Wawa 21
21
Mosese kainumu bilonisi beqa baisoa ivalabubuni
4Me Isileli Koya Owa waineye itauya kedeye inaqo Ligwagwa Yamoyamoina waineye, we ge idalugu Edomu dikabaloina waineye, we kaia ikapavivilimo. We dinaqonina kaniakwanina waineye tomo'otoqa ikabiawa kadikapoka ioqala ge kadisala inakalamaqiqita. 5Beqa Yaubada wete Mosese ibwaduyedi ivo, “Uvale Itipitaeqa kukewaluguaqetema kumaiema pwayapwayamaiqe kakaiwapa? Kima ge mekama beledi wete ge mekama bwasi we mana dede kapoidi ge wayaqima.”
6Matautauda Iave baisoa siwasiwayadi ivetunedi waidie, tomo'otoqanidiavo iovadi we me Isileli puedi ivekalawapawapa. 7Tomo'otoqa matatabudi imai Mosese waineye ivesipupu ivo, “Kima kapoina kavalabubuni paina Iave wete komu kabwaduyemi. Kivelaukui Iave waineye baisoa inakewayavuleni waimeye'eqa.” Beqa Mosese ivelaukui tomo'otoqanidiavo paipaidi.
8Matautauda Iave Mosese ivoneni ivo, “Baisoa siwasiwayana kanununa kuvalabubuni welavi kuvetovoia tabwaneye kuyatoi. Kago aitoi baisoa inaovai inakisalaga kanununina inakiseni inavegiagiamai.” 9#2 Ki 18:4Beqa Mosese baisoanina kainumu bilonisi beqa ivalabubuni welavi ivetovoia tabwaneye iyatoi. We kago aitoi baisoa inaovai inakisalaga kanununina inakiseni inavegiagiamai.
Me Isileli inaqo Moabe
10Me Isileli itauya inaqo Oboti waineye ivebaekwa. 11Oboti waineye'eqa itauya inaqo valavala nakabalagaqeta Aie-abalimu pwayapwayamaiqe, Moabe kanakabavekakava waineye ivebaekwa. 12Wete me Isileli itauya inaqo Seledi kawagova waineye ivebaekwa. 13Matautauda no waineye itauya inaqo Bwasi Anoni vikaineye ivebaekwa pwayapwayamaiqe, me Amoli divikai vivineye. Bwasi Anoni iulaula me Moabe wete me Amoli divikai kanakabavekakava gamwaneye.
Me Isileli Kini Sioni ivelulunapeleni
21Matautauda me Isileli valea ivetuneni inaqo Amoli di Kini Sioni waineye ivesipupu ivo, 22“Kima wayaqima mupwayapwaya waineye kaibala we ge kaivesikaqala mitanoqa o mi oine kaditanoqa naqedie wete ge kamubwasieqa kaiyemu. We kima Kini Nakedeye kainaqomo kanaketoava mupwayapwaya kaikiaweni.”
23We Kini Sioni me Isileli ge idatagwanedi napwayapwaya waineye inabala. We natolauqaviavo iqolekauqidi taiauda inaqo pwayapwayamaiqe, Iasi taoni waineye me Isileli ibabanedi taiauda ivetalaqa. 24We me Isileli Kini Sioni wete natolauqaviavo ivelulunapeledi kepataeqa ileodi. Dipwayapwaya ikewai Bwasi Anoni waineye'eqa inaqo kanaketoava Bwasi Iaboka waineye. Beqa me Isileli ge inaveqanaqo paina me Amomoni divikai kanakabavekakava iekisabodebodeni wete ikalai gileu beqa pakalidi wete kaniakwanidi. 25Me Isileli me Amoli ditaoni iluguya ikewadi waidie imiana, ditaoni bwaigina Esiboni wete ditaoni siaidi matatabuna waidie imiana.
Me Isileli Kini Ogi ivelulunapeleni
31We me Amoli dipwayapwaya me Isileli ikewai waineye imiana. 32Mulineye Mosese tokisavetovetonova ivetunedi inanaqo Iesa taoni inakisavetovetonovi. Matautauda me Isileli ilugu taoninina ikavikavini wete taoni siaidi matatabuna ivelauvivilidi, me Amoli no waineye imiamia ikwavinedi. 33Matautauda isiviladi inaqo Basani kanakedeye. We me Basani di Kini Ogi wete natolauqaviavo imai me Isileli taiauda inavetalaqa Edeleni taoni waineye. 34We Iave Mosese ivoneni ivo, “Ge kigololo Yau Kini Ogi natomo'otoqavo matatabudi wete napwayapwaya ayatoyatodi dimamue. Base me Amoli di Kini Sioni, gumanina Esiboni taoni waineye iloloina, kuluvewapai wete mesaida komu kanasala Kini Ogi kiluvewapai.” 35Beqa me Isileli Kini Ogi, natunavo wete natolauqaviavo matatabudi iluvewapadi. We ge tamo aitoi meyawaina idamiamia. Matautauda napwayapwaya ikewai.
Currently Selected:
Wawa 21: mzz
Highlight
Copy
Compare
Share
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
