YouVersion Logo
Search Icon

Marko 1

1
O Jono kai boldias phenel so avela
1Kadia e Nevi Viasta katar o Jesus Kristo, Šiav le Devlesko. 2Sar si ramome ande o Esai, profeto:
Eta, te tradav angla tute kudales kai phenela ande muřo anav,
kai lašiarela tjiri vurma.
3Si o hango kudalesko kai tsipil ande e pusta:
Lašiaren e vurma le Bareski,
teliaren leske vurmitsi,
4O Jono avilo, bolelas ande e pusta, ai phenelas pa o bolimos le keimasko, te aven jertime le bezexa.
5Sa o them ande e Judea ai sa o narodo ande o Jerusalem žianas paša leste; ai, puřinas penge bezexa, bolenas pe lestar ande o pai o Jordan.
6O Jono sas pe leste jekh tsolo anda o bal la gumulako, ai jekh prastia mortsiaki krugom o prašav. Vo xalas grastoře ai avdjin sirbato. 7Vo delas duma, phenelas: Avel pala mande kudo kai si mai zuralo mandar, ai me či sim harniko te bangiuvav te putrav leske doria le papučenge. 8Me, bolav tumen ande o pai; vo, bolela tumen ande o Svinto Duxo.
O bolimos ai o zumavimos le Jesusosko
9Ande kudia vramia, o Jesus avel anda o Nazaret ande e Galilea, ai boldias les o Jono ande o Jordan. 10Sar vo anklelas avri anda o pai, vo dikhlias ke o čeri puterdiol, ai o duxo vulel pe leste sar jekh gulumbo. 11Ai jekh hango ašundiol anda o čeri, phenel kakala vorbi: Tu san muřo Šiav kai kamav tu but, ande tute me thodem sa muři dragostia.
12Strazo, o Duxo spidias le Jesus ande e pusta, 13Kai vo sas ande e pusta štar-var-deš dies, te zumavel les o Satan. Vo sas le sirbatone žigeniensa, ai le andželi služisarde les.
O Jesus akharel štare mašiaren
14Pala ke o Jono sas dino ka e kris, o Jesus gelo ande e Galilea, phenelas e Laši Viasta le Devleski.
15Vo phenelas: E vramia si gata, ai e amperetsia le Devleski si paše. Kein tume, ai patian tume ka e laši viasta.
16Sar vo nakhelas pe o berego la mariako katar e Galilea, vo dikhlias le Simon ai le Andreas, phral le Simonosko, kai šiude jekh setka ande e maria; ke von sas mašiaria.
17O Jesus phenel lenge: Aven mansa, ai me kerava anda tumende t'astaren le manušen.
18Strazo, von mukle penge setki, ai gele pala leste.
19Gelo tsiřa mai dur, vo dikhlias le Jakob, šiav katar o Zebedeo, ai le Jono, lesko phral, kai, vi von, sas ande jekh čuno ai lašiarenas le setki. 20Strazo, vo akharel le; ai, mukle penge dades o Zebedeo ande o čuno le butiarensa, gele pala leste.
Jekh manuš rimome katar jekh duxo nasul
21Von gele ande o Kapernaum. Ai, o sabato, o Jesus dias angla savořende andre ande e khangeri židovitsko, ai vo sikiarelas. 22Lenge sas šodo so vo sikiarel; ke vo sikiarelas sar t'avel les zor, ai na sar le zakonaria.
23Arakhadilias ande lengi khangeri židovitsko jekh manuš kai sas les jekh duxo nasul, ai vo tsipil: 24So si maškar amende ai tute, Jesus anda o Nazaret? Tu avilian te xasares amen. Me žianav kon san tu: o Svinto le Devlesko.
25O Jesus daravel les, phenelas: Aš, ai ankli avri anda kado manuš.
26Ai o duxo nasul anklisto avri anda kudo manuš, isdraias les pria zurales, ai phurdias baro tsipimos. 27Savořen lias len e dar, kadia ke pušen jekh kavrestar: So si kadia? Jekh nevo zakono! Vo porončil zorasa inke pe le duxuri nasul, ai von patian lesko mui!
28Ai lesko vestimos gelo strazo ande sa le riga krugom e Galilea.
O Jesus sastiarel bute nasvalen
29Sar anklen avri anda e khangeri židovitsko, von gele le Jakobosa ai le Jonosa ka o kher le Simonosko ai le Andreasko. 30E sakra le Simonoski sovelas nasvali; ai strazo dine duma pa late ka o Jesus. 31Vo pašilo, vo vazdias la, lias la vastestar, ai strazo o tatimos muklias la. Porme voi služisardias len.
32E riat, kana pelo tele o kham, andine leske sa le nasvalen ai le bengailen. 33Ai sa o foro sas kjidino angla lesko vudar. 34Vo sastiardias bute ženen kai sas le sako fialo nasvalimos; vo vi mai dias avri but duxuri nasul, ai vo či mukelas le duxuri te den duma, ke vo žianelas le.
O Jesus phirel ande e Galilea
35Karing e diminiats žikin inke sas pria tamlo, vo uštilo, ai anklisto avri te žial ande jekh than pusto, kai řudjil. 36O Simon ai kudala kai sas lesa gele te roden les. 37Ai, kana arakhle les, von phenen leske: Sa roden tu.
38Vo del le palpale: Žias pe kaver than, ande le gava paše, eta te dav duma vi kothe; ke pala kudia me avilem avri.
39Ai vo gelo te del duma ande le khangeria židovitsko, ande sa e Galilea, ai vo gonil le demonon.
O Jesus sastiarel jekhe žiungale nasvales
40Jekh žiungalo nasvalo avel leste; ai, šiudias-pe pe čangende, vo phenel leske milasa: Te kamesa, tu šai vužares man.
41O Jesus, lias les e mila, thodias o vast, asbadias les, ai phenel: Me kamav, av vužio.
42Strazo o nasvalimos muklias les, ai vo areslo vužio. 43O Jesus tradias les strazo, zurale poronkonsa,
44ai vo phenel leske: Le tu sama te na phenes khanči khanikaske; numa žia te sikaves tu ka le raša, ai de pala tjiro vužimos so o Moše phendias, eta t'avel lenge marturo.
45Numa kudo manuš gelotar, vo thodias pe te tsipil opre le dieli ai te puřil, kadia ke o Jesus naštisardias mai te del andre ande jekh foro, vo bešelas avri, ande le thana pusti, ai avenas leste pa sako rig.

Currently Selected:

Marko 1: KALD

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy