Fulaa 36
36
Vanaa Mɛlɛka hɛli-a kandu baalaa
1Mí Bɛtsalɛl, Oholiab a vanaa Mɛlɛka yɔngu kɔlkaloo, dɛnɛ sinaa a taasio le baalala cɛi-kola-toandaa diandaa kpow tosaa-a kandu baala kon kpede tosaa mɛɛ Mɛlɛka pila cɔm nda yɛ.
2Mí Moise veelu Bɛtsalɛl nda Oholiab, a vanaa Mɛlɛka yɔngu kɔlkaloo a dɛnɛ sinaa-a, a yeemɛi va o kɔl le baala kon tosaa-a, mó dimul nda le baalaa kandɔɔ. 3Mó yɔngu nda cuungiaala Israɛlla cuungiaa le baalala cɛi-kola-toandaa diandaa tosaa lan. Idii oo idii, vanaa yeemɛi va o kɔl-la va hunɔɔ a cuungiaala lan o Moise lo tuŋ. 4O kon mí vanaa kɔlkalua va baala cɛi-kola-toandaa kon tosaa-a mal baala nda va tosaa-o, 5má kɔ dimul Moise aa: «Vannda co bɔɔ hunɔɔ a cuungiaalan. Cuungiaala nda yɔngu nin-ndan la hiow baala Mɛlɛka ke naa le tosaa-o.» 6Mɛɛ Moise tuei lende, mó yɔngu yondaa o dɔ́ɔ́ngɔ́ɔ̀ nin kpow aa: «Vana-vana tosa lɛ ɲɛ le hunɔɔ a cuungiaa le baala cɛi-kola-toandaa diandaa le, o va vanapɔnɔ o va vanalanɔ.» O kon, mí vannda pɛngi hunɔɔ a cuungiaalan. 7Kani ɲɛm tangulan mun va nin taw, mun tiw nin le baalala va le tosa lan kpede. Mun nɔla bɛɛ mì mun lo n'tɔ̀.
Kolala tangulaala Calta Mɛlɛka lan
8Mí vanaa kɔlkalua caa baalaa taw-va tangul Calta Mɛlɛka lan a kolala keesela kɛndɛ-kɛndɛlan tɔ́, a kola nda yin a kaan-ndo, a kola siaŋa sɔɔtɔtɔɔ, a kola siaŋa vólotótoo. Mí vanaa caa sɔɔluuo-a tuuliaa mɛlɛkaa kanda ɲɛm Hala-on-nda lecoo. 9Kola oo kola va bandei dunndo bidiin a leŋɔmaa, buo dunndo lehiɔɔlu. Bandii pilɛi a bu pilɔɔ kpé kolalan kpede láà nɔ ni. 10Má bɔɔŋiaa kolalan laŋuɛɛnu nɛɛ pilɛ, má sɔandu lan, má bɔɔŋiaa vɛlɛ laŋuɛɛnula tɔ̀lan nɛɛ pilɛ, má sɔandu. 11O kpengun miuŋun nda bɔɔŋiaa lan-ndon, má baa yoei lakolɛi nda yin a kaan-nde o kola mɛɛlaa o ikpengu oo ikpengu. 12Yoei lakolɛi va beleŋuɛɛnu o mɛɛlula ikpengu oo ikpengu. Mí i kɔ bɔŋa tumndan nɛɛ pilɛ. 13Má tosa bawlan beleŋuɛɛnu a sianion, má bɔŋa kpengun miuŋun mun nɛɛ pilɛ a bawla n'sianila lan. O kon, mí Calta Mɛlɛka lan la siŋnun ɲɔɔ ndu pilɛ. 14Má tosa vɛlɛ kolalan tɔ́ a ò pilɛ a yiiŋii cuinnda le Calta Mɛlɛka lan vuɔɔ a lan. 15Kolala nda toosiaa lan a yiiŋii cuinnda lan, o kɛ́-kɛ̀ va bandei dunndo beleyaa, buo dunndo lehiɔɔlu. Kolala tɔ́ a ò pilɛla lan kpow, bandii pilɛi a bu pilɔɔ láà nɔ ni. 16O kolala lan nin, má ciiŋiaa laŋuɛɛnulan nɛɛ pilɛ, má ciiŋiaa vɛlɛ laŋɔmpumnda lo lan nɛɛ pilɛ. 17Mà baa yoei lakolɛi beleŋuɛɛnu o kola mɛɛlaa o kpengii tasei, má baa vɛlɛ hee beleŋuɛɛnu o kola mɛɛlaa o kpengii diinndɔɛi. 18Má tosa bawlan beleŋuɛɛnu a daɲan le cɛi-kola-toandaa kon tombolaa mò siŋnun ɲɔɔ ndu pilɛ. 19O kon kɔɔli, má toosiaa kolaa a yáwla saa kóndóla nda yin yinɔɔ siaŋaa lan le cɛi-kola-toandaa kon kumbɔɔ a lan, má tosa vɛlɛ kolaa a yáwla kálà-kálàlan le handɔɔ o kola nda toosiaa a yáwla saa kóndólan-ndo coo.
Yɔmii tangulaa cɛi-kola-toandaa diandaa
20Má tosa vɛlɛ pɛngɛn akasia, má tɔal mun lɛŋ le Calta Mɛlɛka lan biyɔɔ kpáŋ. 21Pɛngɛi kɛ́-kɛ̀ va bandei dunndo tɔ́, buo dunndo lepilɛ a tálá. 22Pɛngɛi kɛ́-kɛ̀ ndíì nɔ fondala vana sɔɔŋa yɔmndo le ndu tombolaa a o pilɔɔ lan tan tiɔn o kpengun miunndon. 23Má tosa pɛngɔn bidiin le Calta Mɛlɛka la lan a ba too. 24Mà tosa fondala pɛngɛn mun kɛsi tumndan nin-ndan tan tiɔn a volin humbon le pɛngɛi pilɛ: o pilɛ le fonda sɔɔŋaa yɔmndo o pilɛ. Mí fondala pɛngɔn kɛsi tumndan nin-ndan la bɛnda belehiɔɔlu le pɛngɛn bidiin mun. 25Má tosa vɛlɛ lende le Calta Mɛlɛka lan a ba luaŋ-ndo: pɛngɔn bidiin, 26a fondala kɛsiaa tumnda nda toosiaa a volin humbon-ndan. Latiɔn le pɛngɛi ipilɛ. 27Má tosa pɛngɔn mún ŋɔmpum le Calta Mɛlɛka lan a makɔɔ, kpengii paalen le del-le. 28Má tosa pɛngɔn mún miun le sungbuma co o sɔngilan-ndan yoomuan lueiyo. 29Pɛngɛn mun va n'baalanndon lebɛngu, mí n kɔ luei bolle o kelɛi pilɛi nin a ba luaŋ-ndo. Lende nda toosiaa mún mún miun kpow le sɔngila tiɔnndan ni. 30Kpow-kpow, pɛngɔn va mún ŋɔmaa a fondala kɛsiaa latumndan tɔ́ a laŋɔmpum, la va latoosiaa a volin humbon, latiɔn le pɛngɛi pilɛ. 31Má tosa kandolan laŋuɛɛnu a yɔm akasia le pɛngɛn va o Calta Mɛlɛka lan kpengei pilɛ-on biyɔɔ kpáŋ. 32Má tosa vɛlɛ kandolan laŋuɛɛnu a yɔm akasia le pɛngɛn va o kpengei pilɛi-yon biyɔɔ kpáŋ, má tosa vɛlɛ laŋuɛɛnu le a makɔɔ, ba paalen le del-lo. 33Má tosa kando tɛɛndo, mó kei o pɛngɔn tɛɛn déŋ, cɔn o cɛi-kola-toandaa diandaa kpengeí, kɔ tiiya a kpengei pilɛi, mó va tɛɛn kpafii. 34Má yikpa pɛngɛn mun a sianion, má toosiaa kelan a sianion le kandolan keiyo lenin, má yikpa vɛlɛ kandola lan a sianion.
Kola-landaa o Cɛi-Diandaa nin
35Má tosa kola-landaa a kɛila nda yin a kaan-ndan, a kɛila siaŋala sɔɔtɔtɔlan, a kɛila siaŋala vólotótolan a á kola keesoo. Mí vanaa caa sɔɔluuo taw-va tuuliaa mɛlɛkaa kanda ɲɛm Hala-on-nda lecoo. 36Má sial sungbuan man hiɔɔlu a pɛngɛn akasia le kola-landaa kon tondɔɔ, má yikpa mun a sianion, má hol bawla nda toosiaa a sianion-ndan o sungbuma man, má simi man o fondala kɛsiaa latumnda toosian a sianion-ndan tan hiɔɔlu coo. 37Má tosa kola-landaa celen le dio cɛi-kola-toandaa kon a kola nda yin a kaan-ndo, a kola siaŋa sɔɔtɔtɔɔ, a kola siaŋa vólotótoo a á kola keesoo, má sɔɔluu ndu ɲɛkɛndɛi. 38Má tosa sungbuan maŋuɛɛnu a bawlan le ndu landɔɔ lon. Bolii sungbuma man a kpɔlɔnnda ndalan la va layikpaalan a sianion, fondala kɛsiaa latumnda ŋuɛɛnulan la va latoosiaalan a daɲan.
Currently Selected:
Fulaa 36: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
