Timote veelɛ 4
4
Nwoo ŋɛ̨i laa həli
1Gáá ə́ mąąnɛ̨ɛ̨i Yálá ɲɛ̨i ɓa da Jesus Kristə ɲɛ̨i ɓa, yai pai nu hvulúɠaa da haaɓɛlaa kiti teei, gáá moi yɛ́, gu Nąmu pai lɔwai veelɛnąą, da ŋą tɔɔlaa mąą mɛ̨nį ɓa: 2Nwoo ŋɛ̨i laa həli, ə́ hɔlɔ too mą, ə kɛ a ɲələ hvo kɛ a ɲələ, haŋąmąą kɛ, nuą hvaŋąlɔ, ə́ di liɛwoo kɛ a yələ kəlee, a liikpələ da di mąąkwɛli liihɛlɛn. 3Mąąhɔlɔɓo, yələ ta kaa pai ɉəli, nuą wəli kaa pai walawalai, di hva kɛa di wəli tɔɔ tɛ̨ą woo hu həɠəənŋąą ɓa. Kɛlaa, di kaa pai hvilɛn ɉii di kpɔwɔ liiɓa mɛ̨nįɠaa pulu, di wəlii yɛ di təɠən, diɛ di liiɓa mąąkwɛli kɛ nuą tamąą həɠə di bu di kwɛlɛ. 4Di kaa pai di wəli kulɔi tɛ̨ą woo hu, diɛ di wələ tɔɔ lɛɛ mɛ̨nįɠaa diɛ. 5Kɛlaa ə́ wɛi, ə́ yee kɛ ə́ kpɔwɔ ɓa mɛ̨nį kəlee hu, ə́ liikpələ mɔ̨nɔ̨ mu, ə́ kpɔwɔ kɛ a nwɛlɛɛ lɛlɛɛ laa həli mun, ə́ kɛ kóló kɛ ə́ naa kulɔ.
Ní yələ aa ɉəli
6Yii ɲą́ą́ nwɛ́i, daa náákwɛlanmo a haláá hɛn, ɛlɛɛ, ní yələ aa həli. 7Ŋą́ą́ kɔ lɛlɛɛ kɔ, ŋą́ą́ nwɔ́ gilɛi laa kulɔ, ŋą́ą́ laa na laa hɔlɔɓo. 8Yiihu kɛa, tələnmo ɓɔlɔ laai kɛɛi dɔ́wɔ́, yai gu Nąmu kaa pai dɛɛi bɔ́ a mąą yələi tii, yaa tii a kiti haŋąą teemun, hvo lɔ a ɲą́ą́, kɛlaa, a nuąi da gulɔ mɛ̨nį pono ɲą wɛli la kɛ, diɛ kpɛlimąn, da ɉɔlɔɓo.
Liəwoo kpəliɠaa
9'Ə́ ɲąąwala, 'ə́ pa, ə́ həli mą́ą́ ɉa. 10Mąąhɔlɔɓo, Demasə aa nɛ́ɛ́ laa yɛnɛ̨ɛ̨ hɛnŋaa ŋą wɛlikɛmąąlaa mąą mɛ̨nį ɓa, aa li Tɛsalonikə. Krɛsansə aa li Galatə lɔi hu, Titə aa li Dalmati. 11Lukə yaa tanɔ̨n lɔ ɓə ɓɛ bɔ́, yá kɛli pa, ká Markə ká pa, mąąhɔlɔɓo, a pɛli kpɔnmąą tɛɛ bɔ́ góló hu. 12Ŋą́ą́ Tisike tɔɔ Efɛsə. 13Ŋą́ biliɉui tii ŋą́ nɛɛ Troasə Karpɔsə pɔɔlii, yá kɛli pa, ə́ paa la, ə́ bɛlɛ ɉɛɓɛ́ɠaa diɛ, gəlee ə mą kɛ, yii tii bɛ̨ɛ̨ ɉuɔ-kɔlɔ ɓai.
14Alɛsandrə, gwɛli-yɔwmun, aa túwɔ́ kpɔ a ɲą́ą́ a ɲɔ̨nwɔ̨ɔ̨, gu Ną́mu Jesus kpinįi kaa pai vɛla kulɔi yɛ pələi dúwɔ́ pələ kaa la. 15Yɛ́ kpɛlimąn, ə́ kpɔwɔ mɛ̨ikaa mąą mɛ̨nį hu, hvo gaai, ə tɔɔ ku la kpɔ a ɲɔ̨nwɔ̨ɔ̨.
16Ɲələ tɔlɔɔi ŋą́ kɛli gbɔ́wɔ́ mąą kɔ̨nwɔ̨ la, nwɔ́ nu hvo hɔlɔɓo, nu gəlee di kulɔ búlú. Yálá ə mą wala yili gwələ hvo kulɔ li diɛ. 17Gu Ną́mu nwɛi, ə tɔɔ búlú, ə hvaŋą tɛɛ bɔ́, ə gɛ, ɲą́ą́ bɔ́ pələ, nwɛlɛɛ woo laa ə həli, huwu takpɛliɠaa di mɛ̨n. Ɛlɛɛ, ŋį́ kulɔ yala hvulúmąą la. 18Gu Ną́mu kaa pai gúlɔi mɛ̨nį ɲɔ̨n gəlee yəi, ɛlɛɛ, ə málo ŋą yələkɔlɔn ɉu tɔɔlaai mąą mɛ̨nį ɓa. Mąąwiɛ ə kɛ mą a yələ kəlee kpɛɛ hvo mą! Yálá ə kɛti.
Yələ wala too woo
19Ŋą́ Priska da Akilasə di túwɔ́ ɓo, ə mą kɛ, Onesiforə yəi bɛlɛ́n nuą kəlee. 20Erastə ə lɛɛ Korɛntə daai, ŋą́ Trofimə lɛɛ Milɛtə daai, gɔlɔi hvo pono li.
21'Gɛ pələ kwɛli mą, gɛɛ hąmą hvo kɛ lɔi, ə́ pa. Eubulə, Pudensə, Linə, Klodia da gu nąn nonnii kəlee diɛ ə́ túwɔ́ ɓo.
22Gu Ną́mu ə lɛɛ ə́ pɔ. Ŋą mɛ̨inɛ̨ɛ̨ ə kɛ ká kəlee ka pɔ. Amįįną.
Currently Selected:
Timote veelɛ 4: BKPDCG
Highlight
Copy
Compare
Share
Want to have your highlights saved across all your devices? Sign up or sign in
