Fulaa 37
37
Kesu kpemaa a kumbu ndɔɔ
1Mí Bɛtsalɛl sial kesu kpemaa a pɛngɛn akasia, bandei dunndo lediin a tálá, buo dunndo lepilɛ a tálá, simndan dunndo lepilɛ a tálá. 2Mó yikpa ndu a sianin diandan lenin a o kɔɔ, mó hol sianion o cɔcɔn ndɔn balɔɔ sɔ́. 3Mó cɔaw kelan mún hiɔɔlu a sianion, mó lɛɛnduu mun o pelun hiɔɔlun kesu kpema kon: kpengei pilɛ kelan n'sianion n'miun, kpengei pilɛi vɛlɛ n'miun. 4Mó sial yɔmii cuaa ndu-e a pɛngɛn akasia, mó yikpa ndi a sianion. 5Mó sɔaa yɔmii ken o kelan n'sianin mun nin o kpengun kesu kon, haliko mi vana nɔla ndu cuaa a ndi. 6Mó toosiaa kumbu kesu kpema kon a sianin diandan, bandei dunndo lediin a tálá, buo dunndo lepilɛ a tálá. 7Mó cua sianin fɛtufɛton, mó cɔaw mɛlɛkaa kanda ɲɛm Hala-on-nda nda ŋiɔn a mun, mó hol nda o kpengun mɛɛlan kumbu kesu kon coo. 8Mɛlɛkaa kan va a baalannda a kumbu kesoo latulu. 9Kumbannda ndalan la va lapɛɛngaalan coocoo fɛɛyɛlɛɛ le kumbu kesu kon kumbɔɔ, má mululan hɔlla vellaa-velle, má va tofaa o kumbu kesoo coo.
Tabali nda kɛsi bulu sálàá coo-o a ɲɛm ndɔn laandon
10Mí Bɛtsalɛl toosiaa tabalio a pɛngɛn akasia, bandei dunndo lediin, buo dunndo lepilɛ, simndan dunndo lepilɛ a tálá. 11Mó yikpa ndu a sianin diandan, mó balu sianion holɔɔ o cɔcɔn ndɔn pindo. 12Mó tosa pɛngɔn bandei baa piasaa lepilɛ, mó balu sianion holio o cɔcɔn ndɔn pindo. 13Mó cɔaw kelan mún hiɔɔlu a sianion, mó lɛɛnduu mun o sɔngila hiɔɔlula ndɔlan nɛɛ pelun tabali kalaa hun ciiŋian a tabalio-a. 14O kelan co mun o pɛngɛn biyan ikɛi-yon nin ndáà bɛnda le yɔmii co le tabalio cuaa-e sɔɔ ni. 15Mó tosa yɔmii co le ndu cuaa-e a pɛngɛn akasia, mó yikpa ndi a sianion. Ndi va le tabali kalaa cuaa ni. 16Mó cɔaw ɲɛm-laandun va le kɛsio o tabali kon coo-on a sianin diandan, ɲɛm-laandun mun va mun ni: sɛtilan, taalala kólaalan, hɛngɛilan a fɛngɛla va le sálàla mamɔilan solio lan.
Ɲɛ kɛsiaa lafitina a fitinala ndɔlan
17Mó cɔaw ɲɛ kɛsiaa lafitinaa a sianin diandan fɛtufɛton, mó toosiaa ndu o baalanndo a tum ndɔɔ, a lɔɔla ndɔlan, a boondun ndɔn a á bonyun ndɔn latulu. 18Lɔɔlan la va laŋɔmpum: kpengei pilɛ layàá, kpengei pille layàá. 19Lɔɔ oo lɔɔ ndóò nɔ boondon mún yáá a kpufɔlan a ɲɛlan maa peengela yɔm amanndiee. Lende lɔɔla ŋɔmpumnda ɲɛ kɛsiaa lafitina kon la va ni. 20Boondon va mún hiɔɔlu o sungbule ndɔle va tɛɛn-nden a kpufɔlan a ɲɛlan maa peengela yɔm amanndiee. 21Kpukpun kɛcanndon va o fondala lɔɔlan la hun bɔŋa latiɔn tiɔn-ndan o sungbule ɲɛ kɛsiaa lafitinaa-o. 22Kpukpun kɛcan mun a lɔɔla lan kpede la va labaalanndan o ɲɛ kɛsiaa lafitinaa latulu. Lan kpow, a sianin diandan fɛtufɛton la cɔwnun ni. 23Mó cua sianin diandan, mó cɔaw vɛlɛ fitinalan laŋɔmmɛw, a kpaɲala ndɔlan a bombola kɔandaa lapulta ndɔlan a mun. 24Sianin diandan nda cɔw ɲɛ kɛsiaa lafitinaa a ɲɛm ndɔn laandon-ndon va kilolan beleyaa.
Fonda loamaa cuɛima cun kɛndɔɔ a ansan
25Mí Bɛtsalɛl tosa fonda loamaa cuɛima cun kɛndɔɔ a pɛngɛn akasia, maa kpakpa o va ni: bandei dunndo lepilɛ, buo dunndo lepilɛ, simnda ndɔlan dunndo lediin. Mó heelu kpɛɔn mún hiɔɔlu o sɔngila hiɔɔlulan, kpɛ̀ɛ́n mun va n'baalanndon a ndu pila. 26Mó yikpa ndu lecoo, o kpengon a o kpɛɔn a sianin diandan, mó balu ndu sianion holɔɔ o cɔcɔn pindo. 27Mó cɔaw kelan mún miun a sianion, mó hol mun o cɔcɔn lebɛngon coo o kpengun miunndon le yɔmii co le fonda loamaa macuɛi kon cuaa-e lueiyo lenin. 28Mó tosa yɔmii ken a pɛngɛn akasia, mó yikpa ndi a sianion. 29Mí vana caa cuɛiyan toosiaa-o bɛɛndiaa cuɛiyan le pɔlaa, mí vana caa ɲɛm cun kɛndɔn toosiaa-o toosiaa ansan cun kɛndɔɔ.
Currently Selected:
Fulaa 37: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
