1 Samuela 8
8
Me Isileli wayaqidi Kini inagumetedi
1-2Samuela natunavo kadikailuqa, natomwayai kanawavaqa Ioeli, we kanaveluqa kanawavaqa Abaidia. Tutuyanina Samuela gunabeida itomwatomwaya natunavo ivesinuedi me Isileli inaloinedi wete inavovonayavu paipaidi, we no lituqanina ivalabubuni Bedisiba taoni waineye. 3We valabubuna tonotonovidi ge idavalabubunidi mesaida tamadi. We wayaqidi valabubuna kapoidi beqa mane inakewadi, wete tomo'otoqa ivonedi, “Mane kwaivelema matautauda kaivona kanavo mivalabubuna giamaidi.” We no mesaida valabubuna tonotonovidi iqaudi.
4Beqa me Isileli tomoqovo bwaigidi matatabudi imai Lama waineye Samuela taiauda imiakauqa.
5 #
Loi2 17:14
We ivesipupu waineye ivo, “Kuvevaneneqa, komu deqoina gunabeida kutomwaya we natumwavo muvalabubuna tonotonovidi ge idaemuliedi. Beqa Kini kukalaqeieni inagumetema mesaida tupwaidiavo kabaloina.”
6We Samuela ge idamwasana dinuanua Kini paipaina, beqa ivelaukui Iave waineye. 7We Iave Samuela ivoneni ivo, “Vakai matatabuna ielaukuieni waimue kivalabubuni. Komu ge idavedumwekaikaiemu, we mwaqitana Yau dikini ivedumwekaikaiegu. 8Base akewaluguaqetedi amaiedi Itipitaeqa we tutuya puena iedumwekaikaiegu, yaubada tupwaidiavo waidie isobwasobwanu. Beqa deqoina kaia mesaida ivavalabubunedi waimue. 9Kaia mesaida ielaukuiemu kivalabubuni, we naqaida kivemataluanidi kawaie banikodiqa Kini inavalabubunedi waidie.”
10Beqa Samuela Iave navona matatabuna ivonedi tomo'otoqanidiavo, gumanidiavo Kini paipaina ielaukui. 11Ivonedi ivo, “Kago Kini inaloinemi demesaida inavalabubunedi: natumiavo lamoqidiavo inakewadi inawewesedi natolauqaviavo. We inaloinedi inalituqa wagabiubiu wete osi waidie, we tupwaidiavo inaloinedi inagumeta inalalaukwavina nawagabiubiu matadie. 12We tupwaidiavo inakewadi inavetogumeta tolauqaviavo kadiyoko 1,000 wete tupwaidiavo inavetogumeta tolauqaviavo kadiyoko 50 waidie. Inaloinedi tupwaidiavo inalituqa natanoqe wete kana inatavitavi. Tupwaidiavo nakabalauqaviavo wete nawagabiubiu kadisakuvo inavalabubunidi. 13No Kininina natumiavo vevinediavo inakewadi natovetavoqa wete natokanigabu, wete tupwaidiavo vane maqaidi giamaidi inavalabubunidi paipaina. 14Kami kaditanoqa giamaidi, oine kaditanoqa wete miwelavi olibe kaditanoqa inakewadi natogumetavo wete natolituqavo bwaigidi inaveledi. 15We tutuyanina miwiti wete oine vuadi kwaitavidi sikwagigi 10 kwaivalabubunidi, tamoqana sikwagigi inakewai natogumetavo bwaigidi wete natolituqa taiauda inasenai. 16We mitolituqavo tomoqovo wete vevine inakewadi we mibulumakau wete midoniki giamaidi inakewadi taunina nalituqa inavalabubuni. 17We tutuyanina misipi wete migouti kadiyoko 10 kwaiyatodi, yoko tamoqana tamoqana waidie'eqa tamoqana inakewai taunina paipaina, we komi kwaivetolituqa-maimaiqa waineye. 18Tutuyanina mwaunidiavo waidie kwaikabiawa Kininina kwavesinueni naloina waineye'eqa, kwaivelaukui Iave waineye kaivaisa paipaina, we ge inakaivaisemi.”
19We tomo'otoqa Samuela navona veluvelulunidi ge idanoqaidi. We ivo, “Gebuka, kima wayaqima Kini inaloinema. 20Matautauda kima kabaloina tupwaidiavo mesaida. Makini inakedagumetema wete inatovoi matameye tutuyanina tupwaidiavo yoko taiauda kaivetalaqa.”
21Beqa Samuela Iave ivoneni vakai tomo'otoqa ivesipupuyedi. 22We Iave ivo, “Kini kuveledi mesaida wayaqidi ielaukuiemu.” Samuela itagwana we tomo'otoqa iveyavulidi inaqo divanuqe.
Currently Selected:
1 Samuela 8: mzz
Highlight
Copy
Compare
Share
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
