ƐFƐSƆITIƐ 1

Daali‐mai

1Nai gè ga Pɔɔ, gè ga Ziizɛ Kolai na keelai ta Gala zii‐mai mavele ma, nà ɣa gè kɔlɔi nii wonɛzu wo wɔ wai wo Ɛfɛsɔ wo wuloai su ga tee ga Gala na dɔa wo wɔnɔ ga numaitiɛ nu ɣa la ga tiɛ wo ɣɛɛ vele ma su ɣilekpu wa Ziizɛ Kolaini. 2Maa‐wõi‐ɣaa ƃɔ‐ba ɣa wo ga wiɛ fãa. Na ɣa ɣɛɛ na de ɣeea Gala pɛ, de maliɣii Ziizɛ Kolai pɛ, wa zii‐laa maa zɔlɔ wo te ya fãa.

Gala tuuyiɛi Kolai zaala zu

3Kaze lɛ Galagi nii ma é ga de maliɣii Ziizɛ Kolai keea é ga ná Galagi! Tuuyiɛi nɛpɛgi é zéea gee wɔlɔgi zu é toa de ma de ɣɛɛ vele ma su ɣilekpu da Kolaini. 4Ŋeteai maʋaa lɔɔ ɔ́ teɣa ɣɛ zeizu é yee ƃadoni de va Kolai zaala zu ga a de maa wuo maa‐wulo‐zu mɛ lɛ ɣɛ de va gáazu. 5Ná wõilai mavele ma é ná yɛni ná luo é yee la ga diɛ ga de ɣɛ ga dea Ziizɛ Kolai zaala zu. É nii ɣɛɛni ga é yii‐mai maʋaa laa zo, 6kɛɛ ʋaa ma ƃaa‐la‐ma ƃɔ‐bai é boga ga diɛ wõila lui zaala zu, da wɔ dɛ lɛ maa lii ɣɛɛni, de nà malaa‐maa‐lɛɛ wo da. 7Wũ‐maa‐wogi woga ga diɛ de ɣɛɛ vele ma su ɣilekpu a da duini, na ɣa ɣɛɛ na da lɔ‐kãla‐ŋala tuoi zu ʋaa yɛ dui ƃɔɔ maŋamai zaala zu. É nii ɣɛɛni ga velei ná maa‐wõi‐ɣaa ƃɔ‐bai wɔɔlɔi la. 8Na ɣa ga kpɔ‐bai nii é maʋaa laa loa ga diɛ. 9Ƃɔvɛlaale nii doowugɛi yɛga zii‐ma ʋai zu é maɣele‐ɣelegi ɣaazɔ lɛɛ ga diɛ é kɛ diɛ gaa ɣa. É deʋeni ga zii‐ma ʋai nii leve ma Kolai zaala zu. 10Tɔ ga deʋei nii mawui ɣa daa ʋe na, ŋɛnii ɣaazɔ é gee‐zuvɛ ta niitiɛ te zui ma é te ɣɛ ga ŋɛni gila Kolai yee wu. 11-12Nui nii yá ŋɛni ɣaazɔ maʋaa maala leve è ɣɛ velei nɔ ná deʋei la, manui yee ƃadoga de va wɔlɔ Kolai zaala zu. É de wuloni è ɣɛ velei ná deʋei la, kɛɛ ʋaa ma daitiɛ de ɣɛɛ ga nu maa wũ de Kolai ziɣi ga de ɣi‐to‐su de ɣɛ ga daa‐maa‐lɛɛ‐wo bea ná saala‐malai ʋaa ma. 13Wai ƃalaa pɛ wo gaama woi mɛniga nii é ga wa valolai mawoo niinɛ vagɔ, tɔwɔ wo maʋai ziɣi ga gaama, wo ɣɛɛ vele ma su ɣilekpu wa Kolaini, Gala ge yee‐wo zɛni wo va baa ŋinɛgi leve pele ma wo wɔ nii é wo ɣi toni la. 14Baa ŋinɛgi nii ɣa é yɛsu de weligi wo ga yíɛ dɛ ga da maa zɔlɔ wo ƃɔɔ ti, kɛɛ ʋaa ma diɛ Gala daa maa lɛ ná saala‐malai ʋaa ma.

Pɔɔ na Gala‐feliai

15Nii mazaƃui ma tei tɔwɔ gè faa mɛniga é vile wo yee‐la ʋai va de maliɣii Ziizɛ ma ta wõilai é wo ya é vile Gala na dɔ numai‐tiɛ va, 16gɛ̀ lɛ ƃɔlɔga Gala mamaga va wo ʋaa ma. Wo laa ɣi ka ɣɛ gà nà Gala‐feliai zu, 17kɛɛ ʋaa ma de maliɣii Ziizɛ Kolai na Galagi nii é ga saala‐malai maɣeeai é kele‐ɣele ki‐gaa‐ziɛ ɣɛ wo ma é wo ɣi daa wodo tɔ ɣagi maʋaa zu. 18Gà ɣɛ felizu ga wo ɣi daa ɣa wodo na ŋɛ na, wo ki‐togi nii wɛ̃ɛ é wo liliga ma wiɛ saala‐ma ŋɛni lama‐lamagi wɛ̃ɛ é zéea ná dɔ numaitiɛ zaama. 19Na ɣa ɣɛɛ na wo kwɛ̃ɛ ga velei ná gaa‐ƃai wala wɔɔlɔi la de zaama, dai de maʋaa ziɣia ga gaama. Na ɣa ga gaa‐ƃaa lii walai na 20é maʋaa maala leveni Kolai zaala zu, tei é bu ziɣini saa ya é kɛ é zei ga zee‐za‐su vele gee wɔlɔgi zu. 21Gwala lɛɛvɛ masada ɣaazɔ maazu vele. Tɛɛvɛ gaa‐ƃaa pɛ maazu ta gɔmɛti ʋaa ɣaazɔ é vɛɛ maazu‐ʋaa‐wo‐bo faa ɣaazɔ va. Na ɣa ɣɛɛ na ná daa‐zeigi ɣa daa‐zeigi ɣaazɔ maazu da tili. Ɛ́ lɛ nɔ ga ŋeteai nii zu laa‐zeiga, kɛ̀ niitiɛ ƃalaa te ŋeteai zɔi zu é vaazu wulozu. 22Gala ge ŋɛni pɛ pua kɔwɔ wu é kɛ ga ŋɛni pɛ mawũ Gala pɛlɛi ʋaa ma. 23Na ɣa é ga málɔtɔi nii daa ʋegɛi bɛ́. Towaa é ŋɛnii pɛ daa ʋesu ŋadɛi ɣaazɔ.

Currently Selected:

ƐFƐSƆITIƐ 1: DN1971

Highlight

Copy

Compare