Hinangan 17
17
Laꞌi si Tessalonika
1Manjari inin, lumengngan disi Paul pabutas amban puweblo Ampipolis duk puweblo Appolon. Ubus tekka siye si puweblo Tessalonika. Niyaꞌ laꞌi dambuwaꞌ langgal Yahudi. 2Sa hinangannen, hap pī si Paul si langgal. Tellu Sabtuꞌ magturul-turul, magsuꞌal iye duk meꞌ Yahudihin sabab meꞌ panoloꞌ dem kitabin. 3Pinahātihan weꞌ ne si siye duk ngurung isab iye pureba amban dem kitab weꞌ subey Almasihin makalabey kabinasahan duk pinapatey duk ellum du iye balik amban kamateynen. Ubus paꞌinne, “Si Isa, minahalayakku si kaꞌam inin, iye ne Almasihin.” 4Meꞌ Yahudi sinduwehin kahagad duk patuhut ne pu si Paul duk si Silas. Duk ekka isab patuhut meꞌ bangsa Girik, meꞌ aꞌa magsambahayang si Tuhan. Duk ekka du isab meꞌ dende bangsahan patuhut.
5Saguwaꞌ meꞌ Yahudi sinduwehin ngimbū, hangkan tinawag weꞌ de meꞌ aꞌa dupang amban meꞌ kalān-lānanin duk pinagtipun weꞌ de bu jinabu weꞌ de puweblo miyaꞌan. Ginuhu weꞌ de lumaꞌ si Jasonin pamihahande si Paul duk si Silas, supaya siye taboꞌode pī paluwas si meꞌ aꞌahin. 6Saguwaꞌ peggeꞌ gaꞌ siye kasuwaꞌde, ilalas weꞌ de si Jason duk meꞌ tindeg si Isa sinduwehin pī si meꞌ bagellalin. Ngalingan siye papales, paꞌinde, “Tiyaꞌ ne tekka si puweblote bi inin meꞌ manasew kalahat-lahatanin. 7Duk si Jason inin, inennaꞌ siye weꞌ ne dem lumaꞌne. Kēmon siye inin langgalande saraꞌ Sultan Nakuraꞌin. Paꞌinde weꞌ niyaꞌ koꞌ sultan seddili, ēnnen si Isa.” 8Sabab bissāde miyaꞌan, hewuhalaꞌ ne meꞌ aꞌa mabanesin duk sampay meꞌ bagellalin. 9Manjari si Jason duk meꞌ saweꞌnen dinaꞌak magbayed piyansa weꞌ meꞌ bagellalin, ubus bu pinapoleꞌ ne siye.
Laꞌi si lahat Berea
10Pagsangem ne, dinaꞌak si Paul duk si Silas weꞌ meꞌ pagkaside tindeg si Isahin tahalaꞌ hap Berea. Pagtekkade si Berea, hap pī siye si langgal Yahudi. 11Meꞌ Yahudi malaꞌihin lunuk ateyden amban meꞌ Yahudi si Tessalonikahin. Kēgan teꞌed siye pakale si meꞌ usihat disi Paulin, duk ellew-ellew hinapal weꞌ de kitabin pamayamande bang asal toꞌo ke panoloꞌ si Paulin. 12Ekka meꞌ aꞌa Bereahin sandel ne pu si Isa, sampay meꞌ dende bangsahan amban bangsa Girik, duk meꞌ lella Girik isab.
13Saguwaꞌ pagkale meꞌ Yahudi si Tessalonikahin weꞌ īꞌ si Paul si Berea magmahalayak lapal Tuhanin, hap pī isab siye laꞌi nasew duk ngawul meꞌ aꞌa malaꞌihin. 14Magtawus si Paul dinaꞌak weꞌ meꞌ masandel pu si Isahin padurul pī si higad tahik. Saguwaꞌ si Silas duk Timoteo paꞌamban laꞌi si Berea. 15Tinuhutan si Paul hap pī si puweblo Aten. Ubus balik ne meꞌ manuran iyehin hap Berea moꞌo sessaꞌ amban si Paul weꞌ subey si Silas duk Timoteo paturul si iye mura.
Laꞌi si puweblo Aten
16Manjari inin, sābu si Paul laꞌi si Aten ngagadan si Silas duk Timoteo, sasew teꞌed ateynen pagkitene weꞌ laꞌi si puweblo miyaꞌan ekka teꞌed limbagan tuhan-tuhan. 17Hap pī iye dem langgal duk magsuꞌal iye laꞌi duk meꞌ Yahudi, duk meꞌ aꞌa bangsa seddili isab, meꞌ manambahayang si Tuhanin. Ellew-ellew laꞌi isab iye si tabuꞌan magsuꞌal duk meꞌ aꞌa malaꞌihin. 18Duk niyaꞌ isab meꞌ guru taboꞌone magsuꞌal. Meꞌ guru miyaꞌan, iye tinuhutden meꞌ panoloꞌ aꞌa inēnan Epikuru duk panoloꞌ meꞌ aꞌa inēnan Istoik. Pagkalede si Paul magusihat sabab si Isa duk sabab kaꞌellumne mabalik amban kamateynen, paꞌin meꞌ sinduwehin, “Ine be pinoppot aꞌa inin?” Paꞌin sinduwehin isab, “Aꞌa inin kuweꞌ magpalataꞌ sabab tuhan seddili gaꞌi kataꞌuhan tuꞌu si lahatte bi inin.” 19Manjari binoꞌo weꞌ de si Paul pī si kakunsihalanin, magtipun laꞌi si lugal ēnande Areopagus. Paꞌinde pu si Paul, “Batang kami ngataꞌu sabab toloꞌ baꞌahu binissānu miyaꞌan. 20Meꞌ bissānu miyaꞌan gaꞌ bakas takale kami, hangkan batang kataꞌuhan kami hātinen.” (21Kēmon hep meꞌ aꞌa Atenin duk meꞌ aꞌa liyu-liyu mapatennaꞌ malaꞌihin, tagihan siye magheto-heto duk pakale-kale sabab ine-ine baꞌahu.)
22Manjari nengge si Paul si harapan meꞌ kakunsihalanin duk paꞌinne, “Kaꞌam meꞌ aꞌa Atenin, tapandogaku weꞌ asal be-āgama teꞌed kaꞌam. 23Peggeꞌ sābuku miyaꞌan lumengngan-lengngan tuꞌu si puweblobi, takiteku meꞌ bayuꞌ-bayuꞌan sinumbabin. Niyaꞌ takiteku dambuwaꞌ lugal panumbahanbi duk tasulat bissā inin laꞌi, pinaꞌin, ‘Iye inin lugal panumbahan tuhan manggaꞌi kinataꞌuhanten bi.’ Na,” paꞌin si Paul, “tuhan manggaꞌi kinataꞌuhanbin saguwaꞌ sinumba weꞌ bi, iye ne inin Tuhan pinahātiku si kaꞌam kuweꞌitu inin. 24Iye inin Tuhan magpapanjari dunyahin duk kēmon bayuꞌ-bayuꞌan dem dunyahin. Iye magbayaꞌ si surgaꞌin duk si dunyahin. Gaꞌi Tuhan inin patennaꞌ dem meꞌ lumaꞌ panumbahan hinangan manusiyaꞌ. 25Duk gaꞌi isab iye makitabang si manusiyaꞌ peggeꞌ gaꞌ du niyaꞌ kulang si iye. Bisan miyaꞌan, iye pe mangurung umulin duk napasin duk kēmon bayuꞌ-bayuꞌan ginuna manusiyaꞌin. 26Aꞌa tagnaꞌ pinapanjari weꞌ Tuhanin,” paꞌin si Paul, “iye miyaꞌan tagnaꞌ meꞌ kabangsa-bangsahanin kēmon duk pinalahat siye weꞌ Tuhanin tuꞌu si tibuꞌukan dunya. Duk andang ne ginantaꞌan weꞌ ne bang saꞌingge tiggelanden duk bang lahat ingge patennaꞌanden. 27Hinang Tuhanin inin si meꞌ kabangsa-bangsahanin supaya du iye pihade duk si pagtuyuꞌden kaw du iye kasuwaꞌde. Saguwaꞌ,” paꞌin si Paul, “gaꞌi du hep Tuhanin tala amban kite bi. 28Peggeꞌ hangkan kite bi ellum, hangkan kite bi tapaꞌusaꞌ, hangkan kite bi taga niyawa, sabab Tuhanin. Kuweꞌ du isab pinaꞌin meꞌ aꞌa magkata-katahin,
‘Kite bi inin meꞌ anak Tuhanin du.’
29Na, peggeꞌ meꞌ anak Tuhanin kite bi,” paꞌin si Paul, “subey kite bi gaꞌi magpikil weꞌ Tuhanin kuweꞌ bantuk meꞌ limbagan bulawan atawa pilak atawa batu, hininang amban pikilan duk kapandeyan manusiyaꞌ. 30Matuꞌuhin, peggeꞌ awam pe meꞌ aꞌahin sabab Tuhanin, gaꞌ ne hinang ine weꞌ Tuhanin meꞌ hinangande miyaꞌan. Saguwaꞌ kuweꞌitu, iye pangandaꞌakan Tuhanin si kēmon manusiyaꞌ antag-antag, weꞌ subey ne pagsusunande meꞌ duseden duk lebbahande ne, gaꞌi ne hininang-hinang balik. 31Peggeꞌ bakas kineddewan ne weꞌ Tuhanin ellew pangahukumne manusiyaꞌin kēmon, duk hukumannen bentel. Duk bakas tapeneꞌne ne aꞌa mangahukumin. Pinabugtuꞌ weꞌ Tuhanin si kēmon manusiyaꞌ weꞌ iye ne inin tapeneꞌnen, sabab pinakellum weꞌ ne balik aꞌa inin amban kamateynen.”
32Pagkalede si Paul missā sabab ellum balik meꞌ pateyin, sinduwehin hinangde hadja dagey si Paul. Saguwaꞌ sinduwehin isab magpaꞌin, “Bayaꞌ kew pakale kami missā balik sabab inin.” 33Manjari tahalaꞌ ne si Paul amban pagtipunan miyaꞌan. 34Niyaꞌ meꞌ aꞌahin patuhut si iye duk sandel ne pu si Isa. Sinduwehin siye disi Diyonisi, dambuwaꞌ meꞌ kakunsihalan miyaꞌan, duk dambuwaꞌ dende inēnan Damaris, duk niyaꞌ pe isab meꞌ sinduwe.
Currently Selected:
Hinangan 17: yakV
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
Hinangan 17
17
Laꞌi si Tessalonika
1Manjari inin, lumengngan disi Paul pabutas amban puweblo Ampipolis duk puweblo Appolon. Ubus tekka siye si puweblo Tessalonika. Niyaꞌ laꞌi dambuwaꞌ langgal Yahudi. 2Sa hinangannen, hap pī si Paul si langgal. Tellu Sabtuꞌ magturul-turul, magsuꞌal iye duk meꞌ Yahudihin sabab meꞌ panoloꞌ dem kitabin. 3Pinahātihan weꞌ ne si siye duk ngurung isab iye pureba amban dem kitab weꞌ subey Almasihin makalabey kabinasahan duk pinapatey duk ellum du iye balik amban kamateynen. Ubus paꞌinne, “Si Isa, minahalayakku si kaꞌam inin, iye ne Almasihin.” 4Meꞌ Yahudi sinduwehin kahagad duk patuhut ne pu si Paul duk si Silas. Duk ekka isab patuhut meꞌ bangsa Girik, meꞌ aꞌa magsambahayang si Tuhan. Duk ekka du isab meꞌ dende bangsahan patuhut.
5Saguwaꞌ meꞌ Yahudi sinduwehin ngimbū, hangkan tinawag weꞌ de meꞌ aꞌa dupang amban meꞌ kalān-lānanin duk pinagtipun weꞌ de bu jinabu weꞌ de puweblo miyaꞌan. Ginuhu weꞌ de lumaꞌ si Jasonin pamihahande si Paul duk si Silas, supaya siye taboꞌode pī paluwas si meꞌ aꞌahin. 6Saguwaꞌ peggeꞌ gaꞌ siye kasuwaꞌde, ilalas weꞌ de si Jason duk meꞌ tindeg si Isa sinduwehin pī si meꞌ bagellalin. Ngalingan siye papales, paꞌinde, “Tiyaꞌ ne tekka si puweblote bi inin meꞌ manasew kalahat-lahatanin. 7Duk si Jason inin, inennaꞌ siye weꞌ ne dem lumaꞌne. Kēmon siye inin langgalande saraꞌ Sultan Nakuraꞌin. Paꞌinde weꞌ niyaꞌ koꞌ sultan seddili, ēnnen si Isa.” 8Sabab bissāde miyaꞌan, hewuhalaꞌ ne meꞌ aꞌa mabanesin duk sampay meꞌ bagellalin. 9Manjari si Jason duk meꞌ saweꞌnen dinaꞌak magbayed piyansa weꞌ meꞌ bagellalin, ubus bu pinapoleꞌ ne siye.
Laꞌi si lahat Berea
10Pagsangem ne, dinaꞌak si Paul duk si Silas weꞌ meꞌ pagkaside tindeg si Isahin tahalaꞌ hap Berea. Pagtekkade si Berea, hap pī siye si langgal Yahudi. 11Meꞌ Yahudi malaꞌihin lunuk ateyden amban meꞌ Yahudi si Tessalonikahin. Kēgan teꞌed siye pakale si meꞌ usihat disi Paulin, duk ellew-ellew hinapal weꞌ de kitabin pamayamande bang asal toꞌo ke panoloꞌ si Paulin. 12Ekka meꞌ aꞌa Bereahin sandel ne pu si Isa, sampay meꞌ dende bangsahan amban bangsa Girik, duk meꞌ lella Girik isab.
13Saguwaꞌ pagkale meꞌ Yahudi si Tessalonikahin weꞌ īꞌ si Paul si Berea magmahalayak lapal Tuhanin, hap pī isab siye laꞌi nasew duk ngawul meꞌ aꞌa malaꞌihin. 14Magtawus si Paul dinaꞌak weꞌ meꞌ masandel pu si Isahin padurul pī si higad tahik. Saguwaꞌ si Silas duk Timoteo paꞌamban laꞌi si Berea. 15Tinuhutan si Paul hap pī si puweblo Aten. Ubus balik ne meꞌ manuran iyehin hap Berea moꞌo sessaꞌ amban si Paul weꞌ subey si Silas duk Timoteo paturul si iye mura.
Laꞌi si puweblo Aten
16Manjari inin, sābu si Paul laꞌi si Aten ngagadan si Silas duk Timoteo, sasew teꞌed ateynen pagkitene weꞌ laꞌi si puweblo miyaꞌan ekka teꞌed limbagan tuhan-tuhan. 17Hap pī iye dem langgal duk magsuꞌal iye laꞌi duk meꞌ Yahudi, duk meꞌ aꞌa bangsa seddili isab, meꞌ manambahayang si Tuhanin. Ellew-ellew laꞌi isab iye si tabuꞌan magsuꞌal duk meꞌ aꞌa malaꞌihin. 18Duk niyaꞌ isab meꞌ guru taboꞌone magsuꞌal. Meꞌ guru miyaꞌan, iye tinuhutden meꞌ panoloꞌ aꞌa inēnan Epikuru duk panoloꞌ meꞌ aꞌa inēnan Istoik. Pagkalede si Paul magusihat sabab si Isa duk sabab kaꞌellumne mabalik amban kamateynen, paꞌin meꞌ sinduwehin, “Ine be pinoppot aꞌa inin?” Paꞌin sinduwehin isab, “Aꞌa inin kuweꞌ magpalataꞌ sabab tuhan seddili gaꞌi kataꞌuhan tuꞌu si lahatte bi inin.” 19Manjari binoꞌo weꞌ de si Paul pī si kakunsihalanin, magtipun laꞌi si lugal ēnande Areopagus. Paꞌinde pu si Paul, “Batang kami ngataꞌu sabab toloꞌ baꞌahu binissānu miyaꞌan. 20Meꞌ bissānu miyaꞌan gaꞌ bakas takale kami, hangkan batang kataꞌuhan kami hātinen.” (21Kēmon hep meꞌ aꞌa Atenin duk meꞌ aꞌa liyu-liyu mapatennaꞌ malaꞌihin, tagihan siye magheto-heto duk pakale-kale sabab ine-ine baꞌahu.)
22Manjari nengge si Paul si harapan meꞌ kakunsihalanin duk paꞌinne, “Kaꞌam meꞌ aꞌa Atenin, tapandogaku weꞌ asal be-āgama teꞌed kaꞌam. 23Peggeꞌ sābuku miyaꞌan lumengngan-lengngan tuꞌu si puweblobi, takiteku meꞌ bayuꞌ-bayuꞌan sinumbabin. Niyaꞌ takiteku dambuwaꞌ lugal panumbahanbi duk tasulat bissā inin laꞌi, pinaꞌin, ‘Iye inin lugal panumbahan tuhan manggaꞌi kinataꞌuhanten bi.’ Na,” paꞌin si Paul, “tuhan manggaꞌi kinataꞌuhanbin saguwaꞌ sinumba weꞌ bi, iye ne inin Tuhan pinahātiku si kaꞌam kuweꞌitu inin. 24Iye inin Tuhan magpapanjari dunyahin duk kēmon bayuꞌ-bayuꞌan dem dunyahin. Iye magbayaꞌ si surgaꞌin duk si dunyahin. Gaꞌi Tuhan inin patennaꞌ dem meꞌ lumaꞌ panumbahan hinangan manusiyaꞌ. 25Duk gaꞌi isab iye makitabang si manusiyaꞌ peggeꞌ gaꞌ du niyaꞌ kulang si iye. Bisan miyaꞌan, iye pe mangurung umulin duk napasin duk kēmon bayuꞌ-bayuꞌan ginuna manusiyaꞌin. 26Aꞌa tagnaꞌ pinapanjari weꞌ Tuhanin,” paꞌin si Paul, “iye miyaꞌan tagnaꞌ meꞌ kabangsa-bangsahanin kēmon duk pinalahat siye weꞌ Tuhanin tuꞌu si tibuꞌukan dunya. Duk andang ne ginantaꞌan weꞌ ne bang saꞌingge tiggelanden duk bang lahat ingge patennaꞌanden. 27Hinang Tuhanin inin si meꞌ kabangsa-bangsahanin supaya du iye pihade duk si pagtuyuꞌden kaw du iye kasuwaꞌde. Saguwaꞌ,” paꞌin si Paul, “gaꞌi du hep Tuhanin tala amban kite bi. 28Peggeꞌ hangkan kite bi ellum, hangkan kite bi tapaꞌusaꞌ, hangkan kite bi taga niyawa, sabab Tuhanin. Kuweꞌ du isab pinaꞌin meꞌ aꞌa magkata-katahin,
‘Kite bi inin meꞌ anak Tuhanin du.’
29Na, peggeꞌ meꞌ anak Tuhanin kite bi,” paꞌin si Paul, “subey kite bi gaꞌi magpikil weꞌ Tuhanin kuweꞌ bantuk meꞌ limbagan bulawan atawa pilak atawa batu, hininang amban pikilan duk kapandeyan manusiyaꞌ. 30Matuꞌuhin, peggeꞌ awam pe meꞌ aꞌahin sabab Tuhanin, gaꞌ ne hinang ine weꞌ Tuhanin meꞌ hinangande miyaꞌan. Saguwaꞌ kuweꞌitu, iye pangandaꞌakan Tuhanin si kēmon manusiyaꞌ antag-antag, weꞌ subey ne pagsusunande meꞌ duseden duk lebbahande ne, gaꞌi ne hininang-hinang balik. 31Peggeꞌ bakas kineddewan ne weꞌ Tuhanin ellew pangahukumne manusiyaꞌin kēmon, duk hukumannen bentel. Duk bakas tapeneꞌne ne aꞌa mangahukumin. Pinabugtuꞌ weꞌ Tuhanin si kēmon manusiyaꞌ weꞌ iye ne inin tapeneꞌnen, sabab pinakellum weꞌ ne balik aꞌa inin amban kamateynen.”
32Pagkalede si Paul missā sabab ellum balik meꞌ pateyin, sinduwehin hinangde hadja dagey si Paul. Saguwaꞌ sinduwehin isab magpaꞌin, “Bayaꞌ kew pakale kami missā balik sabab inin.” 33Manjari tahalaꞌ ne si Paul amban pagtipunan miyaꞌan. 34Niyaꞌ meꞌ aꞌahin patuhut si iye duk sandel ne pu si Isa. Sinduwehin siye disi Diyonisi, dambuwaꞌ meꞌ kakunsihalan miyaꞌan, duk dambuwaꞌ dende inēnan Damaris, duk niyaꞌ pe isab meꞌ sinduwe.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.