1 Korinto 15
15
Sabab ellum balik Almasihin
1Na, meꞌ kapungtinaꞌihanku, batang kaꞌam paꞌessebanku balik sabab aka-aka hāp sabab Isa Almasi bakas minahalayakku si kaꞌam matuꞌuhin. Kinahagad inin weꞌ bi duk teteg sandelbin pu si Isa Almasi sabab inin. 2Sabab aka-aka mahāp inin isab taga umul kaꞌam salama-lama bang asal teteg du kaꞌam nuhut lapal minahalayakku si kaꞌamin. Peggeꞌ bang gaꞌi tuhutbi, gaꞌ niyaꞌ guna pakahagadbin.
3Minahalayak hep weꞌ ku si kaꞌam lapal bakas inakahan akuhin. Amban kēmon minahalayakku si kaꞌamin asal iye mamahalgaꞌ manamalin lapal inin, weꞌ Isa Almasi matey supaya kapuwasanne duseten bi kuweꞌ sinulat dem kitabin, 4duk pagubus Almasi matey, kinubul iye duk katellum bahanginen ellum iye balik amban kamateynen kuweꞌ sinulat dem kitabin. 5Ubus ellum iye balik paguwaꞌ iye pu si Petros ubus paguwaꞌ isab iye si sampūꞌ duk duwe kawakilannen. 6Ubus paguwaꞌ isab iye si meꞌ tindegnen, niyaꞌ siye labi lime hatus magtuhutin. Kaꞌekkahanden ellum pe sampay maꞌin saguwaꞌ sinduwehin ubus ne matey. 7Ubus miyaꞌan paguwaꞌ isab iye pu si Yakub, ubus bu paguwaꞌ iye balik si kēmon meꞌ kawakilannen.
8Dambuli-dambuli paguwaꞌ isab iye si aku, bisan ku gaꞌ pataꞌ mayaman iye. 9Peggeꞌ amban kēmon kawakilannen aku ne tamanan madiyawaꞌin. Gaꞌi ku bisan pataꞌ inēnan aꞌa kawakilan Isa Almasi peggeꞌ bininasa hep weꞌ ku matuꞌuhin meꞌ masandel pu si Isa Almasihin. 10Saguwaꞌ sabab lasa duk aseꞌ Tuhan si akuhin hangkan ku kuweꞌ inin, kawakilan weꞌ ne magmahalayak lapalnen. Duk niyaꞌ isab kaꞌujudan lasa duk aseꞌ Tuhan si akuhin. Duk iye kaꞌujudannen, amban kēmon bakas kawakilan Isa Almasihin, gaꞌ niyaꞌ maghinang pabasag amban aku. Saguwaꞌ kēmon tahinangkun dumaꞌin amban basagku, saguwaꞌ weꞌ tabang Tuhan si akuhin. 11Duk lapal minahalayak kamihin magsaliꞌ du. Aku ke atawa meꞌ sinduwehin, iye-iye du lapal minahalayak kamihin. Duk masi du miyaꞌan iye lapal kinahagadbin.
Sabab ellum kite bi balik
12Iye hep lapal minahalayak kami si kaꞌamin weꞌ Almasi pinakellum balik weꞌ Tuhanin amban kamateynen. Bakas kahagadbi ne hep inin, na, weꞌey managhāꞌ kaꞌam sinduwehin magpaꞌin weꞌ gaꞌi du pakellum Tuhanin balik meꞌ pateyin? 13Bang toꞌo pinaꞌinbi iyan, hātinen gaꞌ du Almasi pinakellum balik amban kamateynen. 14Duk bang toꞌo weꞌ gaꞌ du Almasi pinakellum balik weꞌ Tuhanin, na, asal gaꞌ niyaꞌ guna pagmahalayak kami si kaꞌamin duk gaꞌ niyaꞌ guna pakahagadbin. 15Duk dumaꞌin hadja iyan. Bang upama toꞌo pinaꞌinbin weꞌ gaꞌi du pinakellum weꞌ Tuhanin meꞌ pateyin balik, na, hātinen gaꞌ du isab pakellum Tuhanin Isa Almasi balik. Bang kuweꞌ iyan, hātinen magdustaꞌ kami sabab Tuhanin peggeꞌ paꞌin kami weꞌ pinakellum weꞌ ne balik Isa Almasi bu gaꞌi koꞌ toꞌo. 16Peggeꞌ bang meꞌ pateyin gaꞌi du pinakellum balik, hātinen gaꞌ du isab Almasi pinakellum balik. 17Duk bang gaꞌ du Almasi pinakellum balik, hātinen gaꞌ niyaꞌ guna sandelbi si iyehin duk gaꞌ pe taꞌampun dusebin; kuweꞌ iningketan pe kaꞌam weꞌ dusebin. 18Duk hātinen isab weꞌ kēmon meꞌ masandel pu si Isa Almasi mamateyin ne, laꞌi ne siye si narkaꞌ. 19Bang kahāpan inase-asete amban Isa Almasihin para umulte si dunya inin hadja, bu gaꞌ niyaꞌ agadante si ahilat, asal kaꞌaseꞌ-aseꞌ teꞌed kite bi amban kēmon manusiyaꞌin.
20Saguwaꞌ iye matoꞌohin, asal bakas pinakellum Isa Almasi balik amban kamateynen. Iye dehellu-dehellu pinakellumin duk tandaꞌ iye weꞌ si pasōngan pasunuꞌ du meꞌ pateyin pinakellum isab. 21Sabab duse dambuwaꞌ aꞌa, si Apuꞌ Adam, kēmon manusiyaꞌin ujud matey. Damikkiyan sabab hinangan dambuwaꞌ aꞌa isab, si Isa Almasi, kēmon pateyin ujud pinakellum balik. 22Kēmon aꞌahin ujud matey peggeꞌ tubuꞌ Apuꞌ Adam siye. Damikkiyan isab kēmon sukuꞌ pu Isa Almasihin pinakellum du balik si pasōngan. 23Isa Almasi dehellu pinakellumin. Ubus pasunuꞌ isab kēmon meꞌ sukuꞌ pu si Isa Almasihin pinakellum pagtekka ellew pabalik Isa Almasi si dunyahin. 24Manjari taꞌabut ne gantaꞌan dunyahin. Tadaꞌag ne weꞌ Isa Almasi kēmon meꞌ bakas mamantahan Tuhanin, bang meꞌ nakuraꞌin ke, atawa meꞌ taga balakatin ke atawa meꞌ taga kapatutin ke. Manjari sōnganne ne si Samane, Tuhanin, kēmon meꞌ pagbayaꞌannen. 25Peggeꞌ garaꞌ Tuhanin weꞌ magbayaꞌ pe dahuꞌ Almasi samantaꞌan gaꞌi pe tadaꞌag weꞌ ne kēmon bantanen. 26Bang tadaꞌag ne kēmon bantanen, gaꞌi ne matey manusiyaꞌin. 27Tasulat hep dem kitab, pinaꞌin, “Dinaꞌak iye weꞌ Tuhanin magbayaꞌ si kēmon-kēmonin.” Pastiꞌ du weꞌ gaꞌ sumakup Tuhanin pagbayaꞌan weꞌ Isa Almasi peggeꞌ Tuhanin mangandaꞌak iye magbayaꞌin. 28Bang magbayaꞌ ne Almasi si kēmon-kēmonin, manjari maglillaꞌ isab Anak Tuhanin pinagbayaꞌan weꞌ Samane Tuhanin, iye bakas mangandaꞌak iye magbayaꞌin. Duk Tuhanin ne teꞌed magbayaꞌ si kēmon-kēmonin.
29Na, bang meꞌ pateyin gaꞌi pinakellum balik, ine hāti addat meꞌ aꞌa sinduwehin makapandi siye paꞌinde gantiꞌ mamateyin? Bang gaꞌi du pakellum Tuhanin meꞌ aꞌa mamatey miyaꞌan, weꞌey pe tuhutde addat inin? 30Duk kami inin, bang gaꞌi kami kahagad weꞌ asal pinakellum du balik meꞌ pateyin, gaꞌi kami kuweꞌ inin luwal magsandal dem kasiya-siyahan. 31Akahante kaꞌam, meꞌ kapungtinaꞌihanku, kahabaꞌ ellew sōng ku pinapatey. Toꞌo teꞌed pinaꞌinku inin kuweꞌ toꞌo isab weꞌ kēgan ku teꞌed peggeꞌ sandel kaꞌam si Panuhutanten bi Isa Almasihin. 32Tuꞌu si lahat Epesus meꞌ bantakun kuweꞌ meꞌ hayep bingis batang ngaloroy aku. Weꞌey pe ku magsandal kuweꞌ inin bang pahalaꞌkun tuꞌu si dunya hadja. Bang toꞌo weꞌ gaꞌi du ku pinakellum balik si ellew dambuli, gam pe ku magadjak-adjak, sa pinaꞌin eliꞌanin, “Magkakanan kite bi duk maginuman peggeꞌ kaw kite matey sumu duk iye ne miyaꞌan tamananten.”
33Daꞌa kaꞌam salaꞌ si pamikilbin. Bang kite magsaweꞌ duk aꞌa laꞌat, katimboꞌohan isab kite maghinang laꞌat. 34Pasayu kaꞌam! Daꞌa ne kaꞌam magduse. Niyaꞌ kaꞌam awam pe sabab Tuhanin. Subey teꞌed kaꞌam iyaꞌ.
Baranin bang pinakellum
35Kaw niyaꞌ kaꞌam luꞌu magtilew, “Inumey pamakellum aꞌa mamateyin? Ine bantuk barannen bang ne iye ellum balik?” 36Babbal pahāp kaꞌam! Pandogahanun bi bigihin. Subey dahuꞌ tinanem bigihin meke tomoꞌ, duk bang tomoꞌ ne, gaꞌ ne laꞌi bigihin. 37Bang kaꞌam nanem bigi, upama paley atawa bigi seddili, dumaꞌin poꞌon jambanganin tinanembin saguwaꞌ bigihin hadja. 38Manjari, Tuhanin, ginaraꞌ weꞌ ne andang bang ine bantuk jambangan mapaguwaꞌ amban bigi miyaꞌan. Kēmon bayuꞌan bigi, magseddili-seddili bantuk jambangan matomoꞌ amban siyehin.
39Duk kēmon bayuꞌ-bayuꞌan maꞌellum tuꞌu si dunya inin, gaꞌi magsaliꞌ isiden. Isi manusiyaꞌin gaꞌi magsaliꞌ duk isi hayepin. Seddili du isab isi manuk-manukin duk isi kennahin.
40Niyaꞌ baran bayuꞌ-bayuꞌan si surgaꞌ duk niyaꞌ isab bayuꞌ-bayuꞌan baran dem dunya inin. Seddili mannis meꞌ baran si surgaꞌin duk seddili mannis meꞌ baran si dunyahin. 41Hāp dantaꞌ mata ellewin duk hāp dantaꞌ bulanin duk hāp isab dantaꞌ poteꞌanin saguwaꞌ magseddili-seddili dantaꞌden. Bisan meꞌ poteꞌan maꞌekkahin magseddili-seddili du hāpden.
42Na, sa miyaꞌan du dalil baranten bang pinakellum meꞌ pateyin. Bang baran aꞌahin kinubul, ngabuhuk saguwaꞌ bang pinakellum ne balik, gaꞌi ne teꞌed baran miyaꞌan matey-matey. 43Bang kinubul, gaꞌi hāp pinayaman baran aꞌahin duk gaꞌ niyaꞌ basag-basagne. Saguwaꞌ bang pinakellum ne balik, hāp ne teꞌed pinayaman duk basag ne. 44Baran aꞌa kinubulin pataꞌ hadja para si umulte tuꞌu si dunya inin. Saguwaꞌ bang pakellum Tuhanin ne iye balik, baranne mabaꞌahu inin pataꞌ ne para si umulte laꞌi si surgaꞌ. Bang niyaꞌ bayuꞌan baran pataꞌ hadja patennaꞌ si dunya, niyaꞌ isab bayuꞌan baran pataꞌ patennaꞌ si surgaꞌ. 45Tasulat hep dem kitab, pinaꞌin, “Si Apuꞌ Adam, aꞌa tagnaꞌ pinapanjari weꞌ Tuhanin, inurungan umul weꞌ Tuhanin duk barannen pataꞌ ellum tuꞌu si dunya.” Saguwaꞌ niyaꞌ isab inēnan Adam dambulihin duk iye inin si Isa Almasi. Iye mangurung umul manggaꞌ niyaꞌ tamanannen. 46Subey dahuꞌ kite taga baran sukuꞌ si dunya meke kite kaꞌurungan baran sukuꞌ si surgaꞌ. 47Apuꞌ Adam amban dunya du peggeꞌ bulak du pangahinang iyehin. Saguwaꞌ si Almasi amban surgaꞌ. 48Meꞌ tubuꞌ Apuꞌ Adamin, bulak du isab pangahinang siyehin kuweꞌ iyehin. Saguwaꞌ meꞌ mapatuhut si aꞌa amban surgaꞌin, hātinen si Isa Almasi, kuweꞌ iyehin du isab siye. 49Tuꞌu si dunya baranten bi neppu baran Apuꞌ Adamin hininang duk bulak. Bang laꞌi ne kite si surgaꞌ baranten bi neppu isab baran Almasihin, aꞌa amban surgaꞌin.
50Akahante kaꞌam, meꞌ kapungtinaꞌihanku, barante bi si dunya inin gaꞌi tapatennaꞌ si pagbayaꞌan Tuhanin si pasōngan. Barante inin ujud matey du duk buhuk; barante inin gaꞌi makajari ellum gaꞌ tamanan.
51Pakale kaꞌam. Niyaꞌ akaku si kaꞌam bakas tinapuk weꞌ Tuhanin bu kuweꞌitu pinakitaꞌu ne weꞌ ne si aku. Kite bi meꞌ masandel pu si Isa Almasihin, niyaꞌ kite bi gaꞌi matey saguwaꞌ bessuwang hadja pinda baranten bi kēmon. 52Asal lakkes du inin, dem da kilep mata hadja. Bang daꞌak Tuhanin ne pinahelling kuweꞌ tabuliꞌin, kēmon bakas mamatey masandel pu si Isa Almasihin bessuwang pinakellum balik duk gaꞌi ne siye matey balik. Duk kite bi maꞌellumin, baranten bi kēmon pinda ne. 53Peggeꞌ barante bi ujud mamatey inin subey ne pinindahan duk ne baranten bi gaꞌi matey-matey saguwaꞌ ellum ne salama-lama. 54Bang barante bi sukuꞌ mamatey inin tapindahan ne duk ne gaꞌi matey-matey, manjari katumanan ne pinaꞌin dem kitabin, pinaꞌin, “Gaꞌ ne niyaꞌ matey, peggeꞌ ubus ne ānan Tuhanin kamateyin.” 55Gaꞌi ne kite magkaꞌat bang kite matey. Gaꞌi ne kite tinalew matey peggeꞌ gaꞌi ne kite ilegga. 56Hangkan meꞌ aꞌahin tinalew matey peggeꞌ kataꞌuhande weꞌ ilegga siye sabab duseden. Duk hangkan dusehin subey ilegga peggeꞌ bang magduse aꞌahin kalanggalanne saraꞌ Tuhanin. 57Saguwaꞌ hadje pagsukulte bi si Tuhanin. Peggeꞌ sabab tahinang Isa Almasi, Panuhutanten bi, gaꞌi kite subey tinalew matey peggeꞌ pinuwasan weꞌ ne duseten bi.
58Hangkan hep meꞌ kapungtinaꞌihanku kinalasahankun, patetegun bi sandelbin pu si Isa Almasi duk daꞌa kaꞌam usaꞌ amban iye. Tuyuꞌanun bi teꞌed maghinang si iye peggeꞌ kataꞌuhanbi weꞌ magjatu du kēmon hininangbi para si iyehin.
Currently Selected:
1 Korinto 15: yakV
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
1 Korinto 15
15
Sabab ellum balik Almasihin
1Na, meꞌ kapungtinaꞌihanku, batang kaꞌam paꞌessebanku balik sabab aka-aka hāp sabab Isa Almasi bakas minahalayakku si kaꞌam matuꞌuhin. Kinahagad inin weꞌ bi duk teteg sandelbin pu si Isa Almasi sabab inin. 2Sabab aka-aka mahāp inin isab taga umul kaꞌam salama-lama bang asal teteg du kaꞌam nuhut lapal minahalayakku si kaꞌamin. Peggeꞌ bang gaꞌi tuhutbi, gaꞌ niyaꞌ guna pakahagadbin.
3Minahalayak hep weꞌ ku si kaꞌam lapal bakas inakahan akuhin. Amban kēmon minahalayakku si kaꞌamin asal iye mamahalgaꞌ manamalin lapal inin, weꞌ Isa Almasi matey supaya kapuwasanne duseten bi kuweꞌ sinulat dem kitabin, 4duk pagubus Almasi matey, kinubul iye duk katellum bahanginen ellum iye balik amban kamateynen kuweꞌ sinulat dem kitabin. 5Ubus ellum iye balik paguwaꞌ iye pu si Petros ubus paguwaꞌ isab iye si sampūꞌ duk duwe kawakilannen. 6Ubus paguwaꞌ isab iye si meꞌ tindegnen, niyaꞌ siye labi lime hatus magtuhutin. Kaꞌekkahanden ellum pe sampay maꞌin saguwaꞌ sinduwehin ubus ne matey. 7Ubus miyaꞌan paguwaꞌ isab iye pu si Yakub, ubus bu paguwaꞌ iye balik si kēmon meꞌ kawakilannen.
8Dambuli-dambuli paguwaꞌ isab iye si aku, bisan ku gaꞌ pataꞌ mayaman iye. 9Peggeꞌ amban kēmon kawakilannen aku ne tamanan madiyawaꞌin. Gaꞌi ku bisan pataꞌ inēnan aꞌa kawakilan Isa Almasi peggeꞌ bininasa hep weꞌ ku matuꞌuhin meꞌ masandel pu si Isa Almasihin. 10Saguwaꞌ sabab lasa duk aseꞌ Tuhan si akuhin hangkan ku kuweꞌ inin, kawakilan weꞌ ne magmahalayak lapalnen. Duk niyaꞌ isab kaꞌujudan lasa duk aseꞌ Tuhan si akuhin. Duk iye kaꞌujudannen, amban kēmon bakas kawakilan Isa Almasihin, gaꞌ niyaꞌ maghinang pabasag amban aku. Saguwaꞌ kēmon tahinangkun dumaꞌin amban basagku, saguwaꞌ weꞌ tabang Tuhan si akuhin. 11Duk lapal minahalayak kamihin magsaliꞌ du. Aku ke atawa meꞌ sinduwehin, iye-iye du lapal minahalayak kamihin. Duk masi du miyaꞌan iye lapal kinahagadbin.
Sabab ellum kite bi balik
12Iye hep lapal minahalayak kami si kaꞌamin weꞌ Almasi pinakellum balik weꞌ Tuhanin amban kamateynen. Bakas kahagadbi ne hep inin, na, weꞌey managhāꞌ kaꞌam sinduwehin magpaꞌin weꞌ gaꞌi du pakellum Tuhanin balik meꞌ pateyin? 13Bang toꞌo pinaꞌinbi iyan, hātinen gaꞌ du Almasi pinakellum balik amban kamateynen. 14Duk bang toꞌo weꞌ gaꞌ du Almasi pinakellum balik weꞌ Tuhanin, na, asal gaꞌ niyaꞌ guna pagmahalayak kami si kaꞌamin duk gaꞌ niyaꞌ guna pakahagadbin. 15Duk dumaꞌin hadja iyan. Bang upama toꞌo pinaꞌinbin weꞌ gaꞌi du pinakellum weꞌ Tuhanin meꞌ pateyin balik, na, hātinen gaꞌ du isab pakellum Tuhanin Isa Almasi balik. Bang kuweꞌ iyan, hātinen magdustaꞌ kami sabab Tuhanin peggeꞌ paꞌin kami weꞌ pinakellum weꞌ ne balik Isa Almasi bu gaꞌi koꞌ toꞌo. 16Peggeꞌ bang meꞌ pateyin gaꞌi du pinakellum balik, hātinen gaꞌ du isab Almasi pinakellum balik. 17Duk bang gaꞌ du Almasi pinakellum balik, hātinen gaꞌ niyaꞌ guna sandelbi si iyehin duk gaꞌ pe taꞌampun dusebin; kuweꞌ iningketan pe kaꞌam weꞌ dusebin. 18Duk hātinen isab weꞌ kēmon meꞌ masandel pu si Isa Almasi mamateyin ne, laꞌi ne siye si narkaꞌ. 19Bang kahāpan inase-asete amban Isa Almasihin para umulte si dunya inin hadja, bu gaꞌ niyaꞌ agadante si ahilat, asal kaꞌaseꞌ-aseꞌ teꞌed kite bi amban kēmon manusiyaꞌin.
20Saguwaꞌ iye matoꞌohin, asal bakas pinakellum Isa Almasi balik amban kamateynen. Iye dehellu-dehellu pinakellumin duk tandaꞌ iye weꞌ si pasōngan pasunuꞌ du meꞌ pateyin pinakellum isab. 21Sabab duse dambuwaꞌ aꞌa, si Apuꞌ Adam, kēmon manusiyaꞌin ujud matey. Damikkiyan sabab hinangan dambuwaꞌ aꞌa isab, si Isa Almasi, kēmon pateyin ujud pinakellum balik. 22Kēmon aꞌahin ujud matey peggeꞌ tubuꞌ Apuꞌ Adam siye. Damikkiyan isab kēmon sukuꞌ pu Isa Almasihin pinakellum du balik si pasōngan. 23Isa Almasi dehellu pinakellumin. Ubus pasunuꞌ isab kēmon meꞌ sukuꞌ pu si Isa Almasihin pinakellum pagtekka ellew pabalik Isa Almasi si dunyahin. 24Manjari taꞌabut ne gantaꞌan dunyahin. Tadaꞌag ne weꞌ Isa Almasi kēmon meꞌ bakas mamantahan Tuhanin, bang meꞌ nakuraꞌin ke, atawa meꞌ taga balakatin ke atawa meꞌ taga kapatutin ke. Manjari sōnganne ne si Samane, Tuhanin, kēmon meꞌ pagbayaꞌannen. 25Peggeꞌ garaꞌ Tuhanin weꞌ magbayaꞌ pe dahuꞌ Almasi samantaꞌan gaꞌi pe tadaꞌag weꞌ ne kēmon bantanen. 26Bang tadaꞌag ne kēmon bantanen, gaꞌi ne matey manusiyaꞌin. 27Tasulat hep dem kitab, pinaꞌin, “Dinaꞌak iye weꞌ Tuhanin magbayaꞌ si kēmon-kēmonin.” Pastiꞌ du weꞌ gaꞌ sumakup Tuhanin pagbayaꞌan weꞌ Isa Almasi peggeꞌ Tuhanin mangandaꞌak iye magbayaꞌin. 28Bang magbayaꞌ ne Almasi si kēmon-kēmonin, manjari maglillaꞌ isab Anak Tuhanin pinagbayaꞌan weꞌ Samane Tuhanin, iye bakas mangandaꞌak iye magbayaꞌin. Duk Tuhanin ne teꞌed magbayaꞌ si kēmon-kēmonin.
29Na, bang meꞌ pateyin gaꞌi pinakellum balik, ine hāti addat meꞌ aꞌa sinduwehin makapandi siye paꞌinde gantiꞌ mamateyin? Bang gaꞌi du pakellum Tuhanin meꞌ aꞌa mamatey miyaꞌan, weꞌey pe tuhutde addat inin? 30Duk kami inin, bang gaꞌi kami kahagad weꞌ asal pinakellum du balik meꞌ pateyin, gaꞌi kami kuweꞌ inin luwal magsandal dem kasiya-siyahan. 31Akahante kaꞌam, meꞌ kapungtinaꞌihanku, kahabaꞌ ellew sōng ku pinapatey. Toꞌo teꞌed pinaꞌinku inin kuweꞌ toꞌo isab weꞌ kēgan ku teꞌed peggeꞌ sandel kaꞌam si Panuhutanten bi Isa Almasihin. 32Tuꞌu si lahat Epesus meꞌ bantakun kuweꞌ meꞌ hayep bingis batang ngaloroy aku. Weꞌey pe ku magsandal kuweꞌ inin bang pahalaꞌkun tuꞌu si dunya hadja. Bang toꞌo weꞌ gaꞌi du ku pinakellum balik si ellew dambuli, gam pe ku magadjak-adjak, sa pinaꞌin eliꞌanin, “Magkakanan kite bi duk maginuman peggeꞌ kaw kite matey sumu duk iye ne miyaꞌan tamananten.”
33Daꞌa kaꞌam salaꞌ si pamikilbin. Bang kite magsaweꞌ duk aꞌa laꞌat, katimboꞌohan isab kite maghinang laꞌat. 34Pasayu kaꞌam! Daꞌa ne kaꞌam magduse. Niyaꞌ kaꞌam awam pe sabab Tuhanin. Subey teꞌed kaꞌam iyaꞌ.
Baranin bang pinakellum
35Kaw niyaꞌ kaꞌam luꞌu magtilew, “Inumey pamakellum aꞌa mamateyin? Ine bantuk barannen bang ne iye ellum balik?” 36Babbal pahāp kaꞌam! Pandogahanun bi bigihin. Subey dahuꞌ tinanem bigihin meke tomoꞌ, duk bang tomoꞌ ne, gaꞌ ne laꞌi bigihin. 37Bang kaꞌam nanem bigi, upama paley atawa bigi seddili, dumaꞌin poꞌon jambanganin tinanembin saguwaꞌ bigihin hadja. 38Manjari, Tuhanin, ginaraꞌ weꞌ ne andang bang ine bantuk jambangan mapaguwaꞌ amban bigi miyaꞌan. Kēmon bayuꞌan bigi, magseddili-seddili bantuk jambangan matomoꞌ amban siyehin.
39Duk kēmon bayuꞌ-bayuꞌan maꞌellum tuꞌu si dunya inin, gaꞌi magsaliꞌ isiden. Isi manusiyaꞌin gaꞌi magsaliꞌ duk isi hayepin. Seddili du isab isi manuk-manukin duk isi kennahin.
40Niyaꞌ baran bayuꞌ-bayuꞌan si surgaꞌ duk niyaꞌ isab bayuꞌ-bayuꞌan baran dem dunya inin. Seddili mannis meꞌ baran si surgaꞌin duk seddili mannis meꞌ baran si dunyahin. 41Hāp dantaꞌ mata ellewin duk hāp dantaꞌ bulanin duk hāp isab dantaꞌ poteꞌanin saguwaꞌ magseddili-seddili dantaꞌden. Bisan meꞌ poteꞌan maꞌekkahin magseddili-seddili du hāpden.
42Na, sa miyaꞌan du dalil baranten bang pinakellum meꞌ pateyin. Bang baran aꞌahin kinubul, ngabuhuk saguwaꞌ bang pinakellum ne balik, gaꞌi ne teꞌed baran miyaꞌan matey-matey. 43Bang kinubul, gaꞌi hāp pinayaman baran aꞌahin duk gaꞌ niyaꞌ basag-basagne. Saguwaꞌ bang pinakellum ne balik, hāp ne teꞌed pinayaman duk basag ne. 44Baran aꞌa kinubulin pataꞌ hadja para si umulte tuꞌu si dunya inin. Saguwaꞌ bang pakellum Tuhanin ne iye balik, baranne mabaꞌahu inin pataꞌ ne para si umulte laꞌi si surgaꞌ. Bang niyaꞌ bayuꞌan baran pataꞌ hadja patennaꞌ si dunya, niyaꞌ isab bayuꞌan baran pataꞌ patennaꞌ si surgaꞌ. 45Tasulat hep dem kitab, pinaꞌin, “Si Apuꞌ Adam, aꞌa tagnaꞌ pinapanjari weꞌ Tuhanin, inurungan umul weꞌ Tuhanin duk barannen pataꞌ ellum tuꞌu si dunya.” Saguwaꞌ niyaꞌ isab inēnan Adam dambulihin duk iye inin si Isa Almasi. Iye mangurung umul manggaꞌ niyaꞌ tamanannen. 46Subey dahuꞌ kite taga baran sukuꞌ si dunya meke kite kaꞌurungan baran sukuꞌ si surgaꞌ. 47Apuꞌ Adam amban dunya du peggeꞌ bulak du pangahinang iyehin. Saguwaꞌ si Almasi amban surgaꞌ. 48Meꞌ tubuꞌ Apuꞌ Adamin, bulak du isab pangahinang siyehin kuweꞌ iyehin. Saguwaꞌ meꞌ mapatuhut si aꞌa amban surgaꞌin, hātinen si Isa Almasi, kuweꞌ iyehin du isab siye. 49Tuꞌu si dunya baranten bi neppu baran Apuꞌ Adamin hininang duk bulak. Bang laꞌi ne kite si surgaꞌ baranten bi neppu isab baran Almasihin, aꞌa amban surgaꞌin.
50Akahante kaꞌam, meꞌ kapungtinaꞌihanku, barante bi si dunya inin gaꞌi tapatennaꞌ si pagbayaꞌan Tuhanin si pasōngan. Barante inin ujud matey du duk buhuk; barante inin gaꞌi makajari ellum gaꞌ tamanan.
51Pakale kaꞌam. Niyaꞌ akaku si kaꞌam bakas tinapuk weꞌ Tuhanin bu kuweꞌitu pinakitaꞌu ne weꞌ ne si aku. Kite bi meꞌ masandel pu si Isa Almasihin, niyaꞌ kite bi gaꞌi matey saguwaꞌ bessuwang hadja pinda baranten bi kēmon. 52Asal lakkes du inin, dem da kilep mata hadja. Bang daꞌak Tuhanin ne pinahelling kuweꞌ tabuliꞌin, kēmon bakas mamatey masandel pu si Isa Almasihin bessuwang pinakellum balik duk gaꞌi ne siye matey balik. Duk kite bi maꞌellumin, baranten bi kēmon pinda ne. 53Peggeꞌ barante bi ujud mamatey inin subey ne pinindahan duk ne baranten bi gaꞌi matey-matey saguwaꞌ ellum ne salama-lama. 54Bang barante bi sukuꞌ mamatey inin tapindahan ne duk ne gaꞌi matey-matey, manjari katumanan ne pinaꞌin dem kitabin, pinaꞌin, “Gaꞌ ne niyaꞌ matey, peggeꞌ ubus ne ānan Tuhanin kamateyin.” 55Gaꞌi ne kite magkaꞌat bang kite matey. Gaꞌi ne kite tinalew matey peggeꞌ gaꞌi ne kite ilegga. 56Hangkan meꞌ aꞌahin tinalew matey peggeꞌ kataꞌuhande weꞌ ilegga siye sabab duseden. Duk hangkan dusehin subey ilegga peggeꞌ bang magduse aꞌahin kalanggalanne saraꞌ Tuhanin. 57Saguwaꞌ hadje pagsukulte bi si Tuhanin. Peggeꞌ sabab tahinang Isa Almasi, Panuhutanten bi, gaꞌi kite subey tinalew matey peggeꞌ pinuwasan weꞌ ne duseten bi.
58Hangkan hep meꞌ kapungtinaꞌihanku kinalasahankun, patetegun bi sandelbin pu si Isa Almasi duk daꞌa kaꞌam usaꞌ amban iye. Tuyuꞌanun bi teꞌed maghinang si iye peggeꞌ kataꞌuhanbi weꞌ magjatu du kēmon hininangbi para si iyehin.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.