɛni wo Kolai na wõilai maʋaa wo‐ma wɔɔlɔ velei ɣaa ɣa ta zee laa wooza pelei é vɛɛ velei va maʋai zuwuai la. 19Na ɣa ɣɛɛ na wo wõilai ƃɔɔ wɛ̃ɛ, velei ƃalaa pudɛgɛi la nu ƃuse na kele‐ɣelegi maazu. Wa kɛ ŋɛ na kɛɛ ʋaa ma nii nɛpɛ é Gala zeea wo ʋaa ma é wo yii laa ʋe da.

20Tɔwɔ Galagi nii yá zoo é faa lamaa ɣɛ de vɛ é leve niitiɛ ɣaazɔ va da zoo de feli ma ta niitiɛ da zoo de ɣi gaa ziɛ te ma gaa‐ƃai nii é tii ɣɛɛzu la de zaama mazaƃui ma, 21towa daa‐maa‐lɛɛ ɣa wo da ná pɛlɛi zaala zu ta Ziizɛ Kolai. Daa‐maa‐lɛɛ ɣa yɛ wosu la ƃɔɔ wɔ ŋetea li ŋetea va. Towaa ɣɛ ŋɛ na.

Currently Selected:

ƐFƐSƆITIƐ 3: DN1971

Highlight

Copy

Compare