Proverbs 9
9
Isumattullu Isumalluaġiirullu
1Isumattutim nappaŋagaa igluni aasii tallimat malġugnik ayaliqł̣ugu. 2Tuqutitchiŋaruq niġrunmik niqinaqutiksramik, suli iḷauqługu wine, aasii niġġiviich itqanaiqł̣ugich. 3Isumattutim aullaqtinŋagaich aġnat kivgani aiyugaaqłiquvlugich qutchigñiqsraniñ tavrani inimi inna: 4“Isiġitchi, isumalluaġiitchuasii iñuich!” Isumatuitchuanun uqallaktuq, 5“Qaiñ, niġikkich niqautitka suli imiġlugu wine iḷauŋaraġa. 6Uniḷḷugich isumalluaġiitchuat iñuich, aasii iñuulusi. Maliġuaġlugu iḷisimman.”
7Natqiksruġupkich kamanniraaġuuruat iñuich, pisaaŋatchiqsiññaġniaqtutin. Suakkupkich pigiiḷḷiqiruat iñuich, anniaqtausiññaġniaqtutin. 8Natqiksruġnagich kamanniraalguruat iñuich; uumigisiññaġniaġaatin. Aglaan natqiksruġupkich isumaturuat, qiksiginiaġaatin. 9Sumigliqaa uqautigupkich isumaturuat isumatusivsaaġniaġaich. Sumigliqaa uqautigupkich nalaunŋarualiqiruat iḷḷatiniaqtuq iḷisimmataannun.
10 #
Job 28.28; Ps 111.10; Pr 1.7. Qiksiksrautiqaġniq Ataniġmun aullaqisaaguruq isumattunmun. Iḷisimagupku Salumaruaq Ilaa, kaŋiqsimmatiqaqtutin. 11Isumattutim iñuuniqtusivsaaġniaġaatin. 12Ilvich tavra ikayuusiaqaġniaqtutin isumatuguvich, aasii asivaġupku, ilvich tavra nagliksaaġutiginiaġiñ.
13Aġnaq isumalluaġiitchuaq inna ittuq: nipaturuq, naluruq, kanŋuitchuġlu. 14Aquppisuuruq paaŋani igluŋmi naagga qutchigñiqsraŋani iniqpaum, 15aasii ququulavlugich iñuich saniġatquttuat, inmiktuiññaq iglauruat: 16“Isiġitchi, isumalluaġiitchuasii iñuich!” Isumatuitchuanun uqallaktuq. 17“Tigliktaq imiq siiġñalaaqtuq. Tigliktaq punniq tivraġił̣haaqtuq.” 18Aglaan nalurut tuquŋaruat tavraniitilaaŋiññik, aasii aiyugaaqtaŋit itiniqtapiaġatami iniŋanni tuquŋaruat ittut.
Currently Selected:
Proverbs 9: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
