Wawa 25
25
Me Isileli Ba'ala waineye isobwasobwanu
1Tutuyanina me Isileli imiamia Sitimi waineye, tomoqovo ivelamu naqi kapoina#25:1 Naqi kapoina dede gumanidiavo: naqi tamo tomoqo mwanena taiauda o mwanedi—Isauyedi 20:14, Loina Kanaveluqa 5:18; naqi tamo tomoqo taiauda mane o wete tupwaidiavo saku paipaidi—Loina 18:6, 1 Kolinita 6:15; naqi nasusu taunina taiauda mesaida tomoqo natuna vavinena taiauda—Loina 18:6; tomoqo wete tomoqo kadikailuqa inaqinaqi o vavina wete vavina kadikailuqa—Loma 1:26-27; tomoqo kaisaya taiauda inaqi—Loina 18:23; kwanaqi gumanimiavo giladi ge kwadavemialuqemi—Epeso 5:3; kiwewesa wayaqimu tamo aitoi taiauda kwainaqi—Kabavelamu 34:7, Loina Kanaveluqa 22:25. ivavalabubuni Moabe vevine taiauda. 2Dede vevinenidiavo imaseagadi inawedi velomu ivalabubunidi diyaubadavo waidie, taiauda ikani wete me Moabe diyaubadavo waidie isobwanu. 3We me Isileli dede mesaida ivalabubunedi taiauda iluvetaubama isobwasobwanu Ba'ala-Pio#25:3 Ba'ala dede me Kenani diyaubada bwaigina mwanena Asela. waineye, beqa Iave kanakapoka ioqala-otoqa waidie.
4Iave Mosese ivoneni ivo, “Kaditogumetavo matatabudi Ba'ala waineye isobwasobwanu kukavekavinidi kuluvewapadi kaiate matague, kavagi kagukapoka ioqaoqala inavekwada me Isileli waidie.”
5Beqa Mosese me Isileli ditoloinavo ivonedi ivo, “Miyoko tamoqana tamoqana waidie meqavoi Ba'ala waineye isobwasobwanu kwaluvewapadi.”
6Mosese wete me Isileli matatabudi itaitaiqa Ukweta Maqemaqetana kawaneye, we matadie tamo iadi Midiani vavinena ikewai imaieni na'ukweta waineye. 7We tutuyanina Peniasi tovelomu, Eliesa natuna wete Eloni tubuna, tomoqonina ikiseni, itovoi yoko ikiawedi we nakibadi ikewai inaqo 8tomoqonina italakwavini inaqo na'ukweteye. Kibadi itutuleni tomoqo wete vavina iketoluqedi iwapa. Beqa viqa bwaigina, me Isileli kadikaimatavuloqa, ivekailovei. 9We viqanina waineye'eqa tomo'otoqa kadiyoko 24,000 iwapa.
10Iave Mosese ivoneni ivo, 11“Peniasi Yau kagukapoka ikewayavuleni me Isileli waidie paina gunuanuana ivavalabubuni kaguvekimatana paipaina, beqa me Isileli matatabudi ge mekagukapoka adaluvelakovidi. 12Beqa Peniasi kuvoneni Yau guvonadabadaba avavalabubuni waineye guveiaiana aiveleni. 13Paina gunuanua mwaqitana ivavalabubuni kaguvekimatana paipaina wete me Isileli dikapoina ikukumidi, beqa guvonadabadaba aivalabubuni tubuleleleqinavo taiauda inavetovelomu-vaqata.”
Currently Selected:
Wawa 25: mzz
Highlight
Copy
Compare
Share
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
