Bilang 33
33
Hay Nundaldalanan Nadan Tinanud Israel An Nihipun Hi Nakakandah Ad Egypt
1Hidin nakakda nadan tinanud Israel hi ad Egypt an impangulun da Moses i Aaron 2ya imbagan Apu Dios i Moses ta itudo'na nadan mahohonnod an ma'ma'at an mihipun hi akakandah ad Egypt.
3Ta hidin nakak nadan tinanud Israel hi ad Rameses hidih ad Egypt hidin mi'alimah algo hinan namangulun bulan an hidiye nan nabiggat hi nihwangandah ate hi ad Egypt ya ma"id ha takutdah nadan i Egypt an ta'on on mangmangmangonda dida. 4Te i diye ya e pun'ilubu' nadan i Egypt nadan panguluwan an linala'in imbabaledan pinaten Apu Dios i diyen nahdom ta mipatigon ma"id ha abalinan nadan diosda an mangihwang i dida.
5Ta nakakdah ad Rameses ot eda mun'allung hi ad Sukot.
6Ot taynandah ad Sukot ot umedah ad Etam ot mun'allungda bohdi hinan da'ging nan agge naboblayan. 7Ya hidin nakakdah ad Etam ot ibangngaddah ad Pi-Hahirot an nangappit hi tuluwan di algo hi'onta wah ad Baal-Sepon ot eda mun'allung hinan nihaggon hi ad Migdol.
8Ot makakda boh ad Pi-Hahirot ot agwatonda nan baybay an mumbolah ot umedah nan agge naboblayan. Ot dumanallananda hi tuluy algo hinan agge naboblayan hi ad Etam ot eda mun'allung hi ad Marah.
9Ot taynandah ad Marah ot umedah ad Elim an awadan di himpulut duwan (12) obob ya waday napitun (70) palma an kayiw ot mun'allungdahdi.
10Ot taynanda boh ad Elim ot eda mun'allung hi haggon nan baybay an mumbolah.
11Ot makakda bohdi ot eda mun'allung hinan agge naboblayan an nungngadan hi Sin.
12Ot taynanda bo nan agge naboblayan an nungngadan hi Sin ot umedah ad Dopkah ot eda mun'allung hidi.
13Ot makakda bohdi ot eda mun'allung hi ad Alus.
14Ot taynanda boh ad Alus ot umedah ad Repidim ot mun'allungdahdi mu ma"id ha liting hi inumon nadan tatagu.
15Ot taynandah moh ad Repidim ot umedah nan agge naboblayan hi ad Sinai ot mun'allungda bohdi.
16Ot taynanda boh ad Sinai ot umedah ad Kibrot-Hattaabah ot mun'allungda bohdi.
17Ot ahida taynan hi ad Kibrot-Hataabah ot umedah ad Haserot ot mun'allungda bohdi.
18Ot makakda boh ad Haserot ot umedah ad Ritmah ot mun'allungda bohdi.
19Ot makakda boh ad Ritmah ot umedah ad Rimmon-Peres ot mun'allungda bohdi.
20Ot makakda boh ad Rimmon-Peres ot umedah ad Libnah ot mun'allungda bohdi.
21Ot makakda bohdi ot umedah ad Rissah ot mun'allungda bohdi.
22Ot makakdahdi ot umeda boh ad Kehelatah ot mun'allungda bohdi.
23Ot makakdah ad Kehelatah ot umedah nan way billid an nungngadan hi Seper ot mun'allungda bohdi.
24Ot makakda bohdi ot umedah ad Haradah ot mun'allungda bohdi.
25Ot makakdah ad Haradah ot umedah ad Makhelot ot mun'allungda bohdi.
26Ot makakda boh ad Makhelot ot umedah ad Tahat ot mun'allungda bohdi.
27Ot makakda boh ad Tahat ot umedah ad Terah ot mun'allungda bohdi.
28Ot makakda boh ad Terah ot umedah ad Mitkah ot mun'allungda bohdi.
29Ot makakda boh ad Mitkah ot umedah ad Hasmonah ot mun'allungda bohdi.
30Ot makakda boh ad Hasmonah ot eda umedah ad Moserot ot mun'allungda bohdi.
31Ot makakda boh ad Moserat ot umedah ad Bene-Jaakan ot mun'allungda bohdi.
32Ot makakda boh ad Bene-Jaakan ot umedah ad Hor-Haggidgad ot mun'allungda bohdi.
33Ot makakda boh ad Hor-Haggidgad ot umedah ad Jotbatah ot mun'allungda bohdi.
34Ot makakda boh ad Jotbatah ot umedah ad Abronah ot mun'allungda bohdi.
35Ot makakda boh ad Abronah ot umedah ad Esion-Geber ot mun'allungda bohdi.
36Ot makakda boh ad Esion-Geber ot umedah ad Kades hidih nan agge naboblayan an nungngadan hi Sin ot mun'allungda bohdi.
37Ot taynanda boh ad Kades ot umedah nan way billid an nungngadan hi Hor an nihaggon hinan pogpog di ad Edom ot mun'allungda bohdi. 38Ya hidin awadandahdi ya imbagan Apu Dios hinan padi an hi Aaron ta tikidonah diyen billid an nungngadan hi Hor. Ot hidiy atayanah din ohay algoy nibaluh din mi'alimah bulan yaden mi'anapat (40) moh tawon an nihipun hi nakakandah ad Egypt. 39Ta hay tawon Aaron hidin natayanah nan billid an nungngadan hi Hor ya hinggahut ta baintit tulu (123).
40Ya nan patul hi ad Arad an nunhituh nan negeb hi ad Kanaan ya dingngolnan tuwe nadan tinanud Israel.
41Ot makakda mo nadan tinanud Israel hinan billid an nungngadan hi Hor ot umedah ad Salmonah ot mun'allungda bohdi.
42Ot makakda boh ad Salmonah ot umedah ad Punon ot mun'allungda bohdi.
43Ot makakda boh ad Punon ot umedah ad Obot ot mun'allungda bohdi.
44Ot makakda bohdi ot umedah ad Iye-Abarim an da'ging di ad Moab ot mun'allungda bohdi. 45Ot makakda boh ad Iyim ot umedah ad Dibon-Gad ot mun'allungda bohdi. 46Ot makakda boh ad Dibon-Gad ot umedah ad Almon-Diblataim ot mun'allungda bohdi.
47Ot makakda boh ad Almon-Diblataim ot umedah nadan billid an nungngadan hi Abarim an nihaggon hi ad Nebo ot mun'allungda bohdi.
48Ot makakda bohdi ot umedah nan nundotal hi ad Moab an dommang di ad Jeriko an nihaggon hinan wangwang an nungngadan hi Jordan ot mun'allungda bohdi. 49Ta hidih nan nundotal hi ad Moab an haggon nan wangwang an nungngadan hi Jordan di nun'allunganda an nihipun hi ad Bet-Jesimot ta ingganah ad Abel-Sitim.
Hay Imbagan Apu Dios Hi Atondan Mangubat Hi Ad Kanaan
50Hidin nun'allungdah nan nundotal hi ad Moab an haggon nan wangwang an nungngadan hi Jordan an dommang di ad Jeriko ya alyon Apu Dios i Moses di, 51Ibagam hinadan tinanud Israel ta alyom di, Hay pangagwatanyuh nan wangwang an nungngadan hi Jordan ta ume ayuh ad Kanaan 52ya mahapul an pa'aanonyun namin nadan tatagun nunhituhdi. Ya numpa"ihyun namin nadan batu ya gumo' an tinagtaggu ya nadan iniphoddan pundayawanda. 53Te hidiyen boble ya indat'un da'yu ta punhituwanyu. 54Ya hay atonyun mangipiyappong ya ibunutyu. Ta nadan dakdakkol an himpamu'un ya ong'ongal di midat hi punhituwanda. Ya nadan oh'ohhan himpahimpamu'un ya kittang di midat i dida hi pumboblayanda. Ot nan lutan mabunut nadan himpahimpamu'un ya hidiyey midat i dida.
55Mu wada'e tuwali ha batiyonyuh nadan nunhituhdi ta mi'ibobledan da'yu ya nomnomnomonyu an lo'tat ya diday ay butah matayu onu ay pagit. Te diday mangdat hi pumpaligatanyu i diyen boblen punhituwanyu. 56Ta nan ninomnom'un pundusa' i dida ya lo'tat mo ya da'yuy pangata'.
Currently Selected:
Bilang 33: ifa
Highlight
Copy
Compare
Share
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
