Juan 4
4
Jesús Samaria eujãdepema wẽra ome pedeeda
1Fariseorãpa ũrijida Jesupa Juan kꞌãyaara kꞌõpꞌãyoorãra pꞌe wã mãikꞌaapa eperãarã chokꞌaraara poro choopachi. 2(Mãga ũrijida Jesupa poro chookꞌaa paji mĩda. Chi kꞌõpꞌãyoorã́pata poro choopachida.) 3Jesupa mãga kꞌawaa atakꞌãri, waya uchiaji Judea eujãdeepa Galilea eujãdee wãitꞌee.
4Ma wãdade wãyaaji Samaria eujãde. 5Mãgá Jesús pacheji Sicar pꞌuurude. Mãgɨ́ pꞌuuru Samaria eujãde bɨ. Chonaarãweda ma pꞌuuru Jacobpa ichi warra Josemaa eujã teeda kꞌaitꞌa baji. 6Ma eujãde Jacob pozo baji. Ma che wãdade ode cherupa Jesús ĩyapaa cheda perã, ma pozo ikꞌaawa su–akꞌɨ beeji. Imatꞌɨpa pa wã nipaji. 7-8(Chi kꞌõpꞌãyoorã pꞌuurudee wã pꞌanajida chikꞌo netode.) Mãga nɨde Samariadepema wẽra cheji ma pozodee pania joide. Mãpai Jesupa mãgaji irumaa:
—Mɨmaa pania teepáde aji.
9Mamĩda judiorã, Samariadepemaarã ome pedeedakꞌaa pada perã, mãgɨ́ wẽrapa mãgaji:
—Mɨ Samaria eujãdepemapɨ. ¿Sãapꞌeda pɨ, judío bɨta mɨmaa pania iidi cheruma? aji.
10Jesupa pꞌanauji:
—Pɨa kꞌawada paara jõma Tachi Akꞌõrepa oo kꞌinia bɨ eperãarã kꞌaripaitꞌee mãikꞌaapa kꞌawada paara kꞌaipata pɨmaa pania iidimaa bɨ, mɨmaa iidikꞌaji teemerã pania eperãarã ichita chokꞌai pꞌanapipari.
11Mãpai mãgɨ́ wẽrapa mãgaji:
—Señor, na pozo nãpɨa bɨda aji. Pɨa ne–inaa wẽe bɨ pania joi ataitꞌee. ¿Sãma mãgee pania atayama? aji. 12Na pozo tachi chonaarãwedapema Jacobpa bëida. Irua na pozodepemata pania topachi, ichi warrarã ome mãikꞌaapa chi ne–animalaarã ome. ¿Pɨ iru kꞌãyaara waibɨara kꞌĩsia bɨkꞌã? aji.
13Jesupa pꞌanauji:
—Eperãarãpa na pozodepema pania toruta waya opisiadaridaitꞌeeda aji. 14Mamĩda mɨa pania teerudepema todakꞌãri, waa opisiada–e paitꞌee. Ma kꞌãyaara ara pania poatrɨ uchiaparikꞌa eujãdeepa, mãga pɨkꞌa mɨa pania teeru uchiaitꞌee ãra tꞌãrideepa mãikꞌaapa ma kꞌaurepa kꞌawaadaitꞌee ichita pꞌanapataadaitꞌee Tachi Akꞌõre ome.
15Mãpai mãgɨ́ wẽrapa mãgaji:
—Señor, mɨ–itꞌee teepáde aji, mãgɨ́ pania, mɨ waa opisia–e paitꞌee, ichiaba waa che–e paitꞌee pania joide na pozode.
16Jesupa pꞌanauji:
—Wãpáde aji, pɨchi ɨmɨkꞌĩra atade mãikꞌaapa waya namaa chepáde aji.
17Mãgɨ́ wẽrapa pꞌanauji:
—Mɨ ɨmɨkꞌĩra wẽe bɨda aji.
Jesupa mãgaji:
—Wãarata jaraji ɨmɨkꞌĩra wẽe bɨda akꞌãri. 18Ɨmɨkꞌĩraarã joisomaa iru badoo mãikꞌaapa chi ɨ̃rá iru bɨ përe–e. Mapa wãarada aji, pɨa jara bɨ.
19Mãga ũrikꞌãri, ma wẽrapa mãgaji:
—Señor, pɨa pedee jarada kꞌaurepa mɨa kꞌawaa wãda aji, pɨ Tachi Akꞌõre pedee jarapari. 20Tai chonaarã nãgɨ́ eede ɨtꞌaa tꞌɨ̃pachidada aji. Mamĩda parã judiorãpa jarapata Jerusalende eperãarãpa ɨtꞌaa tꞌɨ̃pataadaipia bɨ.
21Mãpai Jesupa mãgaji:
—Wẽra, mɨa jararu ijã́aji. Ewari paruda aji, parãpa wãara ɨtꞌaa tꞌɨ̃pataadaitꞌee Tachi Akꞌõremaa. Mamĩda mãga ooda–e paitꞌee nãgɨ́ eede wa Jerusalende. 22Parãpa ɨtꞌaa tꞌɨ̃pata Tachi Akꞌõremaa. Mamĩda iru pia kꞌawada–e pꞌanɨ. Jõdee táipata iru pia kꞌawa pꞌanɨ, tai judiorã kꞌapꞌɨa pari irua jara pëida perã sãga eperãarã o kꞌachiadeepa kꞌaripa ataitꞌee. 23Mamĩda ewari paitꞌee mãikꞌaapa ɨ̃raweda paru wãarata ɨtꞌaa tꞌɨ̃pataarã Tachi Akꞌõremaa ɨtꞌaa tꞌɨ̃pataadaitꞌee iru Jaure kꞌapꞌɨa pari, Tachi Akꞌõre wãara kꞌawapata perã. Tachi Akꞌõrepa mãgeerã jɨrɨpari mãgá ichimaa ɨtꞌaa tꞌɨ̃pataadamerã. 24Tachi Akꞌõreta, Jaure. Pꞌaareerã irumaa ɨtꞌaa tꞌɨ̃pataadaipia bɨda aji, iru Jaure kꞌapꞌɨa pari, iru wãarata kꞌawapata perã.
25Mãpai mãgɨ́ wẽrapa mãgaji:
—Mɨa kꞌawa bɨ Mesías (ichiaba tꞌɨ̃jarapata Cristo) cheitꞌeeda aji. Iru chekꞌãri, tachimaa ne–inaa jõmaata jarateeitꞌee.
26Jesupa mãgaji:
—Mãgɨ́ mɨda aji, pɨ ome pedeemaa bɨ.
27Mãgá pedeemaa bɨde chi kꞌõpꞌãyoorã pachejida. Ãchi tꞌãridepai kꞌĩsiajida: “¿Sãapꞌeda Jesús pedeemaa bɨ jã wẽra ome?” Mamĩda apidaapa iidida–e paji ma wẽrapa kꞌãata kꞌinia baji, maa–e pɨrã kꞌãare–itꞌee iru pedeemaa baji ma wẽra ome. 28Mãpai mãgɨ́ wẽrapa ichi chokꞌo atabëipꞌeda, wãji pꞌuurudee mãikꞌaapa jaranaji eperãarãmaa:
29—¡Akꞌɨ chétɨ! Eperãpa mɨmaa nepɨrɨji ne–inaa jõma mɨa oopari. ¿Mãgɨ́ Mesia–epaama? aji.
30Mãpai eperãarã wãjida Jesumaa. 31Mãgá cherutade, Jesús kꞌõpꞌãyoorãpa enenee jõnajida nekꞌomerã:
—Tachi Jarateepari, nekꞌóji, ma–ãri pɨjida.
32Mamĩda irua mãgaji:
—Parãpa kꞌawada–e pꞌanɨda aji, chikꞌo mɨa iru bɨ kꞌoitꞌee.
33Chi kꞌõpꞌãyoorã ãchi pitapai pedeepachida:
—¿Apidaapa chikꞌo aneejida–epaama? aji.
34Mamĩda Jesupa mãgaji:
—Mɨ–itꞌee chikꞌo nãga pɨkꞌa bɨ: ooitꞌee mɨ pëidapa kꞌinia bɨkꞌa mãikꞌaapa aupaitꞌee mimia irua kꞌĩsia iru bɨ mɨ–itꞌee. 35¿Parãpa jarapata–ekꞌã? “Atane kꞌĩmari falta bɨ ne–uuda ewadaitꞌee.” ¡Akꞌɨ́tɨ parã ikꞌaawa! Unudaitꞌee ne–uuda chiwari nɨ̃bɨ. Mapa ewadaipia bɨ. 36Ne–uuda ewaparipa ma ne–uuda ewakꞌãri, o–ĩadaipari pꞌaratꞌa jitaitꞌee perã ichi mimia pari. Mãga pɨkꞌa mɨ, Tachi Akꞌõre Ũraa jarateepari, o–ĩadaipari parãpa eperãarã pꞌe atadakꞌãri mɨde ijãapataadamerã, ma kꞌaurepa ichita pꞌanapataadaitꞌee perã Tachi Akꞌõre ome. Maperã chi ne–uupari chi ne–uu ewapari ome o–ĩa para beepari. 37Nãgɨ́ pedee eperãarãpa jarapata wãara bɨ. “Abaapa uupari mãikꞌaapa awaraapa ewapari.” 38Mɨa parã pëiji ne–uu ewanadamerã, parãpa uuda–e paji mĩda. Awaraarã parã naa mimiajida eperãarãpa mɨde ijãadamerã. Maapꞌeda parãpa ãra mimia aupajida.
39Samariadepemaarã chokꞌara Jesude ijãajida mãgɨ́ Samariadepema wẽrapa jarada perã:
—Jõma mɨa ne–inaa ooda jarajida aji.
40Maperãpɨ ma Samariadepemaarã Jesumãi pachedakꞌãri, chupɨria iidijida iru ãchi ome beemerã. Mapa iru mama beeji kꞌãima omé. 41Mama bɨde chokꞌaraarãpa irua jarateeda ũridakꞌãri, ijãajida. 42Mãpai mãɨrãpa mãgɨ́ Samariadepema wẽramaa mãgajida:
—Ɨ̃rapɨ ijãada–eda ajida, pɨa taimaa nepɨrɨda kꞌaurepapai. Ichiaba ijãapata irua jarateeda ũridapꞌedaa perã. Maperãpɨ kꞌawa pꞌanɨ wãara nãgɨ́ eperã cheji na pꞌekꞌau eujãdepemaarã o kꞌachiadeepa kꞌaripa atade.
Jesupa rey mimiapataarã poro waibɨa warra jɨpada
(Mateo 8.5-13; Lucas 7.1-10)
43Kꞌãima omé wãyaapꞌeda, Jesús uchiaji Samaria eujãdeepa mãikꞌaapa wãji Galilea eujãdee. 44Ichi ome nipapatapꞌedaarãpa kꞌĩsiajida mãpemaarãpa ãchi auteebaida–e pai, ichia jarada perã Tachi Akꞌõre pedee jarapari pꞌuurudepemaarãpa iru waaweedakꞌaa. 45Mamĩda Galileade panadakꞌãri, ma eujãdepemaarãpa iru auteebaijida. Mãɨrãpa irua ooda Jerusalende unujida, mama pꞌanadapꞌedaa perã Pascua fiesta oodaitꞌee.
46Jesús waya cheji Caná pꞌuurudee, ichia pania vino papidamãi. Maapai Capernaum pꞌuurude bapachi rey mimiapataarã poro waibɨa. Mãgɨ́ warra kꞌayaa baji. 47Mãgɨpa kꞌawaa atakꞌãri Jesús cheda Judea eujãdeepa Galileadee, wãji iru akꞌɨde mãikꞌaapa chupɨria iidiji wãmerã ichi temaa ichi warra jɨpade, chi warra juakꞌaya bada perã. 48Mãga ũrikꞌãri, Jesupa mãgaji:
—Parãpa unuda–e pɨrã mɨa ooru ne–inaa eperãarãpa pꞌoyaa oodakꞌaa ãchi juadoopa, mɨde ijãadakꞌaa paitꞌeeda aji.
49Mamĩda mãgɨ́ poro waibɨapa mãgaji:
—Tachi Waibɨa, chepáde aji, mɨ warra jai–idaai naaweda.
50Mãpai Jesupa mãgaji:
—Wãpáde aji, pɨchi temaa. Pɨ warra jɨpa beeitꞌeeda aji.
Ma eperãpa Jesupa jarada ijãaji mãikꞌaapa wãji. 51Ichi temaa wãrude, ichi mimiapataarãpa unu chejida mãikꞌaapa mãgajida:
—Pɨ warra jɨpa beejida ajida.
52Ichia iidikꞌãri chisãgɨ́ horade jɨpa beeji, pꞌanaujida:
—Nuweda la una kꞌɨamia tuu beejida ajida.
53Chi akꞌõrepa kꞌawaji mãgɨ́ hora paji Jesupa jarakꞌãri: “Pɨ warra jɨpa beeitꞌee.” Mapa ichia mãikꞌaapa ichi te pidaarãpa Jesude ijãajida.
54Ma cheda omeede Judea eujãdeepa Galilea eujãdee, Jesupa ichiaba ooji ne–inaa eperãarãpa pꞌoyaa oodakꞌaa ãchi juadoopa.
Currently Selected:
Juan 4: sjaB
Highlight
Share
Copy
Want to have your highlights saved across all your devices? Sign up or sign in
©2005, 2010, 2015 Wycliffe Bible Translators, Inc. All rights reserved.