Juan 6
6
Jesupa eperãarã cinco mil nekꞌopida
(Mateo 14.13-21; Marcos 6.30-44; Lucas 9.10-17)
1Ma tꞌẽepai, Jesús wãji Galilea Lago kꞌĩraikꞌa eeree. Mãgɨ́ lago ichiaba tꞌɨ̃jarapata Tiberias. 2Eperãarã chokꞌara iru tꞌẽe nipapachida, irua kꞌayaa beerã jɨpada perã mãikꞌaapa ãrapa unudapꞌedaa perã irua oo bɨ ne–inaa eperãarãpa pꞌoyaa oodakꞌaa ãchi juadoopa. 3Mãpai Jesús wãji ee nokꞌodee mãikꞌaapa su–akꞌɨ banaji chi kꞌõpꞌãyoorã ome. 4Judiorã Pascua fiesta ɨ̃rɨ pa baji. 5Jesupa unukꞌãri ma eperãarã chokꞌara ichi tꞌẽe che wãda, Felipemaa mãgaji:
—¿Sãma chikꞌo netodaitꞌeema aji, na eperãarã jõmaweda nekꞌodamerã?
6Jesupa kꞌawa baji kꞌãata ooitꞌee. Mapa iidiji kꞌawaaitꞌee kꞌãata pꞌanau Felipepa. 7Felipepa pꞌanauji:
—Doscientos denariopa#6.7 Maapai atane ocho mimiapachida doscientos denarios pari. pida araa–e pakꞌaji, pan netodaitꞌee ma–ãri ma–ãria pida kꞌodamerã.
8Mãpai Jesús kꞌõpꞌãyo Andrés, Simón Pedro ɨ̃pemapa mãgaji:
9—Nama bɨda aji, warra aba. Ichia iru bɨda aji, pan cebadadee ooda joisomaa mãikꞌaapa chikꞌo omé. Mamĩda, ¿kꞌãata araayama aji, na eperãarã see nɨ̃bɨ–itꞌee?
10Jesupa pꞌanauji:
—Jarátɨ jõmaweda su–akꞌɨ pꞌaneedamerã.
Mama pꞌũajara jepꞌeda paraaji. Mama su–akꞌɨ pꞌaneejida. Ãchi ɨmɨkꞌĩraarã cinco mil paji. 11Jesupa ma pan jita atapꞌeda, ɨtꞌaa tꞌɨ̃ji gracias jaraitꞌee mãikꞌaapa jõmaarãmaa jedepiji. Ichiaba mãga ooji chikꞌo ome. 12Jõmaweda bi jãwaa pꞌaneedakꞌãri, Jesupa chi kꞌõpꞌãyoorãmaa mãgaji:
—Chi nɨ̃beeda pꞌe atadapáde aji, maarepida ãrinaamerã.
13Ãrapa ipurujida kꞌoraa docena aba ma pan joisomaadeepa. 14Eperãarãpa unudakꞌãri Jesupa oo bɨ ma ne–inaa eperãarãpa pꞌoyaa oodakꞌaa ãchi juadoopa, jarapachida:
—Wãara nata Akꞌõre pedee jarapari tachia nɨ pꞌanadapꞌedaa chemerã na pꞌekꞌau eujãdee. 15Mamĩda Jesupa kꞌawa bada perã ichi rey papi kꞌinia pꞌanɨ, ee nokꞌodee waya wãji, ituaba ba kꞌinia bada perã.
Jesús pania ɨ̃rɨ tꞌɨa nipada
(Mateo 14.22-27; Marcos 6.45-52)
16Pꞌãriupodopa Jesús kꞌõpꞌãyoorã lago idee chejida 17mãikꞌaapa barcode bataudapꞌeda, Capernaum pꞌuurudee wãjida. Pꞌãriudaikꞌãri, waide Jesús pache–e baji. 18Mãgá ãchi ituaba wãrutade pꞌusara tꞌo nɨ̃beeji, nãu golpe pꞌua nɨ̃bada perã. 19Tokꞌesaa wã nidade kilometro joisomaa maa–e pɨrã seis, unujida Jesús barco kꞌaitꞌa tꞌɨa cheru pania ɨ̃rɨ. Mãpai ãchi pꞌeradachida. 20Mãpai irua mãgaji:
—¡Pꞌeranáatɨ! ¡Mɨda! aji.
21Ãchia mãga ũridakꞌãri, o–ĩa iru batau atajida. Taarã–ee panajida ãchi wã nipadapꞌedaamaa.
Eperãarãpa Jesús jɨrɨdapꞌedaa
22Aɨ norema eperãarã lago kꞌĩraikꞌa eere pꞌanadapꞌedaarãpa kꞌawaajida Jesús kꞌõpꞌãyoorã wãdapꞌedaa barco mama badade. Ichiaba kꞌawaajida Jesús ãra ome wã–e pada. 23Mãga nɨde barco pachejida Tiberias pꞌuurudeepa, Jesupa Akꞌõremaa gracias jarapꞌeda, eperãarãpa pan kꞌodapꞌedaa kꞌaitꞌa. 24Mãgá eperãarãpa Jesús chi kꞌõpꞌãyoorã ome mama unuda–e pakꞌãri, ma barcode bataudapꞌeda, Capernaum pꞌuurudee wãjida iru jɨrɨde.
Eperã Jesude ijãa bɨ ichita chokꞌai bapariitꞌee
25Ma eperãarã lago kꞌĩraikꞌa eere panadakꞌãri, Jesús ununajida mãikꞌaapa iidijida:
—Tachi Jarateepari, ¿sãaweda pachejima? ajida.
26Jesupa mãgaji:
—Mɨa wãarata jararu. Parãpa mɨ jɨrɨ nidada aji, mɨa parã bi jãwaa netawada perã, jɨrɨdai kꞌãyaara kꞌawaadaitꞌee mɨa ne–inaa pi–ia oopari eperãarãpa pꞌoyaa oodakꞌaa ãchi juadoopa. 27Mimianáatɨ chikꞌo kꞌodaitꞌee aupai, mãgee chikꞌo jõpari perã. Ma kꞌãyaara mimíatɨ kꞌawaadamerã mɨ, chi ne–inaa jõkꞌaa. Mɨ, chi Eperã Akꞌõre Truadepema kꞌaurepata parã ichita pꞌanapataadai Tachi Akꞌõre ome. Irua akꞌɨpi bɨ mɨ pia akꞌɨ bapari, iru juapa mɨa ookꞌãri ne–inaa eperãarãpa pꞌoyaa oodakꞌaa ãchi juadoopa.
28Mãpai arii pꞌanadapꞌedaarãpa Jesumaa iidijida:
—¿Kꞌãata oodayama ajida, Tachi Akꞌõrepa tai pia akꞌɨpariimerã?
29Jesupa pꞌanauji:
—Tachi Akꞌõrepa kꞌinia bɨda aji, ijãadamerã eperã irua na eujãdee pëidade.
30Mãpai iidijida:
—¿Kꞌãata pɨa ooitꞌeema ajida, taipa ijãadamerã pɨ Tachi Akꞌõrepa pëida? ¿Kꞌãata pɨa taimaa akꞌɨpiitꞌeema? 31Eujã pania wẽe bɨde tachi chonaarãpa ɨtꞌaripema chikꞌo maná, kꞌojidada ajida, Tachi Akꞌõre Ũraa pꞌãdade jara bɨkꞌa:
‘Tachi Akꞌõrepa ãramaa ɨtꞌaripema chikꞌo teeji nekꞌodamerã.’ (Éxodo 16.4)
32Jesupa pꞌanauji:
—Mɨa wãarata jararu. Moisepa parãmaa mãgɨ́ chikꞌo tee–e paji. Mɨ Akꞌõre ɨtꞌaripemapata chikꞌo jõmaweda teepari. Mãgɨ́ chikꞌo chi pipɨara bɨ–e paji. 33Chi pipɨara bɨta ɨtꞌariipa cheji na pꞌekꞌau eujãdepemaarã chokꞌai pꞌanapiitꞌee ichita pꞌanapataadamerã.
34Ãchia mãgajida:
—Tai–itꞌee mãgɨ́ chikꞌota teeparíiji.
35Mãpai Jesupa mãgaji:
—Mɨda aji, chi chikꞌo eperãarã ichita chokꞌai pꞌanapipari. Eperã ewaa nekꞌoda jarrapisia–e bɨkꞌa mãikꞌaapa chi ewaa ne–inaa toda opisia–e bɨkꞌa, mãga pɨkꞌa eperã mɨde ijãa bɨ o–ĩa bapariitꞌee. 36Mamĩda mɨa parãmaa etꞌewa jaradakꞌa, parãpa mɨde ijãada–e pꞌanɨ, mɨ unupata mĩda. 37Jõmaweda eperãarã mɨ Akꞌõrepa mɨ jua ekꞌari bɨda mɨmaa chedaitꞌee. Chi cherutaarãmaa mɨa kꞌinia–eda a–e paitꞌee. 38Mɨ ɨtꞌariipa che–e paji ooitꞌee mɨchia oo kꞌiniata. Ma kꞌãyaara cheji ooitꞌee mɨ Akꞌõrepa kꞌinia bɨkꞌa. 39Ma–itꞌee mɨ pëiji; jõmaweda mɨ jua ekꞌari bɨdaarã akꞌɨ bamerã apida atuanaamerã. Mãgá Akꞌõre ewari waibɨa ewate ãra chokꞌai pꞌirabaidaitꞌee. 40Mɨ Akꞌõrepa kꞌinia bɨ jõmaweda ichi Warra kꞌawa pꞌanɨɨrã mãikꞌaapa irude ijãa pꞌanɨɨrã ɨtꞌaa wãdamerã. Akꞌõre ewari waibɨa ewate mɨata mãgɨɨrã pꞌirabaipiitꞌee.
41Mãpai judiorã poro waibɨarãpa Jesús ãpɨte pedee kꞌachia pedee pꞌaneejida irua jarada perã: “Mɨda aji, chi chikꞌo ɨtꞌariipa cheda”. 42Maperã mãgajida:
—¿Nãgɨ–ekꞌã Jesús, José warra? Taipa kꞌawa pꞌanɨda ajida, chi akꞌõre mãikꞌaapa chi nawe. ¿Sãgapɨ ɨtꞌariipa chejida a bɨma? ajida.
43Mãpai Jesupa mãgaji:
—¡Pedee kꞌachia pedee amáatɨ! 44Mɨ Akꞌõrepa mɨ pëiji. Eperã apida mɨmaa pꞌoyaa cheda–eda aji, irua anee–emãi. Akꞌõre ewari waibɨa ewate irua aneeda eperãarã mɨa pꞌirabai ataitꞌeeda aji. 45Akꞌõre pedee jarapataarãpa pꞌãdapꞌedaade jara bɨ:
‘Tachi Akꞌõrepa eperãarãmaa ichi ũraa jarateeitꞌee.’ (Isaías 54.13)
Mapa jõmaarãpa iru ũraa ũri pꞌanɨ mãikꞌaapa kꞌawaa wãda mɨmaa chedaitꞌee.
46ʼMɨa mãga jarakꞌãri, jara kꞌinia–e bɨ eperãarãpa Tachi Akꞌõre unupata. Eperã apidaapa Tachi Akꞌõre unuda–e pꞌanɨ. Irua ɨtꞌariipa pëidapapaita iru unupari. 47Mɨa wãarata jararu. Eperãpa mɨde ijãa bɨ ɨtꞌaa wãitꞌee. 48Mɨda aji, chi chikꞌo eperãarã ichita chokꞌai pꞌanapipari. 49Parã chonaarã eujã pania wẽe bɨde wãyaadakꞌãri, maná kꞌojidada aji. Mamĩda ma chikꞌopa ãra ichita chokꞌai pꞌanapi–e paji, aɨ tꞌẽepai ãchi piudapꞌedaa perã. 50Mɨa “chikꞌo” akꞌãri, jara kꞌinia bɨ chikꞌo ɨtꞌariipa cheda. Eperãpa mãgɨ́ chikꞌo kꞌoru pɨrã, atua–e. 51Mɨda aji, ma chikꞌo ɨtꞌariipa cheda eperãarã chokꞌai pꞌanapiitꞌee. Chi nãgɨ́ chikꞌo kꞌo bɨpa ichita chokꞌai bapariitꞌee. Nãgɨ́ chikꞌo mɨ kꞌapꞌɨa, mɨa teeitꞌeeda aji, piumerã jõmaarã pari, ichita chokꞌai pꞌanapataadamerã.
52Mãga ũridakꞌãri, judiorã aupedee para beeji:
—¿Sãga na eperãpa tachimaa ichi kꞌapꞌɨa kꞌopiitꞌeema? ajida.
53Mãpai Jesupa mãgaji:
—Mɨa wãarata jararu. Parãpa Eperã Akꞌõre Truadepema kꞌapꞌɨa kꞌoda–e pɨrã mãikꞌaapa iru waa toda–e pɨrã, ɨtꞌaa wãda–e pai. 54Chi mɨ kꞌapꞌɨa kꞌo bɨpa mãikꞌaapa mɨ waa to bɨpa Akꞌõre eujãde banaitꞌee. Akꞌõre ewari waibɨa ewate mɨata iru chokꞌai pꞌirabai ataitꞌee. 55Mapa mɨ kꞌapꞌɨata chi chikꞌo pipɨara bɨda aji. Ichiaba mɨ waata chi ba pipɨara bɨda aji. 56Chi mɨ kꞌapꞌɨa kꞌo bɨpa, ichiaba mɨ waa to bɨpa mɨ ome araa bapariitꞌeeda aji. 57Mɨ Akꞌõre ichita chokꞌai bapari; mɨ jida aukꞌa. Irua mɨ pëiji mɨ kꞌapꞌɨa kꞌopataarã ichita chokꞌai pꞌanapimerã. 58Mɨa jara bɨda aji, chikꞌo ɨtꞌariipa chedade. Nãgɨ́ chikꞌo parã chonaarãpa maná kꞌodapꞌedaakꞌa bɨ–e. Ãrapa maná kꞌojida. Mamĩda ma chikꞌopa ãra ichita chokꞌai pꞌanapi–e paji, aɨ tꞌẽepai piudapꞌedaa perã. Jõdee chi nãgɨ́ chikꞌo kꞌo bɨpa ichita chokꞌai bapariitꞌee.
59Jesupa ma jõma jara aupada jarateeji Tachi Akꞌõre Ũraa jarateepata tede Capernaum pꞌuurude.
Jesupa jarada sãga eperãarã ɨtꞌaa wãdai
60Jesupa jarateemaa bɨ ũridakꞌãri, iru ome nipapataarãpa mãgajida:
—Pɨa jara bɨ pꞌoyaa kꞌawada–eda ajida. ¿Kꞌaipa ijãayama? ajida.
61Jesupa kꞌawa bada perã ichi ãpɨte mãgá pedeemaa pꞌanɨ, iidiji:
—¿Na pedee parãpa kꞌachia ũri pꞌanɨkꞌã? aji. 62Mãgara audupɨara ijãada–e pai, parãpa Eperã Akꞌõre Truadepema unuruta pɨrã ɨtꞌaa wãru ichi badamaa. 63Tachi Akꞌõre Jaurepa eperãarã ichita chokꞌai pꞌanapipari. Tachi kꞌĩradoopa apida ichita chokꞌai pꞌanada–e pai. Mɨa jaradakꞌa parãpa mɨ kꞌapꞌɨa kꞌoruta pɨrã, pia jaraitꞌeera, mɨde wãara ijãaruta pɨrã, Tachi Akꞌõre Jaure cheitꞌee parã ichita chokꞌai pꞌanapide. 64Mamĩda waide parã ũkꞌuru ijãada–e pꞌanɨ.
Jesupa mãga jaraji aɨ naaweda kꞌawa bada perã kꞌairãpa ijãada–e pꞌanɨ mãikꞌaapa kꞌaipa ichi traicionaaitꞌee. 65Ichiaba mãgaji:
—Mapa mɨa parãmaa jaraji eperã apida mɨmaa pꞌoyaa cheda–eda aji, mɨ Akꞌõrepa anee–e pɨrã.
66Maadamãiipa chokꞌara Jesús ome nipadapꞌedaarãpa iru atabaibëijida. 67Mãpai Jesupa iidiji chi kꞌõpꞌãyoorã docemaa:
—¿Parã jida ichiaba wã kꞌinia pꞌanɨkꞌã? aji.
68Simón Pedropa pꞌanauji:
—Tachi Waibɨa, pɨkꞌa awaraa wẽ–e. Pɨ ũraa kꞌaurepa kꞌawa pꞌanɨ ɨtꞌaa wãdaitꞌee. 69Taipa pɨde ijãa pꞌanɨda ajida, mãikꞌaapa kꞌawa pꞌanɨ pɨ chi kꞌachia wẽe bapari, Tachi Akꞌõrepa pëida.
70Jesupa pꞌanauji:
—Mɨa parã doce weda jɨrɨtꞌerajida aji. Mamĩda parãdepema aba netuara eere bɨda aji.
71Jesupa mãga jarakꞌãri, jara kꞌinia baji Simón Iscariote warra Judapa ichi traicionaaitꞌee, chi kꞌõpꞌãyoorã docedepema paji mĩda.
Currently Selected:
Juan 6: sjaB
Highlight
Share
Copy
Want to have your highlights saved across all your devices? Sign up or sign in
©2005, 2010, 2015 Wycliffe Bible Translators, Inc. All rights reserved.