Juan 21
21
Jesupa chi kꞌõpꞌãyoorã ũkꞌuruurãmaa unupida
1Ma tꞌẽepai Jesupa ichi waya unupiji chi kꞌõpꞌãyoorãmaa, Tiberias Lago ikꞌaawa. Nãga paji. 2Ma lago ikꞌaawa pꞌanajida Simón Pedro; Tomás ichiaba tꞌɨ̃jarapatapꞌedaa Me–iso; Natanael, Caná pꞌuurudepema Galilea eujãde bɨ; Zebedeo warrarã omé mãikꞌaapa Jesús kꞌõpꞌãyoorã awaraarã omé. 3Mama pꞌanɨde Simón Pedropa mãgaji:
—Mɨ to–ɨanaitꞌeeda aji.
Apemaarãpa pꞌanaujida:
—Tai jida wãdaitꞌeeda ajida, pɨ ome.
Mãgá wãjida mãikꞌaapa barcode bataukꞌoodachida. Mamĩda ma ewate pꞌãrikꞌua maarepida peeda–e paji. 4Taujaaweda unujida Jesús bainɨ̃ bɨ lago ide. Mamĩda iru kꞌawada–e paji. 5Mãpai Jesupa iidiji:
—Warrarã, ¿Peeda–ekꞌã? aji.
Ãchia pꞌanaujida:
—Maarepida peeda–eda ajida.
6Mãpai Jesupa mãgaji:
—Barco juaraare tꞌɨrɨ tꞌaadapáde aji. Mãgara peedayada aji.
Irua jaradakꞌa oodakꞌãri, ma tꞌɨrɨ pꞌoyaa jirada–e paji chikꞌo chɨkꞌɨapa. 7Mãpai mɨ, chi kꞌõpꞌãyo Jesupa audú kꞌinia iru badapa Pedromaa mãgaji:
—¡Jãgɨ́ Tachi Waibɨa!
Simón Pedropa “Tachi Waibɨa” ũriruta, ichi ɨ̃rɨpema pꞌaru jɨ̃ beeji, ma pꞌaru ẽrapachi perã ma mimia ookꞌãri. Mãpai toidú jɨ̃tɨdachi. 8Jõdee chi apemaarã kꞌõpꞌãyoorã barcode chejida. Tꞌɨrɨ jidiu aneejida chikꞌo ome, makꞌɨara tꞌɨmɨa–e bada perã lago ideepa; cien metropai baji. 9Ipude bataudakꞌãri, unujida okꞌokꞌĩra urua nɨ̃bɨ chikꞌo ome mãikꞌaapa pan. 10Mãpai Jesupa mãgaji:
—Chikꞌo ũkꞌuru anéetɨ parãpa etꞌewa peedapꞌedaadepema.
11Simón Pedro barcode bataudaipꞌeda, tꞌɨrɨ ipu idee jidiu aneeji. Aɨde ciento cincuenta y tres chikꞌo waibɨa bee pꞌaneejida. Mamĩda ma tꞌɨrɨ jẽ–e paji. 12Jesupa mãgaji:
—Nekꞌo chétɨ.
Chi kꞌõpꞌãyoorã apidaapa iididakꞌaa paji kꞌaita iru, Jesuta kꞌawa pꞌanadapꞌedaa perã. 13Mãpai Jesús ãra kꞌaitꞌaara cheji. Ma pan chikꞌo paada ome atapꞌeda, ãramaa jedetꞌaaji.
14Ma Jesupa unupida õpee paji chi kꞌõpꞌãyoorãmaa, iru chokꞌai pꞌirabaida tꞌẽepai.
Jesupa Simón Pedromaa iidida
15Nekꞌodapꞌedaa tꞌẽepai, Jesupa Simón Pedromaa iidiji:
—Simón, Juan warra, ¿pɨa mɨ kꞌinia iru baparikꞌã aji, apemaarãpa mɨ kꞌinia iru pꞌanapata kꞌãyaara?
Pedropa pꞌanauji:
—Tachi Waibɨa, pɨata kꞌawa bɨ. Mɨa pɨ kꞌinia iru bɨ.
Mãpai Jesupa mãgaji:
—Ewaa ijãa pꞌanɨɨrã akꞌɨpariipáde aji, oveja akꞌɨparipa oveja chakꞌeerã akꞌɨparikꞌa.
16Jesupa waya iidiji:
—Simón, Juan warra, ¿pɨa mɨ kꞌinia iru baparikꞌã? aji.
Pedropa pꞌanauji:
—Tachi Waibɨa, pɨata kꞌawa bɨ. Mɨa pɨ kꞌinia iru bɨ.
Jesupa mãgaji:
—Mɨde ijãapataarã akꞌɨpariipáde aji, oveja akꞌɨparipa ovejaarã akꞌɨparikꞌa.
17Waya iidida õpee iidiji:
—Simón, Juan warra, ¿pɨa mɨ kꞌinia iru bɨkꞌã? aji.
Pedro kꞌĩra pia–ee baji Jesupa iidida õpee mãgá iidida perã. Pꞌanauji:
—Tachi Waibɨa, pɨa jõma kꞌawa bɨ. Kꞌawa bɨda aji, mɨa pɨ kꞌinia iru bɨ.
Jesupa mãgaji:
—Mɨde ijãapataarã akꞌɨpariipáde aji, oveja akꞌɨparipa ichi ovejaarã akꞌɨparikꞌa. 18Mɨa wãarata jararu. Pɨ kꞌũtrãa bakꞌãri mãikꞌaapa ãyaa wãitꞌee pakꞌãri, pɨchi pꞌaru pɨchi juadoopa jɨ̃ beepachi. Mamĩda pɨ chonaa pakꞌãri, pɨchi jua eratɨitꞌee mãikꞌaapa awaraapa pɨ pꞌaru jɨ̃ bɨitꞌee, maapꞌeda pɨ ateeitꞌee pɨ wã kꞌinia–e bɨmaa.
19Jesupa mãga jarakꞌãri, jara kꞌinia baji sãgá Pedro piutꞌee paji, mãga pꞌasakꞌãri, eperãarãpa jaradamerã Tachi Akꞌõre jõmaarã kꞌãyaara waibɨara bɨ. Mãga jarapꞌeda, Jesupa Pedromaa mãgaji:
—Mãga pꞌasaitꞌee mĩda, mɨde ijãaparíiji.#21.19 Griego pedeede: Mɨ ome nipaparíiji.
Jesús kꞌõpꞌãyo kꞌinia iru bada
20Ãpɨtee akꞌɨkꞌãri, Pedropa unuji mɨ, chi kꞌõpꞌãyo Jesupa audú kꞌinia iru bada. (Pascua chikꞌo kꞌodakꞌãri, mɨ Jesús ikꞌaawa baji iru kꞌõpꞌãyoorã ome. Mɨ paji chi iidida: “Tachi Waibɨa, ¿kꞌáipapɨ pɨ traicionaaitꞌeema?” ada.)#21.20 Jn 13.25. 21Pedropa mɨ unukꞌãri, Jesumaa iidiji:
—Tachi Waibɨa, ¿kꞌãata pꞌasaitꞌeema aji, iru ome?
22Jesupa pꞌanauji:
—Mɨa kꞌinia bɨ pɨrã iru chokꞌai bamerã mɨ waya cherumaa, pɨ–itꞌee pꞌua–e bɨda aji. Mɨde ijãaparíiji.
23Jesupa mãga jarada perã irude ijãapataarãpa kꞌĩsiapachida mãgɨ́ kꞌõpꞌãyo piu–e paitꞌee. Mamĩda Jesupa mãga jara–e paji. Jĩpꞌa jaraji: “Mɨa kꞌinia bɨ pɨrã iru bamerã mɨ waya cherumaa, pɨ–itꞌee pꞌua–e bɨda” aji.
24Mãgɨ́ “kꞌõpꞌãyo” etꞌewa jarada mɨ, Juanpa nãgɨ́ pedee nepɨrɨmaa bɨ parãmaa. Na jõma mɨa pꞌãji. Mapa kꞌawa pꞌanɨ jõma nepɨrɨda na pꞌãdade wãara.
25Jesús na pꞌekꞌau eujãde bakꞌãri, awaraa ne–inaa chokꞌara oopachi. Ma ne–inaa jõma aba–abaa pꞌãdapꞌedaa paara, mɨa kꞌĩsia bɨ ma pꞌãda jõmaweda araa–e pakꞌaji na eujãde.
Currently Selected:
Juan 21: sjaB
Highlight
Share
Copy
Want to have your highlights saved across all your devices? Sign up or sign in
©2005, 2010, 2015 Wycliffe Bible Translators, Inc. All rights reserved.