Judas 1
1
1Sulat inin amban aku si Judas, dambuwaꞌ daraꞌakan Isa Almasi duk pungtinaꞌi si Yakub. Pasampayku sulat inin piyu si kaꞌam meꞌ tapeneꞌ Tuhanin. Kinalasahan kaꞌam weꞌ Samate bi Tuhanin duk inipat kaꞌam weꞌ Isa Almasi. 2Pāku-pākuku si Tuhan karayaw magkasōng aseꞌne duk lasane si kaꞌamin duk pasōng pasanyangne dem ateybin.
3Meꞌ bagayku kinalasahankun, bayaꞌ teꞌed kaꞌam sulatanku sabab katimbulanten bi saliꞌ-saliꞌ, saguwaꞌ niyaꞌ seddili subey akaku si kaꞌam kuweꞌitu. Subey dahuꞌ kaꞌam sulatanku nessaꞌan kaꞌam, amey-amey tenggehanun bi teꞌed toloꞌ mabennal kinahagadbin. Meꞌ toloꞌ inin pinakataꞌu weꞌ Tuhanin si kite bi meꞌ aꞌanen duk ganap ne meꞌ toloꞌ inin, gaꞌ niyaꞌ kulangne. 4Hangkan kaꞌam sessaꞌanku peggeꞌ niyaꞌ meꞌ aꞌa gaꞌi talew si Tuhan iyuꞌ ne palagumey si kaꞌam bu gaꞌ kataꞌuhanbi. Meꞌ aꞌa inin pinindahan weꞌ de toloꞌ sabab lasa duk aseꞌ Tuhanten bi duk siye tapaghinangan laꞌat. Meꞌ aꞌa inin gaꞌi kahagad pu si Isa Almasi, Amute duk Panuhutante bi dambuwaꞌ-buwaꞌin. Tasulat hep dem kitab awwalley weꞌ ilegga du meꞌ aꞌa kuweꞌ siye inin.
5Bisan du inin kataꞌuhanbi ne, batang hadja kaꞌam paꞌessebanku sabab meꞌ bangsa Israꞌilin masade tabanyagaꞌ si lahat Misil. Pinaluwas siye weꞌ Tuhanin amban lahat Misil saguwaꞌ puwas miyaꞌan pinapatey du weꞌ ne meꞌ manggaꞌ makahagad si iyehin. 6Duk essebun bi isab meꞌ malaꞌikat mangalebbahan kapatut pinasukuꞌ Tuhan si siyehin duk mangambanan lugal pamatennaꞌan Tuhan siyehin. Kinarena siye salama-lama duk kinalabusu siye weꞌ Tuhanin dem lindem bitu-bituhan sampay taꞌabut ellew mahadje pangahukum Tuhan siyehin. 7Essebun bi isab meꞌ aꞌa malaꞌi si Sodom duk si Gomorahin duk si meꞌ puweblo mapaliputin. Kuweꞌ siye meꞌ malaꞌikat miyaꞌan peggeꞌ gaꞌi patut hinanganden. Dumaꞌin hadja meꞌ dende saweꞌde magkahinanganin saguwaꞌ bisan duk pagkaside lellahin maghinangan siye meꞌ kasabulan. Pinatekkahan siye ebbut gaꞌ niyaꞌ kapalemne pangalegga siye supaya niyaꞌ pamintangan meꞌ manusiyaꞌin kēmon.
8Na, damikkiyan isab meꞌ aꞌa pinaꞌinku mapalagumey si kaꞌamin. Niyaꞌ koꞌ taginepde bu peggeꞌ tinuhut weꞌ de, inūtan weꞌ de napsu baranden. Gaꞌi siye ngatu pagbayaꞌan weꞌ Tuhanin. Bissāhande sampay meꞌ malaꞌikat si surgaꞌin. 9Bisan du hatiꞌ si Mikaꞌil, malaꞌikat nakuraꞌin, gaꞌ inin bakas tahinangne. Masa pagsasaꞌde duk nakuraꞌ seyitanin, sakaliꞌ siye magsuweyan bang sine subey mangeddoꞌ bangkey si Musahin, gaꞌ du iye makatawakkal missā-missāhan nakuraꞌ seyitanin. Paꞌinne hadja, “Bayaꞌ-bayaꞌ Tuhanin.” 10Saguwaꞌ meꞌ aꞌa pinaꞌinku inin, bissā-bissāhande manggaꞌi tahātiden. Kuweꞌ siye meꞌ hayep, gaꞌi taꞌu mikil saguwaꞌ hinangde hadja sasuku kinabayaꞌan baranden duk inin makapagkaꞌat siyehin. 11Asal makaꞌaseꞌ-aseꞌ siye. Binatukan weꞌ de meꞌ addat si Kabilin, anak Apuꞌ Adamin. Tinuhut isab weꞌ de hinangan si Balaꞌamin. Hawal napsune si sīnin ngatu iye moꞌo meꞌ aꞌahin pasapeꞌ amban Tuhan basta tinangdanan hadja iye. Duk kuweꞌ si Kora manungkaꞌan si Musa awwalley, sinungkaꞌan isab weꞌ de Tuhanin duk ujud magmula du siye kuweꞌ si Korahin. 12Meꞌ aꞌa inin magsabul si meꞌ pagjamu-jamuhan hinangbi tandaꞌ weꞌ magdambuwaꞌ atey ne kaꞌam. Gaꞌi siye iyaꞌ pasawu si kaꞌam bu laꞌat meꞌ hinanganden. Iye hadja tapikilden nganduhulan diden. Kuweꞌ siye gabun taboꞌo baliyu gaꞌ bisan da pettak ulan laboꞌ weꞌ de. Kuweꞌ isab siye kayu gaꞌi buwaꞌ bisan musim pagbuwaꞌne. Bu dumaꞌin hadja gaꞌi buwaꞌ saguwaꞌ matey ne teꞌed duk bineddutan sampay gamutnen. 13Kuweꞌ isab siye meꞌ goyak si tahikin bang lahat-lahat duk meꞌ hinangande makaꞌiyaꞌ-iyaꞌin pastiꞌ takite kuweꞌ bukal tahikin. Kuweꞌ isab siye meꞌ poteꞌan magpinda-pinda palaꞌihanden, gaꞌi ne tapamandogahan. Niyaꞌ ne andang panyap Tuhanin patennaꞌan meꞌ aꞌa inin dem lindem bitu-bituhan duk laꞌi siye salama-lama.
14Si Nabi Idris ley, kapituꞌ pangkat tubuꞌ si Apuꞌ Adamin, magpaꞌal awwalley sabab meꞌ aꞌa kuweꞌ inin du isab. Paꞌinne, “Pakale kaꞌam! Pitu du iyan Panuhutanten bi magtuhut duk ibu-ibuhan meꞌ malaꞌikatnen 15ngahukum kēmon meꞌ aꞌahin. Laboꞌanne hukuman kēmon manggaꞌi matalew si Tuhanin peggeꞌ bakas maghinangan siye meꞌ hinangan kabunsihan Tuhanin duk peggeꞌ luwal bakas bissā-bissāhande pangkal Tuhanin.”
16Meꞌ aꞌa tinaꞌatku inin luwal sāk si Tuhan duk luwal siye nusunan saweꞌden. Tagam ne siye nganduhulan bisan ine-ine napsu baranden. Magabbu teꞌed siye sabab diden duk pandey siye nanglitan saweꞌden supaya tatuhut kinabayaꞌanden.
17Saguwaꞌ meꞌ bagayku, esseb-essebun bi teꞌed bakas inaka si kaꞌam weꞌ meꞌ aꞌa kawakilan Panuhutanten bi Isa Almasi. 18Paꞌinde hep si kaꞌam, “Bang sōng kiyamat ne, niyaꞌ iyan meꞌ aꞌa piyu si kaꞌam, meꞌ aꞌa luwal ngūtan napsuden. Hinangde kaꞌam iyan dagey.” 19Meꞌ aꞌa inin pagpaꞌilde meꞌ tindeg si Isahin. Iye tinuhutden napsu baranden. Gaꞌ laꞌi si siye Niyawa Tuhanin. 20Saguwaꞌ kaꞌam, meꞌ bagayku, magasig-inasig kaꞌam supaya ngabasag sandelbi si Tuhanin duk pateteg kaꞌam si meꞌ toloꞌ Tuhan kinahagadbin. Bang kaꞌam ngampun si Tuhan tuhutun bi pamanoloꞌ Niyawa Sutsi si kaꞌamin. 21Pateteg kaꞌam si lasa Tuhanin sābubi mangagad-ngagad Panuhutanten bi Isa Almasi ngurungan kaꞌam umul gaꞌ tamananne peggeꞌ maꞌaseꞌ iye si kaꞌam.
22Niyaꞌ luꞌu meꞌ aꞌa nuhut Almasi saguwaꞌ duwe-duwehan pikilanden. Pakitehanun bi aseꞌbin si siye. 23Meꞌ sinduwehin isab, meꞌ sōng taboꞌo si kalaꞌatanin, tabangun bi siye amban dem kasiya-siyahanden kuweꞌ aꞌa tinabangan amban dem lumaꞌ eggas. Meꞌ aꞌa sinduwehin isab, subey kaꞌam maꞌaseꞌ si siye saguwaꞌ subey kaꞌam pahatul-hatul kaw kaꞌam kaleggeyan weꞌ de. Maꞌaseꞌ kaꞌam si siye saguwaꞌ subey kabunsihanbi meꞌ hinangande malaꞌatin.
24Tuhanin, taꞌipatne kite supaya kite gaꞌi taboꞌo magduse. Iye hadja makaꞌānan duseten supaya gaꞌ niyaꞌ takitene dusete bang ne kite binoꞌo si panaꞌananne. Asal magkēg teꞌed kite bi laꞌi si panaꞌananne masahayahin. 25Iye Tuhan dambuwaꞌ-buwaꞌin duk tinimbul kite bi weꞌ ne. Pudjite bi Tuhanin palabey amban Isa Almasi, Panuhutanten bi. Pudjite bi Tuhanin, iye tamanan mabangsahanin duk mabalakatanin duk iye magbayaꞌin amban awwal tagnaꞌ sampay maꞌin duk sampay salama-lama. Amin.
Wassalam
Currently Selected:
Judas 1: yakV
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.