Matewuzhi 1
TKE

Matewuzhi 1

1
Makolo a Yesu
(Luka 3.23-38)
1Ala bi makolo a Yesu Kirixtu,#1.1 Kirixtu mu ewogelo ya eGerego enatapulela Muthikitheliwi, Misiya, naari wi oosakuliwa a Mulugu, oyene onaavulumuse athu. Moone teto verisikulu 16. namabaliwelamo a Davidi, mwaana a Abarahamu.
2Abarahamu ahimbala Ezaaki;
Ezaaki ahimbala Yakobo;
Yakobo ahimbala Zhuda ni addibile;
3Zhuda aali babe a Perezi ni Zera. (Mmeewa aali Tamari.)
Perezi aali babe a Heziromo;
Heziromo aali babe a Aramu;
4Aramu aali babe a Aminadabi;
Aminadabi aali babe a Naxoni;
Naxoni aali babe a Salimoni;
5Salimoni aali babe a Bowazi.
(Bowazi amaaye yaali Rahabi.)
Bowazi aali babe a Obeddi.
(Obeddi amaaye yaali Ruti.)
Obeddi aali babe a Zhesi;
6Zhesi aali babe a Kingi Davidi;
Davidi aali babe a Salomawu.
(Salomawu amaaye yahikala mwadha Uriya.)
7Salomawu aali babe a Robowamu;
Robowamu aali babe a Abiya;
Abiya aali babe a Aza;
8Aza aali babe a Zhosafati;
Zhosafati aali babe a Zhoramu;
Zhoramu aali babe a Uziya;
9Uziya aali babe a Zhotamu;
Zhotamu aali babe a Akaazi;
Akaazi aali babe a Ezekiya;
10Ezekiya aali babe a Manasesi;
Manasesi aali babe a Amoni;
Amoni aali babe a Zhosiya;
11Zhosiya aali babe a Zhekoniya ni addibile mudhidhi oyene wacedheliwiiwa oBabilooniya.#1.11 Moone Mamwene a Nabiili 24.14-15; Koronika a Nabiili 36.10; Zheremiya 27.20.
12Vano vacedheliwiiwa oBabilooniya:
Zhekoniya aali babe a Salatiyeli;
Salatiyeli aali babe a Zorobabeli;
13Zorobabeli aali babe a Abiyudi;
Abiyudi aali babe a Eliyakimu;
Eliyakimu aali babe a Azori;
14Azori aali babe a Zadoki;
Zadoki aali babe a Akimu;
Akimu aali babe a Eliyudi;
15Eliyudi aali babe a Eleyazari;
Eleyazari aali babe a Matani;
Matani aali babe a Yakobo;
16Yakobo aali babe a Zhuuze,
mamuna a Mariya,
Mariya oyene ambalile Yesu,
oyene oneethaniwa Kirixtu.
17Mowinda wambeela wa Abarahamu ofiyedha wa Davidi yavirile anamabaliwelamo dila kumi ni nnayi, wambeela wa Davidi ofiyedha ocedheliwa oBabilooniya yavirile anamabaliwelamo dila kumi ni nnayi, wambeela mudhidhi woocedheliwa oBabilooniya ofiyedha obaliwa wa Kirixtu ole aroromelihiwe yavirile anamabaliwelamo dila kumi ni nnayi.
Obaliwa wa Yesu
(Luka 2.1-7)
18Obaliwa wa Yesu Kirixtu weereyile ayi: Mariya, maaye a Yesu, agaveviwe ni Zhuuze, ehinagone vamohi, ahifwanyeya aganna wari odheela mwa owodha wa Muneba Woweela. 19Vowi Zhuuze, mamuna a Mariya, aali oowoma murima, kaafunile omukaliha manyazo vowooneyela, ahuubuwelelaga omwihiya mowiipiteya. 20Mbwenye oobuwelaga nda, moorohani ahidheeliwaga mungero a Nabwiya, wiira: <<Zhuuze, namabaliwelamo a Davidi, ohoove omwaakela Mariya okala mwihiyanaawo, vowi wari yinniiyena epadduwe ni owodha wa Muneba Woweela. 21Oneere ombala mwaana-mulobwana, vano we oneere omuthwa ndina na Yesu,#1.21 Yesu enatapulela NABWIYA onovulumusa. mwaha wi oliye oneere ovulumusa nlogo naaye mwa dhoothega dheewa>>.
22Dhaatedhene ndo dhipadduwele wi dhaakwanelihiwe dhedho dhawogile Nabwiya odheela mwa namavuhulela, eerile: 23<<Namwali oohumunona mulobwana oneere okanna wari, ambale mwaana-mulobwana, muneeriinyu mmwiithanege Emanuwele>>,#1.23 Moone Ezaya 7.14 (Bibiliya Seputuwazhinta). (enatapulela Mulugu ni hiyo).
24Zhuuze, agarurumuwile moorohani, ahiiragana wona mwamulamulele mungero a Nabwiya, omwaakela Mariya okala mwihiyanaaye. 25Mowindo kaamunonile ofiyedha ombala mwaana oyene, amuthwiliiye ndina nowi Yesu.

© 2015, Wycliffe Bible Translators, Inc. All rights reserved.


Learn More About Takwane

Encouraging and challenging you to seek intimacy with God every day.


YouVersion uses cookies to personalize your experience. By using our website, you accept our use of cookies as described in our Privacy Policy.