Timote dɔlɔɔ 6
6
Luwɔɠaa
1Nuąi kpɔ di kaa luwɔlaa ŋą kpono hu, di mąąnɛ̨ɛ̨i di di nąmįną mąąwiɛ, yili ɓə a gɛ, Yálá laa hva kala, ɛlɛɛ, da kalan mɛ̨nį. 2Luwɔɠaai di nwun nąmįną kaa a kalan nɛa, di hvo kɛ di kaa ɲɛ̨i tɛ kulɔ a diɛ, diɛ kɛ mą: kwa diɛni kəlee, ku kaa a kalan nɛa. Yaamun, di mąąnɛ̨ɛ̨i, di tí kpɔ di nwun nąmįną diɛ a nɛlɛɛ, hvo gaai, di kaa a laa na nuą, a di nąn nonnii, wɛlikɛmąą laa hu, diɛ di kɛ kóló lɛlɛɛ dɔlɔ kulɔ.
Yili ɓə mąąnɛ̨ɛ̨ ə́ nɛ diɛ, ə́ di mąąkwɛli mą.
Yálá mɛ̨nį leelee
3Nu ta a kɛi nuą mąąkwɛli a kalan bələ takpɛli, awala kɛ a gąnąnŋąą gu Nąmu Jesus Kristə woo huhəɠəənŋąąi ɓa, ɛlɛɛ, da túwɔ́ pələ yii a galan bələ mąą hon, 4a kɛti, kpɔwɔ ɲąąkɛnɛ̨ aa ɲɛ̨i pu; ɛlɛɛ, mąą nu kaa dɛɠii, ɲɔ̨n gaa mą, yɛ hɛatooi kwɛli, da hvaa kɛ wooɠaa. Yiliɠaa diɛn mə, mɛ̨nįɠaa ŋɛ̨i da kulɔ ɉu: hɛn nwɛlilaa, hɛatoɔ, Yálá lalan nwooɠaa, mɛ̨nį ɲɔ̨n mąą kiliŋąhiɛ, 5yəliháá tɔɔ gbɛlai hvo mą, nuąi di kili ɲɔ̨nwɔ̨ɔ̨ di lɔwai, di hvɛɠɛɛ a tɛ̨ą, diɛ kɛ, Yálá mɛ̨nį kaa a hɛn gwɛli hɛn. 6A tɛ̨ą, Yálá mɛ̨nį, dɔlɔ kɛnɛ̨i kpɔ a neelee, a gɛ nu ə gwəinɛ̨ɛ̨ a ɉɛn gaa ɲəi. 7A tɛ̨ą, gu hvo pa ɓɛ yɛnɛ̨ɛ̨ a hɛn da, gu hvo nwɔ̨nɔ̨ pai lii a hɛn da. 8Akɛ kani, kɔ̨nɔ̨n da həɠə a kɛ gu yəi, yili ə gu kwəinɛ̨ɛ̨. 9Yii ɓaa nuąi diɛ di kɛ a hɛn gɔw nąmįną, diɛ ɓə da too ɲąąhɛn mɛ̨nį ŋą hɛlɛn ɲą, kilikpɛɛɲəi, hɛn nwɛlilaa tamąą, da di kpɔwɔ kala mɛ̨nįɠaa, mɛ̨nįɠaa tii ɓə da nu kanŋaa lɔ di kala mɛ̨nį hu, da di nwun napili mɛ̨nį. 10Mɛ̨nį ɲɔ̨n gəlee ɉamu ɓaa a, wali lii. Gɛ mɛ̨nį nuą diɛ di kpɔwɔ kwɛlɛ mą, daa lan, daa di mąą kwɛa laa na pələ ɓa, ɛlɛɛ, daa di kpɔwɔ liikələn di kwəi, a kiliŋąhiɛ huwu tamąą.
Laa na woo lɛlɛɛ
11Kɛlaa, ə́ wɛi, Yálá ŋą nu, 'pú, 'həɠə mɛ̨nįɠaa tii tɔwɔ. Mɛ̨nįɠaa ŋɛ̨i kwɛli, diɛ ɓaa: 'Tələnmolaa, mąąwiɛlaai a hvilɛn Yálá ɓa, laa na laa, wɛlikɛmąąlaa, kąnąnmąą laa, da liinɛ̨ɛ̨ gwəilaa. 12Laa na laa mąą kɔ́ lɛlɛɛ kɔ́, yɛnɛ̨ɛ̨ hva kpɛɛi ə́ təliɛi mą, 'gwɛli, yɛ bələ ə́ gɔlɔn na, ɛlɛɛ, ə́ mąą kɛla hvaa ɓo a laa na laa, nu kpulu kɛnɛ̨ɛ̨ ɲɛ̨i ɓa. 13Gáá ə́ tíi, Yálái a yɛnɛ̨ɛ̨ tɛɛ hɛn gəlee pɔ, ɲɛ̨i ɓa, da Jesus Kristə ɲɛ̨i ɓa, yai mąą kɛla hvaa ɓo Pɔnsə Pilatə lii la, laa na laa hu, gɛ́: 14Mɛ̨nįɠaai ti ŋį́ ə́ tí la, ə́ ə́ yee kąnąn diɛ kpɔ kpąą, 'hvó mąą kala, 'hvó ɲɛ̨i ɲɔ̨nwɔ̨i hee mą, ə lɛɛ ɉu, gu Ną́mu Jesus Kristə pa yələ yɛ ɉəli mą; 15guui tii ɉəɛɛ, ɲələ a pa ɉəlii, Nwun na nɛ̨ɛ̨mun, a Hééɓomun danɔ̨n gbən, tɔɔɓɛlaa di wɔɔ Tɔɔmun, a nąmuɠaa kəlee di Nąmu, 16a Yaa tanɔ̨n gbən yɛnɛ̨ɛ̨ kaa ɲəii, Yai heeni kɛɛponoi nu kan hva pɛli lɔi ɉu, a yai nu kan hvo ta gaa li, hva nwɔ̨nɔ̨ pɛli gaai; Yaa ɓə, mąąwiɛlaa, da hvaŋąlaa kaa ɲəi. Amįįną!
Liɛwooi vilɛnŋąąi hɛn gɔw nąmįną mąą mɛ̨nį ɓa
17Nuąi a hɛn gɔw nąmįną ɲɛnɛ̨ɛ̨ ŋɛ̨i hu, mo diɛ, di hvo kɛ di kaa di kpɔwɔ ɲąąkɛnɛ̨i ɉu, di hvo kɛ di kaa di kilitɔɔi hɛn gɔwi gaa a tɛɛi, mą; kɛlaa, di di kilitɔɔ Yálá ɓa, yai a gu kɔ a mɛ̨inɛ̨ɛ̨ɠaa, a ɉu kɛnɛ̨ɛ̨, guɔ ɲąąnɛ̨ɛ̨ kulɔ. 18'Di yee ə kɛ mɛ̨nį lɛlɛɛ kɛɛ ɓa, di yee ə kɛ diɛ hvɛa-hvɛa, diɛ nu takpɛliɠaa kɔ a di yəi hɛn. 19Da kɛli gɛ ti, di kaa hɛn gɔw kpɔn ɉii gee ɓa a di kpɔwɔ nwɔɔ tínąą, diɛ pɛli ɓalo hva kpɛɛ hɔlɔɓoi la.
Yələ wala too woo
20Nwɛ́li kɛ mąą lon Timote, mɛ̨nįi galihvaɓoɔ yɛ́, ə́ yee kąnąn mą kpąą, 'hvó ə́ laa lɔ hɛa kpɛli-kpɛli toɔ hu, yii nwun və mą, mɛ̨nį kɔ́lɔnŋąąi hvo hvilɛn ni Yálá kɔ́lɔn bələ ɓa, 'hvó ə́ laa lɔ ɉu. 21Nuą tamąąi daa di laa lɔ yili hu, daa di kpɔwɔ mąą kwɛa laa na pələ ɓa.
Yálá ŋą mɛ̨inɛ̨ɛ̨i ə kɛ ká pɔ.
Currently Selected:
Timote dɔlɔɔ 6: BKPDCG
Highlight
Copy
Compare
Share
Want to have your highlights saved across all your devices? Sign up or sign in
