2 Yahiya 1
1
1Sulat inin amban aku, Bahiꞌ meꞌ masandel pu si Isa Almasihin. Pasampayku inin pī si dende tapeneꞌ weꞌ Tuhanin duk si meꞌ anaknen. Bennal kalasahante kaꞌam. Duk dumaꞌin hadja aku saguwaꞌ kēmon isab mangataꞌuhan toloꞌ mabennal amban Tuhanin malasa si kaꞌam, 2peggeꞌ teteg toloꞌ mabennalin dem ateyte bi duk pateteg du si kite bi salama-lama.
3Karayaw inipat kite bi duk kaꞌaseꞌan kite bi weꞌ Samaten bi Tuhanin duk weꞌ Isa Almasi, Anaknen duk karayaw pasanyangde dem ateyten bi. Kēmon inin si kite bi meꞌ manuhut mabennalin duk meꞌ maglasa-ilasahin.
4Kēgan ku teꞌed pagkaleku weꞌ meꞌ anaknu sinduwehin nuhut du toloꞌ mabennalin kuweꞌ pangandaꞌakan kite weꞌ Samate bi Tuhanin. 5Na, kuweꞌitu niyaꞌ pākuku si kaꞌam, Dende: subey kite bi maglasa-ilasa. Pangandaꞌakan inin dumaꞌin ne baꞌahu saguwaꞌ andang ne inin tuꞌu si kite bi kemuwe tagnaꞌ sandel kite bi pu si Isa Almasi. 6Bang malasa kite si Tuhan duk si pagkasiten subey tuhutte meꞌ pangandaꞌakan Tuhanin. Duk kemuwebi sandel pu si Isa, iye inin pangandaꞌakan kaꞌamin weꞌ subey kaꞌam teteg maglasa-ilasa.
7Ekka ne meꞌ aꞌa magtoloꞌ manggaꞌi mabennalin si meꞌ kalahat-lahatan tuꞌu si dunya. Meꞌ aꞌa inin gaꞌi kahagad weꞌ si Isa Almasi bakas pitu si dunya magbaran manusiyaꞌ. Meꞌ aꞌa inin pangakkal teꞌed. Siye ne meꞌ kuntara Almasihin. 8Hangkan papateng-pateng kaꞌam supaya gaꞌi du lepas kēmon bakas pagluꞌuganten bi, saguwaꞌ supaya jukup du tasangkabi panumbas Tuhan si kaꞌamin.
9Sasuku gaꞌi pateteg si meꞌ toloꞌ Almasihin saguwaꞌ palabi iye, gaꞌ laꞌi si iye Tuhanin. Sasuku pateteg si meꞌ toloꞌ Almasihin, laꞌi si iye kaduwangan Samahin duk Anakin. 10Hangkan bang niyaꞌ aꞌa piyu si kaꞌam bu seddili meꞌ panoloꞌnen, daꞌa tayimaꞌun bi dem lumaꞌbi. Daꞌa bisan saginahun bi. 11Peggeꞌ sine-sine nagina iye, kuweꞌ ne iye matuk si meꞌ hinanganne malaꞌatin.
12Ekka pe batang paꞌinku si kaꞌam saguwaꞌ gaꞌi ne sulatku. Ngase-ngase du ku weꞌ tapiyu ku nindew kaꞌam duk kite bi kapagtampak magbissā supaya jukup kēgten bi. 13Meꞌ anak pungtinaꞌinun maboꞌo bissā weꞌ essebde kaꞌam.
Wassalam
Currently Selected:
2 Yahiya 1: yakV
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.