Bilang 34
34
Hay Pogpog Nadan Nunlini"odan Di Ad Kanaan
1Alyon Apu Dios i Moses di, 2Ibagam hinadan tinanud Israel ta alyom di, Hitun dumatnganyuh nan bobleh ad Kanaan an idat Apu Dios i da'yu ya datuwe nadan pogpog hi nunlini"odan.
3Hinan nangappit hi muyyadna ya milaggat di udum hinan agge naboblayan an nungngadan hi Sin an nihaggon hinan pogpog di ad Edom. Ya hay pogpogna hi nangappit hi tuluwan di algo ya mihipun hi nangappit hi muyyadnah nan pogpog nan nunhiglay ahinan lobong 4ya inipluynah nangappit hinan muyyad nan matikid an nungngadan hi Akrabbim ya innayunah ad Sin ta ingganah nan muyyad di ad Kades-Barnea. Ya inipluynah ad Hasar-Addar ta ingganah ad Asmon. 5Ya inli"odna ta umeh nan wa"el hi ad Egypt ya innayunah nan baybay an nungngadan hi Mediterranean.
6Ya hay pogpogna boh nangappit hi alimuhan di algo ya nan da'ging nan baybay an nungngadan hi Mediterranean.
7Ya hay pogpogna hi nangappit hi huddo'na ya mihipun hinan baybay ta ingganah nan billid an nungngadan hi Hor. 8Ya innayunah ad Lebo-Hamat ta ingganah ad Sedad 9ya hi ad Sipron ta ingganah ad Hasar-Enan.
10Ya hay pogpognah nangappit hi tuluwan di algo ya mihipun hi ad Hasar-Enan ta ingganah ad Sepam. 11Ya mihipun hi ad Sepam ya innayunah ad Riblah an nihaggon hi ad Ain ta ipluynah nan nabaktu an nangappit hi tuluwan di algo hi'onta wah nan lobong an nungngadan hi Galilee. 12Ya inunudna nan wangwang an nungngadan hi Jordan ta ingganah nan pogpogna hinan nunhiglay ahinan lobong.
Ta danaey pogpog di midat i da'yu hi nunlini"odan diyen boble.
Hay Nangipiyappongan Moses Hinan Lutah Ad Kanaan
13Hi Moses ya imbaganah nadan tinanud Israel an alyonay, Hay atonyun mangogodwah nan luta ya punhiyamonyu ta han godwa. Te hiyah naey imbagan Apu Dios ta midat hinan hiyam an tinanud Israel ya nan godwan di tinanud Manasseh. 14Te nadan tinanud Ruben ya tinanud Gad ya nan godwan di tinanud Manasseh ya nidat mo tuwalin dida nan punhituwanda. 15Ta danaen duwan tinanud ta han godwa ya hay nidat i dida ya nan nangappit hi tuluwan di algo hinan wangwang an nungngadan hi Jordan an dommang di ad Jeriko.
Nadan Ap'apun Pinto' Apu Dios Hi Mangipiyappong Hinadan Luta
16Alyon bon Apu Dios i Moses di, 17Nadan linala'in pangiyukoda' hi mangipiyappong hinan luta i da'yun tinanud Israel ya nan padi an hi Eleasar ya hi Joshua an imbabalen Nun. 18Ya pot'onyu boy ap'apuh nadan himpahimpamu'un ta bumoddangdan mangipiyappong hinan lutan midat i da'yu.
19Ta hay ap'apu hi napili ya hi Kaleb an imbabalen Jepunneh an tinanud Judah
20ya hi Semuel an imbabalen Ammihud an tinanud Simeon
21ya hi Elidad an imbabalen Kislon an tinanud Benjamin
22ya hi Bukki an imbabalen Dogli an tinanud Dan
23ya hi Hanniel an imbabalen Epod an tinanud Manasseh an imbabalen Joseph
24ya hi Kemuel an imbabalen Siptan di ap'apun nadan tinanud Epraim an imbabalen bon Joseph
25ya hi Elisapan an imbabalen Parnak di ap'apun nadan tinanud Sebulun
26ya hi Paltiel an imbabalen Assan di ap'apun nadan tinanud Issakar
27ya hi Ahihud an imbabalen Selomi di ap'apun nadan tinanud Aser
28ya hi Pedalel an imbabalen Ammihud di ap'apun nadan tinanud Naptali.
29Ta danae nadan linala'in nangibagaan Apu Dios hi bumoddang an mangipiyappong hinan godwogodwon nadan tinanud Israel an lutah ad Kanaan.
Currently Selected:
Bilang 34: ifa
Highlight
Copy
Compare
Share
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
