Juan 16
16
1ʼMɨa ma jõma jaraji parãpa mɨde ijãapataadamerã. 2Tachi Akꞌõre Ũraa jarateepata tedeepa parã jëretꞌaapataadaitꞌeeda aji. Ma awara parã peetꞌaadaitꞌeeda aji. Mãga oodakꞌãri, ãchia kꞌĩsiadaitꞌee mãgata pia oomaa pꞌanɨ Tachi Akꞌõre–itꞌee. 3Mãga oodaitꞌee mɨ, mɨ Akꞌõre ome wãara kꞌawada–e pꞌanadairã. 4Mapa ma jõma jaraji parãmaa, mãga pꞌasakꞌãri, kꞌirãpadamerã. Naaweda mãga jara–e paji, parã ome bada perã.
Tachi Akꞌõre Jaurepa oo bɨ
5—Ɨ̃rá mɨ wãitꞌee mɨ pëida baparimaa. Mamĩda parãdepema apidaapa iidida–e pꞌanɨ mɨ sãmaa wãitꞌee. 6Ma kꞌãyaara parã kꞌĩra pia–ee pꞌanɨ, mɨa mãga jarada perã. 7Mɨa wãarata jararu. Parã–itꞌee piara bɨ mɨ wãmerã. Mɨ wã–e pɨrã, Akꞌõre Jaure, Tachi Kꞌaripapari, che–e paitꞌee parã ome bapariitꞌee. Mamĩda mɨ wãru pɨrã, mɨa iru pëiitꞌee parãmaa. 8Iru chekꞌãri, na pꞌekꞌau eujãdepemaarãmaa kꞌawapiitꞌee ãchia pꞌekꞌau kꞌachia oopata. Ichiaba ãchimaa kꞌawapiitꞌee Tachi Akꞌõredeerãpa ne–inaa pia oopata irua kꞌinia bɨkꞌa. Ma awara kꞌawapiitꞌee Tachi Akꞌõre ewari waibɨa ewate ichia akꞌɨitꞌee eperãarãpa oopata jaraitꞌee pia wa kꞌachia. 9Kꞌawapiitꞌee eperãarãpa mɨde ijãada–e pꞌanadakꞌãri, kꞌachia oomaa pꞌanɨ. 10Kꞌawapiitꞌee mɨa oopachi Tachi Akꞌõrepa kꞌinia bɨkꞌa, mɨ irumaa wãru perã. Mãga ookꞌãri, parãpa mɨ waa unuda–e paitꞌee. 11Kꞌawapiitꞌee Tachi Akꞌõrepa pia akꞌɨ–e na pꞌekꞌau eujãdepemaarã poro waibɨapa oo bɨ. Mapa iru, iru eere pꞌanɨɨrã ome miapiitꞌee.
12ʼMɨa kꞌĩsia chokꞌara iru bɨda aji, parãmaa jaraitꞌee. Mamĩda ɨ̃rá waa jara–e, parãpa ma jõma kꞌirãpada–e pai perã. 13Mamĩda Akꞌõre Jaure chekꞌãri, ne–inaa wãarata jõma kꞌawapiitꞌee parãmaa, ichia wãara aupaita jarapari perã. Ichi kꞌĩsiadoopa pedee–e paitꞌee. Tachi Akꞌõrepa jara bɨ ũripꞌeda, mãga jarapariitꞌee mãikꞌaapa jarapariitꞌee ne–inaa waide pꞌasa–e bɨ. 14Akꞌɨpiitꞌee mɨ apemaarã kꞌãyaara waibɨara bɨ, mɨa ne–inaa kꞌawa bɨ parãmaa kꞌawapikꞌãri. 15Jõma mɨ Akꞌõrepa kꞌawa bɨ mɨa pida kꞌawa bɨ. Maperãpɨ mɨa jaraji Akꞌõre Jaurepa kꞌawapiitꞌee jõma mɨa ne–inaa kꞌawapi kꞌinia bɨ parãmaa.
16ʼNa ewari mɨ waa unuda–e paitꞌee. Mamĩda aɨ tꞌẽepai taarãpai waya unudaitꞌeeda aji.
Kꞌĩra pia–ee pꞌanadapꞌeda, tꞌãri o–ĩa pꞌaneedaitꞌee
17Mãga ũridakꞌãri, chi kꞌõpꞌãyoorã ũkꞌuru ãchi pitapai pedee para beeji:
—¿Kꞌãata jara kꞌinia bɨma, ajida, na pedee: “Na ewari mɨ unuda–e paitꞌee, mamĩda aɨ tꞌẽepai waya unudaitꞌee”? ¿Ichiaba kꞌãata jara kꞌinia bɨma nãgɨ́ pedee: “mɨ Akꞌõremaa wãru perã”? 18¿Kꞌãata jara kꞌinia bɨma na pedee: “taarãpai”? Kꞌawada–e pꞌanɨda ajida, irua kꞌãata jara kꞌinia bɨ.
19Jesupa kꞌawaji chi kꞌõpꞌãyoorãpa kꞌãata iidi kꞌinia pꞌanɨ. Mapa mãgaji:
—Mɨa jarajida aji, na ewari parumaa mɨ waa unuda–e paitꞌee, mamĩda aɨ tꞌẽepai waya unudaitꞌee. ¿Mata parãpa iidi para bɨ–ekꞌã? aji. 20Mɨa wãarata jararu. Parã jarajẽedaitꞌee mãikꞌaapa tꞌãri pꞌua pꞌaneedaitꞌee. Jõdee na pꞌekꞌau eujãdepema ijãadakꞌaarã o–ĩa pꞌaneedaitꞌee. Mamĩda parã kꞌĩra pia–ee pꞌanadapꞌeda, o–ĩa pꞌaneedayada aji. 21Kꞌĩsiadáma nãgɨde. Wẽra warra tꞌoitꞌee pakꞌãri, pꞌua nɨ̃beepari, tꞌoitꞌee perã. Mamĩda chi warra tꞌo atakꞌãri, kꞌĩra atuadaipari pꞌua nɨ̃bada mãikꞌaapa o–ĩa nɨ̃beepari warra chai tꞌo atada perã. 22Mãga pɨkꞌa bɨ parã ome. Ɨ̃rá parã kꞌĩra pia–ee pꞌanɨ mɨ wãru perã. Mamĩda mɨa parã waya unuitꞌee. Maapai parã tꞌãri o–ĩa pꞌaneedakꞌãri, apidaapa ma o–ĩa wẽpapida–e paitꞌee.
23ʼMaapai parãpa mɨmaa maarepida iidida–e paitꞌee. Mɨa wãarata jararu. Mɨ tꞌɨ̃de mɨ Akꞌõremaa ne–inaa iidiruta pɨrã, irua parãpa iidi pꞌanɨ teepariitꞌee, mɨchideerã perã. 24Waide mɨ tꞌɨ̃de parãpa maarepida ɨtꞌaa iidida–e pꞌanɨ. Iidítɨ mɨ Akꞌõrepa teemerã parãpa iidi pꞌanɨ. Mãgá parã wãara tꞌãri o–ĩa pꞌanapataadaitꞌee.
25ʼMa etꞌewa jarada mɨa imeraa pɨkꞌa jarateeji. Mapa parãpa pia kꞌawada–e paji. Mamĩda na ewari mãgá jaratee–e paitꞌeeda aji. Jĩpꞌa pedeeitꞌee Akꞌõre netꞌaa pia kꞌawaadamerã. 26Maapai parãpa mɨ tꞌɨ̃de ɨtꞌaa iididaitꞌee, mɨchideerã perã. Mapa mɨa jara–e chupɨria iidiitꞌee parã pari Tachi Akꞌõremaa. 27Akꞌõrépata parã kꞌinia iru bapari parãpa mɨ kꞌinia iru pꞌanapata perã mãikꞌaapa ijãapata perã mɨ wãara cheji iru baparimãiipa. 28Cheji na pꞌekꞌau eujãdee eperã jĩpꞌaakꞌa bapariitꞌee. Ɨ̃rá jõdee na pꞌekꞌau eujã atabëiitꞌeeda aji, mãikꞌaapa waya irumaa wãitꞌee.
29Mãpai chi kꞌõpꞌãyoorãpa mãgajida:
—Ɨ̃rapɨ jĩpꞌa pedee bɨda ajida. Imeraa pɨkꞌa jaratee–e bɨda ajida. 30Ɨ̃rapɨ kꞌawa pꞌanɨ pɨa ne–inaa jõmaata kꞌawa bɨ. Apidaapa pɨmaa iidida–e paitꞌee, taipa iididai naaweda, pɨa kꞌawa bairã taipa iidi kꞌinia pꞌanɨ. Mapa ijãa pꞌanɨda ajida, pɨ wãara cheji Tachi Akꞌõre baparimãiipa.
31Jesupa pꞌanauji:
—¿Mãgara ɨ̃rá wãara ijãa pꞌanɨkꞌã? aji. 32Ewari kꞌaitꞌa pa wã, parã jĩchoodaitꞌee pãchi te chaa mãikꞌaapa mɨ ituaba atabëidaitꞌee. Mamĩda wãara mɨ ituaba bɨ–eda aji, mɨ Akꞌõre mɨ ome bairã. 33Ma jõma jaraji parã tꞌãridepai choodamerã mɨde ijãa pꞌanɨde mãikꞌaapa parã kꞌãiwee pꞌanapataadamerã. Na pꞌekꞌau eujãde pꞌanɨ misa, nepɨrade baaidaitꞌee parã jɨrɨdaitꞌee perã. Mamĩda sõcharra pꞌanapatáatɨ. Mɨata na pꞌekꞌau eujãdepema ijãadakꞌaa beerã ãchi poro waibɨa ome pꞌoyaajida aji.
Currently Selected:
Juan 16: sjaB
Highlight
Share
Copy
Want to have your highlights saved across all your devices? Sign up or sign in
©2005, 2010, 2015 Wycliffe Bible Translators, Inc. All rights reserved.