Leviticus 25
25
Tallimat Malġuŋat Ukiut
(Deuteronomy 15.1-11)
1 #
Ex 23.10, 11. Atanġum uqautiŋagaa Moses Mount Sinai-mi aasii piraksriqł̣ugu, 2qaitchitquvlugu ukuniŋa maliġiraksraŋaŋiññik Israel-gum kiŋuvaaŋisa. Isiġataġuvsi nunamun Atanġum qaitchaŋanun ilivsiññun, qutchiksiḷiġniaġiksi Ataniq naurialiqiŋiḷḷakkuvsi tallimat malġuŋat ukiut tikitchaġikpan. 3Nautchirriiraġaġniaqtusi nunavsiññi, nauyumiññaksaġlugich siiġñisuuruat, suli pukuglugich nauruat itchaksrani ukiuni. 4Aglaan tallimat malġuanni ukiut iluqaani nautchiiñiaŋitchusi, ukiuq tunŋalugu Ataniġmun. Nautchirriiñiaŋitchusi nunavsiññi naakkaunnii nauyumiññaksaġlugich siiġñiviuruat. 5Kivluiñiaŋitchusi-unnii palauvaksranik nausuuruanik ilimiktun nunami, suli pukugnasigik siiġñat grape-gich nauruat nauyumiññaksaŋaitchuani napaaqtuayaani; ukiuq taamna unaŋuiqsiġviuluni inniaqtuq nuna pisigilugu. 6Nuna nauyumiññaksaŋaitkaluaqtillugu taaptumani ukiumi, niqiksraqaqtinniaġaasi, kivgasiḷu, savaktisiḷu, allaniñ nunaniŋŋaqtauruallu iñuuniaqatigirasi, 7pamiqsaallu, suli pamiqsaaguŋitchuallu nunavsiññi. Sunapayauraq nauruaq niġiñaġniaqtuq.
Ukiuŋa Utiqtitchivium
8Malġukipiaq quliŋŋuġutaiḷat (49) ukiut qaaŋiġaġikpata. 9Tavraasii, quliŋanni uvlut tallimat malġuanni tatqich, Uvluŋani Tasuqsautim, tilisiḷusi iñugmik nipauqłuktaun nipatitqulugu nunapayaami. 10Tainna piguvsi inillagniaġiksi malġukipiaq quliŋat (50th) ukiut ilaaguaġlugu aasii nivliusiġilugu atanġiqsautilaaŋat nunami iñupayaat. Taaptumani ukiumi nunat tuniŋaruat sivuani utiqtitauniaqtut iñuqqaaŋiñun naakka kiŋuvaaguruanun, aasii suli kisut kivgauruat utiġniaġmiut nanmiñiq iḷamignun. 11Nautchirriiñiaŋitchusi nautchiivivsiññi naakkaunnii kivluiḷusi palauvaksranik nauruanik ilimiktun naakka pukuglusi siiġñanik grapes-nik nauyumiññaksaŋaitchuaniñ siiġñivivsiññiñ. 12Iluqaan taamna ukiuq salumaruaġiniaġiksi; niqiqaġniaqtusi kisianik nautchiivivsiññi nauruanik ilimiktun.
13Taaptumani ukiumi iluqaġmiŋ nunat tunirauŋaruat utiqtitauniaqtut sivuani iñumignun. 14Tavraasii tuniriguvsi nunamik Israel-gum kiŋuvaaŋanun naakka tauqsiġuvsi nunamik, saglutautinasi avanmun. 15Akiksriġñiaġaat qiñiġlugich qavsiñi ukiuni nauriḷḷatilaaŋa Utiqtitchiñaqsivik Ukiuq tikiñŋaiñŋaan. 16Ukiut iñugiagniqpata, akiŋa qutchigñiaqtuq, aglaan ukiut qavsiqiuraukpata, akiksraŋa atchigḷuni, qanukkii uvva qanutun nauriḷḷatilaaŋa nunam tunirauniaqtuq. 17Pitqiksiġautinasiuŋ Israel-gum kiŋuvaaŋa, aglaan kamagilugu Ataniq God-iksi.
Iłuirrutaa Tallimat Malġuŋata Ukiut
18Kamagilugich Atanġum pitqurapayaaŋi suli piraksriutipayaaŋi, iñuullayumausi anayanniuŋiḷḷusi nunami. 19Nuna nauriḷḷaniaqtuq nautchirriaguruanik, aasii iḷaŋaniñ niqiksraqaġniaqtusi suli anayanniuŋiḷḷusi.
20Aglaan imma iñuk apiqsriñiaqpalliqsuq sumik niqiksraqaġniaqtilaamiŋnik tallimat malġuk ukiuŋani, nautchiiviit nautchirriġvigiŋitpatigik suli nauruanik katitchiŋiḷḷutiŋ. 21Atanġum nauriḷḷuataqtinniaġaa nuna itchaksraŋanni ukiut nauriyumiñaqsiḷugu naamasiḷugich niqiksrat malġugnun ukiugnun. 22Nautchirriiguvsi nautchiivivsiññi tallimat piŋayuanni ukiut, niqiqaġniaqtusi iḷaŋaniñ kivluavsiññik itchaksraŋanni ukiut, niqaiḷḷiuġniaŋitchusi nautchirriasi taaptumani ukiumi katilġataqtillugich.
Utiqtitaummata Nunat
23Nunagiraqsi tuniñasiuŋ tauqsitqikkumiñaiġḷugu, qanukkii ilivsi nanmiñiq pigiŋitkiksi; God-im ilaata pigigaa, aasii ilivsi allaniñ nunaniŋŋaqtatun ittusi atullasiññaqługu nuna.
24Nunamik tunisiñiqpata, nunagiqqaaqtaŋata iñuum tauqsitqiḷḷaruksraġigaa, taamna nalunaiŋaruksrauruq. 25Nalliqsi Israel-gum kiŋuvaaġiraŋiñi piiḷḷiuliġḷutiŋ tuniruksraġuġniġupku nunan, nanmiñiq iḷakpich tauqsitqiksaksraġigaa. 26Iḷaitkuvich tauqsitqiurriyumiñaqtuamik, aquvatigun piiḷḷiuŋaiġuvich aasii naamallasiḷutin tauqsitqikkumiñaġiñ ilignik. 27Tainna piñiġuvich akiḷiiruksraurutin iñugmun tauqsiŋaruamun taputilugich ukiut qavsiutilaaŋat Ukiumun Utiqtitchivigmuaglaan tikitchumaaqtuamun, tavra aasii utiġniaqtutin ilvich nunagnun. 28Aglaan inuŋaniqpan maniiñ tauqsiutiksran tasuġniaġupku nunan, aŋalanniaġaa tauqsiŋaruam Ukiuŋa Utiqtitchivium tikitqigataqtillugu. Taaptumani aasii ukiumi utiġniaqtuq nutim iñuanun.
29Tunisiguvich iglumik sapukutaqaqtuami iniqpagmi, tauqsitqikkumiñaġiñ taaptumani ukiumi tunisiñiġni. 30Aglaan tauqsitqiŋiññiġupku taaptumani ukiumi, tauqsitqikkumiñaiġñiaġiñ, aasii iglu pigiliutipiaġniaġaa tauqsiqsuam suli iliŋisa kiŋuvaaŋisa; utiqtitauniaŋitchuq Ukiuŋani Utiqtitchivium. 31Aglaan iglut sapukutaiḷaani nunaaqqiñiittuat aŋalallaniaġaich nautchiiviktiŋ; iñuŋisa tauqsitqiḷḷaniaġaich, aasii utiqtitaulutiŋ Ukiuŋani Utiqtitchivium. 32Aglaan suli, Levi-m kiŋuvaaŋisa tauqsitqiḷḷaniaġaich qakugupayaaq nunatiŋ nunaaqqiñi inillaktauvlutiŋ iñuuniaġvimigni. 33Iglu iḷaŋanni nunaaqqit tuniraġiŋakparruŋ Levi-m kiŋuvaaŋiññun aasii tauqsitqiŋaiḷḷugu, utiqtitaksrauruq Ukiuŋani Utiqtitchivium, qanukkii iglut Levi-m kiŋuvaaŋisa pigiraŋit nunaaqqimi iliŋisa pigipiaġait akunġanni Israel-gum kiŋuvaaŋisa. 34Aglaan niġiñiaġviich avataanniittuat Levi-m kiŋuvaaŋisa iniqpagiraŋiñi tunirauniaŋitchut; Iliŋsa nunaginiaġaich taimuŋa.
Atukkirrutit Iḷiappauruanun
35 #
Dt 15.7, 8. Nalliŋit Israel-gum kiŋuvaaŋich iñuuniaqtuat qanivsiññi piiḷḷiuliġñiqpata suli ilimignun piñiaġutiksraiġutilutiŋ, piqaqtitaksraġigisi savaktigimmatun iḷiḷugit, iñuuniallayumaut qanivsiññi. 36Akiiḷḷiġñiaŋitkisi Israel-gum kiŋuvaaŋich naggutinnagvigilugich, aglaan kamagilugu God suli iñuuniaqtillugich akunnivsiññi. 37#Ex 22.25; Dt 23.19, 20.Akiḷiipkaġnasigik naggunmik atukkirrutivsiññun manigmun, suli naggutinnagnasi niqinik tunirivigiguvsigik. 38Tavra taamna piraksriutigigaa Atanġum God-ivsi, Egypt-miŋŋaurrivsi aitchuġukłusi nunamik Canaan-mik suli ilivsiññun God-igitquvluni.
Atanġiqsitauniŋat Kivgauruat
39 #
Ex 21.2-6; Dt 15.12-18. Iḷaŋich Israel-gum kiŋuvaaŋich iñuuniaqtuat qanivsiññi piiḷḷiulipiaġataqpata aasii tunnisaġivlutiŋ ilivsiññun kivgausuglutiŋ, savaktinniaŋitkisi kivgat savaaŋiññik. 40Ilivsiññiinniaqtut savaktivsitun aasii savautilusi tikiḷġataqtillugu Ukiuŋa Utiqtitchivium. 41Tavraniasii iliŋiḷḷu qitunġatiglu uniññiaġaasi aasii utiġlutiŋ iḷamignun nunaŋannun kiŋuniimiŋ. 42Israel-gum kiŋuvaaŋich Atanġum kivgaŋi, suli ilaata Egypt-miŋŋautiŋagai; tunirauruksrauŋitchut kivgatun. 43Piaqłuktaġlugich aŋalannasigik, aglaan kamagilugu God-iksi. 44Kivgaqaġukkuvsi, tauqsiġumiñaġisi nunaqpauruaniñ avativsiññiittuaniñ. 45Tauqsiġumiñaġmigisi miqłiqtuŋit allaniñ nunaniŋŋaqtauruat akunnavsiññi iñuuniaqtuat. Miqłiqtut aniŋaruat nunavsiññi kivgaliutiyumiñaġisi, 46aasii kiŋuvaaksrirrutigiyumiñaġmigisi qitunġavsiññun, savautiruksraġiniaġaich qitunġasi iñuuniqtutilaamiktun. Aglaan aŋalanniaŋitkisi Israel-gum kiŋuvaaŋich piaqłuktaġlugich.
47Iḷaanni allaniñ nunaniŋŋaqtauruaq umiallagniqpan, iḷaŋiḷḷi Israel-gum kiŋuvaaŋich piiḷḷiuqtillugich suli tuniḷutiŋ ilimignik kivgauniġmun taaptumuŋa allaniñ nunaniŋŋaqtauruamun naakka iḷaŋiññun allaniñ nunaniŋŋaqtauruam, 48tunirauganikkumiŋ tasuqtauyumiñaġniaqtut. Aniqataugaluaġumi 49naakkaunnii aŋaaluugaluaġumi naakka aññaugaluaġumi naakka qanuq nanmiñiq iḷaugumi tauqsitqikkumiñaġaich; naakkaunnii ilimignik maniññakkumiŋ, akiḷiiḷutiŋ atanġiqsitauyumiñaqtut. 50Kaŋiqsiuqtaksraġigaat iñuk tauqsiqtiktiŋ, aasii kisillugich ukiut tuniraukamiŋ qaŋa tikiḷġataqtillugu Ukiuŋa Utiqtitchivium suli atanġiqsitaummata akiksriġḷugi akiŋatitun savaktiuruat. 51-52Utiqtitaksraġigaat iḷaŋa akiḷiutaata qavsiutilaaŋatigun ukiut kisiŋŋuqtuat, 53savaktauruatitun akiññaktaqłutiŋ ukiuġaġimman. Umialiŋata piaqłuktaġlugich aŋalataksraġiŋitkai. 54Atanġiqsitauŋitpata taapkua nalliatigun, iliŋiḷḷu qitunġaŋiḷḷu atanġiqsitaksraġigaich tikitpan Ukiuŋa Utiqtitchivium. 55Israel-gum kiŋuvaaŋich iñiġlugu kivgauyumiñaitchut, qanukkii Israel-gum kiŋuvaaŋich ilaata Atanġum kivgaġigai. Egypt-miŋŋautiŋagai. Ilaa Ataniq, God-igigaat.
Currently Selected:
Leviticus 25: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
