Isaaya 19

Ebya Misri

1 # Isa 13:7; Kur 12:12; Yer 46:13-26; Ezk 29:1—31:2; 31:18—32:32. Ebi nabi yaahanwire ahari Misri.

Reeba MUKAMA aheekirwe ekicu kirikwiruka

Naaza Misri;

Ebishushani bya Misri ebirikuramibwa biryatetemera omu maisho ge,

emitima y'Abanyamisri ebahwe omunda.

2Ndyateerana Abanyamisri barwane,

Buri muntu arwane na mwene ishe,

Kandi buri muntu arwane na mutaahi we,

Orurembo rurwane n'orundi,

N'obugabe burwane n'obundi.

3Abanyamisri emitima eryabahwa omunda,

Naanye nyite enaama zaabo,

Baraguze aha bishushani ebirikuramibwa,

Abarogi, abafumu, n'abarikugambisa emizimu;

4 # Ezk 30:12. Abanyamisri mbaheyo omu mikono y'omutegyeki w'omwaga,

Kandi bategyekwe omugabe enshaarizi;

Nikwo Mukama, MUKAMA ow'amahe, arikugamba.

5Amaizi g'enyanja garyayoma,

N'omugyere gwome, guhweho,

6Emikura yaagwo enuukye,

N'amaizi g'otugyera twa Misri gaijururukye, goome,

Ebifunjo n'emibimbiri bijunde, bihweho.

7amariisizo ga Nailo ag'aha nkungu zaayo,

N'ebihingirwe byona biryayoma,

Bihweho, birekye kugaruka kureebwa.

8Abategi b'eby'enyanja abarikutegyesa amarobo omuri Nailo boona

Baryacura, baboroogye;

N'abarikutegyesa obutimba omu maizi gaayo baryacweka entegye.

9Abakozi ba furakisi eshemeziibwe baryashoberwa

Hamwe n'abaruki b'emyenda ya pamba erikwera.

10Abaabaire bari enyomyo za Misri baryahendagurika,

N'abarikukorera ebihembo boona baryagira obusaasi.

11Abanyiginya ba Zoani n'abashema buzima,

N'abahi b'obwengye ba Faraho nibamuha enaama z'obushema.

Noobaasa ota kugira Faraho oti:

Ndi omwana w'omunyabwengye,

Mwijukuru w'abagabe ba ira?

12 # Byak 7:22. Mbwenu abanyabwengye baawe barahi?

Nibakugambire, bakumanyise

Eki MUKAMA ow'amahe amaririire kukora Misri.

13Abanyiginya ba Zoani bahindukire abashema,

N'aba Noofu babeihabeihirwe;

Kandi nibo bahabize Misri,

Haza kunu bari enyomyo z'enganda zaayo.

14 # 1 Bag 22:22. MUKAMA ataire omuri Misri omwoyo gw'okurabanamu,

Baagireetera kugwererana omu bi erikukora byona,

Nk'oku omusinzi agwererana naatanaka.

15 # Isa 9:14. Kandi Misri terigira murimo gwona ogwakorwa,

Ogwakukozirwe omutwe nari ekibunu,

Amataagi g'emikindo nari ekibingo.

16 # Isa 11:15; Zab 48:6; Yer 51:30; Nah 3:13. Eryo izooba Abanyamisri baryaba nk'abakazi, batetemesibwe obwoba oburikureetwa omukono gwa MUKAMA ow'amahe, ogu ababangiire. 17Ensi ya Yuda eryaba ekirikutiinisa Abanyamisri; omuntu weena origigambirwa aryatiina, ahabw'eki MUKAMA ow'amahe amaririire kukora, ngu abarwanise. 18Omuri obwo bunaku haryabaho endembo itaano ezirikugamba orurimi rw'Abanyakanaani, zikarahira MUKAMA ow'amahe. Rumwe ahari ezo ruryayetwa Orurembo rw'okuhwerekyerera. 19#Kut 28:18; 2 Bag 5:17. Eryo izooba haryabaho eitambiro eryombekyeirwe MUKAMA ahagati omu nsi ya Misri, kandi n'enyomyo eribyarirwa MUKAMA aha mwatano gwayo. 20#Yos 24:26, 27; Oba 21. Eryaba akamanyiso n'ekirikuhamya MUKAMA ow'amahe omu nsi ya Misri. Ku baritakira MUKAMA ahabw'abarikubahata, aryabooherereza omujuni w'okubarwanirira, abajune. 21#Zek 14:16-18. Obwo aryamanywa omuri Misri, n'Abanyamisri baramumanya, bamuramye nibamutambira ebitambo, n'okumuhongyera empongano, kandi bamuraganise, bahikiirize ebi baamuraganiise. 22#Yer 46:25, 26. Kandi MUKAMA aryarwanisa Misri; omu kubarwanisa abaite kandi abatambire, bwanyima bagarukye ahari MUKAMA; kandi aryahurira okweshengyereza kwabo, abatambire.

23 # Isa 11:16. Omu bunaku obwo haryabaho omuhanda rugyendwa okuruga Misri okuhika Asiria; Abaasiria baze Asiria, baramye hame nabo. 24Kandi obwo Abaisraeli, Abanyamisri na Abaasiria bonshatu baryakwatanisa, bagume nibahaisa ensi omugisha; 25#Isa 29:23; Bir 32:9; Hos 2:23; Rom 3:29. ahabw'okuba MUKAMA ow'amahe abahaire omugisha naagira ati: Misri abantu bangye, Asiria ei emikono yangye yaahangire, na Israeli obuhunguzi bwangye baheebwe omugisha.

Currently Selected:

Isaaya 19: RR64

Highlight

Copy

Compare