Juan 3
3
Jesús Nicodemo ome
1Bapachi fariseo tꞌɨ̃jarapatapꞌedaa Nicodemo. Judiorã poro waibɨarãdepema paji. 2Pꞌãrikꞌua mãgɨ́ eperã Jesumaa pꞌasiade wãji mãikꞌaapa mãgaji:
—Tachi Jarateepari, kꞌawa pꞌanɨda aji, Tachi Akꞌõrépata pɨ pëida taimaa jarateede. Pɨa pꞌoyaa oo–e pakꞌajida aji, nãgee ne–inaa pia pɨa ooparikꞌa, Tachi Akꞌõre pɨ ome ba–e pada paara.
3Jesupa mãgaji:
—Mɨa wãarata jararu. Eperã waya tꞌo–e pɨrã, pꞌoyaa ba–e pai Tachi Akꞌõre jua ekꞌari ichideerã ome.
4Mãpai Nicodemopa iidiji:
—Mamĩda ¿sãga waya tꞌoyama aji, eperã chona bɨta? ¡Pꞌoyaa tꞌĩukꞌaa chi nawe bide waya tꞌoitꞌee!
5Jesupa pꞌanauji:
—Mɨa wãarata jararu. Eperã paniapa tꞌo–e pɨrã mãikꞌaapa Tachi Akꞌõre Jaurepa tꞌopi–e pɨrã, pꞌoyaa ba–e pai Akꞌõre jua ekꞌari ichideerã ome. 6Eperãdeepa uchiapari eperã. Mamĩda Tachi Akꞌõre Jauredeepa uchiapari Tachi Akꞌõredeerã. 7Pꞌera pɨkꞌa banáaji mɨa jarada perã eperãarã waya tꞌodaipia bɨ. 8Nãu pꞌuapari chi pꞌua kꞌiniamaa. Pɨa ma nãu ũriru mĩda, kꞌawakꞌaa sãmãikꞌaapa cheru wa sãmaa wã. Mãga pɨkꞌa bɨ ichiaba eperã Tachi Akꞌõre Jaurepa tꞌopida.
9Mãpai Nicodemopa waya iidiji:
—Mamĩda ¿sãga mãga payama? aji.
10Jesupa pꞌanauji:
—Pɨ Israeldeepa uchiadapꞌedaarã jarateepari. ¿Kꞌawa–e bɨkꞌã aji, mɨa jara bɨ? 11Mɨa wãarata jararu. Taipa jarapata ne–inaa kꞌawa pꞌanɨ mãikꞌaapa unudapꞌedaa. Mamĩda parãpa ijãadakꞌaa taipa jarapata. 12Parãpa ijãada–e pꞌanɨ pɨrã mɨa na eujãdepema ne–inaa jarakꞌãri, ¿sãga ijãadayama aji, mɨa ɨtꞌaripema ne–inaa jarakꞌãri?
13ʼApida Akꞌõre eujãdee wãda–e pꞌanɨ. Jõdee aba, chi Eperã Akꞌõre Truadepema, Akꞌõre eujãdeepa cheji. 14Moisés eujã pania wẽe bɨde Israel pidaarã ome nipakꞌãri, taama broncedee ooda pakꞌurude jiraji eperãarãpa mãgɨ́ akꞌɨdamerã. Mãgá piuda–e paji. Mãga pɨkꞌa ichiaba chi Eperã Akꞌõre Truadepema pakꞌurude ichita jiradaitꞌee 15eperãarãpa iru akꞌɨdamerã. Mãgá jõmaarãpa irude ijãapata ichita iru ome ɨtꞌari pꞌanapataadaitꞌee.
Tachi Akꞌõrepa eperãarã jõmaweda kꞌinia iru bapari
16—Tachi Akꞌõrepa na pꞌekꞌau eujãdepemaarã audú kꞌinia iru bada perã, ichi warra apai iru bada pëiji piumerã eperãarã pari. Eperãpa iru Warrade ijãa bɨ pɨrã, atua–e. Jai–idaakꞌãri, Akꞌõre eujãde banaitꞌee. 17Tachi Akꞌõrepa ichi Warra pëi–e paji na pꞌekꞌau eujãdepemaarã atuapiitꞌee. Jĩpꞌa pëiji eperãarã o kꞌachiade wãdapꞌedaadeepa kꞌaripa atade atuanaadamerã.
18ʼMapa Tachi Akꞌõrepa atuapi–e ichi Warrade ijãa bɨ. Mamĩda atuapiitꞌee chi ijãa–ee bɨ, mãgɨpa ijãakꞌaa perã Tachi Akꞌõre Warra apai iru badade. 19Chi ɨ̃daa pɨkꞌa bɨ cheji na pꞌekꞌau eujãdee. Mamĩda eperãarã ũkꞌuruurãpa ma ɨ̃daa pɨkꞌa bɨ kꞌiniadakꞌaa paji, pꞌãriu pɨkꞌa bɨde pꞌanee kꞌinia pꞌanadapꞌedaa perã ne–inaa kꞌachia oodaitꞌee. 20Chi kꞌachia ooyaa beerãpa ma ɨ̃daa pɨkꞌa bɨ unuamaa iru pꞌanapata. Iru kꞌawa kꞌiniadakꞌaa. Mãga pꞌanɨ kꞌiniadakꞌaa perã irua unupimerã ãchia ne–inaa kꞌachia oopata. 21Jõdee chi oopataarãpa Tachi Akꞌõrepa wãarata jara pëidakꞌa, ma ɨ̃daa pɨkꞌa bɨ kꞌawa kꞌinia pꞌanapata. Mãga pꞌanapata jõmaarãmaa kꞌawapi kꞌinia pꞌanadairã ãchia ne–inaa pia oo pꞌanɨ Tachi Akꞌõrepa oopiparikꞌa.
Juan Bautistapa waya Jesude jarada
22Ma tꞌẽepai, Jesús chi kꞌõpꞌãyoorã ome wãjida Judea eujãdee. Mama taarãji ãchi ome, ãchia eperãarã poro choodamerã. 23Juanpa ichiaba eperãarã poro choomaa baji Enonde, Salim kꞌaitꞌa, mama paniara paraada perã. Mama eperãarã chepachida poro choopidaitꞌee. 24(Mãga paji Herodepa Juan carcelde tꞌɨpitꞌaai naaweda.)
25Ewari aba Juan kꞌõpꞌãyoorã aupedeemaa pꞌaneejida awaraa judío ome, eperãarã poro choopata kꞌapꞌɨa. 26Juanmaa chejida mãikꞌaapa mãgajida:
—Tachi Jarateepari, ma eperã pɨ ome bada Jordán to kꞌĩraikꞌa eere mãikꞌaapa pɨa jarada taimaa, mãgɨpa eperãarã poro choomaa bɨda ajida. Ma awara jõmaarãta irumaa wã pꞌanɨ poro choopide.
27Mãpai Juanpa pꞌanauji:
—Apidaapa mãgee ne–inaa ooda–e pakꞌajida aji, Tachi Akꞌõrepa oopi–e pada paara. 28Pãchia pia ũrijida mɨa jarakꞌãri mɨ Tachi Akꞌõrepa pëida–e eperãarã rey pamerã. Iru pëi naaweda, Tachi Akꞌõrepa mɨ pëiji. 29Kꞌĩsiadáma nãgɨde. Miakꞌãidakꞌãri, wẽra chi ɨmɨkꞌĩra wẽra paru. Mamĩda ma ɨmɨkꞌĩra kꞌõpꞌãyo kꞌaitꞌa bainɨ̃ beepari mãikꞌaapa o–ĩadaipari ũrikꞌãri ma ɨmɨkꞌĩrapa jararu chi wẽramaa. Mãga pɨkꞌa mɨ ma poro choomaa bɨ kꞌõpꞌãyokꞌa bɨ. Maperãpɨ mɨ o–ĩa bɨ. 30Iru mɨ kꞌãyaara waibɨara paitꞌee eperãarã kꞌĩrapite. Jõdee mɨ iru ekꞌariara paitꞌee.
Juan Bautistapa eperã ɨtꞌariipa chedade jarada
31—Eperã ɨtꞌariipa cheda jõmaarã kꞌãyaara waibɨara bɨ. Eperã na pꞌekꞌau eujãdepema na eujãde bapari perã, ichita jarapari na eujãdepema ne–inaa. Jõdee chi ɨtꞌariipa cheda jõmaarã kꞌãyaara waibɨara bɨ. 32Irua jarapari ichia unuda mãikꞌaapa ũrida ɨtꞌari, apidaapa ijãa kꞌiniada–e pꞌanɨ pɨjida irua jara bɨ. 33Mamĩda eperãpa irua jara bɨ ijãakꞌãri, kꞌawa bɨ Tachi Akꞌõrepa ichita wãarata jarapari. 34Tachi Akꞌõrepa pëidapa jarapari Tachi Akꞌõre pedee, Akꞌõrepa ichi Jaure pëipari perã iru ome bapariimerã. 35Tachi Akꞌõrepa ichi Warra kꞌinia iru bapari. Ne–inaa jõmaweda iru jua ekꞌari bɨji irua akꞌɨmerã. 36Eperãpa iru Warrade wãara ijãakꞌãri, ichita bapariitꞌee Tachi Akꞌõre ome. Mamĩda eperãpa iru Warrade ijãa kꞌinia–e bɨ pɨrã, Akꞌõre trua unu–e paitꞌee. Tachi Akꞌõre ichita kꞌĩrau baitꞌeeda aji, mãgɨ́ eperã ome.
Currently Selected:
Juan 3: sjaB
Highlight
Share
Copy
Want to have your highlights saved across all your devices? Sign up or sign in
©2005, 2010, 2015 Wycliffe Bible Translators, Inc. All rights reserved.