Yokana 1
1
Kop me Kuo
1I agege, Kop oudo tie. Kop oudo tie kede Rubanga, doko Kop oudo en Rubanga. 2En oudo etie kede Rubanga cako ki agege. 3Jame dedede riki kocweo pi en, doko likame tie gimoro i cwec kame bin kocweo abongo en. 4Kuo oudo tie i en, doko kuo nono en kame oudo obedo lero me jo. 5Lero nono rieny i colo, do likame colo obwone.
6 #
Matayo 3.1; Marako 1.4; Luka 3.1-2 Riki tie icuo kame nyinge Yokana, kame Rubanga ooro. 7En oudo ebino pi bedo ijura me kop i kom lero nono, tetekeny jo dedede yei pi kop mere. 8En oudo likame ebedo lero, do en bin ebino pi mino ijura i kom lero. 9Lero me ateni kame caro jo dedede oudo tie bino i piny.
10En oudo etie i piny, doko oko cweno piny pi en, di jo me piny likame oko ngene. 11En oudo ebino ture kikokome, do jo mege likame oko game. 12Do jo dedede kame bin ogame, di oko yei nyinge, en bin emio gi twer me doko idwe ka Rubanga, 13kalikame konywalo kede remo, doko likame pi mit me kom arabo mit ka dano, do pi mit ka Rubanga.
14Kop oko doko dano di eko bedo i diere wa di epong kede kisa ka Rubanga kede ateni. Wan oneno deyo mere, deyo ka Wod acel kenekene kame owok kibut Papa.
15Yokana bin omio ijura i kome di elelemo be, “Man en ngat kame bin awaco kop i kome be, ‘Ngat kame tie bino i cen ngea pire dwong loa, pien oudo en etie sek di pwodi ango ali.’ ”
16Wan dedede otieko udo kisa i wi kisa, kame wok ki kisa mere kopong. 17Pien bin komio Iswil di beo kibut Musa, do kisa kede ateni bin obino di beo kibut Yesu Kirisito. 18Likame tie dano kame otieko neno Rubanga, do kwanyo Rubanga Wod acel kenekene, kame bedo iyapiyapi kede Papa, en ngat kame omie engere.
Kop ka Yokana Ngaibatis
(Matayo 3.1-12; Marako 1.1-8; Luka 3.1-18)
19Man en kop me ijura kame Yokana bin omio i kare kame Iyudayan ocwao kede josaseredoti kede Jolebi ki Yerusalem pi penye be, “In en ngai?”
20En likame eko dagi dwoko ne gi kop, do en eko tuco kakaler di ewaco be, “Ango likame Kirisito.”
21 #
Iswilia 18.15, 18; Malaki 4.5 Gin kiko penye be, “In do ngai? Benyo, in en Elia?” En eko dwoko be, “Li.” Kiko bobo penye be, “In do enabi?” En eko dwoko be, “Li.”
22Gin kiko penye be, “In do ngai? Niang wa wek oud kop kame otwero dwoko ne jo kame ooro wa. Kop nyo kame makin kame in iromo waco?”
23 #
Isaya 40.3 En eko waco be,
“Ango en dwan ngat kame lelemo i tim be,
‘Rieunu yongayo ka Rwot,’ ”
bala kame bin enabi Isaya owaco.
24Iparisayon en kame oudo bin ooro gi. 25Gin kiko penye be, “Do pinyo komio in ibatiso jo ka in likame ibedo Kirisito, amoto Elia, arabo enabi?”
26Yokana oko dwoko ne gi be, “Ango abatiso jo kede pii, do tie ngat kame nan tie cungo i diere wu, kame wun likame ingeunu, 27en nono en kame etie bino ki cen ngea; ango likame apoore pi gonyo ausi me amuka mere.”
28Man bin otimere i Betania, i loka tetuca me Yorodan, kakame Yokana oudo bin tie batiso kiye jo.
Katin Romo ka Rubanga
29Oru mere, Yokana oko neno Yesu di tie bino tetu bute, di eko waco be, “Nenunu Katin Romo ka Rubanga kame kwanyo dub me piny! 30Man en dano kame bin ango awaco kop i kome be, ‘Tie ngat kame tie bino ki cen ngea, kame pire dwong loa, piento en oudo etie sek di pwodi ango ali.’ 31Ango da kikoma oudo likame angee, doko gi nono en komio ango abino di abatiso jo kede pii, tetekeny en engere but jo me Isirael.”
32Yokana oko mino ijura be, “Ango aneno Tipo Kacil di bino piny ki malo bala awele di eko dong i kome. 33Ango da kikoma oudo likame angee; do ngat kame oora pi batiso jo kede pii oko waco na be, ‘Ngat kame inenunu Tipo Kacil obino piny di oko dong i kome, manono en ngat kame batiso jo kede Tipo Kacil.’ 34Ango atieko neno doko ajurao be, man en Wot ka Rubanga.”
Josiao me Agege ka Yesu
35Oru mere, Yokana oudo bobo tie cungo kede jo are kikom josiao mege. 36En eko neno Yesu di tie ot, di eko waco be, “Nenunu Katin Romo ka Rubanga!”
37Josiao are nogo bin owinyo di en ewaco kop noni, di do gin kiko lubo Yesu. 38Yesu oko lokere di eko neno gi di kitie lube, en eko penyo gi be, “Imounu nyo?” Gin kiko dwoko ne be, “Rabi” (kame dwong mere be ngapwony), “In ibedo tuai?”
39En eko waco ne gi be, “Bianu inenunu.” Gin kiko ot neno kakame oudo Yesu bedo iye; cenge no gin kiko bedo kede en, pien esawa oudo iyapiyapi romo tomon.
40Ngat acel kikom jo are kame bin owinyo yamo ka Yokana di eko lubo Yesu, oudo obedo Anderia omin me Simoni Petero. 41Me agege, en egeo udo omin mere Simoni, di eko waco ne be, “Wan otieko udo Mesia” (kame dwong mere be Kirisito). 42En eko tere but Yesu. Yesu oko nene di oko waco ne be, “In en Simoni wot ka Yokana. Kobino donyo lwongi do be Kepa” (kame dwong mere be Petero).#1.42 Kepa dwong mere be lela.
Yesu Olwongo Pilipo kede Natanael
43Oru mere Yesu oko moko tam mere pi ot Galilaya. En eko udo Pilipo di eko waco ne be, “Luba.” 44Pilipo oudo obedo dano me Betesaida, bomba kame Anderia kede Petero oudo bedo iye. 45Pilipo oko udo Natanael di eko waco ne be, “Wan otieko udo ngat kame bin Musa owandiko kop i kome i itabu me Iswil, kede kame inabin da owandiko kop i kome, en Yesu me Nasaret, wot ka Yosepu.”
46Natanael oko penye be, “Gimoro aber twero wok ki Nasaret da?” Pilipo oko dwoko ne be, “Bia ineni.”
47Yesu oko neno Natanael di tie bino bute, en eko waco kop i kome be, “Ateteni man en dano me Isirael kame li kede angalo.”
48Natanael oko penye be, “In iko ngena benyo?” Yesu oko dwoko ne be, “Ango aneni di itie i dud yat epigi di pwodi Pilipo likame olwongi da.”
49Natanael oko dwoko ne be, “Apwony, in en Wot ka Rubanga! In en abaka me Isirael!”
50Yesu oko dwoko ne be, “Mam in iyei pi kop kame ango awaco ni be ango oudo aneni di itie i dud yat epigi? Ibino neno gi adongodongo kalamo magi.” 51#Ageini 28.12Yesu oko waco ne be, “Ateteni, ateteni awaco ni be, ibino neno malo di oyabere, kede imalaikan ka Rubanga di tie ot malo kede di kitie bino piny i kom Wot ka dano.”
Currently Selected:
Yokana 1: BILK13
Highlight
Share
Copy
Want to have your highlights saved across all your devices? Sign up or sign in
Baibuli I Leb Kumam © Bible Society of Uganda, 2013.